প্রধান মন্ত্রী শ্রী নরেন্দ্র মোদীনা, ওগস্ত ২৮, ২০২২দা শন্দোকখিবা ‘মন কী বাত’কী ৯২শুবা ইদিসন্দা, মীয়াম পুনশিনবদা অজাদি কা অমৃৎ মহোৎসব অমসুং হর ঘর তিরঙ্গানা লৌখিবা থৌদাং শিংথাখ্রে‍। হায়রিবা কেম্পেনশিং অসিদা এক ভারত স্রেস্থ ভারতকী ৱাখল্লোনগী মমি তারি‍।

মন কী বাতকী ৱারোলদা, পি.এম.না অমৃৎ মহোৎসব অমসুং নীতম্বা নুমিৎকী অখন্নবা থৌরমদা ঐখোয়না লৈবাকসিগী অপুনবগী পাঙ্গল উখ্রে হায়না ফোঙদোকখি‍। ৱাখল তারকপগী মমি উখি‍। চাউরবা, খেন্নবা কয়ানা থল্লবা লৈবাকসিদা মচু অহুমগী ফিরাল চিংখৎপদা মীপুম খুদিংমক্না চপ চান্নবা ৱাখল্লোন্দা চৎমিন্নবগী শক্তম উখি‍। মীয়াম্না মাঙদা থোরক্তুনা মচু অহুমগী ফিরালগী চাউথোকচনিংঙাই ওইরবা মশকপু ঙাকখি‍। ঐখোয়না লৈবাকসিগী ৱাখল্লোন লু-নানগী কেম্পেন অমসুং তিকা থাবগী কেম্পেন্দসু উখ্রে‍। হায়রিবা মরৈবাক নীংবগী ৱাখল্লোন অদুমক অমৃৎ মহোৎসবতা উখি‍। ঐখোয়গী লান্মীশিংনা অৱাংবা চীংদোন্দা, লৈবাকসিগী ঙমখৈদা, অমদি সমুদ্রগী ময়ায়দা মচু অহুমগী ফিরাল চিংখৎখি‍।

অমৃৎ মহোৎসবকী মতাঙদা পল্লদুনা, মরূপশিং অমৃৎ মহোৎসবকী মচুশিং অসি ভারতখক্তদা উখিবতা নত্তনা মালেমগী অতৈ লৈবাকশিংদসু উবা ফংখি হায়না পি.এম. মোদীনা মখা তানা ফোঙদোকখি‍। বোৎস্বানাদা লৈবা লমদমদুগী শৈশকপশিংনা ভারতকী নীংতম্বগী ৭৫শুবা চহিবু হরাও তয়াম্না পাঙথোকপা ওইনা লৈবাক নিংবা ঈশৈ ৭৫ শকখি‍। মসিদা হেন্না মশক থোক্লিবদি হায়রিবা ঈশৈ ৭৫ অসি হিন্দী, পঞ্জাবী, গুজরাতি, বঙ্গলা, অসামিজ, তামিল, তেলুগু, কন্নারা অমসুং সংস্কৃৎ লোন্দা শকখিবদুনি‍। মতৌ অসুম্না, নামিবিয়াদা, ইন্দো-নামিবিয়ন কল্চরেল-ত্রেদিস্নেলগী ওইবা মরি উত্তুনা অখন্নবা স্তাম্প অমা ফোঙখি‍।

প্রধান মন্ত্রীনা মীয়ামদা নীংতম লান্মীশিংগী, মরুওইনা মীয়াম্না শকখঙনবিদ্রবা হীরোশিংগী থৌদাংশিং উৎলিবা স্বরাজ সেরিএল দুরদর্শন্দা য়েংননবা ৱাফম থমখি‍। “মসি লৈবাকসিগী নহারোলশিংদা নীংতম লালহৌদা শরুক য়াখিবা মীয়াম্না শকখঙনবিদ্রবা হীরোশিংগী থৌদাংশিং খঙহন্নবা অফবা থৌরাং অমনি,” হায়না মহাক্না হায়খি‍। ওগস্ত ১৫দা নীংতম নুমিৎকী থৌরম পাঙথোক্নবগীদমক তোঙান তোঙানবা লনাই মীওইশিংনা লৈবাক্কী তোঙান তোঙানবা মফমশিংদা লৌখিবা থৌদাংশিংবুসু মোদীনা শিংথাখি‍।

পি.এম. শ্রী নরেন্দ্র মোদীনা এক ভারত স্রেস্থ ভারতবু লমদমসিগী চাউথোকচনিংঙাই ওইরবা ৱাফম্নি হায়না তোঙান তোঙানবা মন কী বাতকী তাঙ্ককশিংদা শিংথাখি‍।

****