প্রধান মন্ত্রী শ্রী নরেন্দ্র মোদীগী লুচিং মখাদা ভারত অসি মপাঙ্গল কনবা, থাজবা য়াবা অমসুং মশাগী ওক্নবা পুথোকচবা ঙম্বা লৈবাক অমা ওইরে অমসুং শিংনরকপা খুদিংমক থেংন্নবা মপুংফানা শেম-শারে। ৱাফম অসি ওগস্ত ৩০, ২০২২দা রাজস্থানগী উদয়পুরদা পাংথোকপদা থৌরম অমদা রক্ষা মন্ত্রী রাজনাথ সিংহনা ফোঙদোকখিবনি। মহাক্না হায়খি হৌখিবা চহি ৮ অসিদা সরকারনা পায়খৎখিবা থবকশিংনা আর্মদ ফোর্সশিংদা অনৌবা থাজবা অমা পীরে। ভারতনা কৈদৌঙৈদা অতোপ্পা লৈবাক অমতদা খুৎ থাদ্রি, লৈবাক অসিনা মপান লৈবাক্কী লম ইঞ্জি অমা ফাওবা লৌশিনখিদ্রি, অদুবু কনাগুম্বনা লৈবাক অসিগী নিংতম্বা, অপুনবগী শক্তম অমসুং ঙমখৈদা শিংনরক্লবদি মতিক চাবা পাউখুম অমা পীগনি।

শ্রী রাজনাথ সিংহনা হায়খি হৌখিবা চহি ৮ অসিনা মরম ওইদুনা ভারত মখা তানা মপাঙ্গল শোন্দ্রে। ২০১৬দা সর্জিকেল স্ত্রাইকশিং অমসুং ২০১৯দা বালাকোত এয়রস্ত্রাইকশিং পাংথোক্তুনা ঐখোয়গী আর্মদ ফোর্সশিংগী থৌনা উৎতুনা তেরোরিজমগী মায়োক্তা লৈরিবা ঐখোয়গী ফিরেপ অদু ময়েক শেংনা উৎলে। ভারত লান্মীগী থৌনা অদু অতোপ্পা লৈবাক অমদগী তাদ্রে হায়বা অদু মসিনা খুদম অমনি। ভারতকী ময়োক্তা লৈবা মীওইশিংদগী মীয়াম ঙাকথোক্নবা আর্মদ ফোর্সশিং থৌরাং তৌদুনা লৈরি।

মহাক্না মখা তানা হায়খি প্রধান মন্ত্রী শ্রী নরেন্দ্র মোদীগী লুচিং মখাদা ‘অত্মানির্ভর ভারত’কী য়ুম্ফম থোল্লে অমসুং মপাঙ্গল কল্লবা অমসুং মশাগী ওক্নবা পুথোকচরবা ‘অনৌবা ভারত’না শক্তি লৈরবা লৈবাকশিংগা শয়েং-পাম্বোম ঙানদুনা কৃক-কৃক ইন্নদুনা চৎমিন্নরি। ‘অত্মানির্ভর ভারত’ চাউখৎনবা দিফেন্স মিনিস্ত্রিনা থবক কয়া পায়খৎলে, পোৎলম ৩১০ লৈবাক অসিনা পুথোকচনবা লিস্ত অহুম শেম্লে অমসুং লৈবাক অসিগী উদোগশিংদগী পোৎ লৈনবা য়ুনিয়ন বজেত ২০২২-২৩দা কেপিতেল প্রোকিউয়রমেন্ত বজেতকী চাদা ৬৮ খাক্লে। লৈবাক অসিগী দিফেন্স ইন্দস্ত্রি চাউখৎনবা পান্দমদা ‘মেক ইন ইন্দিয়া, মেক ফোর দি ৱার্ল্দ’গী মখাদা ভারত্তা পোৎ-চৈ পুথোক্নবা মপান লৈবাকশিংগী কম্পেনিশিং পুক্নিং থৌগৎলে।

শ্রী রাজনাথ সিংহনা হায়খি সরকারনা পায়খৎলিবা থবকশিংগী মহৈ চাবা হৌবদগী ভারতনা মশাগী দরকার ওইবা পুথোকচবা খক নত্তনা অতোপ্পা লৈবাকশিংগী দরকার ওইবশিং ফংহনবা ঙম্লে। চহি ৮গী মমাঙদা লুপা কোতি ৯০০গী দিফেন্সকী পোৎলমশিং মপান্দা থাদোক্লম্বা অদু, হৌজিক লুপা কোতি ১৩,০০০ য়ৌরে। ২০৪৭ ফাওবগী মনুংদা লুপা কোতি লাখ ২.৭৫গী দিফেন্সগী পোৎলমশিং মপান্দা থাদোক্নবা পান্দম অমা থম্লি।

রক্ষা মন্ত্রীনা হায়খি লৈবাক অসিদা লৈরিবা ভারতমচাশিং খক নত্তনা মালেমগী মফম কয়াদা লৈরিবা ভারতমচাশিং অশোই-অঙাম থোক্তনবা সরকারনা থবক পায়খৎলে। রুসিয়াদা হৌজিক লৈরিবা ফিবম অসিদা উক্রেনদগী ভারতমচাশিং অশোই-অঙাম থোক্তনা হল্লক্লিবা অসি, ভারতমচা খুদিংম অশোই-অঙাম থোকহন্দনবা প্রধান মন্ত্রী শ্রী নরেন্দ্র মোদীগী ফিরেপ অদুগী খুদম্নি।

মীয়াম্না রনা সঙ্গা হায়না খঙনবা ভারতকী নিংথৌ সঙ্গম সিংহ-১গী মরিশুবা মচানুপা উদয় সিংহ-২গী ১৬শুবা চহিচা মতমগী য়োকচবী পান্না ধাইগী মীতম অমা মাইখুম হাংদোক্নবা শ্রী রাজনাথ উদয়পুরদা চৎপনি। মেৱার অমসুং লৈবাক অসিগী য়াইফনবগীদমক, মহারানা প্রতাপকী মপা, উদয় সিংহ-২ কন্নবগীদমক মহাক্না পোকচবা মচানুপা কৎথোকখিবা থৌনা ফরবগী পান্না ধাইগী মফমদা ইকায়খুম্নবা উৎলদুনা শ্রী রাজনাথনা মহাক থাগৎখি। পান্না ধাইগী মতৌ তম্নবা অমসুং লৈবাক শেমগৎপদা মখোয়গী থৌদাং লৌনবা মহাক্না মীয়ামদা তকশিনখি।

*****