প্রধানমন্ত্রীগী লোইশঙ
প্রধান মন্ত্রীনা অহমদাবাদকী সাবরমতী রিভর ফ্রন্ততা খাদী উৎসবতা শরুক য়াখ্রে
“ইচে-ইচল অমসুং ইচানুপী ৭,৫০০না পুন্না তরেংদা লং নাইদুনা পুৱারী অমা শেমখ্রে”
“নখোয়গী নখুৎশিংনা তরেংদা লাং নাইবগা লোয়ননা ভারতকী শক্তম শেম্লি”
“নীংতম ইহৌগুম্না খাদীনা চাউখৎলবা ভারত অমসুং মরোমদোম লেপচবা ঙম্বা ভারত অমগী ৱাশক থুংহন্নবগী ইথিল পীবা ঙম্মি”
“ঐখোয়না খাদী ফোর ত্রান্সফোর্মেসন হায়বা ৱাশক অসিদা খাদী ফোর নেসন অমসুং খাদী ফোর ফেশন হায়বা ৱাশকশিং অসি হাপচিনখি”
“নারী শক্তি অসি ভারতকী খাদী ইন্দস্ত্রীগী হেনগৎলক্লিবা মপাঙ্গল অসিগী মরু ওইবা কন্ত্রিব্যুতর অমা ওইরি”
“খাদী অসি সস্তেনেবল ক্লোতিং, ইকো-ফ্রেন্দলী ক্লোতিংগী খুদম অমনি অমসুং মসিগী কার্বোন ফুতপ্রিন্ত য়াম্না হন্থৈ”
“লাক্কদৌরিবা হরাও-কুহ্মৈশিংদা খাদীগী খুদোল পীবিয়ু অমসুং মসিবু চাউখৎহল্লু”
“ইমুং-মনুংশিংনা দুরদর্শন্দা ‘স্বরাজ সিরিএল’ য়েংগদবনি”
Posted On:
27 AUG 2022 7:20PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি অহমদাবাদকী সাবরমতী রিভর ফ্রন্ততা পাঙথোকপা খাদী উৎসবতা শরুক য়াখ্রে। গুজরাতকী মুখ্য মন্ত্রী, শ্রী ভুপেন্দ্র য়াদব পতেল, মেম্বর ওফ পার্লিয়ামেন্ত, শ্রী সি.আর. পতিল, রাজ্য মন্ত্রী, শ্রী হর্শ সংঘবী অমসুং শ্রী জগদিশ পঞ্চল, অহমদাবাদকী মেয়র শ্রী কিরিতভাই পামর অমসুং কে.ভি.আই.সি.গী চিয়রমেন, শ্রী মনোজ কুমারনা থৌরম অসিদা শরুক য়াখি।
থৌরম অদুদা ৱা ঙাংলদুনা প্রধান মন্ত্রীনা তরেংগা লৈনরিবা মহাক্কী মরী অদু নীংশিংখি অমসুং মহাক্না অঙাং ওইরিঙৈ মতমদা মহাক্কী মমানা তরেং শীজিন্নদুনা থবক তৌখিবা মতম অদুবু নৌহৌনা নীংশিংখি। মহাক্না হায়খি, “ঙসি নীংতম্বগী চহি ৭৫শুরকপগী থৌরম অসিদা সাবরমতী তোর্বান অসি থৌজাল ফংজরে, ইচে-ইচল অমসুং ইচানুপী ৭,৫০০না পুন্না তরেং শীজিন্নদুনা লং নাইদুনা পুৱারী অমা শেমখি”। মহাক্না মখা তারদুনা হায়খি তরেংদা লং নাইবা হায়বা অসি ঈশ্বর থৌনিবগা পাংখক ওই।
মহাক্না ঙসি শঙ্গাখিবা ‘অতল ব্রিজ’দা শীজিন্নবা তেক্নোলোজী অমসুং ফজরবা দিজাইন অসিগী মতাংদা শীংথাখি। মহাক্না হায়খি থোং অসি গুজরাতকী মীয়াম্না মতম চুপ্পদা নুংশিজবা অমসুং ইকাই খুম্নরিবা শ্রী অতল বিহারি বাজপেয়ীদা ইকাই খুম্নবা উৎপা ওইনা মঙোন্দা কত্থোকপনি। “অতল ব্রিদজ অসি সাবরমতী তুরেলগী তোর্বান অনিবু শম্নহনবা খক্তা নত্তনা মসিগী দিজাইন অমসুং ইনোভেসন অসি মমাংদা অমুক্তা উখিদ্রি। গুজরাতকী মমিং লৈরবা তেলঙ্গাগী কুহ্মৈ অসিসু মাগী দিজাইন্দা য়াওহনখি” হায়না মহাক্না ফোঙদোকখি। শ্রী মোদীনা ভারত্তা হর ঘর তিরঙ্গা কেম্পেন থৱায় য়াওনা চত্থখিবা অদুসু পনখি। মহাক্না হায়খি, মসি পালন তৌবনা লৈবাকনীংবগী ৱাখল্লোন ফাওহনবা খক্তা নত্তনা মতমগা চুনবা অমসুং চাউখৎপা ভারত অমগীদমক লৌখিবা ফিরেপ অদুসু তাক্লি। মহাক্না মখা তারদুনা হায়খি, “নখোয়গী খুৎশিংনা তরেংদা লং নাইবা মতমদা ভারতকী শক্তম শেম্লি”।
প্রধান মন্ত্রীনা হায়খি, “খাদীগী লংলা অমনা নীংতম ইহৌগী শাহৌ ওইখি, মীখা পোনবগী য়োৎলিং থৎদৎপা ঙমখিবা পুৱারীনা শাখি ওইরি”। মহাক্না মখা তারদুনা হায়খি খাদীগী চপ মান্নবা লংলা অসিনা চাউখৎপা ভারত অমগী ৱাশক থুংহন্নবা ইথিলগী হৌরকফম ওইখি অমসুং মসিনা আত্মনির্ভর ভারতকী মঙলানসু মঙফাওনহনগনি। মহাক্না হায়, “খাদীগুম্বা চৎনবীদা য়াওরক্লবা পাঙ্গল অসিনা অনৌবা পনখৈশিং তম্না ঐখোয়বু পুবা ঙমগনি”। খাদী উৎসব অসি নীংতম ইহৌগী থৌনা-লিংজেল অমসুং পুৱারী অদু অমুক হন্না হিংগৎহন্নবা অমসুং অনৌবা ভারতকী ফিরেপশিং থুংহন্নবা ইথিল লৌনবগী খোঙথাং অমনি হায়না মহাক্না মখা তাখি। গান্ধীজীনা লৈবাক অসিগী ইশানা ইশাবা ইকাই খুম্নবগী খুদম ওইহনখিবা খাদী অসি নীংতম্বা ফংলবা মতুংদা ইনফেরিওরিতী কমপ্লেক্স অমা ফাওহনখি। মসিনা মরম ওইদুনা খাদী এন্দ ভিলেজ ইন্দস্ত্রীগা খাদীগা লৈনরিবা মরী অসি মপুং ফানা মুত্থৎখি। মসিদা ওইখিবা খাদীগী ফীভম অসি মরু ওইনা গুজরাতকীদমক্তদি য়াম্না থমোয় শোক্নীংঙাই ওইখি, হায়না মহাক্না হায়খি। মহাক্না গুজরাতকী লমদমদা খাদী অমুক হন্না হিংগৎহন্নবা থবক পাইখৎপদা চাউথোকচবা পোকই হায়খি। প্রধান মন্ত্রীনা ‘খাদী ফোর ত্রান্সফোর্মেসন’দগী ‘খাদী ফোর নেসন, খাদী ফোর ফেশন’গী সরকারনা লৌখিবা ৱাশক অদু পাউদমখি। মহাক্না হায়, “ঐখোয়না গুজরাতকী মাইপাকপগী এক্সপরিয়েন্সশিং অদু লৈবাক পুম্বদা শন্দোকপা হৌখি”। লৈবাক শিনবা থুংবদা খাদীগা মরী লৈনবা সমস্যাশিং কোকহনখি। ঐখোয়না ইরৈবাকচাশিংদা খাদীগী পোৎলমশিং লৈনবা পুক্নীং থৌগৎখি। প্রধান মন্ত্রীনা খাদী হিংগৎহনবগী থৌওংদা নুপীশিংনা শরুক তমখিবা অদু শকখঙখি। “নারী শক্তি অসি ভারতকী খাদী ইন্দস্ত্রীগী হেনগৎলক্লিবা পাঙ্গল অসিগী অচৌবা কন্ত্রিব্যুতর অমসু ওইরি। ওন্তপ্রিনোরশিপকী ৱাখল্লোন অসি ঐখোয়গী ইচে-ইচল অমসুং ইচানুপীশিংদা য়াওজরক্লি। মসিগী খুদম অসি গুজরাত্তা লৈরিবা সখি মন্দলশিং পাকথোক-চাউথোরকপা অসিনি” হায়না মহাক্না মখা তাখি। মহাক্না হায় হৌখিবা চহি ৮ অসিদা খাদী য়োনবদা শরুক মরি হেনগৎলকখি অমসুং অহানবা ওইনা খাদী অমসুং গ্রামোদ্যোগকী তর্নওভর অসি করোর লাখ অমা হেনখি। সেক্তর অসিনা অনৌবা থবক করোর ১.৭৫ পীবা ঙমখি। মহাক্না হায়খি মুদ্রা য়োজনাগুম্বা ফাইনান্সিএল ইনক্লুজন স্কিমশিংনা ওন্তপ্রিনোরশিপতা শাহৌ পীরি।
খাদীগী কান্নবশিংগী মতাংদা ফোঙদোক্লদুনা প্রধান মন্ত্রীনা হায়খি মসি সস্তেনেবল ক্লোতিং, ইকো-ফ্রেদলী ক্লোতিংগী খুদম অমনি অমসুং মসিদা কার্বোন ফুতপ্রিন্ত য়াম্না হন্থৈ। তেম্পরেচর ৱাংবা লৈবাক কয়া লৈ, হকশেলগী মীৎয়েংদগী য়েংবদা খাদী অসি য়াম্না মরু ওই। মরম অসিনা মালেমগী থাক্তা খাদীনা অচৌবা থৌদাং অমা লৌবা ঙমগনি। মহাক্না হায়খি মসি মালেমগী থাক্তা লাক্লিবা বেক তু বেসি অমসুং সস্তেনেবল লিবিংগী চৎনবী অসিগা চুনরি।
প্রধান মন্ত্রীনা লৈবাক অসিগী মীয়ামদা লাক্কদৌরিবা হরাও-কুহ্মৈশিং অসিদা খাদী ভিলেজ ইন্দস্ত্রীশিংনা পুথোকপা পোৎলমশিং খক্তমক খুদোল ওইনা পীননবা অপীল তৌখি। প্রধান মন্ত্রীনা হায়, “অদোম্না তোঙান-তোঙানবা ফী মখলশিংদগী পুথোকপা ফিরোলশিং লৈরম্বা য়াই অদুবু করিগুম্বা অদোম্না খাদীগী মফম পীবিবা তারবদি ভোকেল ফোর লোকেল কেম্পন অসি খুমাং চাউশিনগনি”।
হৌখিবা দিকেদশিংদা ভারতকী মশাগী চাউখৎলম্বা তোই ইন্দস্ত্রী অসি মীরৈবাক্কী শান্নপোৎশিংগী লমজেলনা মাংহনখিবা অদু নীংশিংলদুনা প্রধান মন্ত্রীনা হায়খি, সরকারগী খোঙথাংশিং অমসুং তোই ইন্দস্ত্রীশিংদা থবক তৌরিবা ঐখোয়গী ইচিল-ইনাওশিংনা কন্না হোৎনবদগী ফীভম অসি হৌজিক্তি অহোংবা লাকপা হৌরে। মসিনা মরম ওইদুনা শান্নপোৎশিং মপালদগী পুশিল্লকপদা চাউনা হন্থহনবা ঙমখি।
প্রধান মন্ত্রীনা মীয়ামদা দুরদর্শন্দা শন্দোক্লিবা ‘স্বরাজ’ সিরিএল য়েংনবা মীয়ামদা হায়খি। সেরিএল অসিনা অথৌবা নীংতম লান্মীশিংগী ৱারী অমসুং মখোয়না থেংনরকখিবা অৱাবা অদুগী মতাংদা শন্দোক্না তাক্লি। ঐখোয়গী নীংতম্বা ফংনবা ঐখোয়গী ইপা-ইপুশিংনা কত্থোকখিবশিং অদুগী মরমদা খঙনবা ইমুং-মনুংশিংনা সিরিজ অসি য়েংগদবনি।
খাদী উৎসব
খাদী য়োকখৎপা, খাদীগী পোত্থোকশিংগী মরমদা মীয়ামদা পাক শন্না খঙহনবা অমদি নহাশিংগী মরক্তা খাদীগী ফিরোল শীজিন্নববু য়োকখৎপা হায়বসি প্রধান মন্ত্রীনা মতম পুম্নমক্তা হোৎনদুনা লাক্লিবা অমনি। প্রধান মন্ত্রীনা হোৎনরিবা অসিগী মহৈ অমা ওইনা, ২০১৪দগী হৌনা ভারত্তা খাদীগী পোৎলম য়োনবগী চাং অসি শরুক মরী হেনগৎলে, অদুগা গুজরাত্তনা খাদীগী পোৎলম য়োনবগী চাং শরুক নিপান হেনগৎলে।
অজাদী কা অমৃৎ মহোৎসবকী শরুক অমা ওইনা তোপ তোপ্পা মওংদা, খাদী অমসুং নীতম ইহৌগী মতমদা খাদীগী মরুওইববু নীংশিংদুনা খাদী উৎসব পাঙথোকখি। উৎসব অসি সাবরমতী রিভরফ্রন্ততা পাঙথোক্লি অমদি গুজরাতকী তোঙান তোঙানবা দিস্ত্রিক্তশিংদগী লাকপা খাদী ফিশাবী ৭৫০০না মতম অমত্তদা মফম অমত্তদা লাইব ওইনা তরেংদা লং নাইখি। থৌরম অসিদা তোঙান তোঙানবা মীরোলশিংনা ১৯২০গী মতমদগী শীজিন্নরক্লবা তরেং মখল ২২ উত্তুনা “তরেংগী লাংওল”গী একজিবিসন অমসু উৎখি। মসিদা নীংতম ইহৌগী মতমদা শীজিন্নখিবা তরেংশিংবু মহুৎ শিল্লিবা “য়ের্ৱদা চর্খা”দগী হৌরগা ঙসি খ্বাইদগী নৌবা ইনোভেসন অমসুং তেক্নোলোজী শীজিন্নদুনা পুথোকপা তরেংশিং য়াওরি। পোন্দুরু খাদী পুথোকপগী লাইব দিমোন্সত্রেসন অমসু তৌখি। থৌরম অসিদা প্রধান মন্ত্রীনা গুজরাত রাজ্য খাদি গ্রামোদ্যোগ বোর্দকী অনৌবা ওফিস বিল্দীং অমসুং সাবরমতিদা ফুত ওভর ব্রিদ্জ অমসু শঙ্গাখি।
*****
(Release ID: 1854900)
Visitor Counter : 122
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam