نئی دہلی، 23 اگست 2022:

کوئلے، کانوں اور پارلیمانی امور کے مرکزی وزیر جناب پرہلاد جوشی نے کہا کہ مرکز معدنیات کی تلاش میں زیادہ سے زیادہ نجی کاروباری افراد کو راغب کرنے کے لیے مستقل کوششیں کر رہا ہے۔ انھوں نے کہا کہ ڈرونز اور دیگر جدید ترین ٹیکنالوجیوں کے بڑھتے ہوئے استعمال کے ذریعے معدنیات کی تلاش ماحولیاتی اثرات کے بغیر کی جائے گی۔

آج یہاں این ایم ڈی سی لمیٹڈ، وزارت اسٹیل، کانوں کی وزرات اور ایف آئی سی سی آئی کے زیر انعقاد "بھارتی معدنیات اور دھاتوں کی صنعت - 2030 اور وژن 2047کی طرف پیش رفت" کے موضوع پر دو روزہ بین الاقوامی کانفرنس سے خطاب کرتے ہوئے جناب جوشی نے کہا کہ کمرشل کوئلے کی کان نیلامی کے ذریعے گزشتہ سال 25000 کروڑ روپے کی اضافی آمدنی حاصل کی گئی ہے اور ریاست اڈیشہ آمدنی کی پیداوار میں پہلے نمبر پر رہی ہے۔ وزیر موصوف نے جیولوجیکل سروے آف انڈیا (جی ایس آئی) سے اپیل کی کہ وہ نئے دور کے معدنیات کی تلاش پر توجہ مرکوز کرے۔ کان کنی کے شعبے میں شروع کی گئی حالیہ اصلاحات پر بات کرتے ہوئے جناب جوشی نے کہا کہ گزشتہ مالی سال کے 89 ملین ٹن کے مقابلے میں اس سال کیپٹیو کانوں سے کوئلے کی پیداوار 140 ملین ٹن تک پہنچنے کا امکان ہے۔ وزیر موصوف نے مزید کہا کہ رواں مالی سال کے دوران کوئلے کی مجموعی پیداوار میں 900 ملین ٹن ریکارڈ کیے جانے کا امکان ہے۔

وزیر موصوف نے مزید کہا کہ معدنیات کی تلاش کو مزید فروغ دینے کے لیے نیشنل منرل ایکسپلوریشن ٹرسٹ (این ایم ای ٹی) کو خود مختار ادارہ بنا دیا گیا ہے۔ آسٹریلیا کے اپنے حالیہ کامیاب دورے کو یاد کرتے ہوئے جناب پرہلاد جوشی نے کہا کہ آسٹریلیا کے مقابلے میں ہماری معدنیات کی تلاش محدود علاقے تک محدود ہے۔ انھوں نے کہا کہ حالیہ اختراعی پہل اور قوانین اور قواعد میں ترامیم کے نتیجے میں گزشتہ سات برسوں کے دوران 190 بڑے معدنی بلاکس نیلام ہوئے ہیں۔ اس بات کی نشاندہی کرتے ہوئے کہ کمرشل کوئلے کی کان کی نیلامی ایک بڑی کامیابی ہے، وزیر نے پی ایس یو پر زور دیا کہ وہ الاٹ شدہ کوئلے کے بلاکس سے جلد از جلد پیداوار شروع کرے بصورت دیگر انھیں دوبارہ نیلامی کے لیے وزارت کے حوالے کیا جاسکتا ہے۔

***

(ش ح – ع ا – ع ر)

U. No. 9443