কোল, মাইন্স অমসুং পার্লিয়ামেন্তরী এফিয়র্সকী কেন্দ্র মন্ত্রী, শ্রী প্রলহাদ জোশীনা হায়খি মদুদি কেন্দ্রনা মিনরেল এক্সপ্লোরেসন্দা প্রাইবেৎ ওন্তপ্রিনোর হেন্না পুক্নিং চীংশিন্নবা লেপ্পা লৈতনা খোঙথাংশিং লৌখৎলি। দ্রোন অমসুং খ্বাইদগী নৌবা তেক্নোলোজীশিং শীজিন্নবা হেনগৎহন্দুনা অকোইবগী ফীভমদা অকাইবা থোকহনদনা মিনরেল এক্সপ্লোরেসন অসি চত্থগনি হায়না মহাক্না ফোঙদোকখি।

ঙসি এন.এম.দি.সি. লিমিতেদ, স্তীল মন্ত্রালয়, মাইন্স মন্ত্রালয় অমসুং এফ.আই.সি.সি.আই.না শিনবা “ইন্দিয়ন মিনরেল্স এন্দ মেতেল্স ইন্দস্ত্রী – ত্রাঞ্জিসন তুৱার্দস ২০৩০ এন্দ বিজন ২০৪৭” হায়বা নুমিৎ নিনিগী মালেমগী থাক্কী কনফরেন্স অদুদা ৱা ঙাংলদুনা শ্রী জোশীনা হায়খি মমাং চহিদা কম্মর্সিএল কোল মাইন লিলাম লাউবগী খুত্থাংদা অহেনবা আই লুপা করোর ২৫০০০ লাকখি
 অমসুং ওরিশাগী রাজ্যনা আই লাকহনবদা মকোক্তা লৈখি। মন্ত্রীনা জিওলোজিকেল সর্ভে ওফ ইন্দিয়া (জি.এস.আই.)দা ন্যু এজ মিনরেল এক্সপ্লোরেসন্দা মীৎয়েং চংনবা হায়খি। মাইনিং সেক্তরদা হন্দক্তা পাইখৎখিবা রিফোর্ম খরগী মতাংদা পল্লদুনা শ্রী জোশীনা হায়খি মদুদি কেপ্তিব মাইনশিংদগী কোল পুথোকপা অসি মমাংগী শেনবা চহিদা মিলিয়ন তন ৮৯ ওইখিবা অদুগা চাংদম্নবদা চহি অসিদা মিলিয়ন তন ১৪০ য়ৌরবা য়াই পান্নরি। শেনবা চহি অসিগী মনুংদা পুথোকপা অপুনবা কোল অসি মিলিয়ন তন ৯০০ য়ৌরবা য়ানা লৈ হায়না মন্ত্রীনা মখা তাখি।

মিনরেল এক্সপ্লোরেসন্দা শাহৌ হেন্না পীনবগীদমক নেস্নেল মিনরেল এক্সপ্লোরেসন ত্রস্ত (এন.এম.ইতি.)না ওতোনোমস বোদী অমা শেমখি হায়না মন্ত্রীনা মখা তাখি। ওস্ত্রেলিয়াদা হন্দক্তা চৎখিবা মহাক্কী মাইপাক্লবা খোঙচৎ অদু নীংশিংলদুনা শ্রী প্রলহাদ জোশীনা হায়খি ওস্ত্রেলিয়াগা য়েংনবদা ঐখোয়গী মিনরেল এক্সপ্লোরেসন অসি অকক্নবা মফম খরা খক্তদা লোইশিল্লি। মহাক্না হায়খি হন্দক্কী অনৌবা থৌশিলশিং অমসুং এক্ত অমসুং রুলশিংদা অমেন্দমেন্তশিং তৌখিবগী ফল ওইনা মেজর মিনরেল ব্লোক ১৯০ হৌখিবা চহি তরেৎ অসিদা লিলাম লাউখি। কম্মর্সিএল কোল মাইন লিলাম লাউবা অসি অচৌবা মাইপাকপা অমনি হায়না ফোঙদোক্লদুনা মন্ত্রীনা পি.এস.য়ু.শিংদা এল্লোৎ তৌখিবা কোল ব্লোকশিংদা অথুবদা প্রদক্সন হৌনবা নত্ত্রগনা হায়রিবা অদু অমুক হন্না লিলাম লাউনবা মন্ত্রালয়দা শীন্নৌ হায়না ফোঙদোকখি।

****