ভারতকী সংবিধানগী আর্তিকল ১২৪গী ক্লোজ (২)না পীরিবা শক্তি অদু শিজিন্নদুনা, রাস্ত্রপতিনা সুপ্রীম কোর্তকী জজ, শ্রী জস্তিস উদয় উমেশ ললিতপু  ভারতকী চীফ জস্তিস ওইনা খনখ্রে। জস্তিস উদয় উমেশ ললিতনা ২০২২গী ওগস্ত ২৭তা ভারতকী ৪৯শুবা চীফ জস্তিস ওইনা ফম পুরগনি।

জস্তিস উদয় উমেশ ললিত অসি বারদগী ২০১৪গী ওগস্ততা ভারতকী সুপ্রীম কোর্তকী জজ ওইনা খনখি। ললিতনা ১৯৭১দা ১৩শুবা সি.জে.আই. ওইনা থৌ পুরম্বা জস্তিস এস.এম. সিক্রিগী মতুংদা বারদগী সুপ্রীম কোর্ততা দাইরেক্ত ওইনা ফম কারকখিবা ভারতকী অনিশুবা চীফ জস্তিস ওইরগনি। জস্তিস ললিতনা তর্ম অনিরক সুপ্রীম কোর্ত লিগেল সর্বিস কমিতীগী মেম্বর ওইনা থৌ পুরম্মি।

জস্তিস য়ু.য়ু. ললিতনা মমীং লৈরবা শিংথানিংঙাই ওইবা জজমেন্ত কয়া অমা মহাক্না তোখিবগী ক্রেদিৎ লৈ।

মহারাস্ত্রগি সোলাপুরদা ১৯৫৭গী নবেম্বর ৯দা পোকখিবা জস্তিস ললিত অসি ১৯৮৩গী জুনদা মহারাস্ত্র অমসুং গোৱাগী  বার কাউন্সিলনা এদভোকেত ওইনা খনখি। মহাক্না ১৯৮৬কী জনুৱারীদা মহাক্কী প্রক্তিস অদু দিল্লীদা হোংদ্রিঙৈদা ১৯৮৫কী দিসেম্বর ফাওবা বোম্বেগী হাই কোর্ততা প্রক্তিস তৌখি।

মহাক্না ১৯৮৬কী ওক্তোবরদগীনা ১৯৯২ ফাওবা শ্রী সোলি জে. সোরবজীগী চেম্বরদা থবক তৌরমখি অমসুং শ্রি সোলি জে. সোরবজীনা ভারতকী এতোর্নী জেনরেল ওইরিঙৈ মনুংদা য়ুনিয়ন ওফ ইন্দিয়াগী ওকিলশিংগী পেনেলদা য়াওরমখি। মহাক্না ১৯৯২দগীনা ২০০২ ফাওবা এদভোকেত ওন রেকোর্দ ওইনা প্রক্তিস তৌরম্মি অমসুং ২০০৪গী এপ্রিলদা সুপ্রীম কোর্তনা সেনিয়র এদভোকেত ওইনা ফম পীখি। মহাক অসি উমং-ৱামংগা মরী লৈনবা ৱাফমশিং, গারীনা থোকহনবা পোল্যুশন, য়ামুনাগী পোল্যুশন অসিনচিংবা কয়া য়াওনা মরু ওইবা ইশুশিংদা এমিকস ক্যুরী ওইনসু খনখি। মহাক অসি ২জি. গা মরী লৈনবা ৱাফম খুদিংমক্তা ত্রায়েল পাংথোক্নবগীদমক্তা সুপ্রীম কোর্তকী য়াথংগী মখাদা সি.বি.আই.গীদমক্তা স্পেসিবল পব্লিক প্রোসিক্যুতর ওইনা খনখি।

*****