গুদ ইভনিং চেন্নৈ! বনক্কম! নমস্তে!

তমিল নাদুগী রাজ্যপাল, শ্রী আর.এন. রবীজী, মুখ্য মন্ত্রী, শ্রী এম.কে. স্তালিনজী, মন্ত্রী অমসুং মীথুংলেনশিং, এফ.আই.দি.ই.গী প্রসিদেন্ত, শ্রী অর্কাদী বোর্কোভিচজী, তুর্নামেন্ত অসিদা শরুক য়ারিবা চেস শান্নরোই অমসুং তীম, মালেম শিনবা থুংবগী চেসপু নুংশিজবা মীয়াম, ইবেম্মা অসুং ইবুংঙোশিং, ঐহাক্না ভারত্তা পাংথোক্লিবা ৪৪শুবা চেস ওলিম্পিয়াদতা পুম্নমকপু তরাম্না ওকচরি। চেসকী খ্বাইদগী ইকায় খুম্ননীংঙাই ওইবা তুর্নামেন্তনা চেসকী ময়ুম ওইরিবা ভারত য়ৌরক্লে। ভারতকী পুৱারীগী অখন্নবা মতমদা তুর্নামেন্ত অসি মফমসিদা পাংথোক্লি। লোইলম লৈঙাক্তগী নীংতম্বা ফংবগী চহি ৭৫ মপুং ফাবসি হন্দক্কী চহিসিনি। মসিদি ঐখোয়গী নীংতম্বগী অমৃত মহোৎসবনি অমসুং লৈবাক্কী অসিগুম্বা মরু ওইবা মতমসিদা অদোম পুম্নমক্না মফমসিদা লাকপসি ঐহাক্না য়াম্না নুংঙাইবা ফাওই।

মরুপশিং,

ঐহাক্না তুর্নামেন্ত অসিবু শীন-লাঙলিবা মীওইশিংবু থাগৎচনীংই। মখোয়না অতেনবা মতমদা অসুক য়াম্না নীংথিরবা থৌওং শীন-লাঙলি। ঐখোয়না ভারত্তা ‘অতিথী দেবো ভৱ’দা থাজবা থম্মি। মসিনা হায়বদি অতিথী হায়বসি ইশ্বরগুম্বনি হায়বনি। চহি লিশিং কয়াগী মমাংদা, লাইনীংবা তিরুবল্লুরনা হায়রম্মি, “ইরুন দোম্বী ইলৱার বদেল্লাম বিরুন দোম্বী বেরানমাই সেয়দার পোরুত্তু”। মসিনা হায়বদি, পুন্সি মহিংগী শেল তানবা অমসুং য়ুম অমা লৈবা হায়বসি য়ুমদা মীথুংলেন লাকপা মতমদা নীংথিনা ওক্তুনা মখোয়বু নুংঙাইনা লৈহনবা ঙম্নবনি হায়বনি। ঐখোয়না অদোম্বু নুংঙাইহন্নবা হীরম খুদিংদা হোৎনগনি। অদোম্না ইশাগী মশান্নবু খ্বাইদগী নীংথিবা মওংদা শান্নবা ঙমহন্নবা হোৎনগনি।

মরুপশিং,

৪৪শুবা চেস ওলিম্পিয়াদ অসিনা অহানবা অমসুং রেকোর্দ কয়াগী তুর্নামেন্ত ওইরি। চেসকী হৌরকফম ওইরিবা লৈবাক, ভারত্তা চেস ওলিম্পিয়াদ পাংথোকপসি হন্দক্কী অসিনা অহানবনি। তুর্নামেন্ত অসিনা দিকেদ অহুমগী মতুংদা এসিয়াদা অহানবা ওইনা পাংথোক্লে। মসিদা শরুক য়ারিবা লৈবাক মশিংনা হান্নদগী ইহেন হেল্লি। মসিদা শরুক য়ারিবা তীম মশিংনা হান্নদগী ইহেন হেল্লি। নুপীগী সেক্সনগী এন্ত্রী মশিংনা খ্বাইদগী অমুক হেল্লি। চেস ওলিম্পিয়াদকী খ্বাইদগী অহানবা তোর্চ রিলেসু হন্দক হৌদোকখিবনি। মসিগী চেস ওলিম্পিয়াদ অসিদি ঐখোয়না মতম পুম্বদা নীংশিংদুনা লৈহৌরগনি।

মরুপশিং,

চহি অসি ঐখোয়গী নীংতম্বগী চহি ৭৫ মপুং ফাবা চহি অমা ওইবনা, চেস ওলিম্পিয়াদ অসিগী তোর্চ রিলেনা লৈবাক্কী মশক নাইবা মফম ৭৫দা চৎখি। মসিগী কিলোমীতর লিশিং ২৭ হেনবা খোঙচৎনা নহা কয়াগী ৱাখল্লোন্দা মৈরা চুদুনা চেস শান্নহন্নীংনবা ইথিল পীরি। মতুং তারকপদগী হৌনা, চেস ওলিম্পিয়াদকী তোর্চ রিলেনা ভারত্তগী মতম পুম্বদা হৌরগনি হায়বসি ঐখোয়গী চাউথোকচনীংঙাইনি। ঐহাক্না ভারত মীয়ামগী মহুত শিন্দুনা, থৌওং অসিগীদমক্তা এফ.আই.দি.ই.বু থাগৎচরি।

মরুপশিং,

হন্দক্কী চেস ওলিম্পিয়াদ পাংথোক্লিবা মফম অসি য়াম্না চুনবা অমা ওইরি। তোঙানবা মশান্না কয়া তাকপা নীংথিরবা স্কল্পচর লৈবা লাইশঙ কয়া তমিল নাদুদা লৈ। ঐখোয়গী চৎনবীদা শান্ন-খোৎনববু অথোইবনি হায়না খন্দুনা লাক্লিবনি। অদোম্না তমিল নাদুদা চতুরঙ্গা ভল্লাবনাথরগী লাইশঙ থেংনগনি। তিরুপুবানুরদা লৈরিবা লাইশঙ অসিগী চেসকা মরী লৈনবা নুংঙাইবা ৱারী লৈ। ইশ্বর ফাওবনা নিংথৌ মচানুপী অমগা চেস শান্নরম্মি! তমিল নাদুনা চেসকা পুৱারীগী অচেৎপা মরী লৈনৈ। মসিনা মরম ওইদুনা, ভারতকী চেসকী পাৱরহাউস ওইরিবনি। মসিনা ভারতকী চেস গ্রান্দমাস্তর কয়া অমসু পুথোকখ্রে। মসিদি খ্বাইদগী থৌবা ৱাখল্লোন, মতিক লৈবা চৎনবী অমসুং মালেমগী খ্বাইদগী লিরবা লোল, তমিলগী ময়ুম্নি। অদোম্না চেন্নৈ, মহাবলিপুরম অমসুং অনকপা মফমশিং য়েংবগী খুদোংচাবা শোইদনা ফংহন্নীংই।

মরুপশিং,

শান্ন-খোৎনবনা মীয়াম্বু অমত্তা ওইনা পুন্সিনবা ঙম্লিবা অসিনা মসিবু ফজহল্লিবনি। শান্ন-খোৎনবনা মীওইবা অমসুং খুন্নাইবু নকশিন্নহল্লি। শান্ন-খোৎনবনা তীমৱর্ক্কী চৎনবী অমা শেমগৎলি। চহি অনিগী মমাংদা, মালেম্না চহি-চাদা অমুক থেংনবা লাইচৎ লান্থেংনবা হৌখি। পুন্সিনা মতম শাংনা লেপখি। অসিগুম্বা মতমসিদা মালেম্বু অমত্তা ওইনা পুশিল্লকখিবসি তোঙানবা স্পোর্ত তুর্নামেন্তশিংননি। তুর্নামেন্ত খুদিংনা ঐখোয়না অমত্তা ওইবা মতমদা পাঙ্গল লৈ হায়বা পাউজেল পীরি। ঐখোয়না পুন্না লৈবা মতমদা হেন্না ফবা ওই। মান্নবা ইথিল অসিমক ঐহাক্না মফমসিদা উবা ফংই। কোবিদ মতুংগী মালেম অসিনা ঐখোয়দা হকচাং অমসুং ৱাখল অনিমক্কী ফিত্নেস অমসুং ৱেলনেসকী মরু ওইবা খঙহল্লে। মরম অদুনা, স্পোর্তিং তেলেন্ত পুক্নিং থৌগৎপা অসুং মরী লৈনবা ইনফ্রাস্ত্রকচরদা ইনভেস্ত তৌববু পুক্নিং থৌগৎপসি মরু ওইরিবনি।

মরুপশিং,

ভারকী শান্ন-খোৎনবগী হৌজিক্কী মতমদগী হেন্না ফবা মতম লৈখিদ্রি হায়বদা ঐহাক্না নুংঙাইবা ফাওই। ভারতনা ওলিম্পিক্স, পেরালিম্পিক্স অমসুং দীফলিম্পিক্সতা খ্বাইদগী নীংথিজবা পর্ফোরমেন্স উৎখি। ঐখোয়না মমাংদা মায় পাকপা ঙম্লমদবা মশান্নদা হন্দক্তি মায় পাকপা ঙম্লে। ঙসিদি, স্পোর্তপু য়াম্না ফবা প্রোফেসন অমনি হায়না খন্নরে। ভারতকী শান্ন-খোৎনবগী চৎনবীনা মপাঙ্গল হেন্না লৈরক্লিবসি মরু ওইবা হীরম অনি পুনবদগীনি। নহারোলশিংগী শক্তি অমসুং মখোয়গী মতিক ফুদোকপা ঙমহনবা অকোয়বগী ফিভম। ঐখোয়গী তেলেন্ত লৈরবা নহারোলশিংনা, অখন্নবা ওইনা, শহর মচা অমসুং খুঙ্গংগী নহারোলশিংনা লৈবাক্কী মিংচৎ পুরক্লে। ভারতকী শান্ন-খোৎনবগী ইহৌদা নুপীনা মকোক থংবদা লৈবসি য়াম্না পুক্নিং থৌগৎনীংঙাইনি। এদমিনিস্ত্রেতিব ফ্রেমৱর্ক, ইন্সেন্তিব স্ত্রকচর অমসুং ইনফ্রাস্ত্রকরশিংদসু অচৌবা অহোংবা লাক্লে।

মরুপশিং,

ঙসি অসিদি মালেমগী স্পোর্তকী য়াইফরবা নুমিৎ অমনি। ঐখোয়গী ভারত্তা ৪৪শুবা চেস ওলিম্পিয়াদ হৌদোক্লি। ২২শুবা কম্মনৱেল্থ গেমসনা য়ু.কে.দা ঙসিদগী হৌরগনি। মালেমগী তোঙানবা মফমশিংদগী লাকপা শান্নরোইশিংনা মশাগী লৈবাকপু চাউথোকচহনবা পাম্নরি। ঐহাক্না মখোয় খুদিংনা মায় পাকপা ওইসনু হায়বা য়াইফ পাউজেল পীজরি।

মরুপশিং,

শান্ন-খোৎনবদা মায়থীবা হায়বা লৈতে। মসিদা মায় পাকপা অমসুং তুংগী মতমদা মায় পাক্লক্কদবদি লৈ। মফমসিদা তিল্লিবা তীম অমসুং শান্নরোই খুদিংনা ৪৪শুবা চেস ওলিম্পিয়াদ অসিদা মায় পাকপা ওইসনু হায়না ঐহাক্না য়াইফ পাউজেল পীজরি। অদোম্না ভারত্তা নীংশিংনীংঙাই ওইবা মিৎকুপ কয়া শেম্বা ওইসনু অমসুং তুংগী মতমদা চেকশিন্না থম্বা ঙম্বা ওইসনু। ভারতনা অদোম্বু মতম পুম্বদা তরাম্না ওক্কনি। মায় পাকপা ওইবীয়ু! হৌজিক, ঐহাক্না ৪৪শুবা চেস ওলিম্পিয়াদ হৌদোক্লে লাউথোক্লি! গেমস অসি হৌরসনু!

***