ભારત સરકારનું સાંસ્કૃતિક મંત્રાલય ભારતની આઝાદીના 75માં વર્ષને સ્વતંત્રતાના અમૃત મહોત્સવ તરીકે ઉજવી રહ્યું છે. આ પ્રસંગે નેશનલ સ્કૂલ ઓફ ડ્રામા (NSD), નવી દિલ્હી દ્વારા 16મી જુલાઈથી 14મી ઓગસ્ટ 2022 દરમિયાન "આઝાદી કા અમૃત મહોત્સવ - 22મો ભારત રંગ મહોત્સવ, 2022 (આઝાદી ખંડ)" નામનો ઉત્સવ આયોજિત કરવામાં આવી રહ્યો છે જે આપણા સ્વાતંત્ર્ય સેનાનીઓને યાદ કરવા અને શ્રદ્ધાંજલિ આપવા માટે "આઝાદી કા અમૃત મહોત્સવ 2022" હેઠળ થઈ રહ્યો છે. ભારત સરકારના સંસદીય બાબતો અને સંસ્કૃતિ રાજ્ય મંત્રી શ્રી અર્જુન રામ મેઘવાલે ઉત્સવના કાર્યક્રમનું ઉદ્ઘાટન કર્યું. પદ્મશ્રી પુરસ્કાર વિજેતા અને પ્રખ્યાત ભારતીય લોક ગાયિકા સુશ્રી માલિની અવસ્થી અને શ્રી અરબિંદો કુમાર અને સંસ્કૃતિ મંત્રાલયના નિયામક પણ આ પ્રસંગે ઉપસ્થિત રહ્યા હતા.

આ પ્રસંગે તેમના સંબોધનમાં શ્રી અર્જુન રામ મેઘવાલે જણાવ્યું હતું કે સ્વાતંત્ર્ય સંગ્રામના ઘણા એવા નાયકો છે જેમણે આઝાદીની ચળવળમાં સક્રિયપણે ભાગ લીધો છે, છતાં તેઓ આપણા સ્વાતંત્ર્ય સંગ્રામના ઈતિહાસનો હિસ્સો બની શક્યા નથી. એક ઉદાહરણ આપતા તેમણે એમ પણ કહ્યું કે માનગઢમાં વર્ષ 1913માં તે વિસ્તારના આદિવાસીઓ પર નિર્દયતાથી અત્યાચાર ગુજારવામાં આવ્યો હતો અને તેમની હત્યા કરવામાં આવી હતી, પરંતુ મોટાભાગના લોકો આ ઘટનાથી સારી રીતે વાકેફ નથી. તેમણે કહ્યું કે થિયેટર એક્ટિવિસ્ટ્સ અને નેશનલ સ્કૂલ ઑફ ડ્રામાએ તે ઘટનાઓ પર આધારિત નાટકો તૈયાર કરવા માટે આગળ આવવું જોઈએ જેથી કરીને દેશભરના આવા નાયકો વિશે નાગરિકોને માહિતગાર કરી શકાય અને તેમની બહાદુરી અને હિંમતની વાર્તાઓથી વાકેફ થઈ શકે.

પોતાના સંબોધનમાં, સુશ્રી માલિની અવસ્થીએ સ્વતંત્રતા સેનાનીઓની પ્રશંસામાં ભારતના મોટા ભાગોમાં ગવાતા વિવિધ લોકગીતો વિશે વાત કરી હતી. બ્રિટિશ સરકારે આવાં ઘણાં ગીતો પર પ્રતિબંધ મૂક્યો હતો, પરંતુ લોક કલાકારોએ ગાવાનું ચાલુ રાખ્યું હતું, આમ ગુમનામ નાયકોની વાર્તાઓ આગામી પેઢી સુધી પહોંચાડી હતી. નેશનલ સ્કૂલ ઓફ ડ્રામાના ડાયરેક્ટર પ્રો. (ડૉ.) રમેશચંદ્ર ગૌરે કાર્યક્રમની અધ્યક્ષતા કરી હતી.

ઉદઘાટન સમારોહ પછી શ્રી બંસી કૌલ દ્વારા દિગ્દર્શિત નાટક "અરણ્યધિપતિ તાંતીયા મામા"નું મંચન કરવામાં આવ્યું હતું.

SD/GP/JD

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com