حکومت ہند کی وزارتِ ثقافت  ہندوستان کی آزادی کے 75 ویں سال کو آزادی کے امرت مہوتسو کے طور پر منا رہی ہے۔ اس موقع پر نیشنل اسکول آف ڈرامہ (این ایس ڈی) نئی دہلی 16 جولائی سے 14 اگست 2022 تک "آزادی کا امرت مہوتسو- 22 واں بھارت رنگ مہوتسو، 2022 (آزادی سیگمنٹ)" کے عنوان سے ایک میلے کا اہتمام کر رہا ہے جس کا مقصد "آزادی کا امرت مہوتسو 2022" کے تحت مجاہدین آزادی کو  یاد کرنا اور خراج تحسین پیش کرنا ہے۔ میلے کی افتتاحی تقریب کا آغاز وزیر مملکت برائے پارلیمانی امور اور ثقافت جناب ارجن رام میگھوال نے کیا۔ پدم شری ایوارڈیافتہ اور معروف ہندوستانی لوک گلوکارہ محترمہ مالنی اوستھی اور وزارت ثقافت کے ڈائریکٹر  جناب اروند کمار اس موقع پر موجود تھے۔

اس موقع پر اپنے خطاب میں جناب ارجن رام میگھوال نے کہا کہ جدوجہد آزادی کے بہت سے گمنام سورما ہیں جنہوں نے تحریک آزادی میں بڑھ چڑھ کر حصہ لیا لیکن وہ ابھی تک ہماری جدوجہد آزادی کا حصہ نہیں بن پائے ہیں۔ ایک مثال دیتے ہوئے انہوں نے بتایا کہ 1913 میں مان گڑھ میں اس خطے کے قبائل کو وحشیانہ تشدد کا نشانہ بنا کر قتل کیا گیا ہے لیکن یہ واقعہ اچھی طرح سے اجاگرنہیں کیا گیا۔ انہوں نے مزید کہا کہ تھیٹر کے کارکنان اور نیشنل اسکول آف ڈرامہ کو چاہئے کہ وہ ان واقعات پر مبنی ڈرامے تیار کرنے کے لئے آگے آئیں اور یہ ڈرامے ملک بھر میں پیش کئے جائیں تاکہ شہریوں کو ایسے سورماؤں سے آگاہ کیا جا سکے اور ان کی بہادری اور بہادری کی داستانیں منظر عام پر لائی جا سکیں۔

محترمہ مالنی اوستھی نے اپنے خطاب میں ان مختلف لوک گیتوں کا ذکر کیا جو ہندوستان کے بڑے حصے میں مجاہدینِ آزادی کی تعریف میں گائے جاتے تھے۔ اس طرح کے بہت سے گانوں پر برطانوی حکومت نے پابندی لگا دی تھی لیکن لوک فنکار انہیں گاتے رہے اور اس طرح وہ گمنام سورماؤں کی کہانیاں اگلی نسل تک لے گئے۔ نیشنل اسکول آف ڈرامہ کے ڈائریکٹر پروفیسر (ڈاکٹر) رمیش چندر گوڑ نے تقریب کی صدارت کی۔

افتتاحی تقریب کے بعد ڈرامہ "آرنیادھیپتی تانتیا ماما" پیش کیا گیا جس کی ہدایتکاری کے فرائض جناب بنسی کول نے انجام دئیے تھے۔

****

U.No:7664

ش ح۔رف۔س ا