কৈথেল ফম্বী নুপীশিং চাউখৎনবা অমসুং মখোয়গীদমক ওন্ত্রেপ্রেনিউয়রগী অহেনবা খুদোংচাবা কয়া শেমগৎনবা স্তেৎ কম্মিসন ফোর ৱুমেনগা লোয়ন্না নেসনেল কম্মিসন ফোর ৱুমেন্না শীন্দুনা নুপী কৈথেল ফম্বীশিংগী নোংমগী ওইবা ‘কেপাসিতি বিল্দিং ত্রেনিং প্রোগ্রাম’ অমা পাংথোকখ্রে। থৌরম অদুদা মনিপুরগী চীফ মিনিস্তর শ্রী এন.বিরেন সিংহ, মনিপুর সরকারগী সোসিএল ৱেলফিয়ারগী মিনিস্তর শ্রী হৈখাম দিঙ্গো সিংহ অমসুং এন.সি.দব্লিউগী চিয়ারপর্সন রেখা শর্ম্মা শরুক য়াখি।

এসিয়াদা খ্বাইদগী চাউবা নুপীশিং খক্তগী ওইবা কৈথেল অমা ওইরিবা মনিপুরগী ইমা কৈথেলদা মশিং য়াম্লবা নুপীশিংনা হায়রিবা কৈথেল অসিদা পোৎফমশিং ফম্লি। অৱাং-নোংপোক রাজ্যশিংদা কম্মিসন অসিনা পায়খৎলকপা থবকশিংগী শরুক অমা ওইনা, মখোয়গী হিংনবগী লম্বী পীনবা, খুন্নাইগী ঙাকলৌ ফগৎনবা অমসুং পুন্সিগী হিংবগী মগুন হেনগৎনবা ইমা কৈথেল অহুমগী নুপী পোৎফম্বীশিংগীদমক নোংমগী ওইবা ত্রেনিং অসি পাংথোকপনি।

থৌরম অদুদা চীফ গেস্ত ওইনা শরুক য়াখিবা মনিপুরগী চীফ মিনিস্তর শ্রী এন বিরেন্না ত্রেনিং অদুদা শরুক য়াখিবা নুপীশিং পুক্নিং থৌগৎখি। নুপীশিং য়াইফনবা অসিগী থৌরম শীনবগীদমক মহাক্না এন.সি.দব্লিউ থাগৎখি। মহাক্না হায়খি অহেনবা ইমা কৈথেল ৭ শারে অমসুং অথুবা মতমদা অতোপ্পা ইমা কৈথেল অমসু শারগনি।

থৌরম অদুদা এন.সি.দব্লিউগী চিয়ারপর্সন রেখা শর্ম্মানা হায়খি মনিপুরগী হিরম খুদিংমক্তা নুপীশিং শরুক য়াই অমসুং মখোয়না থবক খুদিংমক পাংথোকপা ঙম্মি হায়বা উৎলে। ই-মার্কেত্তা মনিপুরগী নুপীশিংগী পোৎথোকশিং য়োনবা ঐখোয়না পাম্মী। নুপীশিংনা মখোয় মশামক মনিপুর খক্তদা হেনতোক্তনা লৈরোইদবনি। মালেম অসি হোংলি অমসুং মখোয়গী পোৎথোকশিং মালেমগী মফম অমদা হেক্ত য়ৌবা ঙম্নবা নুপীশিংনা তেক্নোলোজি খঙগদবনি। পাইবা ঙম্নবা ঐখোয়না মখোয়গী মশাশিং পানগনি অমসুং ই-কম্মর্স অমসুং অতোপ্পা তেক্নোলোজিগী মতাংদা মখোয় ত্রেনিং পীগনি অমসুং মসিনা মখোয়গী পোৎথোকশিং মালেম্না খঙবা ঙমগনি।

নুপীশিংদা ই-কম্মর্স, বেঙ্কিং, তেক্স লোগী মতাং য়াওনা মরুওইবা হীরমশিং নুপীশিংদা খঙহন্নবা সরকারগী তোঙান-তোঙানবা দিপার্তমেন্তশিং অমসুং বেঙ্কগী শক্নাইরবা মীওইশিং কম্মিসন্না শরুক য়াহনখি। ত্রেনিং অদু তেক্নিকেল সেসন অহুম থোক্না খাইদোকখি। অহানবা সেসন্না 'বেঙ্কগী স্কিমশিংগী লৌশিং অমসুং মতৌ করম্না ওনলাইন বেঙ্কিং শীজিন্নগনি’ হায়বা অসিনি। অনিশুবা সেসন্দা ‘তেক্স লোশিং/জি.এস.তি লোশিং অমসুং তেক্স থিবা’ হায়বা হিরম অসিদা খন্নখি অমসুং অহুমশুবা সেসন্দা ‘ই-কম্মর্স’ হায়বা হিরম অসিদা দেমোন্সত্রেসন উৎখি।

*****