नवी दिल्ली, 15 जून 2022

केंद्रीय मंत्री  किरेन रिजिजू यांनी आज मंगोलियाचे राष्ट्रपती उखनागीन खुरेलसुख यांच्यासह गंदन मठाला भेट दिली आणि कपिलवस्तुच्या पवित्र अवशेषांना आदरांजली वाहिली. त्यांनी मंगोलियातील भगवान बुद्धांच्या पवित्र अवशेषांनाही अभिवादन केले  जे कपिलवस्तू अवशेषांसोबत ठेवण्यात आले आहेत.

केंद्रीय कायदा आणि न्याय मंत्री  किरेन रिजिजू म्हणाले की, कोविड महामारीच्या काळात भारताने अनेक देशांना मदत केली आणि आज मंगोलियातील लोक आनंदी असल्याचे पाहून आपल्याला समाधान वाटत आहे. उभय देशांच्या जनतेमधील संबंधांबरोबरच भारत आणि मंगोलियामधील आर्थिक संबंधही नव्याने आकाराला येत आहेत, असे  केंद्रीय मंत्री म्हणाले. "नजीकच्या काळात अधिकाधिक भारतीयांनी या सुंदर देशाला भेट द्यावी आणि लोकांमधील संबंध अधिक दृढ व्हावेत  अशी  माझी इच्छा आहे." असे किरेन रिजिजू म्हणाले.

मंगोलियाचे राष्ट्रपती  उखनागीन खुरेलसुख म्हणाले की पवित्र बुद्धांचे अवशेष मंगोलियात आणण्यासाठी  विशेष पुढाकार हा भारत आणि मंगोलिया यांच्यातील आध्यात्मिक संबंधाचा पुरावा आहे. बुद्धांच्या अवशेषांचे हे प्रदर्शन आयोजित केल्याबद्दल राष्ट्रपतींनी मंगोलियाच्या जनतेच्या  वतीने  भारत सरकारचे आभार मानले.

कोविड महामारीच्या काळात आम्हाला लसींच्या मात्रा पुरवणारा भारत हा पहिला देश होता आणि या तातडीच्या मदतीमुळे हजारो मंगोलियन लोकांचे प्राण वाचवता आले याबद्दल त्यांनी प्रशंसा केली. ते म्हणाले की मंगोलियामध्ये भारताकडून सुरु असलेले तेल शुद्धीकरण प्रकल्प  हे भारत आणि मंगोलिया यांच्यातील वाढत्या द्विपक्षीय संबंधांचे प्रतीक आहे आणि भारत हा मंगोलियाचा सर्वात विश्वसनीय भागीदार आणि तिसरा शेजारी देश आहे. भगवान बुद्धांचे पवित्र अवशेष आणणे हा द्विपक्षीय संबंध समृद्ध करण्याचा एक उत्तम मार्ग असल्याचेही राष्ट्रपतींनी नमूद केले.

त्यानंतर , कुशोक बकुला रिनपोचे यांच्यावरील टपाल तिकिटाचे प्रकाशन मंगोलियाचे परराष्ट्र व्यवहार सचिव आंखबावर नियमदोरी  आणि मंगोलियातील भारताचे राजदूत एम पी सिंग यांनी केले. यावेळी  किरेन रिजिजू ; मंगोलियाचे माजी राष्ट्रपती  एन आंखबायर  आणि गंदन मठाचे खंबा नोमुन खान उपस्थित होते.

S.Patil/S.Kane/P.Malandkar

सोशल मिडियावर आम्हाला फॉलो करा: @PIBMumbai    /PIBMumbai    /pibmumbai  pibmumbai[at]gmail[dot]com