কেন্দ্রগী মন্ত্রী শ্রী কিরেন রিজিজুনা ঙসি মোঙ্গোলিয়াগী রাস্ত্রপতি, শ্রী উখনাগীন খুরেলসুখকা লোয়ননা গন্দান মোনাস্তরীদা চৎখি অমসুং মখোয় পুন্না কপিলাবস্তুগী শেংলবা রেলিকশিংগী মফমদা ইকায় খুম্নবসু উৎখি। কপিলাবস্তুগী রেলিকশিংগা লোয়ননা থম্মিন্নবা ভগবান বুদ্ধগী মোঙ্গোলিয়াগী শেংলবা রেলিকশিংগী মফমদসু মখোয়না ইকায় খুম্নবা উৎখি। 

ভারতকী লো অমসুং জস্তিসকী কেন্দ্র মন্ত্রী, শ্রী কিরেন রিজিজু; মোঙ্গোলিয়াগী রাস্ত্রপতি, শ্রী উখনাগীন খুরেলসুখ অমসুং মোঙ্গোলিয়াগী ভারতকী এম্বেসেদর, শ্রী মোহিন্দর প্রতাপ সিংহ; খম্বা নোমুক খানসু থৌরম অসিদা শরুক য়াখি।

কেন্দ্রগী লো অমসুং জস্তিস মন্ত্রী, শ্রী কিরেন রিজিজুনা ভারতনা কোবিদ লাইচৎ মনুংদা লৈবাক কয়াগী মতেং পাংখি অমসুং মোঙ্গোলিয়াগী মীয়াম্না ঙসি নুংঙাইনা লৈবা উবদা নুংঙাইবা ফাওই হায়না ফোংদোকখি। ভারত অমসুং মোঙ্গোলিয়াগী মরক্তা লৈরিবা পীপল তু পীপল কন্নেক্তকা লোয়ননা শেন্মিৎলোনগী মরীনা অনৌবা শক্তাক অমা ওইরক্লি হায়না কেন্দ্র মন্ত্রীনা মখা তানা ফোংদোকখি। শ্রী কিরেন রিজিজুনা অসুম্না হায়খি, “ভারত মচা ময়াম অমনা নীংথিরবা লৈবাক অসিদা চৎহন্নীংই অমসুং পীপল তু পীপল কন্নেক্তসু অনকপা তুংগী মতমশিংদা খুমাং হেন্না চাউশিলহন্নীংই”।

ভগবান বুদ্ধগী শেংলবা রেলিকশিংবু মোঙ্গোলিয়াদা অমুক হন্না পীবিরকপগী থৌওং অসিনা ভারত অমসুং মোঙ্গোলিয়াগে মরক্তা লৈরিবা স্পিরিচুএলগী মরীগী থাক্কী খুদম অমনি হায়না মোঙ্গোলিয়াগী রাস্ত্রপতি, শ্রী উখনাগীন খুরেলসুখনা ফোংদোকখি। মোঙ্গোলিয়াগী মীয়ামগী মাইকৈদা নুংশি চান্নবগী থৌওং উৎপা ওইনা অসিগুম্বা এক্সপোকিসন শীনবগীদমক্তা রাস্ত্রপতিনা মোঙ্গোলিয়াগী মহুৎ শিল্লদুনা ভারত সরকারবু থাগৎপা ফোংদোকখি।

ভারতনা কোবিদ লাইচৎ মনুংদা মোঙ্গোলিয়াদা ভেক্সিন পীবিরকখিবা খ্বাইদগী অহানবা লৈবাক ওইখিবা অমসুং খোঙজেল য়াঙবা তেংবাংসিনা মরম ওইরগা মোঙ্গোলিয়াগী পুন্সি লিশিং কয়া কনবা ঙমখিবগীদমক্তা মহাক্না ভারতপু থম্মোই শেংনা থাগৎখি। ভারতনা মোঙ্গোলিয়াদা শাবীরিবা ওইল রিফাইনরীনা লৈবাক অনিগী মরক্কী মরী ফগৎলকপগী খুদম অমনি অমসুং ভারত অসি মোঙ্গোলিয়াগী খ্বাইদগী থাজনীংঙাই ওইবা খোঙলোই ওইবগা লোয়ননা মখোয়গী অহুমশুবা য়ুম্লোন্নবনি হায়না মহাক্না হায়খি। ভগবান বুদ্ধগী শেংলবা রেলিকশিংবু মোঙ্গোলিয়াদা অমুক হন্না পুবীরক্লিবা অসিদি লৈবাক অনিগী মরীবু হেন্না ফগৎহনবগী শীংথানীংঙাই ওইরবা পাম্বৈ অমনি হায়না রাস্ত্রপতিনা মখা তানা ফোংদোকখি।

ঙসি নুমিৎকী মখা তারকপদা, মোঙ্গোলিয়াগী ফোরেন এফিয়র্সকী স্তেত সেক্রেতরী, শ্রী অনখবায়ার য়ামদোর্জ অমসুং মোঙ্গোলিয়াগী ভারতকী এম্বেসেদর, শ্রী এম.পি. সিংহনা শ্রী কিরেন রিজিজু, মোঙ্গোলিয়াগী হান্নগী রাস্ত্রপতি, শ্রী এন. ইনখবায়ার অমসুং গন্দান মোনাস্তরীগী খম্বা নোমুন খানগী মমাঙদা কুশোক বাকুলা রিনপোচেগী পোস্তেল স্তাম্প অমা ফোঙখি।

শ্রী কিরেন রিজিজুনা স্তাম্প ফোঙবগী থৌরমদা ৱা ঙাঙবদা কুশোক বাকুলা রিনপোচেগী মিংদা পোস্তেজ স্তাম্প ফোঙলিবা অসিনা ভারত অমসুং মোঙ্গোলিয়াগী স্পিরিচুএল অমসুং কলচরগী পুন্না চৎমিন্নবা খোঙচৎকী অনৌবা ৱাহন্থোক পীবা মিৎকুপ ওইরে, অমসুং মসিগী ইথিলনা মোঙ্গোলিয়া খক্তা নত্তনা ভারত্তসু য়ৌগনি হায়না ফোংদোকখি। স্তাম্প অসিনা রিনপোচেনা মোঙ্গোলিয়া খক্তা নত্তনা ভারত-মোঙ্গোলিয়াগী মরীবু হেন্না চেৎশিলহন্নবা পায়খৎখিবা মশক নাইরবা থবকশিংবু মীয়ামদা খঙহনবদা য়াম্না চাউনা তেংবাংগনি হায়না মহাক্না মখা তাখি।

থৌরম অসিদা, মোঙ্গোলিয়াগী ভারতকী এম্বেসেদর, শ্রী মোহিন্দর প্রতাপ সিংহনা বাকুলা রিনপোচেনা ভগবান বুদ্ধগী কাওবা নাইররোইদবা পাউতাকশিংবু য়াম্না অচম্বা মওংদা লান্থোকখি হায়না ফোংদোকখি। ঙসিগী থৌরম অসিনা ভগবান বুদ্ধগী ভারত অমসুং মোঙ্গোলিয়াগী রেলিকশিংবু বুদ্ধ নুমিত্তা মফম অমত্তদা পুন্না উৎপগী খ্বাইদগী তাঙবা মিৎকুপ অমা ওইরে হায়না মহাক্না মখা তাখি।

*****