লাক্লিবা থাংজ নুমিৎ জুন ৪, ২০২২দা হরিয়ানাগী পাঞ্চকুলাদা পাংথোক্কদবা খেলো ইন্দিয়া য়ুথ গেমস ২০২১ হৌদোকপা থৌরমদা য়ুনিয়ন হোম মিনিস্তর শ্রী অমিত সাহনা চীফ গেস্ত ওইনা শরুক য়াগনি। হন্দক্কী ৪শুবা  খেলো ইন্দিয়া য়ুথ গেমস অসি ভারত্তা পাংথোকপা অঙাংশিংগী শান্নবা চাংদম্নবগী খ্বাইদগী চাউবা থৌরম্নি অমসুং মসি কেন্দ্র সরকারনা ২০১৮দগী হৌদোকখিবনি।

হৌদোকপগী থৌরমদা হরিয়ানাগী চীফ মিনিস্তর শ্রী মোনহর লাল খাত্তর, য়ুথ এফেয়ার্স অমসুং স্পোর্তসকী য়ুনিয়ন মিনিস্তর শ্রী অনুরাগ থাকুর অমসুং য়ুথ এফেয়ার্স অমসুং স্পোর্তসকী রাজ্য মন্ত্রী শ্র্রী নিসিথ প্রমানিক শরুক য়াগনি। মখোয়গী মথক্তা, হরিয়ানাগী স্পোর্তস মিনিস্তর শ্রী সন্দিপ সিংহশু থৌরম অদুদা শরুক য়াগনি। নুপীমচা শান্নরোয় ২,২৬২ য়াওনা পুন্না শান্নরোয় ৪,৭০০ রোম্না সনাগী মেদল ২৬৯, লুপাগী মেদল ২৬৯ অমসুং শেঞ্জেংগী মেদলগী ৩৫৮গীদমক পুন্না মশান্না ২৫দা অথোই-অহেন তান্নগনি। থৌরম অসি জুন ৪দগী হৌরগা জুন ১৩ ফাওবা পাংথোক্কনি।

গেমস অসিদা ভারত রাজ্য অমসুং য়ুনিয়ন তেরিতোরি ৩৭কী শান্নরোয়শিংনা শরুক য়ারি। মসি সহর ৫(পঞ্চকুলা,সাহবাদ, অম্বালা, চান্দিগর অমসুং দিল্লি)দা পাংথোক্কনি। ভারতকী অরিবা মশান্না ৫ হায়বদি কালারিপায়াত্তু, থাং-তা, গাতকা, মাল্লাখাম্বা অমসুং য়োগসন য়াওনা পুন্না মশান্না ২৫ গেম অসিদা শরুক য়াগনি।

মমাঙগী ইদিসনশিংদা চহি কাংলুপ অনিদা পাংথোকপা অদুগা মান্নদবা মওংদা, হন্দক্কী ইদিসন অসিদা শুপ্নগী চহি ১৮ মখাগী শান্নরোয়শিং খক শরুক য়াগনি। গেমস অসিদা খ্বাইদগী মশিং য়াম্বা ওইনা য়ুম্বু ওইরিবা হরিয়ানাগী শান্নরোয় ৩৯৬ শরুক য়ারি। গেমস অসিগী অনিরক চেম্পিয়ন ওইখ্রবা মহারাস্ত্রাগী শান্নরোয় ৩১৮ শরুক য়ারি অমসুং মশান্না ২৫গী মনুংদা মশান্না ২৩দা চাংদম্নবা য়াওগনি।  

ওলেম্পিক্স, পেরালেম্পিক্স অমসুং এসিয়া গেমশিংদা মেদল ফংলবা শান্নরোয় কয়া পুথোকপা ঙমদ্রবা হরিয়াননা ২০১৮দা হৌদোকখিবা খেলো ইন্দিয়া স্কুল গেমসকী চেম্পিয়ন ওইখি। মথং চহিদা মখোয়না য়ুম্বু ওইবগী খুদোংচাবা ফংদুনা, য়ুথ গেমস হায়না নৌনা মমিং থোনখিবা গেমস অসিগী চেম্পিয়ন ওইবা ঙমখি। পুনেদা পাংথোকখিবা গেমস অদুদা মহারাস্ত্রানা সনাগী মেদল ৮৫  অমসুং হরিয়াননা ৬২ ফংখি। মথংগী চহিদা গুৱাহাতিদা পাংথোকপদা গেমসতশু পুন্না সনাগী মেদল ৭৮ ফংদুনা মহারাস্ত্রনা চেম্পিয়ন ওইখি।

গেমস মনুংদা কোবিদ-১৯গী নিয়মশিং মপুংফানা ইনগনি অমসুং শান্নরোয়শিং দোপিং তেস্তশিং পাংথোক্নবা নেসনেল এন্তি দোপিং এজেন্সি(নাদা)না মপুংফানা থৌরাং তৌরে।

*******