রাস্ত্রপতিগী লোইশঙ
ভারতকী রাস্ত্রপতি সেন্ত ভিন্সেন্ত এন্দ দি গ্রেনেদাইন্সতা লৈরি; সেন্ত ভিন্সেন্ত এন্দ গ্রেনেদাইন্সকী রাজনিতীগী লুচিংবশিংগা উনখ্রে
সেন্ত ভিন্সেন্ত এন্দ দি গ্রেনেদাইন্সকী হাউস এসেমব্লীগী অখন্নবা মীফমদা ৱা ঙাঙখ্রে; অমদি কিংস্তাউনদা ভারত মচাশিংনা ওকপগী থৌরমদা শরুক য়াখ্রে
মালেমগী হৌজিক ওইরিবা তশেংবা ফীভম উত্থোক্নবগীদমক মালেমগী ইন্সতিত্যুসনশিংদা অওনবা পুরকপা মথৌ তাই: রাস্ত্রপতি কোবিন্দ
ভারত অমসুং সেন্ত ভিন্সেন্ত এন্দ দি গ্রেনেদাইন্সনা খাজনা খোমগৎপদা ঈ-পাউ তাথোক তাশিন তৌবা অমদি তেংবাংনবগী য়ানচে, অমসুং ওল্দ কেল্দর কম্ম্যুনিতী সেন্তর নৌনা শেমজিন শাজিন্নবা এম.ও.য়ু. খুৎয়েক পীনখ্রে
Posted On:
20 MAY 2022 10:43AM by PIB Imphal
ভারতকী রাস্ত্রপতি শ্রী রামনাথ কোবিন্দনা জমাইকা অমসুং সেন্ত ভিন্সেন্ত এন্দ দি গ্রেনেদাইন্স লৈবাক অনিগী খোঙচৎকী অরোইবা তাঙ্কক্তা মে ১৮, ২০২২দা সেন্ত ভিন্সেন্ত এন্দ দি গ্রেনেদাইন্সকী কোনুং ময়োল্লম কিংস্তাউন্দা য়ৌরকখ্রে। হন্দক্কী অসিনা লৈবাক অসিদা ভারতকী রাস্ত্রপতিনা চৎপা অহানবা খোঙচৎনি। সেন্ত ভিন্সেন্ত এন্দ দি গ্রেনেদাইন্সকী গভর্নর জেনেরেল ঐচ.ই. মিস দেম সুজেন দুগন, প্রধান মন্ত্রী দোক্তর দি ওনরেবল রাল্ফ ই গোন্সাল্বেস অমসুং অতৈ দিগ্নিতরীশিংনা অর্গাইল ইন্তরনেস্নেল এয়র্পোর্ততা রাস্ত্রপতিবু ওকখি। মহাক্না এয়রপোর্ত্তা য়ৌখিবদা রাস্ত্রপতিবু গার্দ ওফ ওনর পীখি।
ঙরাং (মে ১৯, ২০২২) রাস্ত্রপতিনা মহাক্কী খোঙচৎ গভর্নমেন্ত হাউসতা চত্তুনা গভর্নর জেনেরেল দেম সুজেন দুগন অমসুং প্রধান মন্ত্রী দোক্তর রাল্ফ গোন্সাল্বেসকা উনখি। লুচিংবা অনিদুগা উনবা অদুদা রাস্ত্রপতিনা মহাক্কী মফমদা সেন্ত ভিন্সেন্ত এন্দ দি গ্রেনেদাইন্সতা তরাম্না ওকপিবগীদমক মখোয় অনিবু থাগৎপা ফোঙদোকখি। ইনফোর্মেসন তেক্নোলোজী, হকশেল, মহৈ মশিং, লমকোয় অমসুং নাৎকী লমদা অমদি মল্তিলেতরেল ফোরাদাভারত অমসুং সেন্ত ভিন্সেন্ত এন্দ দি গ্রেনেদাইন্সকী মরক্তা তেংবাংনবগী মরী হেন্না কনখৎহন্নবগীদমক মখোয়না খন্নখি।
মীফম অদুগী মতুংদা রাস্ত্রপতি কোবিন্দ, গভর্নর জেনেরেল দেম সুজেন দুগন অমসুং প্রধান মন্ত্রী দোক্তর রাল্ফ গোন্সাল্বেসনা খাজনা খোমগৎপদা ঈ-পাউ তাথোক তাশিন তৌবা অমদি তেংবাংনবগী য়ানচে, অমসুং ওল্দ কেল্দর কম্ম্যুনিতী সেন্তর নৌনা শেমজিন শাজিন্নবা এম.ও.য়ু. খুৎয়েক পীনবদা শরুক য়াখি।
মতুংদা, রাস্ত্রপতিনা কিংস্তাউনগী বোতনিকেল গার্দেন্দা চত্তুনা ইন্দিয়ন হ্বাইত সেন্দলৱুদ চারা অমা থাখি অমদি ভিন্সেন্ত অমসুং ভারতকী নাৎকী অপুনবা কলচরেল পর্ফোর্মেন্স অমা মীৎয়েঙ তাখি।
মথংগী থৌরমদা, রাস্ত্রপতিনা “ইন্দিয়ন অমসুং সেন্ত ভিন্সেন্ত এন্দ দি গ্রেনেদাইন্স – তুৱার্দ্স এন ইনক্লুজিব ৱর্ল্দ ওর্দর” হায়বা হীরমসিদা সেন্ত ভিন্সেন্ত এন্দ দি গ্রেনেদাইন্সকী হাউস এসেমব্লীগী অখন্নবা মীফমদা ৱা ঙাঙখি।
থৌরমদুদা ৱা ঙাঙলদুনা, রাস্ত্রপতিনা ফোঙদোকখিবদা ঐখোয় মালেম পুমবদা লৈরিবা লৈবাকশিং অমসুং মীওইশিংগী মরক্তা মশিং য়াম্লবা মরীনা শক্তাক্লিবা মালেম অমদা হিংলি। ঙসিগী য়াম্না নকশিন্নরবা তাইবংপান অসিনা অনৌবা কৈথেল হাংদোক্তুনা, অনৌবা মহৈ মশিং অমসুং থবক্কী খুদোংচাবশিংগী খুত্থাঙদা মালেমগী মফমশিংদা লৈরিবা মীওইশিংদা য়াম্লবা কান্নবা পুরকই অমদি ইনফোর্মেসন হেন্না ফংহল্লি অমসুং মপানগী মালেমগী মরী শাগৎনবগীদমক লৈবাকশিংদা অনৌবা মফম কয়া পীরি।
অমত্তা ওইরবা মালেম অসিনা মশাগী ওইবা শিংনবা কয়াসু পুদুনা লাক্লি হায়না রাস্ত্রপতিনা হায়খি। অইং-অশাগী খল হোংলকপা, রাজনিতিগী মুক্নবনা মালেমগী তংদু লৈতাবা অমদি ঙাকশেলদা শিংনরকপা, ঙমখৈ ৱাংমগী তেরোরিজম, সপ্লাই চেনদা অপনবা অসিনচিংবশিং অসি ঐখোয় পুম্নমক্তা শোকহনবা মালেমগী অচৌবা শিংনবা খরনি। লৈবাকশিংনা হায়রিবা শিংনবশিং অসি লাকশিনবদা মখোয় মশাগী ওইবা অপীকপা ৱাখল্লোনগী ৱাংমদা ঐখোয়গী তুংগী মীরোলগী য়াইফনবগীদমক মীৎয়েঙ থমবা মথৌ তাই।
মায়কৈ কয়াগী ওইবা মরী অসি ঐখোয়গী পুৱারীতী তাঙ্ককশিংদা লৈখিবা ফীভমদগী ঙসিগী অমগা অমগা শমজিন্নবা, তাংমিন্নবা তাইবংসিদনা হেন্না মরু ওইরক্লি হায়না রাস্ত্রপতিনা হায়খি। মায়কৈ কয়াগী ওইবা মরীবু লৈবাক খুদিংম্তা মপাঙ্গল কনবা, তুং কোইগদবা, থাক মান্নবা অমদি পুম্নমক কোনশিল্লবা চাউখৎপগী ফীভম পুরক্নবগী পামবৈ অমা ওইনা শীজিন্নফম থোকই। অদুম ওইনমক, মায়কৈ কয়াগী ওইবা মরী অসি অদুমক লৈহন্নবগীদমক ইন্সতিত্যুসনশিংদা অওনবা পুরকপা মথৌ তাই। মালেমগী লাঞ্জাও অনিগী মতুংদা থোরকখিবা স্ত্রকচর অমসুং ইন্সতিত্যুসনশিংনা – অতোপ্পা মালেমগী লাঞ্জাও অমা অমুক থোরক্তনবা হোৎনবা – হায়বা ৱাফমসিদা মীৎয়েঙ থম্নখি। ঙসিগী অরুবা ৱাফমশিং মায়োক্ননবগীদমক ঐখোয়না শেমবা পাম্লিবা অনৌবা মালেমগী চৎনরোল অসি লৈবাক খুদিংমক্না মখোয়গী অপামবা মনীং তম্না ফোঙদোকচবা ঙমবা পুম্নমক কোনশিল্লবা মালেমগী চৎনরোল ওইহনগদবনি। ফীভম অসি মালেমগী মরুওইবা ইন্সতিত্যুসনশিংদা হেন্না পাকথোক চাউথোক্লবা অমদি নীংথিনা শেম শারবা মীহুৎ থাবগী থৌওং অমনা পুরকপা ঙমগনি।
পুম্নমক কোনশিল্লবা মালেমগী চৎনরোল অমগীদমক ঐখোয়না ৱাফম কাঙথোক্লিবসিগী পান্দমদি পুম্নমক্কী ওইবা, চৎন-পথাপ্তা য়ুম্ফম ওইবা, অরোন অথুপ লৈতবা, মনুং মপান ফাওনা উবা ঙমবা, করি ওইরক্কদগে হায়বা ঙমবা, মীচঙ মীখায় নাইদবা, অমদি পুম্নমক মান্নবা মায়কৈ কয়াগী ওইবা থৌওং অমা পুরকপা অমদি মদুবু য়োকখৎপনি। মরম অসিনা হৌজিক মথৌ তারিবসি হৌজিক্কী ওইবা মালেমগী ফীভমসি মমী তাগদবা, য়ু.এন. সিক্যুরিতী কাউন্সিলনা ময়ায়দা লৈরগা পুরকপা মালেমগী ইন্সতিত্যুসনশিংগী অওনবা পুরকপদুনি। হীরম অসিগী মতাঙদা ভারত অমসুং সেন্ত ভিন্সেন্ত এন্দ দি গ্রেনেদাইন্সকী মান্নবা অপামবা, পরিং অমদি ৱাখল্লোন লৈ হায়না মহাক্না ফোঙদোকখি।
ভারত লৈঙাক্কী পান্দমদি “সবকা সাথ, সবকা বিকাস, সবকা বিস্বাস অমসুং সবকা প্রয়াস” হায়বদি পুম্নমক্কা লোয়ননা, পুম্নমক্কী চাউখৎমিন্নবা, পুম্নমক্কী থাজবগা লোয়ননা অমসুং পুম্নমক্না হোৎনমিন্নবা হায়বসিনি হায়না রাস্ত্রপতিনা হায়খি। ভারতনা পাক চাউবা অমদি লন থুম লৈবগী চাংগী ৱাফমগা মরী লৈনদনা লৈবাক খুদিংমক, লমদম খুদিংমক্কী অপামবা অমদি ৱাখল্লোনশিং খঙমিন্নগদবা পুম্নমক কোনশিল্লবা মালেমগী চৎনরোল অমদা থাজবা থম্লিবা মালেমগী থাক্তা লৈরিবা ভারতকী লম্বী পরিং মসিনা তাক্লি। ভারতনা মীওইবা খুন্নাই পুম্নমক্কী তুংগীদমক খল্লি অমদি থবক তৌই হায়না মহাক্না হায়খি। লৈবাক অসিনা চাউখৎলক্লিবা লৈবাকশিংগা থেংনরকপশিং, লৌশিং অমসুং হৈ-শিংবশিং তাথোক তাশিন তৌমিন্নবগী ফিরেপ্তা হোংবা লৈতনা লেপ্লি। পুম্নমক কোনশিল্লবা মালেমগী চৎনরোল অমগীদমক হায়রিবা মান্নবা পান্দমশিং অসি মাঙদা পুখৎপদা ভারত অমসুং সেন্ত ভিন্সেন্ত এন্দ দি গ্রেনেদাইন্সনা মখা তানা নক্ননা থবক তৌমিন্নখিগনি হায়বগী থাজবসু মহাক্না ফোঙদোকখি।
নুংথিলদা রাস্ত্রপতিনা কিংস্তাউনগী কেল্দর রোদতা চৎত্তুনা ভারত মচাশিং অমসুং ভারতকী মরূপশিংগী মফমদা ৱা ঙাঙখি।
থৌরমদুদা পীখিবা মহাক্কী তেন্তকপা ৱারোলদা, রাস্ত্রপতিনা সেন্ত ভিন্সেন্ত এন্দ দি গ্রেনেদাইন্সতা লৈরিবা ইন্দিয়ন দাইস্পোরা অমসুং ভারত মচাশিংগী মফমদা ভারতকী ইনাক খুল্লবা খেন্নবা, নাৎকী লন অমসুং চৎনবীশিং মমি তারি অমদি ভারতনা মখোয়না মায় পাক্লকপদা চাউথোকচবা পোকই। সেন্ত ভিন্সেন্ত এন্দ দি গ্রেনেদাইন্সকা ভারতকা চাউখৎপগী লমদা খোঙবু ওইমিন্নরিবা অসি পুম্নমক ইচিন ইনাউ ওইমিন্নবগী ৱাখল্লোন্দা য়ুম্ফম ওইবনি। মীয়ামগী পুন্সি নুংঙাই য়াইফনা হিংবগী মমল হেনগৎহনগদবা মচাক মথুমগী প্রোজেক্তশিংগা লোয়ননা হেন্না মপাঙ্গল কনবা সেন্ত ভিন্সেন্ত এন্দ দি গ্রেনেদাইন্স অমা শেমগৎপদা ভারতনা মখোয়দা ঙাক্লৌ পীবা পাম্মি। মহাক্না মখোয়গী মফমদা অনৌবা ভারত, মসিগী য়াম্লবা ইনর্জী অমসুং খুমাঙ চাওশিল্লক্লিবা শেন্মিৎলোনগা মরী শাগৎনবা ৱাফম থমখি।
মতুং তারকপদা, রাস্ত্রপতিনা প্রধান মন্ত্রী গোন্সাল্বেস, ভারত মচাশিং অমসুং অতৈ মীথুংশিংগী মমাঙদা প্লাক অমা মায়খুম হাংদোক্তুনা কেল্দর রোদপু ‘ইন্দিয়া দ্রাইভ’ হায়না মমিং হোংখি।
নুমিত্তুগী অরোইবা থৌরমদা, রাস্ত্রপতিনা সেন্ত ভিন্সেন্ত এন্দ দি গ্রেনাদাইন্সকী গভর্নর জেনেরেলনা গভর্নেন্ত হাউসতা থৌবু ওইদুনা শিনবা চাক্লেন অমা চাখি।
*****
(Release ID: 1826881)
Visitor Counter : 138