অসমৰ ৰাজ্যপাল শ্ৰী জগদীশ মুখীজী, অসমৰ জনপ্ৰিয় আৰু উদ্যমী মুখ্যমন্ত্ৰী শ্ৰী হিমন্ত বিশ্ব শৰ্মা, কেন্দ্ৰীয় কেবিনেটত মোৰ জ্যেষ্ঠ সহকৰ্মী শ্ৰী সৰ্বানন্দ সোণোৱালজী, শ্ৰী ৰামেশ্বৰ তেলীজী, দেশৰ দেশৰ উন্নয়নত গুৰুত্বপূৰ্ণ অৱদান আগবঢ়োৱা শ্ৰী ৰতন টাটাজী, অসম চৰকাৰৰ মন্ত্ৰী  শ্ৰী কেশৱ মহন্তজী, অজন্তা নেওগজী, অতুল বৰা জী আৰু এই দেশৰ সন্তান আৰু ভাৰতৰ সৰ্বশ্ৰেষ্ঠ ন্যায় সেৱা আগবঢ়োৱা শ্ৰী ৰঞ্জন গগৈজী, সাংসদসকল, বিধায়কসকল আৰু মোৰ মৰমৰ ভাই-ভনীসকল !

প্ৰথমে মই ৰঙালী বিহু আৰু অসমীয়া নৱবৰ্ষৰ শুভেচ্ছা জনাইছো !

উদযাপন আৰু আনন্দৰ এই বতৰত আজি এই বিশাল সমাৰোহত অসমৰ উন্নয়নক অধিক গতি প্ৰদান কৰাৰ বাবে মই আপোনালোকৰ সেই উৎসাহৰ সৈতে সংযোগ স্থাপনৰ সুযোগ পাইছো। আজি এই ঐতিহাসিক চহৰখনৰ পৰা অসমৰ উন্নয়নত অৱদান আগবঢ়োৱা আৰু সকলোকে সন্মান সহকাৰে অভিবাদন জনোৱা অসম গৌৰৱৰ সকলো মহান সন্তানক মই সোঁৱৰণ কৰিছো।

বন্ধুসকল,

ভাৰতৰত্ন ভূপেন হাজৰিকাৰ এটা গীত আছে-

ব’হাগ মাথো এটি ঋতু নহয় নহয় ব’হাগ এটি মাহ

অসমীয়া জাতিৰ ই আয়ুষ ৰেখা গণ জীৱনৰ ই সাহ !

আমি অসমৰ জীৱনৰেখাক অমলিন আৰু তীব্ৰ কৰি তুলিবলৈ দিন-ৰাতিয়ে আপোনালোকক সেৱা কৰিবলৈ চেষ্টা কৰোঁ। এই সংকল্পৰ সৈতে, আপোনালোকৰ মাজলৈ বাৰে বাৰে অহাৰ দৰে অনুভৱ হয়। অসম আজি শান্তি, উন্নয়নৰ বাবে উৎসাহেৰে ভৰি পৰিছে আৰু মই অলপ আগতে কাৰ্বি আংলঙত ইয়াক দেখিছোঁ আৰু মই কি উৎসাহ, কি উদ্দীপনা হে, কি সপোন, কি সংকল্প অনুভৱ কৰিছো।

বন্ধুসকল,

কিছুদেৰী পূৰ্বে মই ডিব্ৰুগড়ত নতুনকৈ নিৰ্মিত কৰ্কট ৰোগ চিকিৎসালয় আৰু তাত নিৰ্মাণ কৰা সুবিধাবোৰো দেখিলো। আজি ইয়াত অসমৰ ৭খন নতুন কৰ্কট ৰোগ চিকিৎসালয় উদ্বোধন কৰা হৈছে। এটা সময় আছিল, আনকি সাত বছৰৰ ভিতৰত এখন চিকিৎসালয় খোলা হ'লেও ইয়াক এক বৃহৎ উদযাপন বুলি গণ্য কৰা হৈছিল। আজি সময় সলনি হৈছে, এদিনত এখন ৰাজ্যত ৭খন চিকিৎসালয় মুকলি হৈছে। আৰু মোক কোৱা হৈছে যে অহা কেইমাহমানৰ ভিতৰত আৰু ৩ খন কৰ্কট চিকিৎসালয় আৰু আপোনালোকৰ সেৱাৰ বাবে সাজু হৈ উঠিব।

ইয়াৰ উপৰিও আজি ৰাজ্যখনত ৭খন নতুন আধুনিক চিকিৎসালয় নিৰ্মাণৰ কামো আৰম্ভ কৰা হৈছে। এই চিকিৎসালয়সমূহে এতিয়া অসমৰ বহুতো জিলাত কৰ্কট ৰোগৰ চিকিৎসাৰ সুবিধা বৃদ্ধি কৰিব। চিকিৎসালয় প্ৰয়োজনীয় আৰু চৰকাৰে ইয়াৰ নিৰ্মাণো কৰিছে । কিন্তু মই আপোনালোকক এটা ওলোটা শুভকামনাহে দিব বিচাৰিছো ৷ চিকিৎসালয় আপোনালোকৰ সেৱাৰ বাবে উপলব্ধ কিন্তু মই অসমৰ জনসাধাৰণে জীৱনত চিকিৎসালয়লৈ নোযোৱাটো বিচাৰো। মই আপোনালোক সকলোৰে সুস্বাস্থ্যৰ কামনা কৰিছো। আপোনালোকৰ পৰিয়ালৰ কোনেও যাতে চিকিৎসালয়লৈ যাব নালাগে আৰু মই সুখী হ'ম যে আমাৰ সকলো নতুনকৈ সৃষ্টি কৰা চিকিৎসালয় যাতে খালী হৈ থাকে। কিন্তু যদি প্ৰয়োজন হয়, কৰ্কট ৰোগীসকলে অসুবিধাৰ বাবে মৃত্যুৰ সৈতে যাতে মোকাবিলা কৰিব নালাগে, তাৰবাবে আমি আপোনালৈ সেৱা আগবঢ়াবলৈ সাজু।

ভাতৃ আৰু ভগ্নীসকল,

অসমত, কৰ্কট ৰোগৰ চিকিৎসাৰ বাবে এনে এক বিস্তৃত, এনে এক বিস্তৃত প্ৰণালী গুৰুত্বপূৰ্ণ কিয়নো ইয়াত যথেষ্ট সংখ্যক কৰ্কট ৰোগ ধৰা পৰিছে। কেৱল অসমতে নহয়, উত্তৰ-পূৰ্বাঞ্চলত কৰ্কট ৰোগ এক ডাঙৰ সমস্যা হৈ পৰিছে। আটাইতকৈ বেছি ক্ষতিগ্ৰস্ত হৈছে আমাৰ দৰিদ্ৰ পৰিয়াল, দৰিদ্ৰ ভাই-ভনী, আমাৰ মধ্যবিত্ত পৰিয়ালৰ লোকসকল। কেইবছৰমান আগলৈকে, ইয়াত থকা ৰোগীসকলে কৰ্কট ৰোগৰ চিকিৎসাৰ বাবে ডাঙৰ চহৰলৈ যাবলগীয়া হৈছিল। আৰু ইয়াৰ বাবে, দৰিদ্ৰ আৰু মধ্যবিত্তৰ পৰিয়ালৰ ওপৰত এক বৃহৎ অৰ্থনৈতিক বোজা নামি পৰিছিল। দৰিদ্ৰ আৰু মধ্যবিত্ত শ্ৰেণীৰ এই সমস্যা দূৰ কৰাৰ বাবে যোৱা ৫-৬ বছৰ ধৰি ইয়াত গ্ৰহণ কৰা পদক্ষেপসমূহৰ বাবে মই প্ৰাক্তন মুখ্যমন্ত্ৰী সৰ্বানন্দ সোণোৱালজী আৰু বৰ্তমানৰ মুখ্যমন্ত্ৰী হিমন্তজী আৰু টাটা ন্যাসক অভিনন্দন জনাইছো। অসম কেঞ্চাৰ কেয়াৰ ফাউণ্ডেচনৰ দৰে কৰ্কট ৰোগৰ সস্তীয়া আৰু কাৰ্যকৰী চিকিৎসাৰ ইমান বৃহৎ নেটৱৰ্ক এতিয়া ইয়াত সাজু হৈছে। এইটো মানৱতাৰ বাবে এক মহান সেৱা।

বন্ধুসকল,

কেন্দ্ৰীয় চৰকাৰেও অসমকে ধৰি সমগ্ৰ উত্তৰ-পূৰ্বাঞ্চলত কৰ্কট ৰোগৰ এই অতি ডাঙৰ প্ৰত্যাহ্বানৰ মোকাবিলা কৰিবলৈ নিৰন্তৰ প্ৰচেষ্টা চলাই আছে। ৰাজধানী গুৱাহাটীতো কৰ্কট ৰোগৰ চিকিৎসা সম্পৰ্কীয় আন্তঃগাঁথনি শক্তিশালী কৰা হৈছে। এই বছৰৰ বাজেটত উত্তৰ-পূৰ্বাঞ্চলৰ উন্নয়নৰ বাবে ১৫০০ কোটি টকাৰ এক বিশেষ আঁচনি PM-DevINE ত কৰ্কট ৰোগৰ চিকিৎসাৰ ওপৰতো গুৰুত্ব দিয়া হৈছে। ইয়াৰ অধীনত, কৰ্কট ৰোগৰ চিকিৎসাৰ বাবে গুৱাহাটীত এক উৎসৰ্গীকৃত সুবিধা প্ৰস্তুত কৰা হ'ব।

ভাতৃ আৰু ভগ্নীসকল,

কৰ্কট ৰোগৰ দৰে গুৰুতৰ ৰোগে আমাক এটা পৰিয়াল আৰু সমাজ হিচাপে আৱেগিক আৰু আৰ্থিকভাৱে দুৰ্বল কৰি তোলে। সেয়েহে, যোৱা ৭-৮ বছৰ ধৰি, দেশত স্বাস্থ্যৰ ওপৰত যথেষ্ট বৃহৎ আৰু বিস্তৃত কাম কৰা হৈছে। আমাৰ চৰকাৰে সাতটা বিষয়ৰ ওপৰত গুৰুত্ব দিছে বা ইয়াক এনেকৈয়ো ক'ব পাৰি, স্বাস্থ্যৰ সপ্তৰ্ষিৰ ওপৰত গুৰুত্ব দিয়া হৈছে।

প্ৰথম প্ৰয়াসটো হ'ল ৰোগ যাতে দেখা নিদিয়েই। সেয়েহে, আমাৰ চৰকাৰে প্ৰতিৰোধমূলক স্বাস্থ্যসেৱাৰ ওপৰত যথেষ্ট গুৰুত্ব আৰোপ কৰিছে। যোগ, ফিটনেছ, স্ব-সহায়, এনে বহুতো কাৰ্যসূচী ইয়াৰ বাবে চলি আছে। দ্বিতীয়তে, যদি ৰোগটো হয়, ইয়াক আৰম্ভণিতে জনাটো জৰুৰী। ইয়াৰ বাবে সমগ্ৰ দেশতে নতুন পৰীক্ষা কেন্দ্ৰ স্থাপন কৰা হৈছে। তৃতীয় গুৰুত্বটো হ'ল যে মানুহৰ ঘৰৰ ওচৰত উন্নত প্ৰাথমিক চিকিৎসাৰ সুবিধা থাকিব লাগে। ইয়াৰ বাবে, সমগ্ৰ দেশতে এক নতুন শক্তি আৰু সুস্থতা কেন্দ্ৰৰ সৈতে প্ৰাথমিক স্বাস্থ্য কেন্দ্ৰৰ এক নেটৱৰ্ক আগবঢ়োৱা হৈছে। চতুৰ্থটো প্ৰয়াস হ'ল দৰিদ্ৰসকলে সৰ্বশ্ৰেষ্ঠ চিকিৎসালয়ত যাতে বিনামূলীয়া চিকিৎসা লাভ কৰে। ইয়াৰ বাবে আজি ভাৰত চৰকাৰে আয়ুষ্মান ভাৰতৰ দৰে আঁচনিৰ অধীনত ৫ লাখ টকালৈকে বিনামূলীয়া চিকিৎসা প্ৰদান কৰিছে।

বন্ধুসকল,

আমাৰ পঞ্চম গুৰুত্ব ভাল চিকিৎসাৰ বাবে ডাঙৰ চহৰসমূহৰ ওপৰত নিৰ্ভৰশীলতা হ্ৰাস কৰাত প্ৰদান কৰা হৈছে। ইয়াৰ বাবে, আমাৰ চৰকাৰে স্বাস্থ্য আন্তঃগাঁথনিৰ ক্ষেত্ৰত অভূতপূৰ্ব বিনিয়োগ কৰি আছে। আমি দেখিছোঁ যে স্বাধীনতাৰ পিছৰে পৰা নিৰ্মাণ কৰা সকলো ভাল চিকিৎসালয়, সেইবোৰ ডাঙৰ চহৰত নিৰ্মাণ কৰা হৈছে। যদি স্বাস্থ্যৰ অলপ অৱনতি হয়, ডাঙৰ চহৰলৈ যোৱা হয়। সেয়াই হৈ আহিছে। কিন্তু ২০১৪ চনৰ পৰা, আমাৰ চৰকাৰে এই পৰিস্থিতি সলনি কৰিবলৈ চেষ্টা কৰি আহিছে। ২০১৪ চনৰ পূৰ্বে, দেশত মাত্ৰ ৭খন এইমছ আছিল। তাতেও দিল্লীবাসীসকলৰ কথা বাদ দিলে আন ক’তো কোনো এমবিবিএছৰ অধ্যয়ন নাছিল, ক’ৰবাত কোনো অ'পিডি নাছিল, কিছুমান অসম্পূৰ্ণ হৈ আছিল। আমি এই সকলোবোৰ সংশোধন কৰিছিলো আৰু দেশত ১৬খন নতুন এইমছৰ ঘোষণা কৰিছিলো।

এইমছ গুৱাহাটীও ইয়াৰে মাজৰ এখন। আমাৰ চৰকাৰে দেশৰ প্ৰতিখন জিলাত এখন চিকিৎসা মহাবিদ্যালয় স্থাপন কৰাক এই লক্ষ্যৰ ওপৰত কাম কৰি আছে। ২০১৪ চনৰ চনৰ পূৰ্বে দেশত ৩৮৭ খন চিকিৎসা মহাবিদ্যালয় আছিল। এতিয়া এই সংখ্যা প্ৰায় ৬০০ লৈ বৃদ্ধি পাইছে।

বন্ধুসকল,

আমাৰ চৰকাৰৰ ষষ্ঠ গুৰুত্ব হৈছে যিমান সম্ভৱ চিকিৎসকৰ সংখ্যা বৃদ্ধি কৰা। যোৱা সাত বছৰত, এম.বি.বি.এছ. আৰু পি.জি.-ৰ বাবে ৭০,০০০ তকৈও অধিক নতুন আসন যোগ দিয়া হৈছে। আমাৰ চৰকাৰে ৫ লাখতকৈও অধিক আয়ুষ চিকিৎসকক এলোপেথিক চিকিৎসকৰ সমান বুলি গণ্য কৰিছে। ই ভাৰতত চিকিৎসক আৰু ৰোগীৰ মাজৰ অনুপাতো উন্নত কৰিছে। শেহতীয়াকৈ, চৰকাৰে এটা ডাঙৰ সিদ্ধান্ত লৈছে। চৰকাৰে সিদ্ধান্ত লৈছে যে ব্যক্তিগত চিকিৎসা মহাবিদ্যালয়ৰ ৫০ শতাংশ আসন চৰকাৰী চিকিৎসা মহাবিদ্যালয়ৰ সদৃশ একে মাচুল লোৱা হ'ব। ইয়াৰ পৰা হাজাৰ হাজাৰ যুৱক-যুৱতী উপকৃত হৈছে। আমাৰ চৰকাৰৰ প্ৰচেষ্টাত, স্বাধীনতাৰ পিছত দেশখনে লাভ কৰা চিকিৎসকৰ সংখ্যা, এতিয়া অহা ১০ বছৰত অধিক চিকিৎসক উপলব্ধ হ'ব।

বন্ধুসকল,

আমাৰ চৰকাৰৰ সপ্তম গুৰুত্ব হৈছে স্বাস্থ্য সেৱাৰ ডিজিটাইজেচন।  চৰকাৰৰ প্ৰয়াস হৈছে চিকিৎসাৰ বাবে দীঘলীয়া শাৰীৰ পৰা পৰিত্ৰাণ পোৱা, চিকিৎসাৰ নামত সমস্যাবোৰৰ পৰা পৰিত্ৰাণ পোৱা। ইয়াৰ বাবে, এটাৰ পিছত এটা পৰিকল্পনা কাৰ্যকৰী কৰা হৈছে। প্ৰয়াসটো হ'ল যে কেন্দ্ৰীয় চৰকাৰৰ আঁচনিসমূহৰ লাভালাভ সমগ্ৰ দেশৰ নাগৰিকসকলৰ বাবে দেশৰ যিকোনো স্থানত উপলব্ধ হ'ব লাগে, ইয়াৰ বাবে কোনো বাধা থাকিব নালাগে। এয়া হৈছে এক ৰাষ্ট্ৰ, এক স্বাস্থ্যৰ আত্মা। ইয়েই দেশখনক ১০০ বছৰৰ আটাইতকৈ ডাঙৰ মহামাৰীতো শক্তি প্ৰদান কৰিছে, যাৰ ফলত প্ৰত্যাহ্বানৰ সৈতে মোকাবিলা কৰাৰ শক্তি পোৱা গৈছে।

বন্ধুসকল,

কেন্দ্ৰীয় চৰকাৰৰ আঁচনিসমূহে দেশত কৰ্কট ৰোগৰ চিকিৎসা সুলভ আৰু সহজ কৰি তুলিছে। আমাৰ চৰকাৰে আন এটা গুৰুত্বপূৰ্ণ কামৰ সিদ্ধান্ত লৈছে, দৰিদ্ৰৰ পুত্ৰ আৰু কন্যা কিয় চিকিৎসক হ'ব নোৱাৰিব, আনকি গাওঁখনত বাস কৰা শিশুটোৱেও যি জীৱনত ইংৰাজীত পঢ়িবলৈ সুযোগ নাপালে, তেওঁ কিয় চিকিৎসক হ'ব নোৱাৰিব। আৰু সেয়েহে, এতিয়া ভাৰত চৰকাৰে সেই দিশত আগবাঢ়িছে যে চৰকাৰে তেওঁলোকৰ মাতৃভাষাত, স্থানীয় ভাষাত চিকিৎসা শিক্ষা কৰিব বিচৰা সকলৰ বাবেও সুবিধা সৃষ্টি কৰিব লাগে, যাতে দৰিদ্ৰলোকৰ সন্তানো চিকিৎসক হ'ব পাৰে।

বিগত বছৰবোৰত, বহুতো অত্যাৱশ্যকীয় কৰ্কট ৰোগৰ ঔষধ আছে, যাৰ মূল্য প্ৰায় আধা হৈছে। ই প্ৰতি বছৰে কৰ্কট ৰোগীৰ প্ৰায় ১,০০০ কোটি টকাৰ ৰাহি কৰিছে। প্ৰধানমন্ত্ৰী জন ঔষধ কেন্দ্ৰৰ জৰিয়তে, ৯০০ৰো অধিক ঔষধ সস্তাত উপলব্ধ হৈছে যিবোৰ ঔষধ ১০০ টকাত উপলব্ধ, সেই ঔষধবোৰ ১০ টকা, ২০ টকাত উপলব্ধ, ইয়াক ব্যৱস্থা কৰা হৈছে। ইয়াৰে বহুতো ঔষধ কৰ্কট ৰোগৰ চিকিৎসাৰ সৈতে সম্পৰ্কিত। এই সুবিধাবোৰে ৰোগীৰ শ শ কোটি টকাৰ ৰাহি কৰিছে। যদি পৰিয়াল এটাত বৃদ্ধ পিতৃ-মাতৃ থাকে, যদি ডায়েবেটিচৰ দৰে ৰোগ হয়, তেন্তে মধ্যবিত্ত, নিম্ন-মধ্যবিত্ত পৰিয়ালে ঔষধৰ বাবে মাহে ১০০০, ১৫০০, ২ হাজাৰ টকা ব্যয় হয়। জন-ঔষধি কেন্দ্ৰত, সেই ব্যয় ৮০, ৯০, ১০০ টকাত পূৰণ কৰা হয়, আমি এই চিন্তা কৰিছো।

কেৱল এয়াই নহয়, আয়ুষ্মান ভাৰত আঁচনিৰ অধীনত লাভান্বিত হোৱা লোকসকলৰ মাজত যথেষ্ট সংখ্যক কৰ্কট ৰোগী আছে। যেতিয়া এই পৰিকল্পনা নাছিল, বহুতো দৰিদ্ৰ পৰিয়ালে কৰ্কট ৰোগৰ চিকিৎসা পৰিহাৰ কৰিছিল। তেওঁলোকে ভাবিছিল যে যদি চিকিৎসালয়লৈ যোৱা হয় তেন্তে তেওঁৰ পুত্ৰই এই ধন পৰিশোধ কৰিব লাগিব আৰু  সন্তানে এই ঋণ ভুগিব লাগিব। বৃদ্ধ পিতৃ-মাতৃয়ে মৰিবলৈ ভাল পাইছিল, কিন্তু শিশুৰ ওপৰত বোজা হ'বলৈ ভাল নাপাইছিল, চিকিৎসালয়লৈ যোৱা নাছিল, চিকিৎসা লাভ কৰা নাছিল। যদি চিকিৎসাৰ অভাৱত দৰিদ্ৰ পিতৃ-মাতৃৰ মৃত্যু হয়, তেন্তে আমি কিহৰ বাবে আছো? বিশেষকৈ আমাৰ মাতৃ আৰু ভগ্নীসকলে, তেওঁলোকে একেবাৰে চিকিৎসা লাভ কৰা নাছিল। তেওঁলোকে দেখিছিল যে চিকিৎসাৰ বাবে ঋণ ল'ব লাগিব, ঘৰ আৰু মাটি বিক্ৰী কৰিব লাগিব। আমাৰ চৰকাৰে আমাৰ মাতৃ, ভগ্নী আৰু কন্যাসকলক এই চিন্তাৰ পৰা মুক্ত কৰাৰ কামো কৰিছে।

ভাতৃ আৰু ভগ্নীসকল,

আয়ুষ্মান ভাৰতৰ আঁচনি দ্বাৰাই কেৱল বিনামূলীয়া চিকিৎসা লাভ কৰাই নহয়, লগতে আৰম্ভণিতে কৰ্কট ৰোগৰ দৰে গুৰুতৰ ৰোগ চিনাক্ত কৰাত সহায় কৰিছে। অসমকে ধৰি সমগ্ৰ দেশতে মুকলি কৰা স্বাস্থ্য আৰু সুস্থতা কেন্দ্ৰসমূহত ১৫ কোটিৰো অধিক সতীৰ্থক কৰ্কট ৰোগৰ বাবে পৰীক্ষা কৰা হৈছে। কৰ্কট ৰোগৰ ক্ষেত্ৰত, যিমান সম্ভৱ সোনকালে ৰোগটো ধৰা পৰাটো অতি গুৰুত্বপূৰ্ণ। ই ৰোগটো গুৰুতৰ হোৱাত প্ৰতিহত কৰিব পাৰে।

বন্ধুসকল,

দেশত চিকিৎসা আন্তঃগাঁথনি শক্তিশালী কৰাৰ বাবে চলি থকা অভিযানৰ পৰাও অসম লাভান্বিত হৈছে। প্ৰতিখন জিলাতে চিকিৎসা মহাবিদ্যালয় খোলাৰ ৰাষ্ট্ৰীয় সংকল্পৰ বাবে হিমন্তজী আৰু তেওঁৰ দলটোৱে প্ৰশংসনীয় প্ৰচেষ্টা চলাই আছে। কেন্দ্ৰীয় চৰকাৰে নিশ্চিত কৰিছে যে অক্সিজেনৰ পৰা ভেণ্টিলেটৰলৈকে, অসমত সকলো সুবিধা বৃদ্ধি হৈ আছে। অসমত গুৰুত্বপূৰ্ণ যত্নৰ আন্তঃগাঁথনি দ্ৰুতভাৱে অৱতৰণ কৰাৰ বাবে, অসম চৰকাৰে সৰ্বশ্ৰেষ্ঠ কাম কৰাৰ দিশত কেইবাটাও পদক্ষেপ গ্ৰহণ কৰিছে।

ভাতৃ আৰু ভগ্নীসকল,

দেশ আৰু বিশ্বই নিৰন্তৰে ক’ৰোনা সংক্ৰমণৰ বিৰুদ্ধে যুঁজ দি আছে। ভাৰতত টীকাকৰণ অভিযানৰ পৰিসৰ যথেষ্ট বৃদ্ধি পাইছে। এতিয়া, শিশুসকলৰ বাবেও বহুতো ভেকছিন অনুমোদিত হৈছে। প্ৰিকুচন পালিৰ বাবেও অনুমতি দিয়া হৈছে। এতিয়া সময়মতে নিজকে টীকাকৰণ কৰা আৰু শিশুসকলকো এই সুৰক্ষা আৱৰণ প্ৰদান কৰাটো আমাৰ সকলোৰে দায়িত্ব।

বন্ধুসকল,

কেন্দ্ৰ আৰু অসম চৰকাৰে চাহ বাগিচাত কৰ্মৰত লাখ লাখ পৰিয়ালক উন্নত জীৱন প্ৰদান ৰখাৰ বাবে আন্তৰিকতাৰে কাম কৰি আছে। বিনামূলীয়া ৰেচনৰ পৰা হৰ ঘৰ জল যোজনাৰ অধীনত যিকোনো সুবিধালৈকে, অসম চৰকাৰে এই আঁচনবোৰ দ্ৰুতগতিত চাহ বাগিচালৈ লৈ গৈ আছে। শিক্ষা আৰু নিযুক্তিৰ সুযোগ উন্নত কৰাৰ বাবেও নিৰন্তৰে প্ৰচেষ্টা চলি আছে। সমাজত কাকো, কোনো পৰিয়ালক উন্নয়নৰ লাভালাভৰ পৰা বাদ দিব নালাগে, এয়াই আমাৰ প্ৰচেষ্টা, এয়াই আমাৰ সংকল্প।

ভাতৃ আৰু ভগ্নীসকল,

আজি আমি ভাৰতত যি উন্নয়নৰ কাম চলাই আছো, একে সময়তে আমি জনকল্যাণৰ পৰিসৰ যথেষ্ট বৃদ্ধি কৰিছো। আগতে, কেৱল কেইটামান ৰাজসাহায্য জনসাধাৰণৰ কল্যাণৰ সৈতে সম্পৰ্কিত হোৱা দেখা গৈছিল। আন্তঃগাঁথনি, সংযোগৰ প্ৰকল্পবোৰ কল্যাণৰ সৈতে সম্পৰ্কিত বুলি প্ৰত্যক্ষ কৰা হোৱা নাছিল। যদিও উন্নত সংযোগৰ অভাৱত, ৰাজহুৱা সুবিধা প্ৰদান কৰাটো অতি কঠিন। যোৱা শতিকাৰ সেই ধাৰণাটো এৰি দেশখন এতিয়া আগবাঢ়িছে। আজি আপুনি দেখিছে যে অসমৰ দূৰৱৰ্তী অঞ্চলত পথ নিৰ্মাণ কৰা হৈছে, ব্ৰহ্মপুত্ৰৰ ওপৰত দলং নিৰ্মাণ কৰা হৈছে, ৰে'লৱে নেটৱৰ্ক শক্তিশালী হৈ উঠিছে। এই সকলোবোৰ বিদ্যালয় আৰু মহাবিদ্যালয়, চিকিৎসালয়লৈ যোৱা সহজ হৈ পৰিছে। জীৱিকাৰ সুযোগ মুকলি হৈছে, দৰিদ্ৰতম লোকসকলে ধন ৰাহি কৰিছে। আজি, আটাইতকৈ দৰিদ্ৰ লোকসকলেও মোবাইল ফোনৰ সুবিধা লাভ কৰিছে, ইণ্টাৰনেটৰ সৈতে সংযোজিত হৈছে। ইয়াৰ ফলত তেওঁলোকে চৰকাৰৰ প্ৰতিটো সেৱা লাভ কৰা, দুৰ্নীতিৰ পৰা পৰিত্ৰাণ পোৱাটো সহজ হৈ পৰিছে ।

ভাতৃ আৰু ভগ্নীসকল,

সবকা সাথ-সবকা বিকাশ, সবকা বিশ্বাস আৰু সবকাৰ প্ৰচেষ্টাৰ দৃষ্টিভংগীৰে আমি অসম আৰু দেশৰ উন্নয়ন ত্বৰান্বিত কৰাত নিয়োজিত হৈছো। অসমৰ সংযোগ শক্তিশালী কৰা, ইয়াত নতুন বিনিয়োগৰ সুযোগ সৃষ্টি কৰাটোৱেই হ’ল  আমাৰ প্ৰয়াস। অসমত বিনিয়োগৰ বহুতো সম্ভাৱনা আছে। আমি এই সম্ভাৱনাবোৰক সুযোগলৈ পৰিৱৰ্তন কৰিব লাগিব। চাহ, জৈৱিক কৃষি, তেল সম্পৰ্কীয় উদ্যোগ বা পৰ্যটন হওঁক, অসমৰ বিকাশে আমাক নতুন উচ্চতালৈ লৈ যাব লাগিব।

বন্ধুসকল,

আজি মোৰ অসম ভ্ৰমণ মোৰ বাবে অতিশয় স্মৰণীয়। এফালে, মই তেওঁলোকক লগ কৰিবলৈ আহিছোঁ যিসকলে বোমা-বন্দুকৰ পথ এৰি শান্তিৰ পথত উন্নয়নৰ ধাৰাত যোগদান কৰিব বিচাৰে আৰু এতিয়া মই আপোনালোকৰ মাজত আছোঁ, যিসকলে অসুস্থতাৰ বাবে জীৱনত সংগ্ৰাম কৰিব নালাগে, সুখ আৰু শান্তিৰ ব্যৱস্থা হৈছে আৰু ইয়াত আপোনালোকে আশীৰ্বাদ কৰিবলৈ আহিছে। বিহু হৈছে নিজেই উল্লাস আৰু উদযাপনৰ আটাইতকৈ ডাঙৰ উৎসৱ আৰু আজি হাজাৰ হাজাৰ মাতৃ-ভগ্নীসকলে….. মই অসমলৈ বহু বছৰ ধৰি আহিছো। মই অসম ভ্ৰমণ কৰাৰ সময়ত প্ৰত্যেকবাৰেই বিহু পাইছো। কিন্তু আজি মই দেখিলো ইমান সংখ্যক মাতৃ আৰু ভগ্নী একেলগে বিহুত নৃত্য কৰিছে। এই আশীৰ্বাদৰ বাবে মই অসমৰ মাতৃ-ভগ্নীসকলক, বিশেষকৈ এই স্নেহৰ বাবে প্ৰণাম জনাইছো। মই তেওঁলোকক অন্তৰৰ পৰা বহুত ধন্যবাদ জনাইছো।

বন্ধুসকল,

আকৌ এবাৰ, শ্ৰীযুত ৰতন টাটাজী স্বয়ং ইয়াত উপস্থিত হৈছেহি। তেওঁৰ সম্পৰ্ক চাহৰ সৈতে আৰম্ভ হৈছিল আৰু আকাংক্ষালৈ বিস্তাৰিত হৈছিল আৰু আজি তেওঁ আপোনালোকৰ উত্তম সুস্বাস্থ্যৰ বাবে আমাৰ সৈতেও যোগ দিছে। মই তেওঁকো স্বাগতম জনাইছো আৰু আকৌ এবাৰ এই বহুতো নতুন সুবিধাৰ বাবে আপোনালোকক শুভকামনা জনাইছো।

অশেষ ধন্যবাদ ৷

মোৰ সৈতে সৰ্বশক্তিৰে কওক-

ভাৰত মাতাৰ জয় !

ভাৰত মাতাৰ জয় !

ভাৰত মাতাৰ জয় !

অশেষ ধন্যবাদ!

***

DS/ST/NS/MANN