ঙাক-শেল মন্ত্রী, শ্রী রাজনাথ সিংহনা মে ১৯, ২০২২দা নই দিল্লীদা দিফেন্স মন্ত্রালয় (এম.ও.দি.)না শীন-লাঙবা মালেমগী য়োগ নুমিৎ, ২০২২গী কাউন্তদাউনগী থৌরমদা শরুক য়াখ্রে। শ্রী রাজনাথ সিংহনা ঙাক-শেলগী রাজ্য মন্ত্রী, শ্রী অজয় ভত, ফাইনেন্সিএল এদভাইজর (দিফেন্স সর্ভিস), শ্রী সঞ্জিব মিত্তল, দাইরেক্তর জেনেরেল দিফেন্স ইস্তেত, শ্রী অজয় কুমার শর্মা, এম.ও.দি.গী অতোপ্পা সেনিয়র ওফিসিএল অমসুং মীচম মীয়ামগা লোয়ননা থৌরম অসিগী মনুংদা অসন কয়া পাংথোকখি।

ঙাক-শেল মন্ত্রীনা মহাক্কী ৱারোল মনুংদা য়োগবু চহি-কয়াদগী পাংথোক্তুনা লাক্লিবা অসিবু ভারতকী খ্বাইদগী অথোইবা হেরিতেজনি অমসুং মসিনা মীয়ামগী পুন্সিদা অনৌবা শক্তি হাপ্তুনা মখোয়বু মশাগী নুংগী ওইবা মতৌ অমসুং মহৌশাগা অমত্তা ওইহল্লি হায়না ফোংদোকখি। “য়োগনা ৱাখল লাকশিল্লি অমসুং হকশেল ফনা লৈহল্লি। মসিনা ইশাগী থৌদাং নীংথিনা পাংথোকপদা তেংবাংই। য়োগ অসি অখন্নবা মতম অমদা পাংথোকপা থৌওং অমখক নত্তে, মসিদি নুংতিগী থৌদাংশিংবু নীংথিনা অমসুং মীহুম-নাহুম শিংনা পাংথোকপগী ইথিল অমসুং শক্তি পীবনি। য়োগনা ঐখোয়গী ৱাখল খনবগী থৌওং, লৌশিং, করিগুম্বা অমা নীংথিনা পাংথোকপা অমসুং পুক্নিং চঙবগী মতৌবু হেন্না কনখৎহল্লি”, হায়না মহাক্না হায়খি।

শ্রী রাজনাথ সিংহনা য়োগবু নুংগী ৱাখল চরাংনবা অমসুং ৱাখল ৱাবগী মতৌ লৈহন্দবা অমসুং দাইবিতিজ, ব্লদ প্রেসর, হাইপর্তেন্সন অমসুং দিপ্রেসনগুম্বা হকচাংগী লাইনা কয়াগা লান্থেংননবা পাম্বৈ অমনি হায়না ৱাহন্থোক পীখি। কোবিদ-১৯ লাইচৎকা মাইয়োক্নবা ঙম্নবা ইম্ম্যুন ফগৎহন্নবগীদমক্তা য়োগাসন অমসুং প্রনয়ামানা তেংবাংখিবা কয়াবু মহাক্না ময়েক শেনবা পনখি।

প্রধান মন্ত্রী, শ্রী নরেন্দ্র মোদীনা সেপ্তেম্বর ২০১৪দা য়ুনাইতেদ নেসন্স জেনেরেল এসেমব্লী (য়ু.এন.জি.এ.)দা ৱা ঙাঙখিবা অমসুং মসিদা মহাক্না মালেমগী য়োগগী নুমিৎ অমা পাংথোক্নবা মালেমগী খুন্নাইদা হায়খিবা অদুবু ঙাক-শেল মন্ত্রীনা অমুক্কা হন্না ঙসি পনখি। য়ু.এন.জি.এ.না হকশেল অমসুং নুংঙাই য়াইফনা হিংবগী মপুং ওইবা মিৎয়েং পীবা থৌওং ওইনা য়োগবু শকখঙখিবা অদুবু ঙাক-শেল মন্ত্রীনা থাগৎপা ফোংদোকখি।

য়ু.এন.জি.এ.না জুন ২১বু মালেমগী য়োগ নুমিৎ হায়না শকখঙলবা মতুংদা পাংথোকখিবা থৌরম কয়াদা থৱাই য়াওনা শরুক য়াখিবা আর্ম্দ ফোর্স, ইন্দিয়ন কোস্ত গার্দ, দিফেন্স পব্লিক সেক্তর অন্দর্তেকিং অমসুং এম.ও.দি.গী বিভাগ পুম্নমকপু শ্রী রাজনাথ সিংহনা থাগৎখি। মীয়াম্না নুংঙাইবা অমসুং খল-নাইবা পুন্সি হিংনবগীদমক্তা মীয়াম্না য়োগ তৌনবা মহাক্না হায়খি।

****