প্রধানমন্ত্রীগী লোইশঙ
azadi ka amrit mahotsav

পি.এম.না ভারুচতা পাঙথোকপা ‘উৎকর্স সমারোহ’দা ৱা ঙাঙখ্রে

নুপীশিংগী ফিদম ঙাক্লনবা অমদি হিংবদা নুংঙাইহন্নবা পায়খৎখিবা থবকশিংগীদমক্তা থাগৎপা ফোঙদোক্লদুনা লমদমদুগী নুপীশিংনা পি.এম.গী মফমদা অচৌবা রাখি অমা খুদোল তমখি

বিনিফিসিয়রীশিংগী ৱারী ৱাতায় শানখি

“অচেৎপা ফিরেপকা লোয়ননা লৈঙাক্না বিনিফিসিয়রীশিংগী মফমদা পুকচেল শেংনা খুৎ তিংথোক্লবদি ৱাহন্থোক লৈবা মহৈ ফংই”

লৈঙাক অসিগী চহি ৮দি ‘সেবা সুহাসন অমসুং গরিব কল্য়ান্দা’ কত্থোকখ্রে

“ঐগী মঙলান্দি মপুং ফানা য়ৌশিনবদুনি। ঐখোয়না চাদা ১০০ কোনশিন্নবগী মায়কৈদা চঙশিনগদবনি। লৈঙাক্কী মেচিনরীশিংনা মসিদা হৈনবী থমদুনা মীয়াম মরক্তা থাজবা অমা শেমগৎকদবনি”

বিনিফৎসিয়রী ১০০% কোনশিনবা হায়বদি সবকা সাথ, সবকা বিকাসকা লোয়ননা ফুরুপ খুদিংমক্কী কাঙলুপ খুদিংমক্কী মীওইশিংদা ফংহনবা হায়বনি

Posted On: 12 MAY 2022 12:07PM by PIB Imphal

প্রধান মন্ত্রী শ্রী নরেন্দ্র মোদীনা ঙসি ভিদিও কন্ফরেন্সিংগী খুত্থাঙদা গুজরাতকী ভারুচত পাঙথোকপা ‘উৎকর্স সমারোহ’দা ৱা ঙাঙখ্রে‍। থৌরম অদু মথৌ তাবা মীওইশিংদা মতম চানা শেলগী তেঙবাঙ ফংহনবদা মতেং পাংগদবা স্তেত লৈঙাক্কী মরুওইবা স্কিম মরি দিস্ত্রিক্ত অদুদা ১০০% সেচুরেসন ফংবা ঙমখিবগা মরী লৈননা পাঙথোকপনি‍। গুজরাতকী মুখ্য মন্ত্রী শ্রী ভুপেন্দ্রভাই পতেল অমসুং অতৈ মীওই কয়া থৌরমদুদা শরুক য়াখি‍।

লৈবাকসিগী নুপীশিংগী ফিদম ঙাক্নবা অমদি হিংবদা নুংঙাইহন্নবগী পায়খৎলিবা থবকশিংগীদমক্তা মহাকপু থাগৎলদুনা অমদি পুন্সি নুংশাংনবগীদমক্তা লমদমদুগী নুপীশিংনা প্রধান মন্ত্রীগী মফমদা অচৌবা রাখি অমা খুদোল তমখি‍। প্রধান মন্ত্রীনা তোঙান তোঙানবা স্কিমশিংগী বিনিফিসিয়রীশিংগা ৱারী শানখি‍।

মমীৎ উবা ঙমদ্রবা বিনিফিসিয়রী অমগা ৱারী শানরদুনা, প্রধান মন্ত্রীনা মহাক্কী মচানুপীশিংগী মহৈ মশিংগী মরমদা পাউহংখি‍। মচানুপীশিংদুনা মপাগী ফীভমদুদা মপুক্নিং নুংশিরকখি‍। মথম্মোয় শোক্লবা প্রধান মন্ত্রীনা মহাক্কী মিনুংশিনা মাগী মথৌনা ওইরিবনি হায়না থেমখি‍। প্রধান মন্ত্রীনা মহাক অমসুং মাগী ইমুংনা কমদৌনা ইদ পাঙথোকখিবগে হায়নসু হংখি‍। মহাক্না বিনিফিসিয়রী অদুবু ভেক্সিন কাপথোকপগী অমদি মহাক্কী মচানুপীশিংগী মঙলান মখোঙ শোমবিবগীদমক্তা থাগৎ ৱাহৈ ফোঙদোকখি‍। প্রধান মন্ত্রীনা নুপী বিনিফিসিয়রী অমগা ৱারী শানরদুনা মহাক্কী পুন্সিগী মরমদা হংখি অমদি ইকায়খুম্নবা ঙাক্না মাগী পুন্সি হিংনবগী ফিরেপ্পু থাগৎখি‍। নহা ওইরিবা লুখ্রাবী অমনা প্রধান মন্ত্রীগী মফমদা মাগী অঙাঙশিংদা মহাক্না কমদৌনা অফবা পুন্সি অমমম ফংহন্নবগী মহাক্কী খোঙচৎকী মরমদা পাউদমখি‍। প্রধান মন্ত্রীনা মহাকপু অপীকপা শেল তুংশিন্নবা অমদি মরী লৈনবা ওথোরিতীশিংদা মহাক্কী ফিরেপ লৈবা খোঙচৎ অদুদা ঙাক্লৌ পীননবা ৱাফম থমখি‍।

তিল্লিবা মীয়ামদুদা ৱা ঙাঙলদুনা, প্রধান মন্ত্রীনা ঙসিগী উৎকর্স সমারোহ অসি অচেৎপা ফিরেপকা লোয়ননা লৈঙাক্না পুকচেল শেংনা বিনিফিসিয়রীশিংদা খুৎ তিংথোকপদগী ফংলিবা মায় পাকপগী খুদম অমনি হায়বা ৱাফম থমখি‍। সোসিএল সিক্যুরিতীগা মরী লৈনবা মরুওইবা স্কিম মরি অসিদা চাদা ১০০ সেচুরেসন ফংবা ঙমখিবদগীদমক্তা মহাক্না ভারুচ দিস্ত্রিক্ত এদমিনিস্ত্রেসন অমসুং গুজরাত লৈঙাকপু থাগৎখি‍। বিনিফিসিয়রীশিংগী মফমদা ফাওরিবা অপেনবা অমদি থাজজববু প্রধান মন্ত্রীনা পাউদমখি‍। ঈ-পাউ খঙবা ৱাৎপনা মরম ওইরগা ত্রাইবেল, এস.সি. অমসুং মাইনোরিতী ফুরুপকী মীওই কয়া অমা স্কিমশিং অসিগী কান্নবা ফংদনা লৈরি‍ হায়না মহাক্না হায়খি‍। সবকা সাথ সবকা বিকাস অমসুং পুকচেল শেংবা মতৌনা য়েৎননিংঙাই লৈতনা অফবা মহৈ পুরকই হায়নসু মহাক্না ফোঙদোকখি‍।

লৈঙাক অসিগী লাক্কদৌরিবা ৮শুবা কুমওন থৌরমগী মতাঙদা পল্লদুনা প্রধান মন্ত্রীনা লৈঙাক অসিগী হৌখিবা চহি ৮ অসিদি মীয়ামগী থৌগল অমসুং লায়রবশিংগী য়াইফনবগীদমক্তা কত্থোকখ্রে হায়না হায়খি‍। মহাক্কী লৈঙাক্লোনগী মায় পাকপগী মরম মহাক্না লায়রবা, চাউখত্তবা অমদি খুদোংচাবা কয়া ফংদবা পুন্সি মহিং অমদা হিংলকপদা থেংনরকপশিংদগী ফংলকপা ৱাখল লৌশিংশিং অদুননি হায়না মহাক্না হায়খি‍। লায়রবা অমদি মীচম মীয়ামগী অৱাৎ-অপাগী মরমদা মহাক মশানা থেংনরকপশিংদা য়ুম্ফম ওইদুনা মহাক্না থবক তৌখি হায়রদুনা, মহাক্না ফংফম থোকপা মীপুম খুদিংমক্তা হায়রিবা স্কিমশিং অসিগী কান্নবা ফংহনগদবনি হায়না ফোঙদোকখি‍। গুজরাতকী লৈহাওনা মহাক্কী মফম অমদা মায় পাকপা খরদা পেন্থোক্তুনা লৈতনবা তমবিখি অমদি মহাক্না মতম পুম্নমক্তা মীয়ামগী য়াইফ থৌরাংশিংগী মঙম অমসুং কোনশিনবগী চাং হেন্না পাকথোক চাউথোকহন্নবা অমদি ফগৎহন্নবা পান্দম থম্লি হায়না মহাক্না হায়খি‍। “ঐগী মঙলান্দি মপুং ফানা য়ৌশিনবদুনি‍। ঐখোয়না চাদা ১০০ কোনশিন্নবগী মায়কৈদা চঙশিনগদবনি‍। লৈঙাক্কী মেচিনরীশিংনা মসিদা হৈনবী থমদুনা মীয়াম মরক্তা থাজবা অমা শেমগৎকদবনি”

প্রধান মন্ত্রীনা ফোঙদোকখিবদা, ২০১৪দা লৈবাক অসিগী মীশিংগী তঙ্খায় অমগী ময়াদি তোইলেৎ, ভেক্সিনেসন, ইলেক্ত্রিসিতী কন্নেক্সন অমসুং বেঙ্ক একাউন্তনচিংবা খুদোংচাবশিং ফংলমদে‍। হৌখৎবা চহিশিং অসিদা মীয়ামগী হোৎনজমলগা লোয়ননা ঐখোয়না স্কিম কয়া অমা ১০০% সেচুরেসন ফংবা ঙমবগী ফীভমদা পুরকপা ঙম্লি‍। চহি ৮গী মতুংদা ঐখোয় ইশানা ইশাবু অনৌবা ফিরেপ অমসুং খোঙফমগা লোয়ননা অমুক হন্না কত্থোকমিন্নবা চঙই হায়না প্রধান মন্ত্রীনা হায়খি‍।

বিনিফৎসিয়রী ১০০% কোনশিনবা হায়বদি সবকা সাথ, সবকা বিকাসকা লোয়ননা ফুরুপ খুদিংমক্কী কাঙলুপ খুদিংমক্কী মীওইশিংদা ফংহনবা হায়বনি হায়না প্রধান মন্ত্রীনা ফোঙদোকখি‍। লায়রবশিংগী য়াইফনবগীদমক্তা পায়খৎলিবা স্কিম অমত্তদা মীওই অমত্তা চিত্থহল্লোইদবনি‍। মসিনা মোইথেমগী রাজনিতিসু লোইহল্লগনি‍। সেচুরেসন হায়বদি কান্নবশিং অদু খুন্নাইগী মমৈদা লেপ্লিবা মীওই অদুগী মনাক্তা য়ৌহনবা হায়বনি‍।

লমদম অদুগী লুখ্রাবীশিংনা মহাক্কী মফমদা খুদোল তৌরকখিবা রাখিগী শক্লোন্দা মহাক্কী মফমদা থৌনা হাপ্পিখিবগীদমক্তা মহাক্না লমদমদুগী নুপীশিংবু থাগৎখি‍। মখোয়গী য়াইফরোলশিং মহাক্কীদমক্তা চুঙ্গোয়গুম্বনি অমদি মহাকপু হেন্না কন্না হোৎননবগীদমক্তা পুক্নিং থৌগৎলি হায়না মহাক্না হায়খি‍।

মীয়ামগী হোৎনজমল অমদি থাজবনা মরম ওইরগা মহাক্না রেদ ফোর্ত মথক্তগী সেচুরেসনগী পান্দম লাউথোকপা ঙমখিবনি হায়না প্রধান মন্ত্রীনা হায়খি‍। মসি সোসিএল সিক্যুরিতীগী অচৌবা থৌরম অমনি‍। মহাক্না কেম্পেন অদুবু লায়রবশিংদা ইকায়খুম্নবা ফংহনবনি (গরীব কো গরিমা) হায়বা ৱাফমগা লোয়ননা লোইশিনখি‍।

গুজরাতিদা ৱা ঙাঙলদুনা মহাক্না ভারুচকী কম্মর্সিএল অমসুং নাৎকী ওইবা হেরিতেজশিং নীংশিংখি‍। মহাক্কা ভারুচকা মতম কুইনদগী লৈনরকপা মরীবুসু মহাক্না নীংশিংখি‍। ইন্দস্ত্রী চাওখৎপা অমসুং লমদমদুগী নহাশিংগী মঙলান মঙফাওনরকপনা ভারুচপু চাওখৎপগী মরুওইবা লম্বীদা থম্লকপনি হায়না মহাক্না ফোঙদোকখি‍। মহাক্না শেন্মিৎলোনো মহৈ-মশিং, হকশেল অমসুং লম্বী থোংনচিংবা অনৌবা হীরমশিংদা লৈরিবা মতিংশিংগী মতাঙদসু ৱাফম কয়া থমখি‍।

**********



(Release ID: 1824714) Visitor Counter : 59