কোৱিন প্লেৎফোর্মদা তেক্নিকেলগী অশোইবা লৈবনা মরম ওইরগা পুনে জিলাগী বেনিফিশরী লাখ ২.৫দা কোবিদ ভেক্সিনগী অহানবা দোজ কাপ্পগী সর্তিফকেৎ ২ পীরে হায়না মিদিয়াগী পাউদম খরনা মরাল শীরক্লি।

কোৱিন্না ভারতকী কোবিদ-১৯গী তীকা থাবগী প্রোগ্রামদা দিজিতেলগী য়াঙলেন শরু ওইনা মায় পাক্না মথৌ পাংথোকখি। মসিনা প্লেৎফোর্ম অসিদা রেজিস্তর তৌবা ভারত মচা করোর ১০০ হেনবদা কোবিদ-১৯ ভেক্সিন দোজ করোর ১৯০ হেন্না কাপ্পা ঙমহনখি। মসিগুম্বা মায় পাকপা অসি নুমিৎ অমা ফাওবা দাউন-তাইম থোক্তনা পাংথোকপা ঙমখিবনি।

প্লেৎফোর্ম অসিনা শিজিন্নবা লায়বা অমসুং চম্বগী মতৌ অসিদা চাউথোকচরিবনি। প্লেৎফোর্ম অসিদা রেজিস্তর তৌনবগীদমক্তা বেনিফিশরীদা মিদিয়া অহুম – মফমদা লাকপা (ওফলাইন), ওনলাইন পোর্তেল অমসুং হেল্পলাইন অমসুং সি.এস.সি. (কম্মন সর্ভিস সেন্তর)গী খুত্থাংদা তেংবাংবা হায়রিবা পাম্বৈ পীরি। মীওই অমনা রেজিস্তর তৌনবগীদমক্তা মশাগী মোবাইল নম্বর খক্তমক পীবগী মথৌ তাই, অমসুং মসিগা লোয়ননা, ভেক্সিন কাপফমদা লাক্তুনা ভেক্সিন কাপ্পা য়াবগী খুদোংচাবা ফংনবা নত্ত্রগা মতম লৌনবগীদমক্তা মমিং, চহি (পোকপগী চহি) অমসুং জেন্দর পীবগী মথৌসু তাই। শক্তাক চেগী ওইনদি, ফোতো আইদেন্তিতী প্রুফ ৯দগী অমা খনবা য়াবগী খুদোংচাবসু পীরি।

অতোপ্পা ৱাফম অমনা, ভেক্সিনগী অহানবা দোজ কাপ্লবা মতুংদা বেনিফিশরী অমনা অহানবা দোজ কাপ্পদা শিজিন্নখিবা মান্নবা মোবাইল নম্বর শিজিন্নদুনা মান্নবা ভেক্সিন অসিগী অনিশুবা দোজ কাপকদবনি নত্ত্রগা কাপ্নবা মতম লেপ্পগী মথৌ তাই। মান্নবা বেনিফিশরী অমদা অহানবা অমসুং অনিশুবা দোজ কাপ্পগী অকুপ্পা মরোল মরী লৈনহনবগী মসিনা অমত্তা ঙাইরবা থৌওংনি। করিগুম্বা বেনিফিশরী অমনা অনিশুবা দোজকীদমক্তা তোঙানবা মোবাইল নম্বর শিজিন্নদুনা ভেক্সিন কাপ্পগী মতম লেপ্পা তারবদি, মদুবু বেনিফিশরী অদুগী অহানবা দোজ ওইনা মথন্নতা লৌখিগনি। মখা তাবা ওইনা, তোঙানবা মোবাইল নম্বর অনিগীদমক্তা মান্নবা শক্তাক চে শিজিন্নবগী অয়াবা পীদে।

রেজিস্তর তৌখ্রবা মোবাইল নম্বর অমগী মখাদা মীওই অমনা শক্তাক চে অনি পীশিনবা য়াওখিবগী মতাংদা খন্নবগী খুদোংচাবা অমসু লৈ। বেনিফিশরী অমগী মমিং, চহি অমসুনফগ জেন্দরনা মহাক্না পীরক্লিবা ফোতো আই.দি. প্রুফকা করিগুম্বা মান্নবা তারবদি, অহানবা দোজকী সর্তিফিকেত অনিবু অমত্তা ওইনা পুন্সিন্দুনা দোজ অনিমক্কী ওইবা মপুং ফানা ভেক্সিন কাপ্লে হায়বগী সর্তিফিকেৎ অমখক্তা পুন্সিন্নবা কোৱিন্না হায়রক্কনি।

তোঙানবা মোবাইল নম্বর অমসুং ফোতো আই.দি. প্রুফ অনি শিজিন্নদুনা রেজিস্তর তৌরকপা বেনিফিশরী অমগী অহানবা দোজ কাপ্পগী সর্তিফিকেৎ অনিমক সীস্তেম অসিনা মশক খঙফম থোকই হায়না খনবা অসিদি য়ুম্ফম য়াওদবনি। মীওই বিলিয়ন হেন্না লৈবা লৈবাক অসিদা মমিং, চহি অমসুং জেন্দর মান্নবা মীওইশিং লিশিং লাখ কয়া লৈরমগনি। করিগুম্বা হায়রিবা সর্ভিস অসিগুম্না পীরম্বা তারবদি, ঐখোয়গী মিং, চহি অমসুং জেন্দরগা মান্নবা মীওই অমত্তা লৈবাক অসিদা লৈতবা ওইসনু খল্লগা ঐখোয়না অৱাবা কয়া মাইয়োক্নরমগনি। 

মরম অদুনা, মেনুএল দেতা এররবু তেক্নিকেল ওইবা অশোইবনি হায়বসিদি য়ুম্ফম য়াওদবনি। বেনিফিশরী অমনা মহাক্কী পার্ত্নর, মপুরোইবা/লোয়নবীগা লোয়ননা অতোপ্পগী মোবাইল নম্বর অমসুং মখোয়গী দ্রাইবিং লাইসেন্সকী মখাদা রেজিস্তর তৌদুনা অহানবা দোজ কাপ্পদি য়াওরম্বা য়াই। অদুগা মান্নবা মীওই অদুনা মশাগী পান কার্দকা লোয়নবা মশাগী মোবাইল নম্বরগী মখাদা অনিশুবা দোজ কাপ্পা মতমদা বেনিফিশরী অসিগী মফমদা অহানবা দোজ কাপ্পগী সর্তিফিকেৎ অনি লাকপদা ঙকফম থোক্তে। মসিগী মরমদি, সীস্তেম অসিনা মখোয় অনিবু তোঙানবা মীওইনি হায়না খনবগীনি।

অসিগুম্বা মেনুএল দেতা এন্ত্রী এরর অসি থোক্তবা নত্তে, অমসুং অসিগুম্বা থৌওংগী তাংদা কোৱিন সীস্তেম্না উশিন্নদনা লৈতে অমসুং মসিগীদমক্তা চাউরবা গ্রাইবেন্স মেনেজমেন্ত সীস্তেম অমা লৈরি। কোৱিনগী ওনলাইন পোর্তেল অসিদা ‘ৱাকৎ থাংগৎসি’ হায়বা পথাপ মনুংদা য়াওরি অমসুং মসিনা মীয়ামগী ফীদবেক্কীদমক্তা মতম পুম্বদা হাংদুনা লৈ। সি.এস.সি. অমসুং হেল্পলাইন্দা ফোন তৌবা য়াবগী খুদোংচাবা লৈদুনা অয়াম্বা মতমদা থেংনবা শিংনবা নিপানবু মীওইশিংনা শেমদোকপা য়াহল্লি। মান্নবা ওইনা, মীওই অমা হেক্তনা মহাক্কী অহানবা দোজকী সর্তিফিকেৎপু য়াম্না লায়না পুন্সিনবা য়াই। হায়রিবা অসি মহাক্কী মমিং, চহি অমসুং জেন্দর মান্নবা অমসুং রেজিস্তর তৌরবা একাউন্ত অনিমক মহাক্না খঙবা মতমদা পাংথোকপা য়াগদবনি।

কোৱিন অসি য়াম্না শিজিন্নবা নুংঙাইবা অমসুং থাজবা য়াবা প্লেৎফোর্ম অমনি অমসুং লৈবাক্কী মীশিং অপুনবদা রেকোর্দ ওইবা খোঙজেলদা তেংবাংবা য়াহন্নবগীদমক্তা শেমখ্রবনি। মীওইবগী অশোইববু ‘তেক্নিকেল অশোইবনি’ হায়দুনা অসিগুম্লবা মীয়ামগী য়াইফনবগীদমক্তা অহিং নুংথিল নাইদনা দিজিতেলগী খুত্থাংদা শেন্নরিবা তীম্বু মিংচৎ থীহন্নবা হোৎনরকপা উবসি থম্মোই শোক্নীংঙাই ওই।

*****