প্রধান মন্ত্রী শ্রী নরেন্দ্র মোদী এপ্রিল ২৪, ২০২২গী অয়ুক পুং ১১:৩০রোম তাবদা নেস্নেল পঞ্চায়তি রাজ নুমিৎ থৌরমদা শরুক য়ানবগীদমক জম্মু অমসুং কাস্মিরদা চৎকদৌরি অমদি লৈবাক পুম্বগী গ্রাম সভাশিংগী মফমদা ৱা ঙাঙগদৌরি‍। মহাক্না সমবা দিস্ত্রিক্তকী পল্লি পঞ্চায়ত্তা চৎকনি‍। মহাক্কী খোঙচৎ মনুংদা প্রধান মন্ত্রীনা লুপা করোর ২০,০০০লোমগী ওইগদবা তোঙান তোঙানবা চাউখৎ থৌরাংগী প্রোজেক্তশিং শঙ্গাবা অমদি উরেপ উয়ুং তমবগী থবক তৌরমগনি‍। মহাক্না অমৃৎ সরোবর থৌরাংসু হৌদোক্কনি‍। মতুংদা, নুমিদাংৱাইরম পুং ৫দা, প্রধান মন্ত্রীনা মহাক্কী মফমদা ১বা লতা দীননাথ মঙ্গেস্কর মনা পীগদৌরিবা মুম্বাইদা পাঙথোক্কদবা মাস্তর লতা দীননাথ মঙ্গেস্কর এৱার্দ সেরেমোনী শরুক য়াগনি‍।

জে. এন্দ কে.দা পি.এম.

ওগস্ত ২০১৯দা জে এন্দ কেগা মরী লৈননা সংবিধানগী ওইবা অহোংবা পুরকখিবগা মতুংদগী, লৈঙাক অসিনা হান্না পানরুদবা খোঙজেলদা লমদম অসিগী মীয়ামগী পুন্সি মহিং লায়থোকহন্নবা অমদি লৈঙাক্লোন মশক থোক্না ফগৎহন্নবা মখল কয়াগী অহোংবশিং পুরকপদা মীৎয়েঙ চঙদুনা লাক্লি‍। মহাক্কী খোঙচৎ অসিদা শঙ্গারমগদৌরিবর অমদি উরেপ উয়ুং তম্লমগদৌরিবা প্রোজেক্তশিং অসি তঙায় ফদনা মথৌ তাবা মচাকশিং ফংহনবদা, চত্থোক চৎশিনগী পাম্বৈ লায়থোকহনবদা অমদি লমদমসিদা মচাক মথুম শেমগৎপদা চাউনা কান্নগনি‍।

প্রধান মন্ত্রীনা লুপা করোর ৩১০০ চঙনা শাখিবা বনিহাল কাজিগন্দ রোদ তন্নেল শঙ্গারমগনি‍। কিলোমিতর ৮.৪৫ শাংবা তন্নেল অসিনা বনিহাল অমসুং কাজিগন্দগী অরাপ্পা কিলোমিতর ১৬ হন্থহনগনি অমদি চৎপগী মতম পুং অমগা মখায়রোম হন্থহনগনি‍। মসি ত্যুব অনিগী তন্নেলনি – অমমম্না মায়কৈ অমমমদা চৎপগী শীজিন্নবনি – ত্যুব অনি অসি শেম শানবগী অমদি অথু অকায়দা থোকপা য়ানবগীদমক মিতর ৫০০ খুদিংগী লম্বী অমনা শমজিন্নৈ‍। তন্নেল অসিনা জম্মু অমসুং কাস্মিরগী মরক্তা নোংজু নুংশা নাইদনা শম্নহনগনি, অমদি মফম অনিসুবু হেন্না নকশিন্নহল্লগনি‍।

প্রধান মন্ত্রীনা লুপা করোর ৭৫০০ চঙনা শেমগৎকদৌরিবা দিল্লী-অমৃতসর-কত্রা এক্সপ্রেসৱেগী লম্বীগী পেকেজ অহুমগী উরেপ উয়ুং তম্লমগনি‍। মখোয়শিংদুদি এন.ঐচ.-৪৪গী বালসুৱাদগী গুরহা বেলদরন, হিরানগর ফাওবা; গুরহা বেলদরন, হিরানগরদগী জখ, বিজয়পুর ফাওবা; অমদি জম্মু এয়র্পোর্তকসু শম্নগদৌরিবা জখ, বিজয়পুরদগী কুনজ্বানি, জম্মু ফাওবগী – লেন৪/৬কী এক্সেস কন্ত্রোল্দ দিল্লী-কত্রা-অমৃতসর এক্সপ্রেসৱে শেমগৎ শাগৎপগী থবকশিংনি‍।

প্রধান মন্ত্রীনা রেতল অমসুং ক্বার হাইদ্রোইলেক্ত্রিক প্রোজেক্তশিংগী উরেপ উয়ুংসু তমগনি‍। মেগাৱাৎ ৮৫০গী রেতল হাইদ্রোইলেক্ত্রিক প্রোজেক্ত অসি লুপা করোর ৫৩০০লোম চঙনা কিস্ত্বর দিস্ত্রিক্তকী চেনব তুরেল মথক্তা শাগদবনি‍। মেগাৱাত ৫৪০গী ক্বার হাইদ্রোইলেক্ত্রিক প্রোজেক্ত অসিনা লুপা করোর ৪৫০০ চঙনা কিস্ত্বর দিস্ত্রিক্তা চেনব তুরেলগী মথক্তা শাগদবনি‍। প্রোজেক্ত অনি অসিনা লমদমসিগী মৈগী মথৌ তাবশিং ফংহনবা ঙম্লগনি‍।

জে এন্দ কেদা জন ঔসধি কেন্দ্রগী নেৎৱর্ক হেন্না পাকথোক চাউথোকহন্নবা অমদি অফবা জেনেরিক হিদাকশিং অহোঙবা মমলদা ফংহন্নবগীদমক, কেন্দ্র ১০০ মথৌ তৌবা হৌখ্রে অমদি প্রধান মন্ত্রীনা লৈবাক মীয়ামদা কত্থোক্কনি‍। হায়রিবা কেন্দ্রশিং অসি য়ু.তি. অসিগী কাচিন কোয়াদা লৈবনি‍। লৈবাকসিগী খ্বাইদগী অহানবা পঞ্চায়তপু কার্বোন ন্যুত্রেল ওইহনগদৌরিবা পল্লিদা শাগৎলিবা কিলোৱাৎ ৫০০গী সোলার পৱার প্লান্তসু মহাক্না শঙ্গাগনি‍।

প্রধান মন্ত্রীনা স্বামিত্ব কার্দসু স্কিম অসিগী মখাদা লৈরিবা বিনিফিসিয়রীশিংদা য়েন্থোক্কনি‍। নেস্নেল পঞ্চায়তি রাজ নুমিত্তা মখোয় মখোয়গী মায় পাকপশিংগীদমক তোঙান তোঙানবা কাঙলুপশিংদা মনা ফংখ্রবা পঞ্চায়তশিংদা মহাক্না মনাগী শেন্ফমসু খুৎশিন্নগনি‍। প্রধান মন্ত্রীনা লমদমদুগী খুঙ্গঙগী অরিবা মতমগী লনশিং উৎলিবা ইনতেক ফোতো গেল্লরী, অমসুং ভারত্তা মতৌ তমজনিংঙাই ওইবা স্মার্ত ভিলেজ শেমগৎনবগী খুঙ্গঙগী ওন্ত্রপ্রিন্যুরসিপ্তা য়ুম্ফম ওইদুনা শেমগৎপা মোদেল – নোকিয়া স্মার্তপুরদসু চৎকনি‍।

অমৃৎ সরোবর

ঈশিং তুংফমশিং নৌনা ঈশিং তুংহন্নবগীদমক, জে এন্দ কেগী খোঙচৎ মনুংদা প্রধান মন্ত্রীনা অমৃৎ সরোবর কৌবা অনৌবা থৌরাং অমসু হৌদোক্কনি‍। থৌরাং অসি লৈবাকসিগী দিস্ত্রিক্ত খুদিংমক্তা ঈশিং তুংফম ৭৫ শেমগৎপা অমদি নৌনা ঈশিং তুংহন্নবগী পান্দমগা লোয়ননা পায়খৎপনি‍। মসি লৈঙাক অসিগী অজাদি কা অমৃৎ মহোতসব পাঙথোকপগী অতোপ্পা মওং অমনি‍।

মুম্বাইদা পি.এম.

প্রধান মন্ত্রীনা নুংথিল পুং ৫ তাবা মতমদা মুম্বাইদা মাস্তর দীননাথ মঙ্গেস্কর এৱার্দ সেরেমোনীদা শরুক য়াগনি‍। থঔরম অসিদা প্রধান মন্ত্রীগী মফমদা ১বা লতা দীননাথ মঙ্গেস্কর এৱার্দ লান্থোক্কনি‍। ভারত রত্ন লতা মঙ্গেস্করবু নীংশিংদুনা লিংখৎলিবা মনা অসি চহি খুদিংগী লৈবাক শেমবদা শিংথানিংঙাই ওইবা থৌদাং লৌবা মীওই অমমমদা পীগনি‍।

****