প্রধান মন্ত্রী শ্রী নরেন্দ্র মোদীনা ঙসি গুজরাতকী গান্ধীনগরদা গ্লোবেল আয়ুশ ইনভেস্তমেন্ত অমসুং ইন্নোভেসন সম্মিৎ ২০২২ হৌদোকখ্রে। সেক্তর অসিনা শাহৌ চাউনা লৌবা য়াবগী ফিভম উৎপনা মরম ওইরগা নুমিৎ হুম্নি চত্থগদবা আয়ুশ গ্লোবেল সম্মিত অসিদা ওন্তোপ্রিনর, ইন্দস্ত্রী, স্তার্ত-অপ অমসুং অতোপ্পা স্তেকহোলদরশিংদা পুক্নিং থৌগত্তুনা মখোয়না আয়ুশতা ইনভেস্তমেন্ত তৌবা হেনগৎহন্নবা ৱারী-ৱাতাই কয়া শাবগী থৌওং উগনি।

গ্লোবেল আয়ুশ ইনভেস্তমেন্ত অমসুং ইন্নোভেসন সম্মিত ২০২২ হৌদোকপগী সেসন্দা মোরিসসকী প্রধান মন্ত্রী, শ্রী প্রবিন কুমার জগনোথ, দবল্যু.ঐচ.ও.গী দাইরেক্তর জেনেরেল, দাঃ তেদ্রোস অধানোম ঘেব্রেয়েসস, হকশেল অমসুং য়াইফ য়ুম্বালগী কেন্দ্র মন্ত্রী, দাঃ মনশুখ মন্দাবিয়া, আয়ুশকী কেন্দ্র মন্ত্রী, শ্রী সর্বানন্দ সোনোৱাল, গুজরাতকী মুখ্য মন্ত্রী, শ্রী ভুপেন্দ্র পতেল, রাজ্য মন্ত্রী, দাঃ মুঞ্জপারা মহেন্দ্রভাই কালুভাইগা লোয়ননা এম্বেসেদর, মীরমগী মীথুংলেন, ইনভেস্তর, ইন্দস্ত্রীগী অখঙ-অহৈ অমসুং মরু ওইবা অতোপ্পা স্তেকহোলদর কয়ানা শরুক য়াখি।

প্রধান মন্ত্রী, শ্রী নরেন্দ্র মোদীনা মহাক্কী থৌরম হৌদোকপগী ৱারোলদা অসুম্না হায়খি, “আয়ুশকী হিদাক, সপ্লিমেন্ত অমসুং অকেপোৎ কয়া পুথোকপগী লমদা হান্নগুম লৈরমদবা শাহৌ লৌবগী ফিভম ঐখোয়না উবা ফংলে। ইং ২০১৪দা শুপ্নগী য়ু.এস. দোল্লর বিলিয়ন ৩দগী তারম্বা আয়ুশ সেক্তরনা, ঙসিদি দোল্লর বিলিয়ন ১৮ হেনখ্রে। আয়ুশকী পোত্থোকশিং মীয়ামদা খঙবা হেলহন্নবগীদমক্তা মমাংগী চহি খরদা হান্নগুম পাংথোক্তবা থবক কয়া পায়খৎখি”।

প্রধান মন্ত্রীনা আয়ুশ সেক্তরগী ওইনা অনৌবা খোঙথাং কয়া অমা লাউথোকখি, মসিগী মনুংদগী খ্বাইদগী অহানবনা আয়ুশকী পোত্থোকশিংগী অখন্নবা মার্ক থম্বনি। মসিনা মালেমগী মীওই খুদিংদা মখোয়না মগুন লৈবা আয়ুশকী পোত্থোক শিজিন্নরি হায়বগী থাজবা পীগনি। লৈবাক শিনবা থুংবদা আয়ুশকী পোত্থোকশিংগী প্রোমোসন, রিসর্চ অমসুং মেন্যুফেকচরিং তৌবদা পুক্নিং থৌগৎনবগীদমক্তা সরকারনা আয়ুশ পার্কশিংগী নেতৱর্ক অমা শেমগনি। ‘আয়ুশ আহার’ কৌবা অনৌবা কাঙলুপ অমসু লাউথোকখ্রে অমসুং মসিনা হর্বেল ন্যুত্রিস্নেল সপ্লিমেন্ত পুথোকপশিংদা য়াম্না চাউনা তেংবাংগনি।

মখা তাবা ওইনা, আয়ুশ লাইয়েংগী কান্নবা লৌনবগীদমক্তা ভারত্তা লাকপা পাম্বা মীরম লৈবাক্কী নাগ্রিকশিংগী ওইবা মরু ওইবা অতোপ্পা খোঙথাং অমসু লাউথোকখ্রে। ভারতনা য়াম্না অথুবা মতমদা আয়ুশকী অখন্নবা ভিজা কেতগরী অমা হৌদোক্লগনি। হৌজিক্কী মতম, য়ুনিকোর্নগী য়ুগ অসিগী মতাংদা তাক্লদুনা, প্রধান মন্ত্রীনা ইং ২০২২ মক্তদা, ভারতকী স্তার্ত-অপ ১৪না য়ুনিকোর্ন ক্লবকী মনুং চনখি হায়না পাউদমখি। “ঐখোয়গী আয়ুশ স্তার্ত-অপ্তগীসু য়াম্না অথুবা মতমদা য়ুনিকোর্ন থোক্লক্লগনি হায়বগী ঐহাক্না থাজবা থম্মি”, হায়না মহাক্না হায়খি।

প্রধান মন্ত্রী, শ্রী নরেন্দ্র মোদীনা আয়ুশ এক্সপোর্ত প্রোমোসন কাউন্সিল অমসুং আয়ুশ ইনফোর্মেসন হব, আয়ুসোফ, আয়ুশ নেক্স অমসুং আয়ুশ জি.আই.এস. মনুং চনবা আয়ুশ আই.সি.তি. খোঙথাং হৌদোকপসু লাউথোকখি। প্রধান মন্ত্রীনা ‘প্রোফেসর আয়ুশমান’ কৌবা কোমিক লাইরিক অমসু ফোঙখি। লাইরিক অসিনা আয়ুশকী পথাপ অমসুং পোত্থোকশিংনা কোবিদ-১৯ খক্তা নত্তনা অতোপ্পা লাইনাগা মতৌ করম্না মাইয়োক্নবগে হায়বা তাক্লি।

প্রধান মন্ত্রীনা ঙসিগী থৌরম অসিদা ওল ইন্দিয়া ইন্সতিত্যুৎ ওফ আয়ুর্বেদ (এ.আই.আই.এ.)না স্তার্ত-অপ ইন্দিয়াগা খুৎশম্নদুনা পাংথোকখিবা ‘আয়ুশ স্তারত-অপ চেলেঞ্জ’কী মকোক-মথং তাবশিংদা মনা পীখি। হৌদোকপগী সেসন অসিদা সরকার অমসুং মালেমগী ইন্সতিত্যুসনশিংগী মরক্তা মেমোরেন্দম ওফ অন্দর্স্তেন্দিং ৫গী খুৎয়েক পীনবগী থৌওং য়াওখি। মখোয়শিং অদুদি অসুম্না পীরিঃ অর্জেন্তিনাগা পীনবা রাস্ত্রিয় আয়ুর্বেদ বিদ্যাপীথ (আর.এ.ভি.)কী এম.ও.য়ু.; ওল ইন্দিয়া ইন্সতিত্যুৎ ওফ আয়ুর্বেদ (এ.আই.আই.এ.) অমসুং ব্রাজিলগী মরক্তা আয়ুর্বেদদা একাদমিক্কী ওইবা খুৎশম্নবা লৈহন্নবা পার্তীগী অহুমগী এম.ও.য়ু.; ওল ইন্দিয়া ইন্সতিত্যুৎ ওফ আয়ুর্বেদ অমসুং কেনাদগী তোরোন্তোদা লৈবা য়ুনিভর্সিতী হেল্থ নেতৱর্ক (য়ু.এহ.এন.)গী মরক্তা লৈবা এম.ও.য়ু.; মেক্সিকোগী য়ুনিভর্সিদেদ ওতোনোমা দে নুএভো লীওন (য়ু.এ.এন.এল.)দা আয়ুর্বেদ চেয়র লৈহন্নবা এম.ও.য়ু. অমসুং জয়পুরগী এন.আই.এ. অমসুং ফিলিপিন ইন্সতিত্যুৎ ওফ ত্রেদিস্নেল অমসুং অলতর্নেতিব হেল্থ কেয়র (পি.তি.এ.ঐচ.সি.)গী মরক্তা আয়ুর্বেদ অমসুং হিদাক-লাংথক্কী অতোপ্পা ত্রেদিস্নেল ওইবা পথাপকী মতাংদা তেংবাংনবগী এম.ও.য়ু.।

দাঃ তেদ্রোসনা সেসন অসিদা ৱা ঙাংবদা, ইং ২০১৪দগী হৌনা ১৭%কী চাংদা ওইদুনা আয়ুশ সেক্তরনা মশক থোক্না শাহৌ লৌরি হায়খি। আয়ুশ ইন্দস্ত্রীনা হন্দক্কী চহিগী অরোইবা ফাওবদা য়ু.এস. দোল্লর বিলিয়ন ২৩ য়ৌগনি হায়না পানরি হায়না মহাক্না হায়খি। “নাৎকী হিদাক-লাংথক্কী চৎনবীশিংনা পীবা শাফু খোঙদোক্নবা ঐখোয়না অনৌবা থৌওং চেনবা মহৈ তম্বগী মওং অমসুং আর্তিফিসিএল ইন্তেল্লিজেন্স শিজিন্নবগী থৌওং কয়া থীদোক্লি। নাৎকী হিদাক-লাংথক্কী খুদম ওইরিবা ফম্বাকপু মপাঙ্গল কলহনবনা মসিবু খুন্নাইনা লায়না অমসুং নুংঙাইনা শিজিন্নবা য়াহনগনি অমসুং মসিনা মরম ওইরগা, হকশেলগী মতাংদা অপাম্বা মহৈ, শেন্মিৎলোনগী কান্নবা অমসুং মপুং ওইনা অফবা শাফু ফংগনি”, হায়না মহাক্না মখা তাখি।

শ্রী প্রবিন কুমার জগনোথনা থৌরম অসিদা গুজরাত সরকারবু দবল্যু.ঐচ.ও. গ্লোবেল সেন্তর ফোর ত্রেদিস্নেল মেদিসিন হৌদোকপা অসিগী থাগৎপা ফোংদোকখি অমসুং মোরিসসনা নাৎকী হিদাক লাংথক্না মতমগী হিদাক লাংথক্তা কান্নবা মতেং পাংই হায়বা খঙলে হায়না ফোংদোকখি।

আয়ুশকী কেন্দ্র মন্ত্রী, শ্রী সর্বানন্দ সোনোৱালনা মহাক্কী ৱারোলদা অসুম্না হায়খি, “গ্লোবেল আয়ুশ ইনভেস্তমেন্ত অমসুং ইন্নোভেসন সম্মিৎনা স্তেকহোলদরশিংগী মরক্তা কারবারগী খুদোংচাবা, মালেমগী থাক্তা লৈবা খুদোংচাবশিং তাক্নবগীদমক্তা লৈরিবা মতমগা চুনবা তেক্নোলোজী অমসুং মতমগা চুনবা অনৌবা থৌওং শিজিন্ননবা মালেমগী সম্মিৎ অসিনা ওন্তোপ্রিনরশিংদা পুক্নিং থৌগৎপগী মতাংদা এৱিয়র্নেস লৈহনগনি হায়না থাজবা থম্লি। সম্মিৎ অসিদা ফোংদোক্নবা ৱাফম কয়ানা নহা ওইরিবা ওন্তোপ্রিনরশিংগী মফমদা আয়ুর্বেদ সেক্তরদা লৈরিবা কারবারগী তোঙানবা খুদোংচাবা কয়াগী মতাংদা তাক্কনি হায়বগীসু থাজবা থম্মি”।

আয়ুশ মন্ত্রালয় অমসুং মাইক্রো, স্মোল অমসুং মিদিয়ম ইন্তর্প্রাইস মন্ত্রালয় (এম.এস.এম.ই.)না আয়ুর্বেদ অমসুং ত্রেদিস্নেল মেদিসিনগী অতোপ্পা প্রোফেস্নেলশিংগী মরক্তা ওন্তোপ্রিনরশিপ শেম্লি হায়না মহাক্না মখা তাখি। আয়ুশ মন্ত্রালয়না নহা ওন্তোপ্রিনরশিংনা প্রধান মন্ত্রীগী স্তার্ত-অপ ইন্দিয়া খোঙথাংগা মরী লৈননা আয়ুশতা স্তার্ত-অপ লিংখৎহন্নবা পুক্নিং থৌগৎনবা ওন্তোপ্রিনরশিপ দিভেলপমেন্ত প্রোগ্রাম শেমখ্রে।

নুমিৎ হুম্নি চত্থগদবা সম্মিৎ অসিদা শক্নাইরবা ৱাঙাংলোই ৯০ অমসুং একজিবিতর ১০০গা লোয়ননা প্লেনরী সেসন ৮, রাউন্দতেবল ৬, ৱর্কশোপ অমসুং সিম্পোজিয়ম ২ মনুং চনগনি। সম্মিৎ অসিনা ইনভেস্তমেন্তকী মতিক খঙদোকপদা তেংবাংগনি অমসুং ইন্নোভেসন, রিসর্চ অমসুং দিভেলপমেন্ত, স্তার্ত-অপ ইকোসীস্তেম অমসুং ৱেলনেস ইন্দস্ত্রীবু ইনোৎ হাপকনি। মসিনা ইন্দস্ত্রীগী মকোক থোংবা, একাদমিসিয়ন অমসুং স্কোলরশিংবু অমত্তা ওইনা পুরক্তুনা তুংদা খুৎশম্নরকপা য়াবগী প্লেৎফোর্ম অমা ওইনা মথৌ তৌগনি।

গ্লোবেল আয়ুশ ইনভেস্তমেন্ত অমসুং ইন্নোভেসন সম্মিত অসি গুজরাতকী গান্ধীনগরদা এপ্রিল ২২, ২০২২ ফাওবা চত্থগনি। প্রধান মন্ত্রীনা জাম্নগরদা দবল্যু.ঐচ.ও. গ্লোবেল সেন্তর ফোর ত্রেদিস্নেল মেদিসিন শঙ্গাখ্রবা মতুংগী নুমিত্তা সম্মিত অসি হৌদোকখিবনি।

******