“সেক্রেতরী ব্লিঙ্কন, সেক্রেতরী ওস্তিন, দোক্তর জয়শঙ্কর, প্রেসকী মীওইশিং, ইকায়খুম্নরবী অমসুং খুম্নরবশিং,

ঐনা সেক্রতরীশিং, মখোয়গী খোঙবু, অমসুং মখোয়গী স্তাফশিংবু চীং লেম্লবা ৱারী ৱাতায় অমসুং মখোয়গী তরাম-তরামবা মতৌগীদমক থাগৎচরি‍। ঐখোয়গী নাকল অনিগী ওইবা মরীসিদা লৈরিবা মখোয়গী খোঙফমগীদমক ঐনা পুকচেল শেংনা নুংঙাইবা ফোঙদোকচরি‍।

ঙসি ঐখোয়না য়াম্না ৱাহন্থোক লৈনা অমদি মনুং হঞ্জিন্না খন্ন-নৈনখ্রে‍। মসিনা ভারত-য়ু.এস.কী মরীবু খোঙজেলবু কায়হন্দনা থমবদা অমদি ঐখোয়না পায়খৎলিবা থবক থৌরমশিংবু মাঙদা পুখৎপদা মতেং ওইরগনি‍। ঐখোয়গী অথোইবা লৈবাক অনি অসিগী ওইবা পান্দম ফংমিন্নবগী লমদা অমগা অমগা তেংবাংনবা অমদি মান্নবা ফিরেপ লৈ‍।

ঐখোয়না নাকল অনিগী ওইবা, ঙাকশেল অমসুং মালেমগী ওইবা ৱাফমশিংগী মতাঙদা খন্ন-নৈনখ্রে‍। মালেমগী খ্বাইদগী চাউবা দিমোক্রেসী অমা ওইনা হায়রিবা হীরমশিং অসিদা ঐখোয়গী অপুনবা মীৎয়েঙ লৈরি হায়বসি খঙবদা নুংঙাইবা ফাওই‍। ভারত অমসুং য়ু.এস. অনিমক্কী অপনবা লৈতবা, অমকপা লৈতবা, পুম্নমক য়াওরবা অমসুং চৎন-কাঙলোন্দা য়ুম্ফম ওইবা ইন্দো-পেসিফিক অমসুং ইন্দিয়ন ওসীন রিজনগী মান্নবা মীৎয়েঙ লৈ‍। ঐখোয়গী খোঙবু ওইবগী মরী অসি ইন্দো-পেসিফিক অমসুং ইন্দিয়ন ওসীন রিজন্দা ইং-তপ্পা, মরা চেৎপা অমসুং নুংঙাই য়াইফবা ফীভম পুরকপদা মরুওই‍।

মীফম মনুংদা ঐখোয়গী য়ুম্লোন্নবা অমসুং ইন্দিয়ন ওসীন রিজনদা লৈরিবা ফীভমশিং ঐখোয়না ফোঙদোক্নখি‍। ভারতকী মায়োক্তা খুজিল থৌরাং য়াৎপদা তেরোরিজমবু পাম্বৈ অমা ওইনা শীজিন্নরি হায়বা ৱাফমশিং ময়েক শেংনা থোরকখি‍।

ঐখোয়না হীরম কয়াদা পুন্না চৎমিন্নবসিনা মরুওইবা মহৈশিং পীরি‍। মসিদা ভারতকী দিপার্তমেন্ত ওফ স্পেস অমসুং য়ু.এস.কী দিপার্তমেন্ত ওফ দিফেন্সকী মরক্তা স্পেস সিচুএস্নেল এৱ্যার্নেস এগ্রীমেন্ত খুৎয়েক পীনখিবা; অথুবা মতমদা দিফেন্স স্পেস অমসুং দিফেন্স আর্তিফিসিএল ইন্তলিজেন্স দাইলোগ হৌগদৌরিবা; অতৈ থৌরাং মতাঙদা মশক থোক্না খুমাং চাওশিনবা অমসুং য়ানচেশিং খন্নরিবা; অমদি ঐখোয়গী লান্মীগী এক্সরসাইজকী স্কোপ অমসুং কম্প্লেক্সিতী হেনগৎহন্নিংবগী মান্নবা ৱাখল্লোনশিং য়াওরি‍।

লাইচৎ লৈজরগসু ঐখোয়গী লান্মীগা লান্মীগা চৎমিন্নবগী থৌওং মখা চত্থরি‍। বাহরাইনদা লৈবা মাইকৈ কয়াগী ওইবা কোম্বাইন্দ মেরিতাইম ফোর্সতা (সি.এম.এফ.) ভারতনা এসোসিএৎ পার্ত্নর অমা ওইনা শরুক য়াবসিদা ঐ হরাওই‍। মসিনা নোংচুপথংবা ইন্দিয়ন ওসীনগী মফমশিংদা রিজনেল সিক্যুরিতীগী লমদা তেংবাংনবগী ফীভম মপাঙ্গল কনখৎহনগনি‍। ঐখোয়না সি.ও.এম.সি.এ.এস.এ. মতিং লৈনা পায়খৎনবা, অমদি বি.ই.সি.এ. পায়খৎপা মপুং ফাহন্নবা লম্বীদা চঙশিল্লি‍।

ঐখোয়না দিফেন্স সাইবর, স্পিসিএল ফোর্স অমসুং অপুনবা এক্সরসাইজ মনুংদা এল.ই.এ.ও.এ.গী মখাদা লোজিস্তিক কোওপরেসনগী স্কোপ পাকথোক চাউথোকহন্নবগীদমক মখা তানা তেংবাংননবা ৱাফম ঐখোয়না য়ানরে‍।

খুমাঙ চাওশৎল্লবা, নৌনা থোরক্লিবা অমদি মরুওইবা লান্মীগী তেক্নোলোজীগী লমদা পায়খৎপা অপুনবা প্রোজেক্তশিং থুনা থবক্তা ওন্থোক্নবগীদমক দিফেন্স তেক্নোলোজী এন্দ ত্রেদ ইনিসিএতিব (দি.তি.তি.আই.) মথৱাই হাপ্পা মথৌ তাই হায়বা ৱাফমসু নাকল অনিনা য়ানরে‍।

হায়রিবা খোঙবু ওইবগী মরী অসিবু য়ু.এস. কম্পেনীশিংগী পুন্না শেমগৎমিন্নবা অমদি পুন্না পুথোকমিন্নবগী মায়কৈদা চঙশিনবা ভারতনা পাম্লি হায়বা ৱাফম ঐনা থমজরি‍। ‘মেক ইন ইন্দিয়া’ প্রোগ্রামগী মখাদা য়ু.এস. দিফেন্স কম্পেনীশিংবু ভারত্তা মখোয়গী ইনভেস্তমেন্ত হেনগৎহন্নবা ৱাফম থম্লি‍। ইন্দস্ত্রিএল কোলাবোরেসন অমসুহ রিছর্চ এন্দ দেভেলপমেন্ততা খোঙবু ওইবগী লমদা য়ু.এস.গী কেম্পেনীশিংনা শরুক য়াবনা ভারতকী ‘আত্মনিরভর ভারত’ কেম্পেন মপুং ফাহনবদা য়াম্না মরু ওইগনি‍।

ঙসিগী ২+২ মীফম অসি ভারত অমসুং য়ু.এস. অনিগী মরক্তা লৈরিবা স্ত্রেতেজিক দিফেন্স এঙ্গেজমেন্ত মপাঙ্গল কনখৎহনবদা মরুওই অমসুং নাকল অনিগী ওইবা অপুনবা ইন্তরেস্তকী লমদা পুন্না থবক তৌমিন্নবা য়াহল্লগনি‍। ঐখোয়গী তেংবাংনবগী ফীভম হেনগৎহনবনা ইং-তপ্পা অমসুং সিক্যুরিতী ঙাক্তুনা থমবদা অমদি মালেমগী ওইবা অপুনবা হীরমশিংদা অপনবা লৈতনা ফংহনবদা মরুওইবা থৌদাং লৌগনি‍। ঐনা সেক্রেতরী ওস্তিন অমসুং সেক্রেতরী ব্লিঙ্কনবু মখোয়গী তরান-তরামবা মতৌ অমসুং ভারত-য়ু.এস. খোঙবুবু মখা তানা চত্থহনবদা মখোয়গী মমল য়াম্লবা থৌদাংগীদমক ঐনা অমুক্কা হন্না থাগৎচরি‍। মথংগী ২+২ মিনিস্তরিএল মীফম নাকল অনিগী খুদোংচাগদবা মতম অমদা পাঙথোক্নবগীদমক ঐখোয়না সেক্রতরী অনিবু ভারত্তা লেঙলক্নবা পাউকৎ পীজরে‍।

*******