ফ্রৈত রেত ৱাংবা, কন্তেনরগী অৱাৎপা লৈবগী মওংদা কোবিদ-১৯ লাইচৎনা লৈহনখিবা লোজিস্তিক্সকী শিংনবশিংনা চৈথেং কয়া পীখ্রবসু এগ্রী এক্সপোর্তনা ইং ২০২১-২২দা য়ু.এস.দি. বিলিয়ন ৫০ হেনবা ঙমখি। কম্মর্স অমসুং ইন্দস্ত্রী মন্ত্রালয়গী মখাদা থবক পাংথোকপা এগ্রিকলচরেল অমসুং প্রোসেস্‌দ দুফ প্রদক্ত এক্সপোর্ত দিভেলপমেন্ত ওথোরিতী (এ.পি.ই.দি.এ.)না ভারতকী য়ু.এস.দি. বিলিয়ন ৫০গী অপুনবা এগ্রীকলচর এক্সপোর্তকী ৫১% ওইদুনা চাউরাকপা য়ু.এস.দি. বিলিয়ন ২৫.৬কী চাংদা লৌউ-শিংউ অমসুং প্রোসেস তৌরবা চিঞ্জাক এক্সপোর্ত তৌদুনা অনৌবা পুৱারী শেমখি।

মসিদা নত্তনা, এ.পি.ই.দি.এ.না ইং ২০২১-২২দা য়ু.এস.দি. বিলিয়ন ২৫.৬কী পোত্থোক থাদোক্তুনা শেনবা চহি অসিগী য়ু.এস.দি. বিলিয়ন ২৩.৭কী মশাগী পান্দম্বুসু হেঞ্জখি।

দি.জি.সি.আই. অমসুং এস.না থাদোকপা প্রোভিজনেল ওইবা মশিংগী মখা পোন্না, ইং ২০২১-২২দা এগ্রিকলচর এক্সপোর্তনা য়ু.এস.দি. বিলিয়ন ৫০.২১ য়ৌদুনা ১৯.৯২%গী শাহৌ লৌবা ঙমখি। শাহৌ লৌবগী চাং অসিনা ইং ২০২০-২১দা য়ু.এস.দি. বিলিয়ন ৪১.৮৭ য়ৌদুনা ১৭.৬৬%কী শাহৌ লৌখিবদগী হেনবনা মরম ওইরগা য়াম্না মশক থোকপা অমা ওইখি অমসুং হায়রিবা অসি ফ্রৈত রেত ৱাংবা, কন্তেনরগী অৱাৎপা লৈবগী মওংদা কোবিদ-১৯ লাইচৎনা লৈহনখিবা লোজিস্তিক্সকী শিংনবশিংনা চৈথেং কয়া লৈনা লৈনা য়ৌবা ঙমখিবনি। এ.পি.ই.দি.এ. সেদ্যুল এক্সপোর্তকী তসেংবা এক্সপোর্ত অসিবু গ্রাফ-১দা য়েংবা য়াগনি। মসিনা হৌজিক্কী চহি, ২০২১-২২ অমসুং মমাংগী চহি ২০২০-২১গী এ.পি.ই.দি.এ.গী পোত্থোক এক্সপোর্ত তৌবগী চাংদম্নবগী ফিভম তাক্লি। এ.পি.ই.দি.এ. এক্সপোর্তকী সিরিএল সেক্তরনা ইং ২০২১-২২দা ৫২% হেনবা শরুক তম্লি। লাইবস্তোক পোত্থোক অমসুং প্রোসেস তৌরবা অতোপ্পা চিঞ্জাক্না ইং ২০২১-২২গী এ.পি.ই.দি.এ. এক্সপোর্তকী মথংশিৎনা ১৭% অমসুং ১৫%গী শরুক তম্লি।

গ্রাফ-১

মমাংগী চহি অনিদগী ফংলক্লিবা পুৱারী ওইরবা মায় পাকপশিংনা প্রধান মন্ত্রীনা লৌমীশিংগী চাগা হেনগৎহনবগী মঙলান মঙলিবা অসিবু মঙফাওনবদা য়াম্না তেংবাংগনি।

এগ্রীকলচরগী অপুনবা এক্সপোর্তকা চাংদম্নবদা, এ.পি.ই.দি.এ. এক্সপোর্তনা ইং ২০২০-২১দা য়ু.এস.দি. বিলিয়ন ২২.০৩ য়ৌরম্বদগী হেনগত্তুনা ইং ২০২১-২২দা য়ু.এস.দি. বিলিয়ন ২৫.৬ য়ৌদুনা ১৬% শাহৌ লৌখি। এ.পি.ই.দি.এ. পোত্থোক্না মমাংগী চহিগা চাংদম্নবদা ইং ২০২১-২২দা ফংখিবা খ্বাইদগী য়াম্বা শাহৌ অসি গ্রাফ-২দা য়েংবা য়াগনি।

দি.জি.সি.আই. অমসুং এস.কী দেতাগী মখা পোন্না, চেং এক্সপোর্ত তৌবনা ইং ২০২১-২২দা য়ু.এস.দি. মিলিয়ন ৯৬৫৪ য়ৌদুনা ফোরেক্স খ্বাইদগী য়াম্না তানবা ওইখি অমসুং মমাংগী চহিদা য়ু.এস.দি. মিলিয়ন ৮৮২৯ য়ৌখিবা অদুদগী ৯.৩৫%গী শাহৌ লৌখি।

গেহু এক্সপোর্ত তৌবনা ইং ২০২০-২১দা য়ু.এস.দি. মিলিয়ন ৫৬৭ য়ৌখিবগা চাংদম্নবদা ইং ২০২১-২২দা খ্বাইদগী ৱাংবা ওইনা য়ু.এস.দি. মিলিয়ন ২১১৮ য়ৌদুনা ২৭৩%গী শাহৌ লৌখি। অতোপ্পা সিরিএলগী এক্সপোর্তনা মমাংগী চহিদা য়ু.এস.দি. মিলিয়ন ৭০৫ য়ৌখিবগা চাংদম্নবদা ইং ২০২১-২২দা য়ু.এস.দি. মিলিয়ন ১০৮৩ য়ৌদুনা ৫৩%গী শাহৌ লৌখি।

হৱাইগী এক্সপোর্তনা ইং ২০২০-২১দা য়ু.এস.দি. মিলিয়ন ২৬৫ য়ৌখিবগা চাংদম্নবদা ইং ২০২১-২২দা য়ু.এস.দি. মিলিয়ন ৩৫৮ য়ৌদুনা ৩৪%গী শাহৌ লৌখি।

দাইরী পোত্থোক্কী এক্সপোর্তনা ইং ২০২০-২১দা য়ু.এস.দি. মিলিয়ন ৩২৩ য়ৌখিবগা চাংদম্নবদা ইং ২০২১-২২দা য়ু.এস.দি. মিলিয়ন ৬৩৪ য়ৌদুনা ৯৬%গী শাহৌ লৌখি অমসুং বোভিন মীতকী এক্সপোর্তনা ইং ২০২০-২১দা য়ু.এস.দি. মিলিয়ন ৩৩০৩ য়ৌখিবগা চাংদম্নবদা ইং ২০২১-২২দা য়ু.এস.দি. মিলিয়ন ৩১৭১ য়ৌদুনা ইরোইগী মীতনা শুপ্নগী ৪%গী শাহৌ লৌখি।

পোলত্রী পোত্থোক্কী এক্সপোর্তনা মমাংগী চহিদা য়ু.এস.দি. মিলিয়ন ৫৮ য়ৌখিবগা চাংদম্নবদা ইং ২০২১-২২দা য়ু.এস.দি. মিলিয়ন ৭১ অমসুং য়াও/হামেংগী মীৎকী এক্সপোর্তনা মমাংগী চহিদা য়ু.এস.দি. মিলিয়ন ৪৪ য়ৌখিবগা চাংদম্নবদা ইং ২০২১-২২দা য়ু.এস.দি. মিলিয়ন ৬০ য়ৌদুনা ৩৪%গী চাংদা হেনগৎখি।

উহৈ-ৱাহৈ অমসুং মনা-মশিংগী এক্সপোর্ত তৌবনা ইং ২০২০-২১দা য়ু.এস.দি. মিলিয়ন ১৪৯২ য়ৌখিবগা চাংদম্নবদা ইং ২০২১-২২দা য়ু.এস.দি. মিলিয়ন ১৬৭৬ য়ৌদুনা ১২%গী শাহৌ লৌখি। প্রোসেস তৌরবা উহৈ-ৱাহৈ অমসুং মনা-মশিংগী এক্সপোর্তনা মমাংগী চহিদা য়ু.এস.দি. মিলিয়ন ১১২০ য়ৌখিবগা চাংদম্নবদা ইং ২০২১-২২দা য়ু.এস.দি. মিলিয়ন ১২০২ য়ৌদুনা ৭%গী শাহৌ লৌখি।

প্রোসেস তৌরবা অতোপ্পা চিঞ্জাক্কী পোত্থোক এক্সপোর্ত তৌবনা ইং ২০২০-২১দা য়ু.এস.দি. মিলিয়ন ৮৮৬ য়ৌখিবগা চাংদম্নবদা ইং ২০২১-২২দা য়ু.এস.দি. মিলিয়ন ১১৬৪ য়ৌদুনা ৩৪%গী শাহৌ লৌখি। কেশিয়ু এক্সপোর্তনা মমাংগী চহিদা য়ু.এস.দি. মিলিয়ন ৪২০ য়ৌখিবগা চাংদম্নবদা ইং ২০২১-২২দা য়ু.এস.দি. মিলিয়ন ৪৫২ য়ৌদুনা ৭%গী শাহৌ লৌখি। ফ্লোরিকলচরগী পোত্থোকশিংনা ইং ২০২০-২১দা য়ু.এস.দি. মিলিয়ন ৭৭ য়ৌখিবগা চাংদম্নবদা ইং ২০২১-২২দা য়ু.এস.দি. মিলিয়ন ১০৩ য়ৌদুনা ৩৩%গী শাহৌ লৌখি হায়না পাউদমলকখি।

এ.পি.ই.দি.এ.গী ওইনা ইং ২০২১-২২গী দেতাগী মতুং ইন্না এক্সপোর্তকী মরু ওইবা পন্থুংফমশিংনা বাঙ্গলাদেশ, য়ু.এ.ই., ভিএৎনাম, য়ু.এস.এ., নেপাল, মলেসিয়া, সাউদী অরাবিয়া, ইন্দোনেসিয়া, ইরান অমসুং ইজিপ্তনা ওইখি।

এগ্রী-এক্সপোর্ত্তা মশক থোক্না হেনগৎলকপনা ভারত সরকারনা লৌউ-শিংউ অমসুং প্রোসেস তৌরবা চিঞ্জাক্কী পোত্থোকশিংগী এক্সপোর্ত্তা অহেনবা মিৎয়েং চঙদুনা লৌমীশিংগী চাগা হেনগৎহন্নবা খোংফম চেৎপগী খুদম অমা ওইনা উনরি।

লৌউ-শিংউ অমসুং প্রোসেস তৌরবা চিঞ্জাক্কী এক্সপোর্ত্তা হেনগৎলক্লিবা অসিদি তোঙানবা লৈবাকশিংদা বি.২.বি. একজিবিসন শীনবা, ভারতকী ইম্বেসীশিংনা থৱাই য়াওনা শরুক য়াদুনা অখন্নবা অমসুং মহৌশাগী মার্কেতিং কেম্পেন চত্থদুনা অনৌবা কৈথেল থীদোকপগুম্বা এ.পি.ই.দি.এ.গী খুত্থাংদা কেন্দ্রনা পায়খৎপা তোঙানবা খোঙথাংশিংনা য়াম্না চাউবা মরম ওইবননি।

সরকারনা লৌউ-শিংউগী পোত্থোকশিংগী এক্সপোর্ত হেনগৎহন্নবগীদমক্তা রাজ্য সরকারশিংগা খুৎশম্নদুনা আউতরীচ প্রোগ্রাম ৩০০ হেন্না শীন-লাঙদুনা পাংথোকখ্রবনি।

 “ঐখোয়গী এক্সপোর্তকী পোর্তফোলিও পাকথোক চাউথোকহনবগী মতিক লৈবা লৌউ-শিংউ পোত্থোক ৫০গী মেত্রিক্স অমা ঐখোয়না শেম-শাখ্রে”, হায়না এ.পি.ই.দি.এ.গী চেয়র্মেন, দাঃ এম. অঙ্গামুথুনা ফোংদোকখি।

মালেম শিনবা থুংবগী মরু ওইবা ইম্পোর্ত তৌবা লৈবাকশিংগা পুন্দুনা লৌউ-শিংউ অমসুং চিঞ্জাক্কী লৈবা য়োনবগী মীফম কয়া অমা ভর্চুএলদা শীন্দুনা ভারতকী ওইনা লৌউ-শিংউ অমসুং প্রোসেস তৌরবা চিঞ্জাক্নি হায়না জিওগ্রাফিকেল ইন্দিকেসন (জি.আই.) রেজিস্তর তৌরবা কয়াবু হেন্না চাউখৎহন্নবা কেন্দ্রনা অতোপ্পা খোঙথাং কয়া অমসু পায়খৎলি।

এক্সপোর্ত তৌগদবা পোত্থোকশিংগী ক্বলিতী সর্তিফিকেসন পরিং নাইনা শোইদনা পাংথোকহন্নবগীদমক্তা সরকারনা ভারত শিনবা থুংবগী লেব ২২০ শকখঙখ্রে অমসুং মখোয়না এক্সপোর্ত তৌবা মীওইশিংগীদমক্তা পোত্থোক কয়া অমগী তেস্তিং তৌবগী সেবা পীরি।

কেন্দ্র সরকারনা এ.পি.ই.দি.এ.গী খুত্থাংদা এক্সপোর্ত তেস্তিং অমসুং রেসিদ্যু মোনিতরিং প্লানগীদমক্তা শকখঙলবা লেবশিংবু অপগ্রেদ তৌবা অমসুং মপাঙ্গল হেনগৎহনবদসু তেংবাংলি। লৌউ-শিংউগী পোত্থোক্কী এক্সপোর্ত হেনগৎহন্নবগীদমক্তা ইনফ্রাস্ত্রকচর শেম-শাবা, মগুন হেন্না লৈহনবা অমসুং কৈথেল শাগৎপগী শেলগী তেংবাংবা থৌওংগী মখাদা এ.পি.ই.দি.এ.না অতোপ্পা তেংবাং কয়াসু পীরি।

মালেমগী কৈথেলদা মশাগী চিঞ্জাক্কী পোত্থোকশিংবু মশক খঙহন্নবগীদমক্তা এক্সপোর্তরশিংদা প্লেৎফোর্ম পীবা ইন্তর্নেস্নেল ত্রেদ ফেয়র শীন্দুনা এক্সপোর্তরশিংবুসু শরুক য়াহল্লি। আহার, ওর্গানিক ৱর্ল্দ কংগ্রেস, বাইওফেক ইন্দিয়ানচিংবা লৈবাক্কী ওইবা থৌরম কয়াসু এগ্রী-এক্সপোর্ত খুমাং চাউশিলহন্নবা শীন-লাঙলি।

মালেমগী কৈথেলগী অপাম্বা মগুন পীবা ঙম্নবগীদমক্তা হোর্তিকলচর পোত্থোকশিংগী পেক-হাউস রেজিস্তর তৌবগী থৌওংসু সরকারনা এ.পি.ই.দি.এ.গী লুচিং মখাদা পায়খৎলি। পীনত শেল্লিং, গ্রেদিং অমসুং প্রোসেসিং য়ুনিৎশিংগী এক্সপোর্ত য়ুনিৎশিং রেজিস্তর তৌরিবা অসি ই.য়ু. অমসুং নন-ই.য়ু. লৈবাকশিংগী ক্বলিতী ইন্নবগীদমক্তা পাংথোকপনি।

মালেমগী ওইবা ফুদ সেফতী অমসুং ক্বলিতীগী তঙাই ফদবশিং শোইদনা ইলহন্নবগীদমক্তা এ.পি.ই.দি.এ.না মীত প্রোসেসিং প্লান্ত অমসুং এবাতোইরশিংগী রেজিস্ত্রেসন পায়খৎলি। পুম্নমক অসিগী মনুং চনবা অতোপ্পা মরু ওইবা থৌওং অমদি ইম্পোর্ত তৌরিবা লৈবাকশিংগী ফুদ সেফতী অমসুং ক্বলিতী কমপ্লাইএন্স শোইদনা ইলহন্নবগীদমক্তা ত্রেস-এবিলিতী সীস্তেম শেমদুনা মদুবু চৎনহনবা অসিনি।

এ.পি.ই.দি.এ.না এক্সপোর্ত হেনগৎহন্নবগীদমক্তা মালেমগী লল্লোন-ইতিক্কী ই-পাউ কয়া খোমজিন্দুনা মীয়ামদা খঙহল্লি, এক্সপোর্তরশিংগী মরক্তা কৈথেলগী ই-পাউ তাক্লি অমস্নগ ত্রেদ ইঙ্ক্বাইরী কয়াবুসু মাইয়োক্নরি।

লৌউ-শিংউগী পোত্থোকশিং অসি য়াম্না থুনা পৎকনবনা মরম ওইরগা, মখোয়বু খুদক্তা অমসুং অথুবা মতমদা পুথোকফমদগী পন্থুংফম য়ৌহনবগী অচৌবা তঙাই ফদবা লৈবনা, পি.এম. গতিশক্তী নেস্নেল মাস্তর প্লানগী শরুক অমা ওইনা, এ.পি.ই.দি.এ.না রেলৱে অমসুং রোদৱেজ য়াওনা তোঙানবা মন্ত্রালয়শিংগা লোয়ননা কন্নেক্তিবিতী হেন্না ফগৎহন্নবা খুৎশম্নরি।

“পুর্বঞ্চল, হিমালয়গী লমদম, অৱাং নোংপোক রাজ্য, জম্মু অমসুং কশ্মির অমসুং লদাখকী এগ্রী এক্সপোর্ত খুমাং চাউশিলহন্নবা সরকারনা মিৎয়েং চঙলি”, হায়না দাঃ অঙ্গামুথুনা ফোংদোকখি।

সরকারনা পায়খৎলিবা দিজিতেল ইন্দিয়া পোলিসীগা মরী লৈননা, এ.পি.ই.দি.এ.না ইং ২০২১-২২দা মখোয়গী মখাদা লৈরিবা লৌউ-শিংউগী পোত্থোকশিংগী য়ু.এস.দি. বিলিয়ন ২৫গী এক্সপোর্ত তৌবদা মরু ওইবা থৌদাং লৌখিবা অনৌবা দিজিতেল তেক্নোলোজীদা য়ুম্ফম ওইবা খোঙথাং কয়াবু থবক ওইনা পাংথোকখি।

এ.পি.ই.দি.এ.না হোর্তিনেত ত্রেস-এবিলিতীদা শিজিন্নখিবা ব্লোকচেন তেক্নোলোজী, ফার্মর কন্নেক্ত পোর্তেল, জিওগ্রাফিকেল ইন্দিকেসন (জি.আই.) প্রমোসন পোর্তেল, মোবাইল এপ- আই.ত্রেক সীস্তেম, ত্রেসনেত, ওর্গানিক প্রোমোস্নেল পোর্তেল, এগ্রিএক্সচেঞ্জ এপ অমসুং ক্লাউদ মাইগ্রেসন্নচিংবা আই.তি. দিবিজনগী মালেমগী থাক্তা লৈবা তেক্নোলোজী অমসুং সোফৱেয়র কয়া শিজিন্নখি।

মহৌশাগী ওইবা পোত্থোকশিং পাম্বা হেনগৎলক্লিবা অমসুং কঞ্জ্যুমরশিংনা মহৌশাগী পোৎলম য়াওবা চিঞ্জাক, কোস্মেতিক্স অমসুং হিদাক চাং য়াম্না পাম্নরক্লিবা অসি খঙলদুনা, কেন্দ্র সরকারনা লৌউ-শিংউ মন্ত্রালয়গা খন্ন-নৈনদুনা নেচরেল ফার্মিং পোত্থোকশিংগী এক্সপোর্ত খুমাং চাউশিলহন্নবা থৌরং য়াৎনবা খন্নবগী থৌওং কন্না পায়খৎপগা লোয়ননা পোত্থোক পুথোকপগী স্তেন্দরর শেম্বগা লোয়ননা সর্তিফাই তৌনবা পথাপসু শেম্নবা কেন্দ্র সরকারনা থবক পায়খৎলি।

ফার্মর প্রদ্যুসর ওর্গনাইজেসন (এফ.পি.ও.) নত্ত্রগা ফার্মর প্রদ্যুসর কম্পেনী (এফ.পি.সি.), কোওপরেতিব অমসুং নুপী ওন্তোপ্রিনরশিংনা এক্সপোর্তরশিংগা পাউ ফাওনহন্নবা প্লেৎফোর্ম অমা পীনবগীদমক্তা এ.পি.ই.দি.এ.গী ৱেবসাইত্তা ফার্মর কন্নেক্ত পোর্তেল অমসু শেম্লে। এফ.পি.ও. অমসুং এফ.পি.সি. চাউরাকপা ৩২৯৫ অমসুং এক্সপোর্তর ৩৩১৫না হৌজিক ফাওবগী ওইনা পোর্তেল অসিদা রেজিস্তর তৌরক্লে। ওর্গানিক ফার্মর লাখ ২৪ হেনবনা এ.পি.ই.দি.এ.দা রেজিস্তর তৌরক্লে। ভারতনা মালেমদা ওর্গানিক পোত্থোক পুথোকপদা খ্বাইদগী মাংজিল থারিবনি।

তেবলঃ লৌউ-শিংউ অমসুং প্রোসেস তৌরবা চিঞ্জাক্কী পোত্থোক এক্সপোর্ত তৌবগী চাংয়েংনবা

সোর্সঃ মার্চ ২০২২গী ত্রেদ এলর্ত্তা য়ুম্ফম ওইবা দি.জি.সি.আই.এস. অমসুং হোংবসু য়াই

*****