ইকায় খুম্ননীংঙাই ওইরবা উত্তর প্রদেশকী  রাজ্যপাল, শ্রীমতি অনন্দিবেন পতেলনা মালেমগী তি.বি. নুমিৎ ২০২২ পালন তৌবগী থৌরম অমদা, তি.বি.গীদমক্তা থমখিবা ইং ২০৩০গী এস.দি.জি. পান্দমগী চহি মঙাগী মমাংদা লৈবাক অসিবু ইং ২০২৫ ফাওবদা অৱাবা কয়া পীরিবা তি.বি.গী লাইওংদগী মপুং ফানা মনীং তমহনবা হায়বগী ৱারেপকীদমক্তা খোঙফম চেৎপবু নৌহৌননা নীংশিংলদুনা কেন্দ্রগী হকশেল অমসুং য়াইফ য়ুম্বাল মন্ত্রী, দাঃ মনশুখ মন্দাবিয়াগী মমাংদা “তি.বি. লোইশিন্নবা মাংজিল থানা চঙশিনবা” থৌরম হৌদোকখ্রে। হকশেল অমসুং য়াইফ য়ুম্বালগী কেন্দ্রগী রাজ্য মন্ত্রী, দাঃ ভারতী প্রবিন পাৱর, সাইন্স অমসুং তেক্নোলোজী অমসুং আর্থ সাইন্স মন্ত্রালয়গী রাজ্য মন্ত্রী (ইন্দিপেন্দেন্ত চার্জ), দাঃ জিতেন্দ্র সিংহ, অসম অমসুং অরিনাচল প্রদেশকী রাজ্যগী হকশেল মন্ত্রী, মথংশিৎনা শ্রী কেশব মহান্তা অমসুং শ্রী অলো লিবাং, নিতি আয়োগকী মেম্বর, দাঃ ভি.কে. পাউল অমসুং অতোপ্পা মীংথুংলেনশিংনা থৌরম অসিদা শরুক য়াখি।

(Image)

হীরম খুদিংগী মীওইবু জন আন্দোলন অমদা অমত্তা ওইনা পুন্সিন্দুনা খুন্নাই অমা ওইনা খুৎশম্নবনা ইং ২০২৫ ফাওবগী মনুংদা তি.বি. মুত্থৎপগী পান্দম ফংবা ঙমগনি হায়না শ্রীমতি অনন্দিবেন পতেলনা হায়খি। মীপুম খুদিংদা মচি ওইবা চিঞ্জাক ফংহন্নবা, লাইনা অসিগা মরী লৈনবা তাথী-তাওই তৌবা অমদি অচান-মীরাই তৌবগী মাইয়োক্তা মীওই খুদিংদা খঙহন্নবা মীয়াম্না হোৎনসি হায়না মহাক্না ফোংদোকখি। লাইনা অসিনা নাবা অঙাং অমসুং মখোয়গী ইমুংনা থেংনবা খুদোংচাদবশিংগী মতাংদা মহাক্না মিৎয়েং চঙবগা লোয়ননা অঙাং ওইরিঙৈদা তি.বি. নাবগী থৌওং থোকহন্দবগী মরু ওইববু ফোংদোকখি। মীয়াম, সরকার অমসুং লন্নাইগী লুপ, এজুকেসন ইন্সতিত্যুসন, এন.জি.ও.নচিংবদা তি.বি.না নারবা অঙাং য়োকপীনবা মহাক্না পুক্নিং থৌগৎপদা থেংনখিবশিংগী মতাংদা তম্লদুনা, মহাক্না সম্মিৎ অসিদা শরুক য়ারিবা মীয়ামদা খোঙজং অসিগী মাইকৈদা মশক থোক্না তেংবাংবা ওইনা তি.বি.নাবা অঙাংশিং য়োকসি হায়বা ৱাফম থমখি। “মমা-মপা, খুন্নাই, স্কুল অমসুং অঙ্গনৱাদিশিংবু পুক্নিং থৌগত্তুনা মাংজিল থানা থোক্তুনা অঙাংশিংবু তি.বি.গীদমক্তা চাংয়েং তৌদুনা মতম চানা লাইয়েংহৌনবা হোৎনবা অসিসু মান্ননা মরু ওই”, হায়না মহাক্না মখা তাখি।

রাজ্য/য়ু.তি.শিংদা পায়খৎলিবা তোঙানবা খোঙথাংশিংগী মতাংদা পাউদম্লদুনা মহাক্না মমাংগী চহি ফাওবদা ঐখোয়না তি.বি. অমসুং কোবিদ-১৯গী শিংনবা অনি থেংনদুনা লাকখিবনা মরম ওইরগা ঐখোয়না হোৎনবা হায়বসি অমুক্কা হেন্না মরু ওইরে হায়না মখা তাখি। তসেংবদি, কোবিদ অমসুং তি.বি. লৈবরা য়েংথোক্নবা হকশেলগী থৌমীশিংনা য়ুম্থোং খুদিংদা চত্তুনা পাংথোকখিবা বাই-দাইরেকস্নেল স্ক্রীনিংনা খঙদোকপগী চাংদা হেনগৎহনখি। “মফম খুদিংদা চত্তুনা মথৌ পাংথোক্লিবা হকশেলগী মীহুৎ, নুপীশিংগী এস.ঐচ.জি., মহৈরোই লুপ অমসুং মীয়ামগী হকশেল ফহন্নবা থবক পায়খৎনবগীদমক্তা নীংথিজনা শিজিন্নবা য়ারিবা অতোপ্পা স্তেকহোলদর কয়াগী চাউরবা হকশেলগী নেতৱর্ক অমা লৈবাক অসিদা লৈরিবসিবু মহাক্না মীয়ামদা তাকখি।

থৌরম অসিদা ‘অখন্নবা ৱাফম’ থমদুনা, দাঃ মনশুখ মন্দাবিয়ানা ৩৬০ দিগ্রীগী হোলিস্তিক ওইবা থৌওং অমনা ভারত্তগী তি.বি. মুত্থৎপগী খ্বাইদগী মশক থোকপা থৌওং ওইগনি হায়না ফোংদোকখি। “এস.দি.জি. ২০৩০ ফাওবগী থম্লিবা তি.বি.গী পান্দমগী চহি মঙাগী মমাংদা, ইং ২০২৫ ফাওবগী মনুংদা তি.বি. মুত্থৎপা হায়না ইকায়খুম্ননীংঙাই ওইরবা প্রধান মন্ত্রীগী মঙলান ফংনবা ঐখোয়না খোঙফম চেৎলি। রাজ্যশিংনা থৱাই য়াওনা শরুক য়াবা অমসুং লৈবাক্কী লুচিংবশিংনা প্রোগ্রাম অসিদা লেপ্তনা য়েংশিনবীদুনা, প্রোগ্রাম অসিনা চাংয়েংগী থাক কয়া লানখ্রে”, হায়না মহাক্না হায়খি। তি.বি. মাইয়োক্তা থেংনরিবা লান অসি মায় পাক্নবগীদমক্তা খুন্নাই অমসুং সরকারশিংনা পুন্না হোৎনমিন্নবগী মথৌ তাই। তি.বি. লৈতবা ভারত অমগীদমক্তা মথৌ পাংথোকপা হায়বসি মশাগী থৌদাংনি হায়না এন.জি.ও., সি.এস.ও. অমসুং অতোপ্পা স্তেকহোলদরশিংনা খনবগী তঙাই ফদবা লৈ। রাজ্য/য়ু.তি.শিংদা মখোয়গী হোৎনজমনগীদমক্তা মনা পীবগা লোয়ননা, মহাক্না “মতিক চাবা রাজ্য/য়ু.তি.শিংবু শকখঙবনা হেন্না নীংথিজনা মথৌ পাংথোক্নবা ইথিল পীগনি অমসুং তি.বি.বু মাইথীবা পীবদা ঐখোয়দা তেংবাংগনি” হায়না মহাক্না ফোংদোকখি।

(Image)

কোবিদনা পীরিবা চৈথেং কয়া অসিবু পল্লদুনা, কেন্দ্রগী হকশেল মন্ত্রীনা “তি.বি. লৈরিবসিগী মথক্তা ঐখোয়না চহি অনি হেনবদগী মালেমগী লাইচৎ অসি থেংনদুনা লাক্লি। লাইনা অনিমক অসি য়াম্না লৌনগল্লি, নুংশিত্তা শন্দোকই অমসুং ইমুং অমদি খুন্নাইদা অচৌবা চৈথেং পী। ঐখোয়না মখা তানা চঙশিল্লিবা অসিদা, অমসুং ঐখোয়না কোবিদ-১৯গা লান্থেংনখিবগী মতৌ মান্ননা, ঐখোয়গী তি.বি.গী থেংনরিবা লান অসিদা তোঙান-তোঙানবা স্তেকহোলদর অমসুং খোঙলোয়শিংবু জন আন্দোলন অমসুং জন ভাগীদারীগী খুত্থাংদা য়াওহন্দুনা চৎমিন্নসি” হায়খি। “অঙাং য়োকপগী মথক্তা, ঐখোয়না ব্লোক অমসুং জিলাশিংবু মফমদুগী লৈঙাক্লোইশিংগী তেংবাং লৌদুনা নকশিন্নবসু য়াই” হায়না ফোংদোকখি। “ঐখোয়না লৈবাক শিনবা থুংবগী ওইনা অনাবা মশক খঙদোকপা, লাইয়েংবা অমসুং শৌগৎপগী পথাপ অমা শেম্লে। ঐখোয়না তি.বি.গী মাইয়োক্তা শিজিন্নবা য়াবা অনৌবা অফবা তেক্নোলোজী অমসুং লাইয়েংবগী থৌওং কয়া অমসু লাক্লগনি”, হায়নসু মহাক্না মখা তাখি। সর্ভিস দেলিভরী সীস্তেম, আর্তিফিসিএল ইন্তেল্লিজেন্স সীস্তেম, ই-ফার্মাসী অমসুং তেলিমেদিসিনগুম্বা দিজিতেলগী ওইবা খুদোংচাবশিংসু তি.বি. মুত্থৎপগী খোঙজংদা শিজিন্নবা য়াগনি।

দাঃ ভারতী প্রবিন পাৱরনা হকশেলগী থৌমীশিংবু মালেমগী থাক্তা পায়খৎলিবা থবকশিংগীদমক্তা থাগৎপা ফোংদোকখি, অমসুং ভারত অসি কোবিদ-১৯ শেন্নবগী থৌওংগীদমক্তা মালেম্না থাগৎনরি অমসুং মসিগা মান্নবা ওইনা তি.বি. মুত্থৎপগী মতাংদসু ঐখোয়না খুদম অমা শেম্বা য়াগনি হায়খি। “ঐখোয়না কোবিদ লাইচত্তগী তমহৌবশিংনা ঐখোয়দা তেংবাংগনি। লৈঙাকপগী তোঙানবা থাক্তা হোৎনরিবশিং, জিলাগী থাক্তা ওইরো, নত্ত্রগা ব্লোক, পঞ্চায়ত নত্ত্রগা খুন্নাইগী থাক্তা ওইরো, থৌওংশিং অসি নীংথিনা মওং-মরিল চুমহনবা য়াগনি”।

দাঃ জিতেন্দ্র সিংহনা “দেয়র তু ইরেদ তি.বি.’ প্রোগ্রাম লাউথোকখি অমসুং হায়রিবা অসি ভারতকী দেতা, দবল্যু.এস.জি. তি.বি. সর্ভেলিএন্সকী জিনোম সিক্বেন্সিং তৌবগী কন্সোর্তিয়ম অমা শেম্বদা য়ুম্ফম ওইগনি। মহাক্না লাইনাগী বাইওলোজী, হিদাক পুথোকপা অমসুনফ ভেক্সিন শাদুনা লৈবাক অসিদগী তি.বি.বু মরু ফংনা মুত্থৎনবা হোৎনরিবা সাইন্স অমসুং তেক্নোলোজী মন্ত্রালয়গী হোৎনজমন কয়াগী মতাংদসু পনখি।

লাইচৎ অসিনা দাইগ্নোস্তিক সর্ভিসশিং অসি য়ুম্থোং খুদিংদা য়ৌহনবা য়াই হায়বা তাক্লে হায়না দাঃ ভি.কে.পাউলনা ফোংদোকখি। মখা তাবা ওইনা, হোম কেয়র অমসুং হেল্থ সর্ভিস দেলিভরীগী থৌওং কয়াগী মেকানিজমশিং রাজ্যশিংদা লৈহনখ্রে। মসিগী পারাশিং অসি ঐখোয়না তি.বি. লোইশিন্নবা পায়খৎলিবা প্রোগ্রামশিংগী মপাঙ্গল হাপকনি। তোঙান্না লৈবা কাঙলুপশিংনা লাইনা অসিগী অৱাবা চৈথেং কয়া পুবা য়াবগী ওইথোকপা লৈবনা মরম ওইরগা, ঐখোয়না ত্রাইবেলগী মীয়ামদা য়ৌশিনবগী তঙাই ফদবা লৈ অমসুং অহেনবা মিৎয়েং চঙবগী মথৌ তারি।

থৌরম অসিদা তোঙানবা পাউদম অমসুং ৱারোইশিন কয়া পুথোকখি। ইন্দিয়া তি.বি.রিপোর্ত ২০২২ অমসুং নেস্নেল তি.বি. প্রিভলেন্স সর্ভে রিপোর্তনা লৈবাক অসিদা লৈরিবা তি.বি.গী থাক তাক্লি। রিপোর্ত ওন সি.-তি.বি. (তি.বি. নাবরা য়েংনবা পাংথোকপা অনৌবা স্কিন তেস্ত), স্তেন্দর্দ ত্রিৎমেন্ত ৱর্কফ্লো ফোর মেনেজমেন্ত ফোর এস্কত্রা-পলমনরী তি.বি. অমসুং পেদিয়াত্রিক তি.বি. (লাইরিক অমসুং মোবাইল এপ্লিকেসন)নচিংবা অতোপ্পা কয়া অমসু ফোঙখি অমসুং ইন.তি.জি.এস. (ইন্দিয়ন তি.বি. জিনোমিক সর্ভেলিএন্স কন্সোর্তিয়ম) অসিসু লাউথোকখি। এপ্রিল ১৪, ২০২২দা লোইশিনগদবা অমসুং অয়ূশমান ভারত-হেল্থ অমসুং ৱেলনেস সেন্তরগী খুত্থাংদা জন আন্দোলনা অমা হৌনবা পায়খৎপা নুমিৎ ২১নিগী কেম্পেন অমসু হৌদোকখি।

শ্রী রাজেশ ভুশন, কেন্দ্রগী হেল্থ সেক্রেতরী, দাঃ বলরাম ভার্গবা, দি.জি. আই.সি.এম.আর., দাঃ রাজেশ এস. গোখলে, সেক্রেতরী (বাইওতেক্নোলোজী বিভাগ), দাঃ সুনিল কুমার, দি.জি.ঐচ.এস., শ্রী বিকাস শীল, এ.এস. অমসুং এম.দি. (এন.ঐচ.এম.), অতোপ্পা সেনিয়র ওফিসিএল অমসুং তি.বি.বু মাইথীবা পীবা মীওই কয়াসু থৌরম অসিদা শরুক য়াখি।

****