মাতৃভুমিগী মেনেজিং দিরেক্তর শ্রী এম.ভি. শ্রেয়াম কুমারজী, মাতৃভুমিগী অপুনবা তীম অমসুং রীদরশিং, মশক নাইরবা মীথুংলেনশিং,

খুরুমজরি!

মাতৃভুমিগী চহি চামা শুবগী পালন থৌরম হৌদোকপদা ঐহাক্না ৱা ঙাংবা ফংজবা অসি য়াম্না নুংঙাই। থৌরম অসিদা ঐহাক্না পাউচে অসিগা মরী লৈনবা মীপুম খুদিংমক্তা য়াইফ-পাউজেল পীজরি। ঐহাক্না মীদিয়া হাউস অসিদা মমাংদা থবক তৌরম্বশিং অদুনা শরুক তম্লমখিবা অদুসু নীংশিংলি। শ্রী কে.পি. কেসবা মেনন, কে.এ. সমোদর মেনন, কেরেলা গান্ধী শ্রী কে. কেলপ্পন অমসুং কুরুর নীলকান্তন নমবোদিরিপাদ অসিগুম্বা মশক নাইবা লমজিং মৈরাশিংগা মাতৃভুমিগা মরী লৈন্নখি। ঐহাক্না মাতৃভুমিবু চাউনা খোঙজেল য়াংশিনবদা লুচিংখিবা এম.পি. ভীরেন্দ্র কুমারবু নীংশিংজরি। ইমর্জেন্সীগী মনুংদা ভারতকী দেমোক্রেতিক ইথোস অসি ঙাক্নবা মহাক্না হোৎনখিবশিং অদু কৈদৌঙৈদা কাওবা লৈররোই। মহাক অসি অফাওবা ওরেতর, স্কোলর অমনি অমসুং অকোইববু নুংশিজবা মীওই অমনি।

মরুপশিং,

মহাত্মা গান্ধীগী ৱাখল্লোনশিংনা ইথিল পীরিবা মাতৃভুমি অসি ভারতকী নীংতম ইহৌ মপাঙ্গল হাপ্নবা লিংখৎখি। মাতৃভুমি অসিনা লোইলম লৈঙাক্কী মায়োক্তা ঐখোয়গী লৈবাক অসিগী মীয়াম্বা অমত্তা ওইনা পুনশিন্নবা ভারত শিনবা থুংবদা পাউচে অমসুং জর্নেলশিং পুথোকপা হৌখিবগী অচৌবা চৎনবী অদুদা মরু ওইবা থৌদাং অমা লৌখি। করিগুম্বা ঐখোয়গী পুৱারী অদুবু হন্দুনা য়েংলুবা তারবদি, অথৌবা মীওই কয়ামরুমদা পাউচে অমা নত্ত্রগা অমগা শোইদনা মরী লৈনরমগনি। লোমান্য তিলকনা কেসারি অমসুং মাহরত্তাবু য়োকখৎখি। গোপাল কৃষ্ণ গোখলে অসি হিতবাদকা মরী লৈনৈ। প্রভুদ্ধা ভারত অসি স্বামি বিবেকানন্দগা মরী লৈনখি। ঐখোয়না মহাত্মা গান্ধীবু নীংশিংবা মতমদা ঐখোয়না মহাক্না য়ং ইন্দিয়া, নবজিবন অমসুং হরিজনদা শরুক তম্লমখিবা অদু নীংশিংই। শ্যামজী কৃষ্ণ ভর্মনা দি ইন্দিয়ন সোসিওলোজিস্ত ইদিৎ তৌখি। ঐহাক্না খুদম খরা খক্তমক পীজবনি। মসিগী লিস্ত অসিদি লোইবা নাইদে।

মরুপশিং,

করিগুম্বা মাতৃভুমি অসি ভারতকী নীংতম ইহৌগী মতমদা পোকখিবা ওইরবদি, মাগী চহি চামা শুবগী থৌরম অসি ভারতনা আজাদী কা অমৃত মহোৎসব পাঙথোক্লিঙৈ মতম অসিদা তাররে। স্বারাজকীদমক ঐখোয়না নীংতম ইহৌগী মনুংদা ঐখোয়গী থৱায় কত্থোক্নবা খুদোংচাবা ফংখিদে। অদুম ওইনমক, মসিগী অমৃত কাল অসিনা ঐখোয়না মপাঙ্গল কনবা, চাউখৎপা অমসুং ইনক্লুসিব ওইবা ভারত অমগী মাইকৈদা চংশিন্নবা খুদোংচাবা পীরি। লৈবাক অমা হেক্তা চাউখৎহনবদা অফবা পোলিসীশিং শেম্বা হায়বা অসি মরু ওইবা হীরম অমনি।  অদুবু পোলিসীশিং অসি মাইপাকপা ঙমহন্নবা অমসুং চাউনা অওনবা পুরকপা ঙম্নবা খুন্নাইগী শরুক পুম্বদগী এক্তিব পার্তিসিপেসন মথৌ তাই। মসিগীদমক মেদিয়ানা অচৌবা থৌদাং অমা লৌরি। হৌখিবা চহিশিংদা ঐহাক্না মেদিয়ানা পীখিবা পোজিতিব ইম্পেক্ত অদু উবা ফংখি। খুদম ওইনা স্বচ্ছ ভারত মিসন অসি মীয়াম্না খঙনরে। মেদিয়া হাউস খুদিংমক্না থমোয় শেংনা মিসন অসি পাইখৎখি। মসিগা মান্নবা মওংদা মেদিয়ানা য়োগ, হকচাং ফনা থম্বা অমসুং বেতি বচাও বেতি পরাও হায়বা অসি মীয়ামদা খঙহনবদা য়াম্না শীংথানীংঙাই ওইবা থৌদাং অমা লৌখি। মসি রাজনিতী অমসুং রাজনিতী দলশিংগী ৱাংমদা লৈবা দোমেনগী হীরমশিংনি। তুংদা লাক্কদবা চহিশিংদা মখোয়না অফবা লৈবাক অমা ওইহল্লগনি। মসিগী মথক্তা আজাদী কা অমৃত মহোৎসব অসিগী মতাংদা তৌবা য়াবা কয়া অমা লৈ। হৌজিক মতম অসিদা মীয়াম্না নীংতম ইহৌগী অমসুং মশক খঙবীখিদ্রবা নীংতম লান্মীশিংগী মতাংদা খঙহন্নবা থৌরমশিং পাঙথোক্লি। মসি পাকথোক চাউথোকহনবদা মেদিয়ানা অচৌবা থৌদাং লৌবা য়াই। মসিগা মান্নবা মওংদা শহর নত্ত্রগা খুঙ্গংদা নীংতম ইহৌগা মরী লৈনবা মফমশিং লৈ। মখোয়গী মরমদা কয়া খঙনদে। ঐখোয়না মফমশিং অদু উৎথোক্তুনা মীয়াম্না মফম অদুদা চৎনবা পুক্নিং থৌগৎপা তাই। নন-মেদিয়া বেকগ্রাউন্দশিংদগী অনৌবা অইবশিংদা পুক্নিং থৌগৎপা অমসুং মখোয়গী ইবা হৈবগী স্কিল অদু উৎথোক্নবা ফম্পাক অমা ঐখোয়না পীবা য়ারোইদ্রা? ভারতকী খ্বাইদগী চাউবা পাঙ্গল অসি ঐখোয়গী দাইভর্সিতী অসিনি। অদোমগী মেদিয়া প্রোপর্তীশিংগী খুত্থাংদা অতোপ্পা লোলশিং খঙননবা কী ৱার্দশিং শেম্বগী মতাং ঐখোয়না খন্নবা য়ারোইদ্রা?

মরুপশিং,

ঙসিগী মতম অমদি চহিচা অসিদা মালেমনা ভারত্তা আশা কয়া তৌরি। কোবিদ-১৯ লাইচৎনা ঐখোয়গী লৈবাক অসিদা শোকহনবা মতমদা ভারতনা মসি লাকশিনবা ঙম্লোই হায়না ৱাখলনা শাগৎনখি। ভারতকী মীয়াম্না ক্রিতিকশিং অদু লাল্লি হায়না উৎখি। ঐখোয়না হৌখিবা চহি অনি অসিদা ঐখোয়গী খুন্নাইগী হেল্থ অমসুং ঐখোয়গী শেন্মীৎলোনগী হেল্থ ফগৎহনখি। চহি অনি মীওই করোর ৮০না লেম্না রাসন ফংখি। ভেক্সিন দোজ করোর ১৮০ কাপখ্রে। লৈবাক কয়ানা ভেক্সিন কাপ্পদা চীংনবা পোকপা অসি কোকহনবা ঙমদ্রিঙৈগী মতম অমদা ভারতকী মীয়াম্না মদুগী লম্বী তাকখি। ভারতকী তেলেন্ত লৈবা নহারোলনা শক্তি পীদুনা ঐখোয়গী লৈবাক অসিনা আত্মনির্ভরগী মাইকৈদা চংশিল্লি। ৱাখল্লোন অদুগী নুংদা মরু ওইরিবা অসি ভারতপু দোমেস্তিক অমসুং গ্লোবেলগী মথৌ তাবশিংদা মতেং পীরিবা ইকনোমিক পাৱর-হাউস অমা ওইহনবনি। অমুক্তা ওইখিদ্রিবা মওংদা, শেন্মীৎলোন খুমাং চাউশিনবদা শাহৌ পীগদবা রিফোর্মশিং পুরকখি। লোকেল ইন্তর্প্রাইসপু পুক্নিং থৌগৎনবা তোঙান-তোঙানবা সেক্তরশিংদা প্রদক্সন লিঙ্ক ইনসেন্তিব স্কিমশিং হৌদোকখি। ভারতকী স্তার্ত-অপ ইকো-সিস্তেম অসি মমাংদা অসুম্না অমুক্তা ফগৎলকখিদ্রি। তায়র-২, তায়র-৩গী শহর অমসুং খুঙ্গংশিংদগী নহারোলশিংনা শীংথানীংঙাই ওইবা থবক তৌরি। ঙসি ভারতনা মালেমবু তেক্নোলোজিকেল এদভান্সমেন্তগী লমদা মালেমবু লুচিংলি। শুপ্নগী চহি ৪ য়ু.পি.আই. ত্রাঞ্জেক্সনশিং অসি শরুক ৭০ হেনগৎখি। মসিনা ঐখোয়গী মীয়ামগী মরক্তা পোজিতিব ওইবা অহোংবা অআ পাম্লি হায়বা তাক্লি।

মরুপশিং,

ঐখোয়না নেক্স জেনরেসন ইনফ্রাস্ত্রকচরগী মরু ওইবা অদু মপুং ফানা খঙই। নেস্নেল ইনফ্রাস্ত্রকচর পাইপলাইন অমদা লুপা করোর লাখ ১১০ চাদিং তৌরি। পি.এম. গতিশক্তিনা ইনফ্রা শেমগৎপা অমসুং লৈঙাকপদা অপনবা লৈহল্লোই, ঐখোয়না ভারতকী খুঙ্গং খুদিংমক্তা হায়-স্পীদ ইন্তর্নেৎ কন্নেক্তিবিতী লৈহন্নবা কন্না হোৎনরি। ঐখোয়গী খোঙথাংশিং অসিবু লমজিংলিবা ৱাখল্লোন অদুদি তুংগী মীরোলশিংনা মমাংদা লৈরম্বা অদদুগী হেন্না ফবা পুন্সি মহিং অমা পীবা ঙম্বা হায়বা অসিনি।

মরুপশিং,

চহি কয়াগী মমাংদা মহাত্মা গান্ধীনা মাতৃভুমিদা লাকলমখিবা মতমদা মহাক্না অসুম্না হায়রমখি মদুদি: মাতৃভুমি অসি মশানা মরোমদোম খোঙফম চেৎনা লাপ্লিবা ইন্সতিত্যুসন অমনি। ভারত্তা লৈরিবা পাউচে খরা খক্তনা অসুম্না তৌবা ঙমগনি। মরম অসিনা ভারতকী অদুগুম্বা পাউচেশিং অদুগী মরক্তা মাতৃভুমিনা অখন্নবা মফম অমা কনবা ঙমখি। বাপুনা থাজবা থমদুনা ফোঙদোকখিবা ৱাহৈশিং অদুবু মাতৃভুমিনা ঙাক্তুনা চৎপা ঙমগনি হায়না ঐহাক্না থাজৈ। ঐহাক্না মাতৃভুমিগী চহি চামা শুবগী থৌরম অসিগীদমক নুংঙাইবা ফোঙদোচরি অমসুং রীদরশিংদা ঐহাক্না য়াইফ-মঙ্গোল পীজরি!

থাগৎচরি।

জয় হিন্দ।

খুরুমজরি।

***