ভারত সরকারগী ওপরেসন গঙ্গাগী শরুক ওইনা তরেৎশুবা মী হোন্দোরকপগী ফ্লাইতনা য়ুক্রেনদগী ভারত মচা ১৮২ ভারত্তা পুরকখ্রে। অখন্নবা এয়র ইন্দিয়া এক্সপ্রেস ফ্লাইত ঙসি অয়ুক মুম্বাইগী ছত্রপতি শিবাজি মহারাজ ইন্তরনেস্নেল এয়রপোর্ত্তা তাখি। মাইক্রো, স্মোল অমসুং মেদিয়ম ইন্তরপ্রাইজেসকী কেন্দ্র মন্ত্রী শ্রী নরায়ন রানেনা এয়ারপোর্ত্তা মহৈরোইশিংনা অয়াম্বা ওইবা পুথোরক্লিবা মীওইশিং অদু তরাম্না ওকখি।

সরকারনা য়ুক্রেনদগী ভারত মচা পুম্নমক পুথোরক্নবা অচেৎপা ৱাফম থম্লি হায়না মন্ত্রীনা ফোংদোকখি। মহাক্না মহৈরোইশিংদা থাজবা পীখি মদুদি য়ুক্রেনদা লৈরিবা মখোয়গী মরুপ-মপাংশিংসু অথুবা মতমগী মনুংদা পুথোরক্লগনি। 

মীদিয়াগা ৱারী শানরদুনা কেন্দ্রগী মন্ত্রীনা হায়খি মদুদি লান শোক্নরিবা মফমদগী হলকপা ওইবনা মহৈরোইশিং অসি থক্কৎপা অমসুং অৱাবা মায়োক্নরম্মি অমদি মখোয় হৌজিক খুদোং থিনিঙাই ওইদবা মফমদা লৈরে হায়বদু মহাক্না থাজবা পীখি। মহাক্না হায়খি মদুদি মখোয়বু ময়ুমদা য়ৌহন্নবগীদমক মথৌ তাবা পুম্নমক মরী লৈনবা রাজ্যশিংনা ফংহনগনি।

পোক্নফম লমদম য়ৌরবা মতুং অমদি ইমুং মনুংগা উনরবা মতুং মহৈরোইশিংনা সরকারগী মায়কৈদা তৌবিমল খংবা ফোংদোকখি। মহৈরোইশিংগী খুদোং চানবগীদমক তোঙান তোঙানবা রাজ্য সরকারশিংনা মুম্বাই এয়রপোর্ত্তা হেল্পদেস্ক অমা শেমগৎলে।

এয়র ইন্দিয়া এক্সপ্রেস ফ্লাইত অসি নিংথৌকাবগী নুমিদাং পুং ১১.১০ (আই.এস.তি.) তাবা মতমদা হেনরি কোনদা ইন্তরনেস্নেল এয়রপোর্ত, বুচারেস্ততগী পাইরকখি অমদি থাউ হান্নবগীদমক কুএত্তা ঙাইহাক পল্লুরবা মতুং ঙসি অয়ুক পুং ৭.০৫ তাবা মতমদা মুম্বাইদা য়ৌরকখি। মসি মী হোন্দোকপগী মিসন ওইরিবা “ওপরেসন গঙ্গা”গী মখাদা ওপরেৎ তৌবা ৭শুবা ফ্লাইতনি।

এয়র ইন্দিয়া, এয়র ইন্দিয়া এক্সপ্রেস, ইন্দিগো অমসুং স্পইসজেৎনা য়ুক্রেনগী য়ুমলোন্নবা লৈবাকশিংদগী দিল্লী অমসুং মুম্বাইগীদমক ফ্লাইত কয়া ওপরেৎ তৌরিবা ওপরেসন গঙ্গা মিসনদা শরুক য়ারি।

***