দোক্তর মনসুখ মন্দাবিয়া, হকশেল অমসুং য়াইফ-য়ুম্বালগী কেন্দ্র মন্ত্রীনা ঙসি হকশেল অমসুং য়াইফ-য়ুম্বাল মন্ত্রালয়দা চহি মঙাগী মখাদা লৈবা অঙাঙশিংদা পোলিও মরিক পীথক্তুনা নেসনেল পোলিও ইম্ম্যুনাইজেসন দ্রাইব হৌদোকখ্রে‍।

থৌরমদুদা ৱা ঙাঙলদুনা, দোক্তর মনসুখ মন্দাবিয়ানা হায়খি, “ভারতকী পোলিওগী মায়োক্তা চঙশিল্লিবা লাঞ্জঙ অসি ভেক্সিন্না ঙাকথোকপা ঙমবা লায়নাশিংগী মায়োক্তা ভারতনা পায়খৎলিবা মীয়ামগী হকশেলগী থৌরাংপা পায় পাকপগী ৱারী অমনি‍। ঐখোয় চেকশিন্না লৈবা অমদি চহি ৫গী মখাদা লৈবা অঙাঙ খুদিংমক পোলিও মরিক পীথক্নবা হোৎনবা মথৌ তাই‍।”

ইকায়খুম্নরবা প্রধান মন্ত্রীগী লুচিং মখাদা, য়ুনিভর্সেল ইম্ম্যুনাইজেসন প্রোগ্রাম্না হান্নদগী হেন্না অঙাঙশিংবু লায়না কয়াদগী ঙাকথোক্নবা মীৎয়েঙ থম্লি অমদি হৌখিবা মতম খরসিদা ন্যুমোকোকেল কঞ্জুগেৎ ভেক্সিন (পি.সি.ভি.), রোতাভাইরস ভেক্সিন, অমসুং মীজল্স-রুবেলা ভেক্সিন (এম.আর.)নচিংবা অনৌবা ভেক্সিন কয়াসু হাপচিল্লে‍। মখা তানা, ঐখোয়গী অঙাঙশিংদা অহেনবা ঙাকথোকপগী মতিং ফংহন্নবগীদমক ভারত লৈঙাক্না মাগী চাং নাইনা চত্থবা ইম্ম্যুনাইজেসন প্রোগ্রামদা ইঞ্জেক্তেবল ইনএক্তিভেতেদ পোলিও ভেক্সিনসু হাপচিল্লে‍। ঐখোয়গী অঙাঙশিংবু লায়না কয়াদগী ঙাকথোক্নবা হোৎনবগা লোয়ননা, প্রোগ্রাম অসিগী মখাদা লৈরিবা ভেক্সিন খুদিংমক অঙাঙ খুদিংমক্তা য়ৌহনবা হায়বসি মরুওইবা অমনি”, হায়না দোক্তর মন্দাবিয়ানা মখা তাখি‍।

নেসনেল ইম্ম্যুনাইজেসন দে পাঙথোকপগী মরুওইবা ৱাফমশিং থম্লদুনা, কেন্দ্রগী হকশেল মন্ত্রীনা হায়খিবদা, “স্বাস্থ ভারতকী পান্দম অসি ঐখোয়গী অঙাঙশিং মশা মউ ফনা থম্লবখক্তদা ফংবা ঙমগনি‍। মিসন ইন্দ্রধনুস অমসুং পোলিও ভেক্সিনেসন দ্রাইবকী পান্দমদি অসিগুম্বা তমথিরবা লায়নাশিংদগী ঐখোয়গী অঙাঙশিংবু ঙাকথোকপনি‍। ঐখোয়গী য়ুমলোন্নবা লৈবাকশিং পোলিও লৈতবা ওইদ্রিবা মরম্না, ঐখোয় চেকশিন্না লৈদুনা ভেক্সিনেসনগী প্রোগ্রাম মখা তানা চত্থবা তাই‍। লাক্কদৌরিবা থা খরসিদা চহি ৫গী মখাদা লৈবা অঙাঙ করোর ১৫দা ভেক্সিন পীথক্কদৌরি‍। কনাগুম্বা অমত্তা চিত্থহৌদনবা পাক চাউরবা মাইক্রো প্লান্নিংগী খুত্থাঙদা য়ুমথোঙ য়ুমথোঙ চঙদুনা ভেক্সিনেসনগী থবক পায়খৎকনি‍। ইম্ম্যুনাইজেসন প্রোগ্রাম অসিবু ইকায়খুম্নরবা প্রধান মন্ত্রীনা থমখিবা মীৎয়েঙগী পরিংদা মীয়াম্না শরুক য়াবা ইহৌ অমা ওইহনবগীদমক্তা ঐনা হকশেলগী থৌমীশিং, দব্লিউ.ঐচ.ও., য়ুনিসেফ, রোতরী ক্লবনচিংবা স্তেকহোল্দরশিং অমসুং এন.জি.ও. পুম্নমক্কী মফমদা নুংঙাইবা ফোঙদোকচরি‍। ঐনা ইমুং খুদিংদা মখোয়গী অঙাঙশিং ভেক্সিন পীথক্নবা থোকপিরকউ হায়না নোল্লুকচরি‍।”

কেন্দ্রগী হকশেল সেক্রেতরীনা মায় পাক্লবশিং অমসুং নেসনেল ইম্ম্যুনাইজেসন প্রোগ্রাম পায়খৎনবা চঙশিনগদৌরিবা লম্বী পরিংগী মরমদা ৱাফমশিং থমখি‍। মহাক্না হায়খিবদা, “ভারত্তা পোলিও লৈত্রবসু, ঐখোয় চেকশিন্না লৈবা মথৌ তাই‍। ইম্ম্যুনাইজেসন মায় পাক্না পাঙথোক্নবা স্তেত পুম্নমক্তা ত্রাঞ্জিৎ কাঙবু থমখ্রে‍। অদুগা ঐখোয়গী য়ুমলোন্নবা লৈবাকশিংদা পোলিও কেসশিং থেংনরিবনা মরম ওইরগা ঙমখৈগী মফমশিংদা লেপ্পা নাইদনা পল্স পোলিওগী থবকশিং পায়খৎলি‍।”

পোলিও নেসনেল ইম্ম্যুনাইজেসন দ্রাইব অমসুং পোলিও নেসনেল ইম্ম্যুনাইজেসন দে ২০২২ (এন.আই.দি.)গী মরমদা:

নেসনেল পোলিও ইম্ম্যুনাইজেসন দে ২০২২ (এন.আই.দি.) লৈবাক শিনবা থুংনা নোংমাইজিং নুমিৎ, ফেব্রুৱারী ২৭, ২০২২দা পাঙথোক্কদৌরি‍। ভারতনা পোলিওভাইরসতগী মীয়ামবু ঙাকথোক্নবা অমদি পোলিও লৈত্রবা লৈবাক্কী ফীভম ঙাক্তুনা থম্নবগীদমক চহি খুদিংগী লৈবাক শিনবা থুংনা পাঙথোকপা এন.আই.দি. অমা, অমদি সব-নেসনেল ইম্ম্যুনাইজেসন দে (এস.এন.আই.দি.) অনি পাঙথোক্লি‍। পোলিও এন.আই.দি.না, স্তেত অমদি য়ু.তি. ৩৬দা লৈবা দিস্ত্রিক্ত ৭৩৫দা লৈবা অঙাঙ করোর ১৫ হেনববু কোনশিনগনি‍। দ্রাইব অসিদা লৈবাক শিনবা থুংনা বুথ লাখ ৭তা অঙাঙশিংদা পোলিও মরিক পীথক্কনি‍। ভলুন্তিয়র লাখ ২৪ অমসুং সুপরভাইজর লাখ ১.৫রোম্না চাউরাক্না য়ুম করোর ২৩.৬তা চৎকনি‍। মেঘালয়না জনুৱারী ২৪, ২০২২দা মাঙজৌননা দ্রাইব অসি চত্থখ্রে অদুগা মিজোরম্না লমদমদুগী ওইবা মরম খরদগী মার্চ ১, ২০২২দা পায়খৎনবা থৌরাং তৌরি‍। মীখল পাঙথোক্কদবা স্তেত উত্তর প্রদেশ অমসুং মনিপুরনা পোলিও এন.আই.দি. অসি মথঙশিৎনা মার্চ ২০ অমসুং ২৪দা পাঙথোক্নবা থৌরাং তৌরি‍।

বুথতা পীথক্লবা মতুংদা চিত্থ-নান্থহৌবা অঙাঙশিং খঙদোক্তুনা পীথক্ননবগীদমক মথঙগী নুমিৎ নিনিদগী মঙানি ফাওবগী মনুংদা য়ুমথোঙ-য়ুমথোঙ চঙদুনা য়েংশিনবা (মোপ-অপ রাউন্দ) চঙশিনগনি‍। পুন্সি কনগদবা হিদাক অসি পীথকপদা অঙাঙ অমত্তা চিত্থহৌদনবা চত্থোক চৎশিন তৌরিবা অঙাঙশিংদা পীথক্নবগীদমক্তা ভেক্সিনেসন কাঙবুশিং বস তর্মিনেল, রেলৱে স্তেসন, এয়রপোর্ত অমসুং ফেরী ক্রোসিংশিংআ থমখ্রে‍।

ভারতকী ইকোন কোনবা ৱাইল্দ পোলিওভাইরস কেস জনুৱারী ১৩, ২০১১দা থেংনখিবগা লোয়ননা ভারতনা চহি তরা হেন্না পোলিও লৈতবা লৈবাক ওইদুনা লাক্লি‍। অদুম ওইনমক ৱাইল্দ পোলিওভাইরসনা শোকহল্লিবা অফঘানিস্তান অমসুং পাকিস্তান্নচিংবা য়ুমলোন্নবা লৈবাকশিংদগী লৈবাকসিদা পোলিওভাইরস চঙশিল্লকপা থিংনবগীদমক ভারতনা চেকশিন্না লৈরি‍।

বুথতা মী য়াম্না চিনবা থোকহন্দবা, ফিজিকেল দিস্তেন্সিং থমবা, মাস্ক উপ্পা, খুৎ-শা হামবা অমদি নুংশিৎ-নুংশা মরাঙ কায়না চঙবা মফমদা পোলিও মরিক পীথকপনচিংবা কোবিদ এপ্রোপ্রিএৎ বিহেবিয়র (সি.এ.বি.) ঙাক্তুনা লাইচৎ মনুংসিদা পায়খৎপা য়াবা চেকশিন থৌরাংশিংসু পায়খৎননবা থবক পায়খৎলি‍।

মীফম অদুদা শ্রী বিকাস শীল, এ.এস. অমসুং এম.দি., হকশেল অমসুং য়াইফ-য়ুম্বাল মন্ত্রালয়, শ্রী অসোক বাবু, জোইন্ত সেক্রেতরী, হকশেল অমসুং য়াইফ-য়ুম্বাল মন্ত্রালয়, দোক্তর রোদেরিকো ঐচ. ওফ্রিন, দব্লিউ.ঐচ.ও.গী ভারত মীহুৎ অমদি হকশেল অমসুং য়াইফ-য়ুম্বাল মন্ত্রালয়গী মকোক থোংবা ওফিসিএলশিংনা শরুক য়াখি‍।

***