প্রধান মন্ত্রী, শ্রী নরেন্দ্র মোদীনা ঙসি ৭ লোক কল্যান মার্গতা লৈবাক অসিগী সিখশিংগী মরু ওইবা লুচিংবশিংগা উনখি। সিখ ফুরুপকী য়াইফনবগীদমক্তা লেপ্তনা খোংথাং কয়া অমা পাইখৎখিবগীদমক্তা, অমসুং মরু ওইনা দিসেম্বরগী ২৬পু বীর বাল দিৱস ওইনা লাউথোক্নবগী ৱারেপ লৌরদুনা চার সাহিবজাদেবু ইকাইখুম্নবীবগীদমক্তা দেলিগেশন অদুনা প্রধান মন্ত্রীবু থাগৎপা ফোংদোকখি। দেলিগেশন অদুগী মেম্বর খুদিংমক্না  প্রধান মন্ত্রীবু ‘সিরোপাও’ অমসুং ‘সিরি সাহিব’না ইকাইখুম্নবা উৎখি।

প্রধান মন্ত্রীনা হায়খি মদুদি লৈবাক অসিগী রিজন কয়া অমগী মীশিংনা চার সাহিবজাদেগী লৌখিবা থৌদাং অমসুং মখোয়না খত্থোকখিবশিং অদুগী মতাংদা খঙদে। মহাক্না নিংশিংলদুনা হায়খি মদুদি মহাক্না স্কুলশিংদা অমসুং অঙাংশিংগী মমাংদা ৱা ঙাংনবগী খুদোংচাবা অমা হেক ফংবা খুদিংগী, মহাক্না মতম চুপ্পদা চার সাহিবজাদেগী মতাংদা ঙাংখি। দিসেম্বরগী ২৬পু বীর বাল দিৱস ওইনা পাংথোকপগী ৱারেপ অসিনা লৈবাক অসি শিনবা থুংনা কাচিন-কোয়াদা লৈরিবা অঙাংশিংদা মখোয়গী মতাংদা খঙহনবদা য়াম্না মরু ওইবা থৌদাং লৌগদৌরিবনি।

প্রধান মন্ত্রীনা সিখ ফুরুপকী মরু ওইবা লুচিংবশিংবু মহাক্কা উনবা লাকপগীদমক্তা থাগৎপা ফোংদোকখি অমসুং মহাক্কী য়ুমগী থোং অসি মখোয়গীদমক্তা মতম চুপ্পদা লাউনা হাংদুনা লৈগনি হায়না হায়খি। মহাক্না পঞ্জাবতা লৈবা মতমদা মখোয়গা থমখিবা মরী অমসুং মখোয়গা লোইননা লেনখিবা মতম অদুবু নিংশিংখি।

প্রধান মন্ত্রীনা সিখ ফুরুপকী থৌগল তৌবগী ৱাখল্লোন অদুবু থাগৎখি অমসুং মালেম অসিদা মসিগী মতাংদা হেন্না খঙহনবগী মথৌ তাই হায়না হায়খি। মহাক্কী সরকার অসিনা সিখ ফুরুপকী য়াইফনবগীদমক্তা লেংদনা লেপ্লি হায়না প্রধান মন্ত্রীনা হায়খি। মসিগী মতাংদা সরকারনা লৌখৎখিবা খোংথাংশিং অদুগী মতাংদা হায়খি। মহাক্না অফগনিস্তান্দগী গুরু গ্রন্থ সাহিবপু পুরক্নবগীদমক্তা তৌখিবা অখন্না থৌরাংশিং অদুগী মতাংদা খন্নখি। মহাক্না সিখ পিলগ্রিমশিংগীদমক্তা কর্তারপুর সাহিব কোরিদোর হাংদোক্নবা দিপ্লোমেতিক ওইবা চেনেলশিংগী খুত্থাংদা সরকার অসিনা লৌখৎখিবা খোংথাংশিং অদুগী মতাংদসু হায়খি।

শ্রী মঞ্জিন্দর সিং সির্সানা হায়কি মদুদি বীর বাল দিৱস পাংথোক্নবগী ৱারেপ অসিনা চার সাহিবজাদেগী কত্থোকখিবশিং অদুগী মতাংদা লৈবাক অসিগী অঙাংশিংদা খঙহল্লগনি। সিং সাহিব গ্যানি রঞ্জীত সিং, জাথেদার  তখত স্রি পত্না সাহিবনা কর্তারপুর সাহিব কোরিদোরবু অমুক হন্না হাংদোকপগীদমক্তা অমসুং লঙ্গরদগী জি.এস.তি. লৌথোকপা অসিগুম্বা খোংথাংশিং পাইখৎপগীদমক্তা প্রধান মন্ত্রীবু থাগৎপা ফোংদোকখি। মহাক্না মখা তারকখি মদুদি সিখ ফুরুপকীদমক্তা প্রধান মন্ত্রীনা লৌখৎখিবা খোংথাং কয়া অসিনা মহাক অসি থমোইনুংদদি সিখ অমনি হায়বা উৎলি।নেস্নেল মাইনোরিতী কমিসনগি হান্নগী চেবরমেন, শ্রী তার্লোচন সিংনা হায়খি মদুদি লৈবাক অসি খাইদোরকপা মতমদা মশিং য়াম্লবা মীওই কয়া অমনা পুনশি কত্থোকখিবা সিখ ফুরপনা লৌখিবা থৌদাংশিং অদুবু নিংখা তম্লবা মতুংদা অহানবা ওইনা  মশক খংবীরে হায়না মহাক্না হায়খি। মহাক্না সিখ ফুরুপনা লৌখিবা থৌদাংশিং মালেমগী থাক্তা পুখৎপীবগীদমক্তা প্রধান মন্ত্রীবু থাগৎপা ফোংদোকখি।

*****