ഇന്ത്യയിലെ ടെലികോം കമ്പനികൾക്ക്, യോഗ്യതയുള്ള വിദേശ കമ്പനികളുമായി സംവദിക്കുന്നതിന് അവസരം നൽകുന്നതിനായി, കേന്ദ്ര കമ്മ്യൂണിക്കേഷൻസ് മന്ത്രി ശ്രീ അശ്വിനി വൈഷ്ണവ് ഇന്ന് ഒരു അന്താരാഷ്ട്ര ബിസിനസ് എക്‌സ്‌പോ 'ഇന്ത്യ ടെലികോം 2022' - ഉദ്ഘാടനം ചെയ്തു. കേന്ദ്ര കമ്മ്യൂണിക്കേഷൻസ് സഹമന്ത്രി ശ്രീ ദേവു സിൻഹ ചൗഹൻ സന്നിഹിതനായിരുന്നു.

കേന്ദ്ര വാണിജ്യ വകുപ്പിന്റെ മാർക്കറ്റ് ആക്‌സസ് ഇനിഷ്യേറ്റീവ് സ്‌കീമിന് (MAI) കീഴിൽ, ടെലികോം എക്യുപ്‌മെന്റ് ആൻഡ് സർവീസസ് എക്‌സ്‌പോർട്ട് പ്രൊമോഷൻ കൗൺസിൽ (TEPC) ആണ് 2022 ഫെബ്രുവരി 8 മുതൽ 10 വരെ പരിപാടി സംഘടിപ്പിച്ചിരിക്കുന്നത്. ടെലികമ്മ്യൂണിക്കേഷൻസ് വകുപ്പ്, കേന്ദ്ര വിദേശകാര്യമന്ത്രാലയം, വിവിധ രാജ്യങ്ങളിലെ ഇന്ത്യൻ എംബസികൾ എന്നിവയും പരിപാടിയെ പിന്തുണയ്ക്കുന്നുണ്ട്. 45-ലധികം രാജ്യങ്ങളിൽ നിന്നുള്ള യോഗ്യതയുള്ള ബയർമാരാണ് പരിപാടിയിൽ പങ്കെടുക്കുന്നത്. സമ്മേളനത്തിന് പുറമെ 40-ലധികം ഇന്ത്യൻ ടെലികോം കമ്പനികൾ തങ്ങളുടെ ഉൽപ്പന്നങ്ങളും കഴിവുകളും എക്സിബിഷനിൽ പ്രദർശിപ്പിക്കുന്നുണ്ട്.

ഇന്ത്യയിലെ ഇലക്‌ട്രോണിക്‌സ് നിർമ്മാണം 75 ശതകോടി യുഎസ് ഡോളറിനടുത്താണെന്ന് ഉദ്ഘാടന പ്രസംഗത്തിൽ ശ്രീ അശ്വിനി വൈഷ്ണവ് പറഞ്ഞു. ഇത് 20% CAGR-ഇൽ കൂടുതൽ വളർച്ച രേഖപെടുത്തുന്നു. രാജ്യം തദ്ദേശീയമായി 4G കോർ & റേഡിയോ നെറ്റ്‌വർക്ക് വികസിപ്പിച്ചെടുത്തിട്ടുണ്ട്. 5ജി നെറ്റ്‌വർക്ക് വികസനത്തിന്റെ അവസാന ഘട്ടത്തിലാണെന്നും അദ്ദേഹം കൂട്ടിച്ചേർത്തു.

'ഇന്ത്യ ടെലികോം 2022' സാങ്കേതികവിദ്യയുടെയും ബിസിനസ്സ് വിനിമയത്തിന്റെയും ഒത്തുചേരലിനുള്ള ഒരു വേദിയാണ്.