কেন্দ্রগী হকশেল অমসুং য়াইফ য়ুম্বাল মন্ত্রী, দাঃ মনশুখ মন্দাবিয়ানা কেন্দ্রগী হকশেল অমসুং য়াইফ য়ুম্বালগী রাজ্য মন্ত্রী, দাঃ ভারতী প্রবিন পাৱর য়াওবা থৌরমদা নৌনা শেমদোক্লবা সি.জি.ঐচ.এস. (সেন্ত্রেল গবর্নমেন্ত হেল্থ স্কিম) ৱেবসাইত (www.cghs.gov.in) অমসুং মোবাইল এপ (মাই সি.জি.ঐচ.এস.) লোঞ্চ তৌখ্রে।

 “নৌনা শেমদোক্লবা সি.জি.ঐচ.এস. ৱেবসাইতপু মোবাইল এপ অমগা লোয়ননা লোঞ্চ তৌখিবসি ভারত্তা দিজিতেলগী থৌওং শিজিন্নবা হেনগৎলক্লিবা অসিদা তেংবাংবা য়াম্না মরু ওইবা অমসুং মতম চাবা খোঙথাং অমনি। ৱেবসাইত অসিদসু অপদেত তৌরবা খুদোংচাবা কয়া য়াওরি অমসুং মসিনা বেনিফিশরী লাখ ৪০ (থবক তৌরিবা অমসুং থবক্তগী পোত্থারবা প্রোফেস্নেলশিং) হেনবদা কান্নবা পীদুনা মখোয়গী ময়ুমদগী রীএল তাইম ইনফোর্মেসন কয়া লৌবা য়াহনগনি”। অসিগুম্বা খুদোংচাবা অসিনা ময়ুমদগী মপান থোকহন্দনা মশাগী ময়ুমদা হেল্থকেয়রগী সেবা কয়া য়ৌহনবা য়াহনগনি অমসুং হৌজিক চৎলিবা কোবিদ-১৯গী লাইচৎ মনুংসিদা য়াম্না মতম চাবা অনৌবা খোঙথাং অমসু ওইরি হায়না মহাক্না মখা তাখি। মসিদি ভারত্তা দিজিতেলগী থৌওং শিজিন্নবা হেনগৎলকপনা তেংবাংবা মরু ওইবা অমসুং মতম চাবা খোঙথাং অমনি হায়না মহাক্না ফোংদোকখি।

নৌনা মওং শেমদোক্লবা ৱেবসাইত অসিদা সর্ভিস কয়াগী বাস্কেত চাউথোকহল্লে হায়না হকশেল মন্ত্রীনা পাউদমখি। তেলি-কন্সলতেসনগী নৌনা হাপ্লিবা খুদোংচাবা অসি লৌদুনা সি.জি.ঐচ.এস. বেনিফিশরীশিংনা তেলিকন্সলতেসনগী খুত্থাংদা হকথেংনা পাউতাক লৌবা য়ারগনি হায়না মহাক্না ফোংদোকখি। অসিগুম্লবা হান্নদগী ফগৎলবা খুদোংচাবশিংগা লোয়ননা, সি.জি.ঐচ.এস.না তোঙানবা খুদোংচাবা কয়া লায়না ফংহনবগা লোয়ননা মখোয়গী বেনিফিশরীশিংদা য়ৌবা ঙম্বগী চাং হেনগৎহন্নবা পান্দমসু থম্লি।

অনৌবা সি.জি.ঐচ.এস. ৱেবসাইত অমসুং মসিগী “মাই সি.জি.ঐচ.এস.” কৌবা মসিগী এক্সতেন্সন ওইরিবা মোবাইল এপ অসিদা বেনিফিশরীশিংনা নুংঙাইগদবা খুদোংচাবা কয়া য়াওরি অমসুং বেনিফিশরীশিংদা সর্ভিসশিং অসি, কোবিদ লাইচৎ অসিগী মনুংদা মরু ওইনা, ময়ুমগী তেক্ত-কায়দবা মফমগী মনুংদা লায়না য়ৌহনবদা তেংবাংনবগীদমক্তা শেম-শাবনি।

সি.জি.ঐচ.এস. ৱেবসাইত অসিদা অপগ্রেদ তৌরবা তোঙানবা খুদোংচাবশিং মখাদা পীরিঃ

১. ৱেবসাইত অসি জি.আই.জি.দবল্যু. (গাইদলাইন ফোর ইন্দিয়ন গবর্নমেন্ত ৱেবসাইত)গী মতুং ইন্না শাবনি। মসিগী স্তেন্দর্দ অমসুং কাংলোন্না ৱেবসাইত অসিবু ৩য়ু., হায়বদি য়ুজেবল, য়ুজর সেন্ত্রিক অমসুং য়ুনিভর্সেল্লী এসেসিবল, কমপ্লাইএন্ত ওইহল্লি।

২. জি.আই.জি.দবল্যু.না তাকপগী মতুং ইন্না, সাইত অসি তুংগী মতমদা লোল কয়াদা য়েংবা য়াহন্নবা শেম্বগা লোয়ননা হৌজিক বাই-লিঙ্গুএল ওইরি (হিন্দি অমসুং ইংলিশ)।

৩. ৱেবসাইত ইন্তর্ফেস অসি য়াম্না লাইহল্লি অমসুং অপাম্বা ই-পাউ থিবদা লাইহল্লি। ৱেবসাইত অসিদা য়াওরিবশিংবু থিবা য়ানবগীদমক্তা এক্সতেন্সিব সর্চ ফেসিলিতী অমা য়াওহল্লি।

৪. ৱাহৈবু খোঞ্জেলনা তাকপা অমসুং ফোন্ত চাউখৎহনবা পীকথহনবা য়াবা উবা তাবদা নুংঙাইতবশিংগীসু য়ুজর ফ্রেনলী ওইবা ফীচর খরা হাপ্লে।

৫. সি.জি.ঐচ.এস. ৱেবসাইত অসিগী খুত্থাংদা ই.সঞ্জিবনী তেলিকন্সলতেসন ফেসিলিতী লৌনবগীদমক্তা হকথেংননা ক্লিক তৌনবা লিঙ্ক য়াওরি।

৬. ৱেবসাইত অসিদা সি.জি.ঐচ.এস. বেনিফিশরীশিংগীদমক্তা শেমখিবা ওনলাইন গ্রাইভেন্স পোর্তেলগী লিঙ্ক পীরি অমসুং মসিগী খুত্থাংদা মখোয়গী ৱাকৎশিংবু মতম চানা য়েংনবগীদমক্তা মরী লৈনবা ওফিসরদা এস.এম.এস. অমসুং ইমেল এলর্তকী খুত্থাংদা হকথেংননা থাবা য়াগনি।

৭. ৱেবসাইত অসিদা মেদিকেল ক্লেম, ৱাকৎ, সি.জি.ঐচ.এস. কার্দকী স্তেতস ত্রেক তৌবা, সি.জি.ঐচ.এস. কার্দ দানলোদ তৌবা, হিদাক্কী হিস্তরী য়েংবা, ওনলাইন্দা এপ্পোইন্তমেন্ত লৌবগী পথাপ অমসুং অতোপ্পা খুদোংচাবা কয়া লৌনবা বেনিফিশরীশিংনা লোগ-ইন তৌবগী লিঙ্ক অমসু পীরি।

মায় পাকপসিদা নুংঙাইবা ফোংদোক্লদুনা, দাঃ ভারতী প্রবিন পাৱরনা অসুম্না ফোংদোকখি, “ঐখোয়না লাইচৎ মনুংদা দিজিতেল মীদিয়া সোর্স শিজিন্নবগী মতাংদা নীংথিজনা খঙখিবদগী ঐখোয়না হৌজিক্কী মায় পাকপসি ফংলিবনি। দিজিতেল হেল্থ মিসনগী মতুং ইনবা ওইনা, মসিগী অনৌবা ৱেবসাইত অসি বেনিফিশরীশিংনা মখোয়গী খুদোংচাবগী মতুং ইন্না কান্নবশিং অসি ফংহন্নবগীদমক্তা লোঞ্চ তৌখিবনি”। “প্লেৎফোর্ম অসিনা মতুং তারক্কদবা মতমশিংদসু, ঐখোয়গা মরী লৈনরিবা বেনেফিশরী লাখ ৪০দা হকশেলগা মরী লৈনবা ই-পাউ কয়া পীবদসু তেংবাংগনি”,  হায়না মহাক্না মখা তানা ফোংদোকখি।

সেন্ত্রেল গবর্নমেন্ত হেল্থ স্কিম (সি.জি.ঐচ.এস.) অসি সেন্ত্রেল গবর্নমেন্তকী থৌমীশিং অমসুং স্কিম অসিগী মনুং চল্লিবা অতোপ্পা অখন্নবা বেনিফিশরী কাঙলুপ অমসুং মখোয়গী মখা পোনবা মীওইশিংদা হেল্থকেয়র পীনবা নোদেল এজেন্সীনি। ভারতকী গনতন্ত্রগী পথাপ অসিগী য়ুম্বী মরি, মমিং ওইনা পল্লবদা লেজিসলেচর, জুদিসিএরী, একজেক্যুতিব অমসুং প্রেসকী মতিক চাবা বেনিফিশরী খুদিংগী হেল্থকেয়রগী তঙাই ফদবা খুদিংবু মসিনা য়েংশিনগনি অমসুং মখোয়গী বেনিফিশরীগী বেজ পাক চাউনা লৈরিবা অমসুং এলোপেথীগা লোয়ননা নাৎকী হিদাং-লাংথক্কী পথাপকী খুত্থাংদা পেন-ইন্দিয়া শিনবা থুংনা হেল্থকেয়র পীরিবা অসিনা মরম ওইরগা থৌওং অসি মশাগী ওইনা য়াম্না তোপ তোপ্পনি। ভারত্তা দিজিতেলগী থৌওং নীংথিনা হেনগৎলক্লিবা অসিদা তেংবাংবা ওইনা, সি.জি.ঐচ.এস.না তোঙানবা ওনলাইনগী চেনেলগী খুত্থাংদা হেল্থকেয়র য়ৌহনবদা অহেনবা মিৎয়েং চঙলি।

শ্রী রাজেশ ভুশন, কেন্দ্রগী হকশেল সেক্রেতরী; শ্রী অলোক সক্সেনা, এ.এস. & দি.জি. (সি.জি.ঐচ.এস.); দাঃ নিখিলেশ চন্দ্র, দাইরেক্তর (সি.জি.ঐচ.এস.); দাঃ নীতা বর্মা, দি.জি., এন.আই.সি. অমসুং মন্ত্রালয়গী অতোপ্পা সেনিয়র ওফিসিএলশিংসু থৌরমসিদা ভর্চুএল ওইনা শরুক য়াখি।

****