ঐহাক্কী নুংশিরবা লৈবাক মচাশিং, অদোম খুদিংগী মফমদা খৃস্তমাসকী য়াইফা পেউজেল পীজরি। ঐখোয়না চহিসগী অরোয়বা চয়োলদা লৈরে। ইং ২০২২ অসি লাক্লবগুম্বনি। অদোম খুদিংনা ইং ২০২২গীদমক্তা শেম-শাদুনা লৈনরম্লগনি।

অদুবু, ঐখোয়না হরাও নুংঙাইবগা লোয়ননা চেকশিন্না লৈবগী মতম অমসু ওইরি। ঙসিদি, মালেমগী লৈবাক কয়াদা, কোরোনাগী অনৌবা ভেরিএন্ত ওমিক্রোন্না মরম ওইরগা খুদোংচাদবা কয়া থেংনরি। ভারত্তসু মীওই কয়া অমা ওমিক্রোন পোজিতিব ওইবা থেংনরে। ঐহাক্না অদোমগী মফমদা পাখৎপীদনবা হায়জরি। চেকশিন্না অমসুং মিৎকুপ নাহুম শিংনা লৈবীয়ু। মতম পুম্বদা মাস্ক উপ্পীয়ু অমসুং মতম খরা-খরা কান্নরগা খুৎ হাম্বসু কাওবীগনু।

ভাইরস অসিনা ঙসি ম্যুতেত তৌরকপগা লোয়ননা ঐখোয়না শিংনবশিংগা থেংননবা থৌনা অমসুং ইশাদা থাজবগী চাংসু অদুমক হেনগৎলক্লি। ঐখোয়গী অনৌবা থৌওং পাংথোকপগী ইথিলসু হেনগৎলক্লি। লৈবাক অসিদা ঙসিদি আইসোলেসন বেদ লাখ ১৮ লৈরি। ওক্সীজেনগী তেংবাং য়াওবা বেদ লাখ ৫ লৈরি। আই.সি.য়ু. বেদ লাখ ১গা লিশিং ৪০ লৈরি। আই.সি.য়ু. অমসুং নন-আই.সি.য়ু. বেদ পুন্সিন্নরবদি, বেদ লিশিং ৯০ লৈরি, মরু ওইনা অঙাংশিংগীদমক্তা। লৈবাক অসিদা পি.এস.এ. ওক্সীজেন প্লান্ত লিশিং ৩ হেনবনা ঙসি মথৌ পাংথোক্লি। ওক্সীজেন সিলিন্দর লাখ ৪বু লৈবাক শিনবা থুংনা য়ৌহনখ্রবনি। রাজ্যশিংগী তঙাই ফদবা হিদাকশিংগী বফর দোজ শেম-শাবদা তেংবাংলি। মতিক চানা কোন্নগদবা তেস্তিং কিৎশিংসু মখোয়দা ফংহল্লি।

মরুপশিং,

ঐখোয়না শাথীরবা কোরোনাগা লান্থেংনরকপদা হৌজিক ফাওবদা খঙলক্লিবা লৌশিংনা ইশানা মরী লৈনবা হীরম খুদিংদা চেকশিং-থৌরাং লৌখৎপনা লাইচৎ অসিগা লান্থেংনবদা খ্বাইদগী মতিক চাবা খুৎলায় ওই হায়বা খঙবা ঙম্লে। অদুগা অতোপ্পা খুৎলায় অমনা তীকা থাদোকপনি। কোরোনানা ওইহনবা অরুবা ফিভমশিং য়েংদুনা, ঐখোয়না ভেক্সিন পুথোকপগী থৌওংসু মতম কয়াগী মমাংদগী মিসন মোদতা পাংথোকপা হৌখ্রবনি। ভেক্সিনগী মতাংদা রিসর্চ তৌবগা লোয়ননা, অয়াবা পীবা, সপ্লাই চেন, য়েন্থোকপা, ত্রেনিং তৌবা, আই.তি.না ঙাক্লৌ পীনবা পথাপ অমসুং সর্তিফিকেসনগী থৌওংশিং লেপ্তনা চত্থদুনা লাকখি।

অসিগুম্বা হোৎনবশিং অসিনা মরম ওইরগা, ভারতনা হন্দক্কী চহিগী জনুৱারী ১৬তগী ঐখোয়গী মীয়ামদা ভেক্সিন কাপ্পগী থবক হৌখি। ঐখোয়গী লৈবাক মীয়াম পুনবনা অমত্তা ওইনা হোৎনমিন্নবা অমসুং ৱাখল লেপ্পগী মহৈ ওইনা ঙসি ভারতনা ভেক্সিন দোজ করোর ১৪১ কাপ্পগী মমাংদা অমুক্তা পাংথোকখিদ্রিবা অমসুং লুরবা পান্দম ফংবা ঙম্লিবনি। ঙসিদি, ভারতকী ভেক্সিন কাপ্পা য়ারবা মতিক চাবা অপুনবা মীশিংগী চাউরাকপা ৬১%না ভেক্সিনগী দোজ অনিমক কাপ্নখ্রে। অমসুং ৯০%না অহানবা দোজ কাপ্নখ্রে। মালেমগী খ্বাইদগী চাউবা, পাক-শনবা অমসুং খুদোংচাদবা লম্মিৎ-তুম্মিৎকী মরক্তা তেক্ত-কায়দবা ভেক্সিনেসন কেম্পেন পাংথোকপা ঙমখি হায়বদা ঙসিদি ভারত মচা খুদিংনা চাউথোকচরিবনি।

রাজ্য কয়া, মরু ওইনা তুরিজমগী হীরমদা মরু ওইবা গোৱাগুম্বা রাজ্যশিং, উত্তরাখন্দ, হিমাচলগুম্বা রাজ্যশিংনা ১০০%কী চাংদা সিঙ্গল দোজ কাপ্পগী পান্দম ফংবা ঙমখি। লৈবাক্কী মনুং-হঞ্জিনবা খুঙ্গশিংদা ১০০%কী চাংদা ভেক্সিন কাপ্লে হায়বগী পাউ তাবা মতমদা ইমোন্দা য়াম্না নুংঙাইজবা অমা ফাওই। মসি ঐখোয়গী হকশেল পথাপকী মপাঙ্গল কনবা, ঐখোয়গী তীমশিংনা মথৌ নীংথিনা পাংথোকপা অমসুং হকশেলগী থৌমীশিংগী মপুকচেল শেংবা অমসুং খোঙফম চেৎপা, লৈবাক্কী মীচম মীয়ামগী নীংথিরবা লিচৎ অমসুং সাইন্সতা থাজবগী খুদম্নি। ঐখোয়গী লৈবাক অসিদা নাতোন্দা পীবা তীকা অমসুং মালেমগী খ্বাইদগী অহানবা দি.এন.এ. ভেক্সিন কাপ্পসু হৌগদৌরে।

মরুপশিং,

ভারতনা কোরোনাগা লান্থেংনবগী থৌওং অসি হৌরকপদগী হৌনা  সাইন্সকী ৱাখল্লোন, পাউতাক অমসুং থৌওংদা য়ুম্ফম ওইরগা লাকখি। মমাংগী থা ১১দগী ভেক্সিন কাপ্পগী খোঙথাং চত্থদুনা লাক্লি। লৈবাক মীয়ামশিংনা মসিগী কান্নবসু ফজনা খঙলে। মখোয়গী নুংতিগী পুন্সি মহিংসু হান্নগুম্না হঞ্জিল্লক্লে। শেন্মিৎলোনগী থবক-থৌরমশিংসু অতোপ্পা লৈবাকশিংগা চাংদম্নবদা য়াম্না পুক্নিং থৌগৎনীংঙাই ওইরি।

অদুবু মরুপশিং,

কোরোনা অসি হৌজিক লোইদ্রি হায়বা ঐখোয়না পুম্নমক্না খঙলি। অদুনা, মতাং অসিদা চেকশিনবা হায়বসি য়াম্না মরু ওই। লৈবাক অমসুং লৈবাক মীয়াম্বু তেক্ত-কায়দনা থম্নবগীদমক্তা ঐখোয়না লেপ্তনা হোৎনরি। ভেক্সিন কাপ্পা হৌখিবা মতমদসু, ঐখোয়না থবক অসি সাইন্তিস্তশিংনা পীবা পাউতাকশিংদা য়ুম্ফম ওইরগা হৌখি। অহানবা দোজ অসি কনাদা হান্না কাপ্পা হৌগনি, অহানবা অমসুং অনিশুবা দোজকী মরক্তা নুমিৎ কয়া কান্নগনি, মশা-মউ ফবশিংদা করম্বা মতমদগী কাপ্পা হৌগনি, কোরোনা নাখ্রবা মীওইশিংদা করম্বা মতমদা কাপকনি, মতম কুইনদগী লাইনা লৈদুনা নারগা লাক্লবা মীওইশিংদা মরম্বা মতমদা কাপ্পা য়াগনি হায়বা ৱারেপশিং তত্তনা লৌদুনা লাকখি অমসুং হায়রিবশিং অসিনা নুংশা থিনীংঙাই ওইরবা ফিভমশিং লাকশিনবদা মতেং য়াম্না ওইখি। ভারতনা তোঙান-তোঙানবা ফিভম অমসুং তাঞ্জা কয়াদা সাইন্তিস্তশিংনা পীবা পাউতাকশিংগী মতুং ইন্না মরু ওইবা অমসুং অরুবা ৱারেপশিং লৌখি।

ওমিক্রোনগী মতাংদা ৱাফম কয়া হৌজিক-হৌজিক ঙাংনরি। মালেমগী মফম খুদিংগী ফিভমসু তোঙাল্লি, তোঙানবা ৱাখল্লোন্সু লৈনৈ। ভারতকী সাইন্তিস্তশিংসু মসিগী মতাংদা কুপ্না নৈনরি, থবক তৌরি। ঙসি, ঐখোয়না ভেক্সিন কাপ্পগী থা ১১ মপুং ফারক্লবা অসিদা, সাইন্তিস্তশিংগী পাউতাক অমসুং মালেম্না থেংনখিবা থৌদোক কয়াদা য়ুম্ফম ওইরগা, ঐখোয়না ৱারেপ খরা লৌরে। ঙসি, অজলজী মপোক নুমিৎনি, খৃস্তমাসকী কুমহৈসু ওই, অদুনা ঐহাক্না অদোমগী মফমদা ৱারেপশিং অসি খঙহনফম থোকি হায়না খল্লি।

মরুপশিং,

চহি ১৫দগী ১৮ ফাওবগী অঙাংশিংগীদমক্তা লৈবাক অসিদা ভেক্সিন কাপ্পা হৌরগনি। ইং ২০২২গী জনুৱারী ৩, নিংথৌকাবা নুমিত্তগী হৌরগনি। মসিগী ৱারেপ অসিনা কোরোনাগা লান্থেংনবদা লৈবাক্কী মপাঙ্গল হাপকনি, অদুগা স্কুল-কোলেজতা কারিবা ঐখোয়গী অঙাংশিংগী মমা-মপাশিংগী অৱাবসু হন্থহল্লগনি।

মরুপশিং,

কোরোনা ৱারিয়র, হেল্থকেয়র অমসুং ফ্রন্তলাইন ৱর্করশিংনা মসিগী লান্থেংনরিবসিগী মাইয়োক্তা লৈবাকপু তেক্ত-কায়দনা থম্বদা অচৌবা থৌদাং য়াই হায়বা ঐখোয়না থেংনদুনা খঙলে। মখোয়না ঙসিসু, কোরোনা নাবা অনাবশিংগী মরক্তা মখোয়গী মতম কাইথোক্লি। মরম অদুনা, সরকারনা চেকশিন থৌরাং ওইনা ভেক্সিনগী প্রীকোসন দোজ অসিদি হেল্থকেয়র অমসুং ফ্রন্তলাইন ৱর্করশিংদা হান্না কাপ্পা হৌরগনি হায়না ৱারেপ লৌরে। মসিগী থৌওং অসিনা ইং ২০২২গী জনুৱারী ১০, নিংথৌকাবা নুমিত্তগী হৌগনি।

মরুপশিং,

চহি য়াম্লবশিং অমসুং অরুবা লাইনানা মমাংদগী নারক্লবা মীওইশিংদা প্রীকোসন দোজ অসি কাপ্পগী মথৌ তাই হায়বা ঐখোয়না কোরোনাগী ভেক্সিন কাপ্পা হৌরকপগী খঙলকপা লৌশিংগী মতুং ইন্না খঙলে। ৱাফম অসিবু খন্নরবা তুংদা, চহি ৬০গী মথক্তা লৈবা মত্ম কুইনদগী লাইনা অমা নাদুনা লাক্লবশিংদা দাক্তরগী পাউতাক মতুং ইন্না মখোয়গী অপাম্বগী মতুং ইন্না প্রীকোসন দোজ ফংহনবসু হৌরগনি। মসিসু জনুৱারী ১০দগী হৌগনি।

মরুপশিং,

তোকঙা, অরানবা থাজবা অমসুং অকীবা শন্দোকপগী চৎনবী অমা লৈরিবসিদগী লাপ্না লৈনবা ঐহাক্না মীয়ামদা হায়জনীংই। ঐখোয় লৈবাক মীয়াম পুন্দুনা মালেমগী খ্বাইদগী চাউবা তীকা থাবগী খোঙজং পাংথোক্লিবনি। লাক্কদৌরিবা মতমদসু, মসিগী খোঙজেল য়াঙখৎহনগদবনি অমসুং হেন্না পাকথোক চাউথোকহনগদবনি। অসিগুম্বা হোৎনবগী মতেংদগী ঐখোয়না কোরোনাগী মাইয়োক্তা থেংনরিবা লান অসিদা লৈবাকপু মপাঙ্গল কনখৎহনবা ঙমগনি।

অদোম খুদিংবু অমুক্কা হন্না থাগৎচরি।

***