ప్రధానమంత్రి గరీబ్ కల్యాణ్ యోజన (పి.ఎం.జి.కె.వై.) పథకం కింద నిరుపేద ప్రజలకు సహాయ ప్యాకేజీ కింద రూ. లక్షా 70వేల కోట్లను ప్రభుత్వం ప్రకటించింది. కరోనా వైరస్ మహమ్మారి వ్యాప్తి నేపథ్యంలో దేశవ్యాప్తంగా జీవనోపాధి దెబ్బతిన్నవారి సహాయార్థం ప్రభుత్వం ఈ ప్యాకేజీని ప్రకటించింది. ప్రస్తుతం వృద్ధాప్య పెన్షన్, వితంతు పెన్షన్, వికలాంగుల/దివ్యాంగుల పెన్షన్ పొందుతున్న జాతీయ సామాజిక సహాయ కార్యక్రమ (ఎన్.ఎస్.ఎ.పి.) లబ్ధిదారులకు ఈ ప్యాకేజీ కింద వెయ్యిరూపాయల చొప్పున (రూ. 500చొప్పున రెండు విడతలుగా) అందించేందుకు ఈ ప్యాకేజీని రూపొందించారు. వివిధ రాష్ట్రాలకు, కేంద్ర పాలిత ప్రాంతాలకు రెండు విడతలుగా 2020 ఏప్రిల్, మే నెలల్లో మొత్తం రూ. 2,814.50కోట్లను విడుదల చేశారు. పి.ఎం.జి.కె.వై. కింద, ఎన్.ఎస్.ఎ.పి. పథకాల లబ్ధదారులైన 2.82కోట్లమందికి ఎక్స్.గ్రేషియాగా చెల్లించడానికి ఈ మొత్తాన్ని విడుదల చేశారు.  ఇందిరాగాంధీ జాతీయ అంగవైకల్య పెన్షన్ పథకం (ఐ.జి.ఎన్.డి.పి.ఎస్.) కింద 7.73 లక్షలమంది వికలాంగులైన లబ్ధిదారులకు రూ. 77.73కోట్లను ఈ ప్యాకేజీలో భాగంగానే విడుదల చేశారు.

  ఐ.జి.ఎన్.డి.పి.ఎస్. పథకం కింద పెన్షన్ ప్రయోజనం పొందిన లబ్ధిదారులకు సంబంధించి రాష్ట్రాల, కేంద్రపాలిత ప్రాంతాల వారీ వివరాలు ఈ దిగువన ఇచ్చిన అనుబంధంలో పొందుపరచబడి ఉన్నాయి.

  ఎన్.ఎస్.ఎ.పి. మార్గదర్శక సూత్రాలను అనుసరించి, తీవ్రమైన అంగవైకల్యం కలిగిఉండి, దారిద్ర్య రేఖకు దిగువన ఉండే కుటుంబాలకు చెందిన 18-79 సంవత్సరాల వ్యక్తులకు ఐ.జి.ఎన్.డి.పి.ఎస్. పథకం కింద పెన్షన్ ప్రయోజనాలను వర్తింపజేస్తారు.

ఈ సమాచారాన్ని కేంద్ర గ్రామీణాభివృద్ధి శాఖ సహాయమంత్రి కుమారి సాధ్వీ నిరంజన్ జ్యోతి నిన్న ప్రశ్నోత్తరాల సమయంలో లోక్.సభకు తెలిపారు. ఒక ప్రశ్నకు ఇచ్చిన లిఖితపూర్వ సమాధానంలో మంత్రి ఈ వివరాలను వెల్లడించారు.

****