“কোবিদ-১৯ ভেক্সিন কাপথোকপগী অরোইবা শরুক্তা ঐখোয়না য়ৌশিল্লক্লে৷ ভেক্সিন কাপ্পগী খোঙজেল য়াংখৎহন্দুনা অমসুং কভরেজ চাওথোকহন্দুনা কোবিদ-১৯ ভেক্সিন মপুং-ফানা কাপথোকহন্নবা ঐখোয়না এগ্রেসিব ওইবা কেম্পেন্দ হৌদোক্লসি”৷ ৱারোল অসি হকশেল অমসুং য়াইফ-য়ুম্বালগী কেন্দ্রগী মন্ত্রী, দা. মন্সুখ মন্দাবিয়ানা মনিপুর, মেঘালয়, নাগালেন্দ অমসুং পুদুচেরীদা লৈরিবা কোবিদ-১৯ ভেক্সিন কাপ্পগী স্তেতস অমসুং হর ঘর দস্তক কেম্পেন্দগী মখাদা ফংখিবা প্রোগ্রেস অদু য়েংশিন্নবা মহাক্না থৌবুরেল ওইনা ফমদুনা রাজ্যশিং/য়ু.তি. অসিগী হেল্থ সেক্রেতরীশিং অমসুং হেল্থ দিপার্তমেন্তগী সেনিয়র ওফিসিয়েলশিংগা ঙসি ভর্চুএল্লী ওইনা উন্নখিবদা মহাক্না ফোংদোকখিবনি৷ হায়রিবা রাজ্যশিং/য়ু.তি. অসিনা ভেক্সিন চাং নেম্না কাপ্পগী রিপোর্ত লাক্লি৷ ভারতকী অহানবা দোজ কভরেজ অসি ৮২%নি অমসুং অনিশুবা দোজ কভরেজনা ৪৩%নি, পুদুচেরী (৬৬%, ৩৯%), নাগালেন্দ (৪৯%, ৩৬%), মেঘালয় (৫৭%, ৩৮%) অমসুং মনিপুর (৫৪%, ৩৬%)না মখোয়গী অহানবা অমসুং অনিশুবা দোজ কভরেজতা লৈবাক্কী ওইবা চাংচৎতগী হন্থরি৷

কোবিদ-১৯ লাইনা-লাইচৎ অসি লান্থেংনবদা ভেক্সিন কাপথোকপা অসি খ্বাইদগী শক্তি লৈবা খুৎলাই অমনি হায়না ফোংদোক্লদুনা, এন.জি.ও.শিং, থাজবদা বেজ তৌবা ওর্গনাইজেসনশিং, রিলিজিয়র্স লিদরশিং, কম্ম্যুনিতী ইফ্লুয়েন্সরশিং অমসুং অতোপ্পা পার্তনরশিং য়াওনা তোঙান তোঙানবা স্তেকহোল্দরশিংদা কোবিদ ভেক্সিন মপুং-ফানা কাপথোকহন্নবগীদমক কেন্দ্রগী হকশেল মন্ত্রীনা রাজ্যশিংদা তকশিনখ্রে৷ “ লৈবাক অসিদা কোবিদ-১৯ ভেক্সিনগী ‘সুরক্সা কৱচ’ য়াওদনা ইলিজিবল ওইরবা মীওই অমতা চিথহৌদনবা অমদি লান্না পাউ শন্দোক্লিবা অমদি অরানবদা থাজনবগী ইসুশিং অসি থেংননবা ঐখোয়না অমতা ওইনা হোৎনমিন্নসি৷”

রাজ্য সরকারগী ওফিসিয়েল পুম্নমক চয়োল অমদা নুমিৎ অমমম কাইথোক্তুনা ইলিজিবল ওইরবা য়ুমথোং খুদিংমক্তা থাদুনা মখোয়বু মপুক্নিং ওলহন্দুনা মপুং-ফানা ভেক্সিন কাপথোকহন্নবা দা. মন্সুখ মন্দাবিয়ানা রাজ্যশিংদা তকশিনখি৷ খুঙ্গংশিংদা মাংজৌননা ‘প্রচার তোলি’ দিপ্লোই তৌদুনা এৱার্নেস কেম্পেন্দশিংগা লোইননা ইলিজিবল ওইরবা মীয়ামবু পুনশিন্দুনা অমসুং কাউন্সিলিং তৌবিদুনা মখাতানা ভেক্সিন কাপ্পা য়ারবা প্রজাবু অহানবা অমসুং অনিশুবা দোজ কাপথোকহন্নবা ‘ভেক্সিনেসন তোলি’ পাংথোকপা য়াওনা ‘হর ঘর দস্তক’ কেম্পেন্দ মপাঙ্গল লৈহন্নবগীদমক প্রধান মন্ত্রীগী মপুং ফারবা স্ত্রাতিজীশিং অদু মহাক্না হঞ্জিন-হঞ্জিন পনখি৷ “ঐনা মমাংদা অরুনাচলদা চৎখিবা মতমদা “মপুং ফানা ভেক্সিন কাপ্লবা য়ুমদা” স্তিকরশিং শিজিন্নবা ঐনা উরে৷ অসিগুম্লবা ইন্নোবেতিব ওইরবা স্ত্রাতিজীশিং অসি অতোপ্পা রাজ্যশিংদসু শিজিন্নবা য়াই”, হায়না মহাক্না ফোংদোকখি৷ অঙাংশিং অমসুং মহৈরোইশিংনা মখোয় মখোয়গী ইমুংশিং অমসু কম্ম্যুনিতীশিংদা লৈরিবা অহলশিং অমদি ইলিজিবল ওইরবা মীওইশিংবু কোবিদ-১৯ ভেক্সিন দোজ অনিমক কাপথোকহন্নবা মখোয়গী মপুক্নিং ওলহন্নবা রাজ্যশিংনা অঙাংশিং অমসুং মহৈরোইশিংবু কোবিদ-১৯ ভেক্সিনেসন এম্বাসেদরশিং ওইহনবা য়াই হায়না মহাক্না মখাতাখি৷

জিলা-জিলাগী ওইবা অকুপ্পা মাইক্রো প্লানশিং শেম্নবা, তীম মতিক চানা দিপ্লোই তৌনবা অমসুং ভেক্সিন চাং নেম্না কাপ্লিবা জিলাশিংগী নোংম-নোংমগী ওইরিবা প্রোগ্রেস অদু চাং নাইনা য়েংশিন্নবা দা. মন্দাবিয়ানা রাজ্যশিংদা হায়খি৷ তোঙান তোঙানবা সোসিএল মেদিয়া প্লেতফোর্মশিং অমসুং ত্রেদিস্নেল মেদিয়া ইফেক্তিব ওইনা শিজিন্নবগা লোইননা ভেক্সিন কাপ্পা তপ্লিবা অসিগীদমক তার্গেৎ গ্রুপশিং অদু থেংননবা ইন্নোবেতিব ওইবা অতেনবা ভিদিওশিং শেম্ননবা রাজ্যশিংদা তকশিনখি৷

হৌজিক হৌজিক চত্থরিবা ‘হর ঘর দস্তক’ কেম্পেন্দগী মখাদা ভেক্সিনেসন দ্রাইব পাক শন্না পাংথোকপদা তপ্লিবা অসিগী চপ-চাবা মরমশিং অদু খঙদোক্নবা কেন্দ্রগী হকশেল মন্ত্রীনা রাজ্যশিং/য়ু.তি.দা য়েংশিনখি৷ ভেক্সিন কাপ্পা তপ্পগী ইসুশিং অসি থেংননবা রাজ্য/য়ু.তি. এদমিনিস্ত্রেসননা হৌজিক হৌজিক হোৎনরিবশিং অদু মহাক্না পখি৷

অদুগা অমরোমদা ভারতকী অহানবা দোজ কউরেজ অসি ৮২%নি (ঙসি ফাওবদা), পুদুচেরীগী য়ু.তি. নত্তনা, অতোপ্পা রাজ্যশিংগী কভরেজ অসি ৬০%গী মখাদা লৈরি৷ তার্গেৎ পোপুলেসন লাখ ২০ হেন্না লৈরিবা মেঘালয়না অহানবা দোজ কাপ্নবা মীওই লাখ ৮ ঙাইদুনা লৈরি অমসুং অনিশুবা দোজ কাপ্নবগীদমক লৈরিবা বেনিফিসরীশিংনা লাখ ২.৫ হেল্লি৷ মতৌ অসিগুম্না, মনিপুরসু তার্গেৎ পোপুলেসন লাখ ২৩.৪ লৈবগী মনুংদা মীওই লাখ ১০ হেন্না অহানবা দোজ কাপ্তনা লৈরি অমসুং মীওই ৩.৭ হেল্লিবা বেনিফিসরীশিংনা অনিশুবা দোজ কাপ্তনা লৈরি৷ তার্গেৎ পোপুলেসন লাখ ১৪.৭ লৈরিবা নাগালেন্দনা অহানবা দোজ লাখ ৭.৫ হেন্না কাপ্তনা লৈরি অমসুং বেনিফিসরী লাখ ১.২না অনিশুবা দোজ কাপ্তনা লৈরি৷ মীওই লাখ ১১.৩ লৈরিবা পুদুচেরীদা মীওই লাখ ৩.৮৮ অহানবা দোজ কাপ্তনা লৈরি অমসুং মীওই লাখ ১.৯১না অনিশুবা দোজ কাপ্তনা লৈরি৷

কেন্দ্রগী হকশেল সেক্রেতরী শ্রী রাজেশ ভুসন, এদিস্নেল সেক্রেতরী(হেল্থ) দা. মনোহার অগনানি, হেল্থ সর্ভিসেসকী দাইরেক্তর জেনেরেল দা. সুনিল কুমার, জোইন্ত সেক্রেতরী(হেল্থ) শ্রীমতি ইন্দ্রানি কৌশাল, জোইন্ত সেক্রেতরী(হেল্থ) শ্রী অশোক বাবু অমসুং মন্ত্রালয়গী অতোপ্পা সেনিয়র ওফিসিয়েলশিংনা মীফম অসিদা শরুক য়াখি৷

******