1 0

રાષ્ટ્રીય પુરસ્કાર વિજેતા ફિલ્મ દિગ્દર્શક મધુર ભંડારકરે આજે ભારતના 52મા આંતરરાષ્ટ્રીય ફિલ્મ મહોત્સવના ભાગ રૂપે આયોજિત 'ફિલ્મ નિર્માણ' પરના માસ્ટરક્લાસમાં જણાવ્યું હતું કે સારી ફિલ્મ લાવવા માટે મહત્વાકાંક્ષી ફિલ્મ દિગ્દર્શકોને તેમની વાર્તાઓમાં દ્રઢ વિશ્વાસ હોવો જરૂરી છે.

શ્રી ભંડારકરે કહ્યું, "મારી ફિલ્મનો કોન્સેપ્ટ હંમેશા મારામાંથી જ ઉદ્ભવે છે. હું મારી જાતમાં અને મારી વાર્તાઓમાં વિશ્વાસ કરું છું. જ્યારે મને વાર્તામાં દ્રઢ વિશ્વાસ આવે છે, ત્યારે જ હું ફિલ્મ બનાવવા આગળ વધી શકું છું."

શ્રી ભંડારકરે કહ્યું કે કેમેરા જે કેપ્ચર કરે છે તે જીવનભર ટકે છે, તેથી ફિલ્મની ગતિ ખૂબ જ આકર્ષક હોવી જોઈએ. "હું હંમેશા કલાત્મક અને કોમર્શિયલ ફિલ્મો વચ્ચે સંતુલન જાળવવાનો અને વાસ્તવિક વાર્તાઓ પર આધારિત આકર્ષક ફિલ્મો બનાવવાનો પ્રયત્ન કરું છું," તેમ તેમણે ઉમેર્યું હતું.

સિને-પ્રેમીઓ સાથે વાર્તાલાપ કરતા, તેમણે કહ્યું, "આજકાલ OTT પ્લેટફોર્મ મહત્વાકાંક્ષી દિગ્દર્શકો અને નિર્માતાઓને મોટી તકો પ્રદાન કરે છે."

પેજ 3 અને ટ્રાફિક સિગ્નલ જેવી એવોર્ડ વિજેતા ફિલ્મોના દિગ્દર્શકે પોતાની સિનેમેટિક સફરનું વર્ણન કરતાં કહ્યું કે ચાંદની બારે મારો વિશ્વાસ અને આત્મવિશ્વાસ વધાર્યો. શ્રી ભંડારકરે કહ્યું, “હું ફિલ્મમાં શરૂઆતથી અંત સુધી હતો. જો કે તે ડાર્ક અને ડિપ્રેસિવ ફિલ્મ હતી, તે આકર્ષક હતી અને તેણે કામ કર્યું."

તેમની ભાવિ યોજનાઓ વિશે વાત કરતા, તેમણે કહ્યું, “અમે રોગચાળાના સમયગાળા દરમિયાન ખૂબ જ મુશ્કેલ અને કસોટીના સમયમાંથી પસાર થયા હતા. તેથી હવે હું ટૂંક સમયમાં કોમેડી ફિલ્મમાં કામ શરૂ કરવાનો છું."

આ માસ્ટરક્લાસનું સંચાલન જાણીતા ફિલ્મ વિવેચક તરણ આદર્શ દ્વારા કરવામાં આવ્યું હતું. રાષ્ટ્રીય પુરસ્કાર વિજેતા નિર્દેશક નીલા માધબ પાંડા દ્વારા મધુર ભંડારકર અને તરણ આદર્શને અભિવાદન સાથે સત્રનું સમાપન થયું હતું.

SD/GP/JD

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com