حکومت ہند نے اعلان کیا ہے کہ بھگوان برسا منڈا کے یوم پیدائش کو جن جاتیہ گورو دِوَس کے طور پر منایا جائے گا۔ اس موقع پر وزیراعظم جناب نریندر مودی 15 نومبر 2021کو رانچی میں بھگوان برسا منڈا اسمرتی ادیان  سہ سوتنترتا سینانی سنگرہالیہ کا افتتاح کریں گے   اور یہ افتتاح صبح 9 بج کر 45 منٹ پر ویڈیو کانفرنسنگ کے ذریعے کیا جائے گا۔

وزیراعظم نے ہمیشہ قبائلی برادریوں کی گرانقدر دین کا اعتراف کیا ہے ۔ خاص طور سے ہندوستان کی آزادی کی جدوجہد میں ان کی قربانیوں کو یاد کیا ہے۔ 2016 میں یوم آزادی کی اپنی تقریر میں انہوں نے ہندوستان کی جدوجہدآزادی کےدوران قبائلی مجاہدین آزادی کے رول کو اجاگر کیا تھا اور بہادر قبائلی مجاہدین آزادی کی یاد میں میوزیم بنائے جانے کی بات کی تھی تاکہ آنے والی نسلیں ملک کے لئے ان کی قربانیوں کے بارے میں جان سکیں۔ قبائلی امور کی وزارت نے اب تک قبائلی مجاہدین آزادی کے لئے وقف اس میوزیم کی تعمیر کو منظوری دی ہے۔ یہ میوزیم مختلف ریاستوں اور خطوں کے قبائلی مجاہدین آزادی کی یادوں کو محفوظ کریں گے۔

بھگوان برسا منڈا اسمرتی ادیان سہ سوتنترتا سینانی سنگرہالے  کی تعمیر جھارکھنڈ سرکار کے اشتراک سے رانچی کے اولڈ سنٹرل جیل میں کی گئی ہے، جہاں بھگوان برسا منڈا نے اپنی جان کی قربانی دی تھی۔ یہ ملک اور قبائلی برادریوں کے لئے ان کی قربانی کے تئیں خراج عقیدت ہوگا۔ میوزیم قبائلی ثقافت اور تاریخ کو محفوظ کرنے اور اس کے فروغ میں اہم کردار ادا کرے گا۔ اس کے ذریعےقبائلیوں کی وہ جدوجہد بھی دکھائی جا سکے گی، جو انہوں نے اپنے جنگلات، زمینوں کے حقوق اور اپنی ثقافت کے تحفظ کے لئے کی جو کہ قوم کی تعمیر میں اہم مقام رکھتا ہے۔

بھگوان برسا منڈا کے ساتھ ساتھ میوزیم میں مختلف تحریکوں سے جڑے دیگر قبائلی مجاہدین آزادی مثلاً شہید بدھو بھگت، سِدھو-کانہو، نیلامبر-پیتامبر، دیوا-کِسون،تلنگا کھڑیا، گیا مُنڈا، جاترا بھگت، پوٹو ایچ، بھگیرتھ مانجھی اور گنگا نارائن سنگھ کو بھی اجاگر کیا جائے گا۔ میوزیم میں بھگوان برسا منڈا کا 25 فیٹ اونچا مجسمہ ہوگا اور اس کے ساتھ ساتھ اس خطے کے دیگر مجاہدین آزادی کے 9-9 اونچے مجسمے ہوں گے۔

اسمرتی ادیان 25 ایکڑ زمین پر بنایا گیا ہے اور اس میں ایک موسیقی ریز فوارہ، فوڈ کورٹ، چلڈرنس پارک اور  باغ شامل ہیں۔

قبائلی امور کے مرکزی وزیر پروگرام کے دوران موجود رہیں گے۔

****************************

U-12852

ش ح-ع س-ک ا