প্রধানমন্ত্রীগী লোইশঙ
পি.এম. মোদীনা জে.অমসুং কে.গী নাওশেরা দিস্ত্রীক্তা ইন্দিয়ন আর্ম ফোর্সেসকী লান্মীশিংগা লোয়ননা দিৱালী পাংথোকখ্রে
নাওশেরাগী অথৌবশিং ব্রিগেদর উস্মান, নাইক জাদুনাথ সিংহ, লেফতেনেন্ত আর. আর. রানে অমসুং অতৈ অতোপ্পা কয়াগী মফমদা ইকাই খুম্নবা উৎখ্রে
“ঐহাক্না অদোমগীদমক ভারত মচা কোতি ১৩০গী য়াইফ পাউজেল পুরক্লি”
“ঙসিগী ভারতনা, নিং-তম্বগী ‘অমৃত কাল’ অসিদা তৌবা ঙম্বা অমসুং রিসোর্সকী মরমদা খঙনরে”
“লদাখকী ঙমখৈ মনাক্তগী অরুনাচল প্রদেশ ফাওবা, জয়সলমীরগদী অন্দমান নিকোবর ফাওবা লৈরিবা লম্বীশিং অসি মতমগা চুনবা ইনফ্রাস্ত্রকচরদা শেমগৎপনি, হায়রিবা অসিনা মমাংদা অমুক্তা থোকখিদ্রিবা মওংদা ইনফ্রাস্ত্রকচর ফগৎহল্লি অমসুং লান্মীশিংগীদমক খুদোংচাবা ওইরি”
“লৈবাক্কী দিফেন্সতা নুপীনা শরুক য়ারকপনা অনৌবা থাক অমা য়ৌরক্লি”
“ভারতকী আর্ম ফোর্সেসশিং অসি মালেমগী মকোক্তা লৈবা আর্ম ফোর্সেসশিংগা মান্নরি অদুবু মসিদা লৈরিবা মীওইবগী মগুন অসি তোপ-তোপ্না থোইদোকপা অমা ওইরি”
“ঐখোয়না লৈবাক অসিবু সরকার, শক্তি নত্ত্রগা নিংথৌরেল ওইনা উদে, ঐখোয়গীদমক্তদি, মসি অহিংবা, থৱায় পানবনি, মসিবু ঙাক-শেনবা হায়বা অসি মসিগী লমগী ওইবা ঙমখৈ খক্তা ঙাকপনা লোইবা নত্তে। ঐখোয়গীদমক্তদি ঙাক-শেনবা হায়বা অসি লৈবাক্কী লৈরিবা মখল কয়া, লৈবাক্কী অমত্তা ওইবা অমস
Posted On:
04 NOV 2021 1:46PM by PIB Imphal
মমাংদা হৌখিবা চহি কয়া অমদা মহাক্কী লৈঙাক্তা পাংথোকখিবগুম হন্দক্কী চহি অসিসু প্রধান মন্ত্রী শ্রী নরেন্দ্র মোদীনা আর্ম ফোর্সেসকা লোয়ননা দিৱালী পাংথোকখি। মহাক্না জে.অমসুং কে.গী নাওশেরা দিস্ত্রীক্তকী ইন্দিয়ন আর্ম ফোর্সেস্তা চৎখি।
লান্মীশিংদা ৱা ঙাংলদুনা, প্রধান মন্ত্রীনা হায়খি মদুদি আর্ম ফোর্সেসকা লোয়ন্ননা দিৱালী পাংথোকপা অসি মহাক্কীদমক ওইনা মহাক্কী ইমুং-মনুংগা দিৱালী পাংথোকপগা চপ মান্নৈ। মহাক্না হায়খি, মরম অদুনা, মহাক্না মহাক্কী দিৱালী অসি লৈঙাক্কী থবক অতৈ লোইরবা মতুংদা আর্ম ফোর্সেসকা লোইনরিবনি। মহাক্না হায়খি মহাক মথন্তা লাকপা নত্তে, অদুবু মহাক্কা লোয়ননা ভারত মচা কোতি ১৩০গী য়াইফ পাউজেল পুদুনা লাক্লি। মহাক্না হায়খি ঙসিগী নুমিদাং অসি ভারত মচা খুদিংমক্না লৈবাক অসিগী মথৌনা লৈরবা লান্মীশিংদা মখোয়গী য়াইফ-পাউজেল পীনবা ‘দিয়া’ অমা থানগনি। প্রধান মন্ত্রীনা লান্মীশিংদা হায়খি মদুদি মখোয় অসি লৈবাক অসিগী ঙাকথোক্নবা চুঙ্গোইনি। লৈবাক্কী ওইনা থৌনা ফনা সেবা তৌবা অসি মীপুম খুদিংনা ফংবা হেক্তা ঙমদবা লাইবক ফবা থবক অমনি।
নাওশেরাদগী, শ্রী মোদীনা ইরৈচাশিংবু দিৱালী অমসুং অতৈ লাক্লিবা কুমহৈ গোবর্ধন পুজা, ভাইয়া দুজচাথনচিংবগী হরাও-তয়াম্বা ফোংদোরকখি। মহাক্না গুজরাতকী মীয়ামদা মখোয়গী অনৌবা চহিগীদমক য়াইফ-পাউজেল পীখি।
মহাক্না হায়খি নাওশেরাগী পুৱারীনা ভারতকী থৌনাবু পাংথোক্লি অমসুং মসিদা য়াওরিবা অসি লান্মীশিংগী থৌনা অমসুং অখাং কনবা অসি উৎলি। মফম অসি এগ্রেসর অমসুং এমকোচরশিংগী মায়োক্তা লিংনা লেপ্লি। শ্রী মোদীনা ইমা লৈবাক্কীদমক ঙাক-শেনবদা মপুন্সি কৎথোকখ্রবা নাওশেরাগী অথৌবশিং ব্রিগেদর উস্মান অমসুং নাইক জাদুনাথ সিংহদা ইকাই খুম্নবা উৎখি। মহাক্না লেফতেনেন্ত আর. আর. রানে অমসুং অতৈ অতোপ্পা লৈবাক নিংবদা অতৈ কনাগী মপা লৈত্রবা মথৌনা লৈবশিংগীদমক ইকাই খুম্নবা উৎখি। প্রধান মন্ত্রীনা আর্ম ফোর্সেসপু লেপ্পা লৈতনা মতেং পাংলিবা শ্রী বালদেব সিংহ অমসুং শ্রী বসন্ত সিংহবু মঙোন্দা ফাওরকপা মখোয়গী থৌজালবুসু ফোংদোকখি। মহাক্না সর্জিকেল স্ত্রাইক্তা মখোয়গী থৌদাং লৌখিবা মফম অদুদা লৈরিবা ব্রিগেদপু থাগৎপা ফোংদোকখি। স্ত্রাইক অসিদগী থৌনা ফরবা লান্মীশিংনা তেক্ত-কাইদনা হল্লকপদা অৱাবা কোকখিবা মিকুপ অদুবু মহাক্না নিংশিংখি।
প্রধান মন্ত্রীনা হায়খি মদুদি মীপুম খুদিংমক্কা লোয়ননা ঙমখৈ অসিগী নিং-খা তম্বা ঙাক্তুনা থম্বগী থৌদাং অসিদা ঙসিগী ভারতনা, নিং-খা তম্বগী অমৃত কাল অসিনা মসিগী তৌবা ঙম্বা অমসুং রিসোর্স খঙলে। দিফেন্স রিসোর্সনা মমাংগী মতমদা মপাল লমদা মীপাল তাংলম্বা অদুগী মহুৎতা আত্মানির্ভর্তা চাউখৎপগী মতাংদা ৱা ঙাংখি। মহাক্না হায়খি দিফেন্সকী বজেদ ৬৫% অমা লৈবাক অসিগী মনুংদা শিজিন্নরি। পোত্থোক লিস্ত ২০০ অমা ইরমদমদা লৈনবা শেম-শারি। লিস্ত অসি য়াম্না থুনা য়ামখৎলক্লগনি,হায়না মহাক্না হায়খি। মহাক্না অনৌবা দিফেন্স কম্পনী ৭ অমসু বিজয়া দাশমিদা হৌদোক্লগনি। দিফেন্সকী কোরিদোরসু লাক্লগনি। ভারতকী নহারোলশিং অসি দিফেন্সকা মরী লৈনবা স্তার্ত-অপ কয়া অমদা য়াওরক্লি। মসি পুম্বনা দিফেন্সকী এক্সপোর্তরদা মপাঙ্গল কনখৎহল্লগনি, হায়না মহাক্না হায়খি।
প্রধান মন্ত্রীনা মরুওইবা পীখি মদুদি ভারতকী মিলিতরী পাৱর অসি হোংলকপগী তঙাইফবদা য়েংদুনা চাউথোকপা অমসুং অওনবা অমা পুরকপা তঙাইফদবা লৈ। মহাক্না হায়খি য়াম্না থুনা অওনবা লাক্লিবা তেক্নোলোজী লেন্দস্কেপ অসিনা অনৌবা অওনবা অমা দিমান্দ তৌরক্লি, মরম অসিনা ইন্তিগ্রিতেদ মিলিতরী লিদরশিপ অমগী মতেং পীবদা য়াম্না লুই। সি.দি.এস. অমসুং মিলিতরী এফিয়র্স দিপার্তমেন্তনা মাইকৈ অসিদা চৎলি। মসিগা মান্ননা, মতমগা চুনবা ঙমখৈগী ইনফ্রাস্ত্রকচরনা লৈবাক অসিগী মিলিতরীগী পাঙ্গল হেনগৎহল্লগনি, হায়না মহাক্না হায়খি। মহাক্না হায়খি মদুদি লদাখকী ঙমখৈ মনাক্তগী অরুনাচল প্রদেশ ফাওবা, জয়সলমীরগদী অন্দমান নিকোবর ফাওবা লৈরিবা লম্বীশিং অসি মতমগা চুনবা ইনফ্রাস্ত্রকচরদা শেমগৎপনি, হায়রিবা অসিনা মমাংদা অমুক্তা থোকখিদ্রিবা মওংদা ইনফ্রাস্ত্রকচর ফগৎহল্লি অমসুং লান্মীশিংগীদমক খুদোংচাবা ওইরি।
প্রধান মন্ত্রীনা হরাওবা ফোংদোকখি মদুদি লৈবাক্কী দিফেন্সতা নুপীনা শরুক য়াবা অসিনা অনৌবা থাক অমদা য়ৌরে। নেভী অমসুং এয়র ফোর্সকী ফ্রন্তলাইন্দ চংলবা মতুংদা, হৌজিক্তি নুপীগী থৌদাং অসি আর্মীদসু থৌদাং লৌখ্রে। পর্মানেন্ত কম্মিসন, এন.দি.এ., নেস্নেল মিলিতরী স্কুল, নুপীগী নেস্নেল ইন্দিয়ন মিলিতরী কোলেজ হাংদোকপগা লোয়ননা, প্রধান মন্ত্রীনা নুপীমচাগী সাইনিক স্কুল হাংনবা ইন্দিপেন্দেন্স দেদা লাওথোকখিবা পনখি।
প্রধান মন্ত্রীনা হায়খি মদুদি আর্ম ফোর্সেস্তা, মহাক্না মপা লৈতনা তৌবা ঙম্বা খক্তা উদে অদুবু নোপ্পা লৈত্রবা থবক্কী ইথিল, অকনবা দিতর্মিনেসন অমসুং মপা লৈতবা অমা উবা ফংই। হায়রিবা অসিনা ইন্দিয়ন আর্ম ফোর্সেসনা, মালেমগী অতৈ আর্ম ফোর্সেসতগী নাইতোম তারি। ভারতকী আর্ম ফোর্সেসশিং অসি মালেমগী মকোক্তা লৈবা আর্ম ফোর্সেসশিংগা মান্নরি অদুবু মসিদা লৈরিবা মীওইবগী মগুন অসি তোপ-তোপ্না থোইদোকপা অমা ওইরি হায়না প্রধান মন্ত্রীনা হায়খি। “অদোমগীদমক, থবক অসি তোলোপকী খক্তা নত্তে, অদোমগীদমক মসি লাই খুরুম্বা অমনি, হায়রিবা অসিনা মীওই কোতি ১৩০গী ইথিলগী লাই খুরুম্বা অমনি” হায়না প্রধান মন্ত্রীনা হায়খি। মহাক্না মখা তাখি, “নিংথৌরেল লাকখি অমসুং চৎখি অদুবু ভারত অসি চহি লিশিং অমগী লোইনাইদ্রবা অমনি অমসুং ঙসিসু লৈরি অমসুং মুৎনাইদনা চহি লিশিং কয়া অমসু লৈহৌরগনি। ঐখোয়না লৈবাক অসিবু সরকার, শক্তি নত্ত্রগা নিংথৌরেল ওইনা উদে, ঐখোয়গীদমক্তদি, মসি অহিংবা, থৱায় পানবনি, মসিবু ঙাক-শেনবা হায়বা অসি মসিগী লমগী ওইবা ঙমখৈ খক্তা ঙাকপনা লোইবা নত্তে। ঐখোয়গীদমক্তদি ঙাক-শেনবা হায়বা অসি লৈবাক্কী লৈরিবা মখল কয়া, লৈবাক্কী অমত্তা ওইবা অমসুং লৈবাক্কী ওইনা পুনশিনবা অসিনি”।
“করিগুম্বা ঐখোয়গী আর্ম ফোর্সেস আতিয়া ফংনা থৌনাগী থৌজাল ফংলবা, মখোয়গী থম্মোয়সু মীওইবগী থৌজালগী সমুদ্রনি, মরম অদুনা ঐখোয়গী আর্ম ফোর্সেস অসিনা ঙমখৈ খক্তা ঙাকপা নত্তনা মখোয়না মহৌশাগী ওইবা অমাং-অতা থোক্লকপা মতমদা মতম পুম্বদা মতেং পাংলি। মসিনা ভারত মচা খুদিংগী থম্মোয়দা য়াম্না থাজবা অমা হেনগৎলক্লি। অদোম্না ভারতকী অমত্তা ওইবা অমসুং অপুনবগী কস্তিদিয়ন্নি অমসুং দিফেন্দরনি অমসুং এক ভারত শ্রেস্থা ভারতকী পুক্নিংগী অপাম্বা অমনি। ঐহাক্না মপুং ফানা থাজবা থম্লি মদুদি অদোমগী থৌনাগী পুক্নিং থৌগৎপনা, ঐখোয়না ভারতপু চাউখৎপা অমসুং মাংলোম চংশিনবদা মতোল য়ৌরগনি” হায়দুনা মহাক্না লোইশিনখি।
*******
(Release ID: 1769753)
Visitor Counter : 136
Read this release in:
English
,
Urdu
,
Hindi
,
Bengali
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam