প্রধানমন্ত্রীগী লোইশঙ

তীকা দোজ করোর ১০০ কাপ্পগী মশক থোকপা মাই-পাকপা ফংখিবগীদমক্তা প্রধান মন্ত্রীনা লৈবাক মীয়ামদা ৱাফম থমখ্রে

“তীকা দোজ করোর ১০০ অসি শুপ্নগী মশিং খক্তা নত্তে, মসিনা লৈবাক্কী পাঙ্গল তাক্লিবনি”

“ভারত অমসুং লৈবাক মীয়াম পুম্বগী মাই-পাকপা”

“লাইনানা অচান মীরায় খায়দবনিনা, ভেক্সিন কাপ্পদা ঐখোয়না করিগীদমক্তা অচান-মীরায় খায়দৌরিবনো। মরম অদুনা, তীকা থাবগী খোঙজংদা ঐখোয়না ভি.আই.পি.গী চৎনবী অমত্তা লৈহন্দ্রিবনি”

“ভারতপু মালেমগী ফার্মা হব অমা ওইনা লৌরিবসি হেন্না মপাঙ্গল কনখৎহল্লগনি”

“লাইচৎকী মাইয়োক্তা লান্থেংনবদা মীয়াম্না শরুক য়াবগী থৌওংবু সরকারনা ঐখোয় ইশা ঙাকথোকচবগী খ্বাইদগী অহানবা থবক ওইহনখি”

“ভারতকী তীকা থাবগী খোঙজং অপুনবসি সাইন্সতগী থোক্লকপা, সাইন্সনা চলায়বা অমসুং সাইন্সতা য়ুম্ফম ওইবনি”

“ভারতকী কম্পেনীশিংদা ঙসি মমাংদা তৌখিদ্রিবা ইনভেস্তমেন্ত লাকপদা নত্তনা নহারোলশিংগী থবক্কী অনৌবা খুদোংচাবা কয়াসু লৈরক্লি। স্তার্ত-অপশিংদা রেকোর্দ ইনভেস্তমেন্ত লাকপদগী, য়ুনিকোর্ন কয়াসু থোক্লক্লি”

“স্বচ্ছ ভারত অভিয়ান্না মীয়ামগী ইহৌ ওইবগুম্না, ভারত্তা শাবা পোত্থোক লৈবা, ভারত মচানা শাবা পোত্থোক লৈবা অমসুং ভোকেল ফোর লোকেল ওইবসি ঐখোয়না থবক ওইনা পাংথোকপগী মথৌ তারে”

“ঙাকথোক্নবা কুয়োম্না য়াম্না ফরবসু, ঙাকথোক্নবা কুয়োম্না মতমগা খ্বাইদগী চান্নবা ওইরবসু, কুয়োম অসিনা শোইদনা ঙাকথোক্কনি খঙলবসু, লাল মখা চত্থরিঙৈদি, খুৎলায় থাদবা য়াদ্রি। ঐখোয়না চেকশিন্দনা লৈবগী মরম লৈত্রি। হরাও-কুমহৈশিংবু য়াম্ন চেকশিন্না পাংথোকসি”

Posted On: 22 OCT 2021 11:36AM by PIB Imphal

প্রধান মন্ত্রীনা তীকা দোজ করোর ১০০ কাপ্পগী মশক থোকপা মাই-পাকপা ফংখিবগীদমক্তা লৈবাক মীয়ামদা ৱাফম থমখ্রে।

প্রধান মন্ত্রীনা লৈবাক মীয়ামদা ৱা ঙাংবদা, ভেক্সিন দোজ করোর ১০০ কাপ্পদা থেংনখিবা অরুবা অদুবু মশক থোকপদি ওইবা থৌওংশিংবু থাগৎপা ফোংদোকখি। মহাক্না মাই-পাকপা অসি লৈবাকমচা করোর ১৩০গী হোৎনজমন্দগী ফংবনি, মরম অদুনা মসিদি ভারতকী মাই পাকপনি, লৈবাক মীয়ামগী মাই পাকপনি হায়না ফোংদোকখি। মহাক্না তীকা দোজ করোর ১০০ অসি শুপ্নগী মশিং খক্তা নত্তে, মসিনা লৈবাক্কী পাঙ্গল তাক্লিবনি হায়বগা লোয়ননা থৌওং অসিদি ভারতকী পুৱারীদা অনৌবা তাঙ্কক অমা হৌবনি হায়না মখা তাখি। মসিদি অরুবা পান্দম থমদুনা, মদুবু মতৌ করম্না ফংবা ঙমগদগে খঙবা অনৌবা ভারতকী অনৌবা শক্তম্নি।

ঙসিদি মীওই কয়া অমনা ভারতকী তীকা থাবগী প্রোগ্রামগা অতোপ্পা লৈবাক্কী প্রোগ্রামশিংগা চাংদম্নমরি হায়না প্রধান মন্ত্রীনা পাউদমখি। মহাক্না ভারতনা অথুবা মতমদা ভেক্সিন দোজ বিলিয়ন ১ (করোর ১০০)গী মশিং হেন্দোকপা ঙম্বসিদসু মখোয়না থাগৎনরি হায়খি। অদুবু, অসুম্না য়েংশিনবগী তাঞ্জাসিদা ঐখোয়না কদাইদগী হৌরকপগে হায়বসিদি খঙনদ্রে হায়বা ৱাফমসু মহাক্না থমখি। ভেক্সিন পুথোকপা মালেমগী অচৌবা লৈবাকশিংদা ভেক্সিনগী রিসর্চ, ভেক্সিন থিদোকপগী মতাংদা দিকেদ কয়াগী খঙ-হৈবা অমসুং লৌশিং লৈ অমসুং ভারতনা অয়াম্বা মতমদা মখোয়না পুথোকপা ভেক্সিনগী মখা পোল্লম্মি হায়না মহাক্না হায়খি। মরম অসিনা, চহি ১০০দা খ্বাইদগী চাউবা লাইচৎ লাকপদা, ভারতনা মালেমগী লাইচৎ অসিগা থেংনবা ঙম্বগী মতাংদা ৱাহং হংনবা হৌরকখি হায়না মহাক্না হায়খি। ভারতনা অতোপ্পা লৈবাক্তগী অশুক য়াম্লবা ভেক্সিন লৈনবা শেল কদাইদগী লাক্কনি? ভারতনা করম কান্দা ভেক্সিন ফংগনি? ভারতকী মীয়াম্না ভেক্সিন ফংগদরা, ফংলোইদরা? ভারতনা লাইচৎ অসিনা শন্দোকপা থিংবা ঙম্নবা য়াম্লবা মীয়ামসিবু তীকা কাপ্পা ঙমগদরা? অদুবু ভেক্সিন দোজ করোর ১০০ হেন্দোক্না কাপ্পা ঙমখিবা অসিনা ৱাহং খুদিংগী পাউখুম পীরে। ভারতনা লৈবাক মীয়ামদা ভেক্সিন দোজ করোর ১০০ কাপ্পা ঙমখিবতা নত্তনা পুম্নমক অসি লেম্না কাপখিবনি হায়বদা অহেনবা মিৎয়েংসু চঙখি। ভারতপু মালেমগী ফার্মা হব অমা ওইনা লৌরিবসি হেন্না মপাঙ্গল কনখৎহল্লগনি হায়নসু মহাক্না মীয়ামদা হায়খি।

কোরোনা লাইচৎ হৌরকপদা ভারতকুম্বা গনতন্ত্রা চৎপা লৈবাক্না লাইচৎসিগা লান্থেংনবদা য়াম্না লুনা থোক্কনি হায়না খন্নরম্মি হায়না প্রধান মন্ত্রীনা ফোংদোকখি। ভারত অমসুং মীয়ামগী খন্নরবা তুংদা অসিগুম্লবা অথিংবা অমসুং লিচৎশিংবু মতৌ করম্না চৎনহনগদগে হায়বা ৱাফম কয়া অমসু লৈখি। অদুবু মহাক্না হায়খিবদা, ঐখোয়গী ওইবা গনতন্ত্রাগী ৱাহন্থোক্তি ‘পুম্নমক্কা পুনবা’ হায়বসিনি।  ভারতনা মীয়াম পুম্বগা লোয়নদুনা ‘সবকো ভেক্সিন-মুফ্‌ৎ ভেক্সিন’ খোঙথাং হৌদোকখি। লাইরবা-ইনাক খুনবা, খুঙ্গং-শহর, অনকপা-অথাপ্পা নাইদনা মীপুম খুদিংদা ভেক্সিন য়ৌহনখি। লৈবাক্কী মন্ত্রা অমখক লৈ, মদুদি লাইনানা অচান-মীরায় য়েংদবগুম্না ভেক্সিন্নসু অচান-মীরায় নাইদে হায়বসিনি হায়না মহাক্না ফোংদোকখি। মরম অদুনা, ভেক্সিনগী খোঙথাংদা ভি.আই.পি. কলচর লৈহন্দনবা ৱারেপ্নখি অমসুং লৈসু লৈহনখিদে হায়না মহাক্না ফোংদোকখি।

ভারতকী অয়াম্বা মীয়াম্না ভেক্সিন কাপফমদা ভেক্সিন কাপ্পা চৎপগী মতাংদা ৱাহং কয়া থোক্লকখি হায়না প্রধান মন্ত্রীনা ফোংদোকখি। মালেমগী চাউখৎলবা লৈবাকশিংদা ভেক্সিন কাপ্নীংদবগী চাউরবা শিংনবা অমা ঙসিসু লৈরি। অদুবু ভারতকী মীয়াম্না ভেক্সিন দোজ করোর ১০০ হেন্না কাপ্তুনা মসিগী পাউখুম পীরে। খোঙথাং অসি ‘মীয়াম খুদিংগী হোৎনজমন্নি’ অমসুং মীয়ামগী থবকশিংবু পরিং নাইহল্লবদি, চুংশিন্নরবদি, মদুগী মহৈদি য়াম্না নীংথিবা ওইগনি হায়না মহাক্না ফোংদোকখি। লাইচৎকী মাইয়োক্তা লান্থেংনবদা মীয়াম্না শরুক য়াবগী থৌওংবু সরকারনা ঐখোয় ইশা ঙাকথোকচবগী খ্বাইদগী অহানবা থবক ওইহনখি হায়না মহাক্না হায়খি।

ভারতকী ভেক্সিনেসন প্রোগ্রাম অপুনবা অসি সাইন্সনা থিজিনবদগী ওইথোকপনি, সাইন্সকী লমদা হৌরক্তুনা সাইন্সকী থৌওংগী খুত্থাংদা মাইকৈ মরিদা য়ৌবা ঙম্বনি হায়না প্রধান মন্ত্রীনা ফোংদোকখি। ভারতকী তীকা থাবগী খোঙজং অপুনবসি সাইন্সতগী থোক্লকপা, সাইন্সনা চলায়বা অমসুং সাইন্সতা য়ুম্ফম ওইবসি ঐখোয় পুম্নমক্কী চাউথোকচনীংঙাইনি। ভেক্সিন শাদ্রিঙৈ অমসুং ভেক্সিন কাপ্ত্রিঙৈদগী হৌনা খোঙজং অসি সাইন্তিফিক ওইবা থৌওংদা য়ুম্ফম ওইরগা লাকখি হায়না মহাক্না ফোংদোকখি। ভেক্সিন পুথোকপা হেনগৎপগী তঙাই ফদবা লাকখিবা অদুসু য়াম্না চাউবা শিংনবা অমা ওইখি। মদুগী হেক মথংগী শিংনবনা, তোঙানবা রাজ্যশিংদা য়েন্থোকপা অমসুং মনুং হঞ্জিনবা মফমশিংদা মতম চানা য়ৌহনবা। অদুবু সাইন্তিফিক ওইবা থবক অমসুং অনৌবা থৌওং পুথোকপদগী , লৈবাক অসিনা শিংনবশিং অসিগী ৱারোইশিন পুরকপা ঙমখি। খ্বাইদগী তোঙানবা অয়াঙবা খোঙজেলদা রিসোর্সশিং হেনগৎহনবা ঙমখি। ভারত্তা শাবা কোৱিন প্লেৎফোর্ম্না মীচম মীয়ামদা য়াম্না খুদোংচাহনবতা নত্তনা মেদিকেল স্তাফশিংগী থবকসু য়াম্না লাইথোকহনখি হায়না মহাক্না ফোংদোকখি।

প্রধান মন্ত্রীনা লৈবাক কয়াগী অখঙ-অহৈ অমসুং এজেন্সী কয়ানা ভারতকী শেন্মিৎলোনগী মতাংদা অফবা ৱাখল্লোন লৈরে হায়খি। ঙসিদি, ভারতকী কম্পেনীশিংদা রেকোর্দ ইনভেস্তমেন্ত লাকপদা নত্তনা নহারোলশিংগী থবক্কী অনৌবা খুদোংচাবা কয়াসু লৈরক্লি। স্তার্ত-অপশিংদা রেকোর্দ ইনভেস্তমেন্ত লাকপদা য়ুনিকোর্নসু থোক্লক্লি। হাউজিং সেক্তরদা অনৌবা পাঙ্গল লৈবা উরে। মমাংগী থা খরদা লৌখৎখিবা রিফোর্ম অমসুং খোঙথাংশিংনা ভারতকী শেন্মিৎলোন্না অথুবা মতমদা শাহৌ লৌবদা চাউরবা মতেং পাংগনি হায়না মহাক্না ফোংদোকখি। লাইচৎ মনুংদা। লৌউবগী সেক্তরনা ঐখোয়গী শেন্মিৎলোনবু মপাঙ্গল কন্না লৈহনখি হায়না মহাক্না থমখি। ঙসিদি, সরকারনা হৱাই-চেং ৱাই লৈবগী থবক্তা হান্নগী মতৌদগী য়াম্না হেন্না পাংথোক্লি। শেনফমশিং অসিসু লৌমীশিংগী বেঙ্ক একাউন্ততা হকথেংননা চঙলি।

খ্বাইদগী পিকপা পোৎ-চৈ ফাওবদা ভারত্তা শাবা, ভারত মচানা শাবা ঙাক্তা লৈসি হায়না প্রধান মন্ত্রীনা মীয়ামগী মফমদা থমখি। মীয়াম্না পুন্না হোৎনমিন্নবা মতমদা মসিগী থবক পুম্নমক ওইথোক্কনি হায়না মহাক্না ফোংদোকখি। স্বচ্ছ ভারত অভিয়ান্না মীয়ামগী ইহৌ ওইবগুম্না, ভারত্তা শাবা পোত্থোক লৈবা, ভারত মচানা শাবা পোত্থোক লৈবা অমসুং ভোকেল ফোর লোকেল ওইবসি ঐখোয়না থবক ওইনা পাংথোকপগী মথৌ তারে।

লৈবাক অসিনা অচৌবা পান্দম করম্না থমগনি অমসুং মতৌ করম্না মদুবু মঙফাওনহনগনি হায়বা নীংথিনা খঙই হায়না প্রধান মন্ত্রীনা ফোংদোকখি। অদুবু, মসিগীদমক্তা ঐখোয়না মতম পুম্বদা চেকশিন্না লৈতবদি য়াদে। ঙাকথোক্নবা কুয়োম্না য়াম্না ফরবসু, ঙাকথোক্নবা কুয়োম্না মতমগা খ্বাইদগী চান্নবা ওইরবসু, কুয়োম অসিনা শোইদনা ঙাকথোক্কনি খঙলবসু, লাল মখা চত্থরিঙৈদি, খুৎলায় থাদবা য়াদ্রি হায়বা ৱাফমদা মহাক্না মিৎয়েং চঙখি। ঐখোয়না চেকশিন্দনা লৈবগী মরম লৈত্রি হায়বগা লোয়ননা মহাক্না হরাও-কুমহৈশিংবু য়াম্ন চেকশিন্না পাংথোকসি হায়না ফোংদোকখি।

***



(Release ID: 1765766) Visitor Counter : 91