খুরুমজরি, থৌরম অসিদা শরুক য়ারিবা ঐহাক্কী কেবিনেৎকী মরুপ, শ্রী হর্দীপ সিংহ পুরীজী, শ্রী গজেন্দ্র সিংহ সেখাৱৎজী, শ্রী প্রহলাদ সিংহ পতেলজী, শ্রী কৌশল কিশোরজী, শ্রী বিস্বেস্বরজী, রাজ্যগী মন্ত্রীশিং, অর্বান লোকেল বোদীগী মেয়র অমসুং চেয়র্পর্সন, ম্যুনিসিপাল কম্মিস্নর, স্বচ্ছ ভারত মিসন অমসুং অম্রুত য়োজনাগী থৌমী অমসুং মরুপশিং!!!

ঐহাক্না লৈবাক অসিবু স্বচ্ছ ভারত অভিয়ান অমসুং অম্রুত মিসনগী মথংগী তাঙ্কক্তা খোঙথাবগীদমক্তা থাগৎপা ফোংদোকচরি। ইং ২০১৪দা লৈবাক মীয়াম্না মপান্দা অমাঙবা তৌবগী চৎনবী থাদোক্তুনা ও.দি.এফ. ওইনবা ৱারেপ লৌখি। অমাংশঙ করোর ১০দগী হেন্না শাদুনা লৈবাক মীয়াম্না ৱাশক মঙফাওহল্লে। হৌজিক্কী ‘স্বচছ ভারত মিসন- অর্বান 2.0’গী পান্দমদি ফত্ত-হৌদি অমত্তা লৈতবা শহর -  Garbage-Free ওইবা শহর ওইহনবনি। অম্রুত মিসন্না লৈবাক মীয়াম্বু হীরমসিদা য়াম্না তেংবাংগনি। শহরশিংদা ১০০%গী চাংদা লুবা ঈশিং ফংহনবা ওইরো, শহরগী সিৱেজ সীস্তেম হেন্না ফগৎহনবা ওইরো, মাইকৈ অসিদা ঐখোয়না মাং থানা চঙশিল্লি। মিসন অমৃৎকী মথং থাক্কী পান্দমদি- ‘সিৱেজ অমসুং সেপ্তিক মেনেজমেন্ত হেনগৎহনবা, ঐখোয়গী শহরশিংবু ৱাতর সেক্যুর সিতী ওইহনবা’ অমসুং ঐখোয়গী তুরেলশিংদা মখল অমত্তগী অমোৎপা নালাশিংনা তাশিনহন্দবা অসিনি।

মরুপশিং,

স্বচ্ছ ভারত অভিয়ান অমসুং অমৃত মিসনগী হৌজিক ফাওবগী খোঙচৎনা লৈবাক মীয়ামদা তসেংনা চাউথোকচবা ফাওহনগনি। মসিদা মিসন, ইকায় খুম্নবা, ইশাগী ইজৎ ঙাকপা, লৈবাক্কী অনিঙবা-অপাম্বা অমসুং ইমা লৈবাকপু নুংশিবগী ৱাখল্লোন য়াওরি। লৈবাক অসিনা স্বচ্ছ ভারত মিসনগী মখাদা কান্নবা ফংলিবশিংনা ভারতনা মশাগী থৌদাং পাংথোকপদা থম্মোই কয়াম্না শেংবগে অমসুং পুক্নিং চঙবগে হায়বা ঐখোয়দা হেন্না থাজহল্লি। মাই-পাকপা অসিদা ভারত মচা খুদিংগী খুৎ য়াওই, অদোমগী হোৎনজমনগী হুমাংমলনি। ঐখোয়গী ফত্ত-হৌদি শেংলিবা মীওইশিং, শুমচিৎ পায়দুনা নুংতিগী লম্বী-শোরোক ৱাই শিৎলিবা ইচে-ইচল, ইচিল-ইনাওশিং, ফত্ত-হৌদিগী নমথীরবা মনম খাঙদুনা লৌথোক্লিবা মীওইশিং অসিনা খোঙজং অসিগী তসেংবা অথৌবশিংনি। কোরোনাগী লুরবা তাঞ্জাদা মখোয়না পাংথোকখিবা থবকশিং ঐখোয়না নীংথিনা খঙলে, উরে।

ঐহাক্না অসিগুম্লবা থবকশিং অসিগী মথক্তা ভারত মচা খুদিংবু ‘স্বচ্ছ ভারত মিসন- অর্বান ২.০’ অমসুং অম্রুত ২.০’গীদমক্তা য়াইফ পাউজেল পীজরি। অসিগুম্লবা অনৌবা খোঙথাং অসিনা গান্ধী জয়ন্তী নুমিত্তা হৌদোকপসিদগী হেন্না নুংঙাইবা করি থৌওং লৈগনি। খোঙথাং অসি গান্ধীজীনা পীবিরম্বা ইথিলগী মহৈনি অমসুং বাপুজীগী ৱাখল্লোনশিংগী মরমদগী ঐখোয়না হীরম অসিদা মাং থানা চঙশিনবা ঙম্লিবনি। লু-নান্না লৈবগা লোয়ননা মসিদগী ঐখোয়গী ইমা, ইচে-ইচলশিংগী খুদোংচাবা কয়া য়াম্না হেনগৎলমগনি হায়বা অমুক্তা খন্থবীয়ু! হান্নদি, য়ুমগী মপান্দা অমাংশঙগী খুদোংচাবা লৈতবনা নুপী কয়া অমনা ময়ুমদগী হেন্দোকপা ঙম্লমদে, থবক চৎপা ঙম্লমদে। নুপীমচা কয়া অমদি স্কুলদা অমাংশঙ লৈতবদগী মহৈ তম্বা তোকপা ফাওবা তারম্মিবনি। হৌজিক্তি, ফিভম অসিদা অহোংবা য়াম্না লাক্লে। নীংতম্বগী ৭৫শুবা চহিসিদা মাই-পাকপশিং অমসুং অনৌবা ফিরেপশিংবু নুংশিরবাবাপুজীগী খুয়াখাদা কৎচদুনা মহাকপু ইকায় খুম্নবা উৎচরি।

মরুপশিং,

ঙসিগী থৌরম্না বাবা সাহেবতা কত্থোক্লবা মসিগী ইন্তর্নেস্নেল সেন্তর অসিদা পাংথোক্লিবা অসিসু ঐখোয়গী ওইনা য়াম্না লাইবক ফরবা তাঞ্জা অমনি। বাবাসাহেবনা শহর মচাদা চাউখৎপা পুরকপনা মান্নদবগী মিৎয়েং য়েংবগী চৎনবী মুত্থৎপগী পাম্বৈনি হায়না থাজরম্মি। অফবা পুন্সি মহিং অমা ফংনবগীদমক্তা খুঙ্গংদগী মীওই কয়ানা শহরদা লাকই। মখোয়না থবকপুদি ফংই, অদুবু মখোয়গী পুন্সি মহিংদি খুঙ্গংদগী হেন্না খুদোংচাদবা ওই হায়বসি ঐখোয়না খঙলবনি। মসিদি মখোয়গী ওইনা ফত্তবা ইথিলগী শরুক অনি ফংবগুম্নি। ফিভম অমদনা য়ুমদগী লাপ্না লৈবা অদুগা অতোপ্পা অমদনা অসিগুম্বা ফিভমদা লৈবনি। বাবাসাহেবনা অসিগুম্বা ফিভম্বু হোংদোকপা অমসুং মান্নদনা য়েংবগী থৌওং মুত্থৎনবা অহেনবা মিৎয়েং চঙলম্মি। স্বচ্ছ ভারত মিসন অমসুং মিসন অম্রুতকী মথংগী তাঙ্কক্তি বাবাসাহেবকী মঙলান মঙফাওনহনবগী মাইকৈদা থাংজিনবা খোঙথাং অমনি।

মরুপশিং,

নীংতম্বগী ৭৫শুবা চহিসিদা লৈবাক্না ‘সবকা সাথ, সবকা বিকাস অমসুং সবকা বিস্বাস’কা লোয়ননা ‘সবকা প্রয়াস’কী খোল্লাও অমসু লাওরি। মীয়াম পুন্না হোৎনমিন্নবগী ৱাখল্লোন অসি লু-নান্না লৈবগী হীরমদা য়াম্না মথৌ তাই। অদোম্না খুঙ্গংগী অথাপ্পা মফমশিংদা শোইদনা কোইবা চৎলমগনি, ত্রাইবেলশিংগী নাৎকী য়ুমশিং শোইদনা উরক্লমগনি। রিসোর্স মরাং কাইনা লৈত্রবসু, মখোয়গী তরু-তনানবা য়ুমশিং উবদা অদোম শোইদনা পুক্নিং শুমহৎলমগনি। মতৌ অসুম্না, অৱাং-নোংপোক, হিমাচল নত্ত্রগা উত্তরাখন্দগী চিংদা অদোম কোইবা চৎপীয়ু, চিংদা শারিবা অপিকপ-অপিকপা য়ুমশিংনা লু-নানবনা মরম ওইরগা তোঙানবা শক্তি অমা চেল্লিবদু অমুক্তা থেংনবীয়ু। অসিগুম্লবা মরুপশিংগা পুন্না লৈমিন্নবদগী লু-নানবা অমসুং পুক্নিং নুংঙাইবগা কয়াম্না নকপা মরী লৈনবগে হায়বা খঙবা ঙম্লিবনি।

মরম অদুনা, ঐহাক্না গুজরাতকী মুখ্য মন্ত্রী ওইদুনা চাউখৎপা পুরকপদা তুরিজম্না করি থৌদাং লৌবা য়াবগে খঙদোক্নবা হোৎনরকপা মতমদা লু-নানবদা খ্বাইদগী হেনবা মিৎয়েং চঙখি অমসুং মসিদা মীয়াম খুদিংবু য়াওহনবা পামখি। নির্মল গুজরাত অভিয়ান্না মীয়ামগী ইহৌ ওইরকপা মতমদা মসিগী কান্নবা মহৈ ফংবা ঙমখি। মসিদগী গুজরাতকী অনৌবা শক্তাক ফংখি, রাজ্যগী তুরিজমসু হেনগৎখি।

ইচিল ইনাওশিং,

মীয়ামগী ইহৌ হায়বা ৱাখল্লোন্না স্বচ্ছ ভারত মিসন্না মাই পাকপগী য়ুম্ফম্নি। হান্নদি, শহরগী লম্বীশিংদা, লৈরকশিংদা ফত্ত-হৌদি তাদুনা লৈরম্মি, হৌজিক্তি য়ুম্থোং খুদিংদগী ফত্ত হৌদি খোম্বতা নত্তনা পব্লিক ৱেস্ত সেগ্রেগেসনগী থৌওংদসু অকনবা মিৎয়েং চঙলে। য়ুম্থোং খুদিংদা অচোৎপা অমসুং অকঙবা ফত্ত-হৌদিগী তোঙানবা দস্তবিন থম্নবা ঐখোয়না উরে। য়ুমদগী হেন্দোক্তুনা, মপান্দা করিগুম্বা ফত্ত-হৌদি লৈবা উরবদি, মীয়াম্না লু-নানবগী এপ্তা মসিগী মতাংদা রিপোর্ত তৌনরে, অতোপ্পা মীওইশিংদসু খঙহল্লে। ঐখোয়গী হৌজিক্কী চারোন-শুরোন্না লু-নান্না থম্বগী থৌদাং লৌখৎপা উবসিদা ঐহাক্না য়াম্না নুংঙাইবা ফাওজৈ। মিথাই য়োম্বগী মকুশিং হৌজিক্তি লম্বীদা হুন্দোক্নদরে, মশাগী ফুরিৎখাওদা ওইনা হাপ্নরে। পিক্লিবা অঙাংশিংনা অহল-লমনশিংদা অমোৎ অকায় তৌবগী চৈনরে। মখোয়না মপু-মবেন, মখুরা-মদোনশিংদা ফত্ত-হৌদি হুন্দোকপীগনু হায়নরে। শরহরশিংদা নহাশিংনা স্বচ্ছতা অভিয়ানগীদমক্তা তোঙান-তোঙানবা মওংদা তেংবাংনরি। খরনা ফত্ত-হৌদিদগী লন-থুমদা ওন্থোক্নরি অমসুং খরনা মসিগী মতাংদা মীয়ামদা খঙহন্নবা হোৎনরি।

মীয়াম্না স্বচ্ছ ভারত রেঙ্কিংদা মখয়-মখোয়গী শহরশিংনা মাং থাবা মফমদা লৈগদবনি, মনিং হন্থহনবা য়াদে হায়বগী ভ্বাখল্লোন চেন্নরি, অদুগা করিগুম্বা মনিং হন্থবা মতমদা, ঐখোয়না করিগীদমক্তা মমিং হন্থরক্লিবনো, ঐখোয়না করি শোইখ্রে হায়না খন্নরি। মীদিয়ানা মমাং থাবা শহরগী মতাংদা ইনরি। মসিনা মখোয়দা তৌদবা য়াদে হায়বা ৱাখল্লোন লৈহল্লি। রেঙ্কিং অসিদা মখোয়গী থাক ৱাংবা, লু-নানবগা মখোয়গী শহরগী মমিংগা মরী লৈনবা, অমোৎ-অকায়না থল্লবা শহর অমনি হায়না মীয়ামদা খলহন্দবা পাম্নরে। ইন্দোরগী মীওইশিংনা হৌজিক তি.ভি. য়েংনরমগ্নি, ঐহাক্না হায়রিবা ৱাফম অসি মখোয়না হেন্না য়ানিংলমগনি। ইন্দোরনা রেঙ্কিং অসিদা খ্বাইদগী মকোক্তা লৈ হায়বসি মীয়াম খুদিংনা খঙনরবনি। মসি ইন্দোরগী মীয়ামগী মাই-পাকপনি। অসিগুম্বা মাই-পাকপা অসি লৈবাক্কী শহর খুদিংগা মরী লৈনগদবনি।

ঐহাক্না লৈবাক্কী রাজ্য সরকার, মফম-মফমগী লৈঙাক্লোই, শরগী মেয়রশিংদা অসিগুম্লবা চাউরবা খোঙজং অসিদা অমুক্কা হন্না মিৎয়েং চঙবীয়ু হায়বা ৱাফম অমুক্কা হন্না থমজনীঙই। কোরোনাগী মতমদা খুদোংচাদবা খরা লাক্লবসু, হৌজিক্তি ঐখোয়না অনৌবা ইথিল অমগা লোয়ননা তুংলমচৎকীদমক্তা চৎকদবনি। লু-নানবা হায়বসি নোংমা, থাখাই, চহি অমা নত্ত্রগা মীওই অমখক্তনা পাংথোক্কদবা নত্তে হায়বসি ঐখোয় খুদিংমক্না খঙগদবনি। লু-নানবা হায়বসি নুমিৎ খুদিং, থাখাই খুদিং, চহি খুদিং অমসুং চারোন-শুরোন্না পাংথোক্কদবা চাউরবা খোংজং অমনি। লু-নানবা অসি পুন্সি মহিংনি, পুন্সি হিংবগী মন্ত্রনি।

অয়ুক খুদিং ঙন্না হৌগত্তুনা চিন-য়া শেংদোকপগী হৈনবী লৈবগুম্না লু-নান্না লৈবসু ঐখোয়গী পুন্সিগী শরুক অমা ওইহনগদবনি। মসিদা ঐহাক্না পর্সনেল হাইজিনখক্তগী ৱাফম থম্বা নত্তে, সোসিএল হাইজিনগী ৱাফম ফোংদোক্লিবনি। রেলগী দবা, রেলৱে প্লেৎফোর্ম লু-নান্না থম্বসি য়াম্না লুবা থৌওং নত্তে। সরকারনা থবক-থৌরম খরা পায়খৎলে, মীয়াম্না মতেং খরা পাংলে, হৌজিক্তি রেলৱেগী শক্তম অসি পুংহোং হোংলে।

মরুপশিং,

শহরদা লৈরিবা মিদ্দল ক্লাসকী ইমুং, লাইরবশিংগী ইমুংশিংগী পুন্সি মহিং ফগৎহন্নবা সরকারনা মমাংদা তৌখিদ্রিবা শেনফম কয়া ইনভেস্ত তৌরি। ইং ২০১৪দগী চহি ৭কী মমাংগী ৱারী শারবদি, অর্বান দিভেলপমেন্ত মন্ত্রালয়গীদমক্তা চাউরাকপা লুপা করোর ১.৫গী শেনফম কায়থখি। অদুবু ঐখোয়গী সরকারনা চহি ৭ অসিদা মসিগীদমক্তা লুপা করোর ৪ কায়থখি। থাদরিবা শেনফম অসি শহর লু-নান্না থম্বা, ৱেস্ত মেনেজমেন্ত, সিৱেজ ত্রিতমেন্ত তৌনবা অনৌবা প্লান্ত শাবগীদমক্তনি। হায়রিবা শেনফম অসিদগী লাইরবশিংগী য়ুম, মেত্রোগী অনৌবা লম্বী অসুং স্মার্ত সিতীগা মরী লৈনবা প্রোজেক্ত কয়া অমা লোইশিনবা ঙম্লি। ঐখোয় ভারত মচাশিংনা ঐখোয়গী পান্দম ফংবা ঙমগনি হায়বসিদা ঐহাক্না থাজবা থম্মি। স্বচ্ছ ভারত মিসন অমসুং মিসন অম্রুতকী খোঙজেল অমসুং পাক চাউবা অসিনা ঐহাক্কী থাজবা অমুক্কা হেন্না হেনগৎহল্লে।

ঙসিদি, ভারত্তা নুমিৎ খুদিংগী ফত্ত হৌদিগী চাউরাকপা তোন লাখ ১ প্রোসেস তৌরে। ইং 2014দা লৈবাক অসিনা খোংথাং অসি হৌদোকখিবা মতমদা, লৈবাক অসিদা নোংমদা থোকপা ফত্ত-হৌদিগী ২০%গী চাংদগী তানা প্রোসেস তৌরম্মি। ঐখোয়না ঙসিদি নোংমদা থোকপা ফত্ত হৌদি চাউরাকপা ৭০%গী চাংদা প্রোসেস তৌরি। ঐখোয়না মসিবু ১০০%কী চাংদা শোইদনা য়ৌহনগদবনি। অদুগা পান্দম অসি, ৱেস্ত দিস্পোজেল তৌবগী খুত্থাংদগী খক্তা ফংবা ঙম্লোই, ৱেস্ত তু ৱেল্থ লৈহনবগী খুত্থাংদগী ওইথোকপা ঙমগনি। মরম অদুনা, লৈবাক অসিনা শহরশিংদা ১০০%কী চাংদা ৱেস্ত সেগ্রেগেসন তৌবগা লোয়ননা মসিগা মরী লৈনবা মতমদা চান্নবা পোৎলমশিং নৌনা খোমগৎনবা খুদোংচাবা শাবগী পান্দম ফাওবা থম্লবনি। অসিগুম্বা মতমগা চান্নবা ফেসিলিতীনা ফত্ত-হৌদি খন্দোকপা, রি-সাইকল তৌবা য়াবা পোৎলমশিংবু প্রোসেস তৌবা, তোঙান্না খন্দোকপা য়ারগনি। মসিগী মতেংদগী শহরদা লৈরবা য়াম্লবা ফত্ত-হৌদিশিংবু পমুং ফানা মাঙহনবা ঙমগনি। হর্দীপজী, ঐহাক্না ফত্ত-হৌদি ময়াম শেংদোকপগী ৱারী শারি, অদুগা দিল্লিদসু মতম কুইনদগী ফত্ত-হৌদি কয়ানা অয়েৎপা পীদুনা লাক্লি। মখোয়শিং অসি লৌখৎপীরো হায়দুনা ঙাইদুন লৈরিবনিকো।

মরুপশিং,

মালেম অসিদা হৌজিক্কান গ্রীন জোবকী ওইথোকপা য়াবগী মতাংদা ঙাংনরিবা অসিদা, ভারত্তা হৌগদৌরিবা খোঙথাংশিংনা গ্রীন জোব কয়া অমা ফংহনগনি। লৈবাক অসিদা শহর চাউখৎহন্নবগীদমক্তা মতমগা চান্নবা তেক্নোলোজী শিজিন্নবসু লেপ্তনা হেনগৎলক্লি। হন্দক্কী ওগস্ত থাদা, লৈবাক অসিনা নেস্নেল ওতোমোবিল স্ক্রেপেজ পোলিসী হৌদোকখ্রে। মসিগী অনৌবা স্ক্রেপিং পোলিসী অসিনা ৱেস্ত তু ৱেল্থকী খোঙজং, সর্ক্যুলর ইকোনোমীবু হেন্না মপাঙ্গল হাপ্লগনি। পোলিসী অসিনা লৈবাক্কী শহরশিংনা পোল্ল্যুসনগী চাং হন্থহন্নবা হোৎনবদা অচৌবা থৌদাং লৌগনি। মসিগী ৱাখল্লোন্দি- হন্না শিজিন্নবা, রিসাইকল অমসুং রিকভরী তৌবা হায়বনি। লম্বী-শোরোক শাবদসু সরকারনা ফত্ত-হৌদি শিজিন্নবগী হীরমদা অখন্নবা মিৎয়েং চঙলি। সরকারগী বিলদিং, সরকারগী অৱাস য়োজনাগী মখাদা শারিবা য়ুমশিংদসু রিসাইকল তৌবগী থৌওংশিং পুক্নিং থৌগৎলি।

মরুপশিং,

স্বচ্ছ ভারত অমসুং শহর মচাশিংবু খল মান্ননা চাউখৎনবা হোৎনবগী অনৌবা মাইকৈ অমদা পুনবা হোৎনবদা রাজ্যশিংগী চাউরবা থৌদাং য়াওরি। ঐখোয়না মরুপ্লোই মুখ্য মন্ত্রী খরগী ৱারোলসু হৌজিক তাখ্রে। ঐহাক্না লৈবাক্কী রাজ্য খুদিংগী সরকারদা ঙসি থাগৎপা ফোংদোকচনীংই। রাজ্য খদুংমক্না ঈশিং পীবদগী হৌদুনা সেনিতেসনগী ফাওবগী খ্বাইদগী মথৌ তাবা হীরমশিং মশক খঙদোক্লে। অম্রুত মিসনগী মখাদা প্রোজেক্ত করোর ৮০,০০০ হেন্না থবক পায়খৎপা হৌরে। মসিনা শহরশিংদা নীংথিরবা তুংলমচৎ পীবতা নত্তনা নহাশিংদা অনৌবা খুদোংচাবা কয়া অমসু পীরি। ঐখোয়না মসিগী খুদোংচাবশিং অসি শহর মচাগী য়ুম্থোং ১০০%দা শোইদনা য়ৌহনগদবনি। ঐখোয়গী শহরশিংগী সিৱেজকী ঈশিং ত্রিৎমেন্ত তৌবা হেনগৎলবদি, শহরশিংগী ঈশিং হৌরকফম অমসুং তুরেলশিং লু-নান্না লৈহনবা ঙমগনি। ত্রিৎমেন্ত তৌদবা ঈশিং মরিক অমত্তা তুরেলদা তাহন্দবা অমসুং অমোৎপা নালাগী ঈশিংনা তুরেলদা তাহন্দনবা ঐখোয়না মাং থানা চত্তুনা হোৎনগদবনি।

মরুপশিং,

মসিগী শহর মচা চাউখৎপগী প্রোগ্রাম অসিদা ঙসিদি, ঐহাক্না শহরগী খ্বাইদগী মরু ওইবা খোঙলোয়শিংগী মতাংদা ৱাফম খরা থমজনীংই। হায়রিবা খোংলোই অসিদি লম্বীদা দুকান ফম্বা, থেলা গারী ইনবশিংনি। মখোয়গীদমক্তা পি.এম. স্বনিধী য়োজনানা আশাগী মঙাল অমা ওইনা লাক্লি। নীংতম্বা ফংলবা মতুংগী দিকেদ কয়াদগী মখোয়শিংবু নীংথিনা য়েংশিন্দনা লাক্লে। মখোয়না য়ামদ্রবা শেল খরগীদমক্তা অতোপ্পদগী শেন্দোই চাউনা শেল পুবা তারি। মীগী মরন্না খ্বাং কোন্দুনা হিংদুনা লাক্লি। মখোয়না নুমিৎ চুপ্পা ৱানা হোৎনদুনা ইমুং মনুংদা পুশিনবা শেলদগী শেন্দোই হুনবনা হেন্না য়াম্লি। বেঙ্কতগী শেল লৌবগী ৱারোল, চে-চাং অমত্তা লৈতবনা, মরী লৈনবা বেঙ্কশিংদগী লোনসু ফংদে।

অসিগুম্বা ফিভমশিংদা ওইথোক্লরোই খন্নরম্বা থৌওং কয়া পি.এম. স্বনিধী য়োজনানা ওইথোকহল্লে। ঙসিদি, লৈবাক্কী লম্বীদা দুকান ফম্বা মীওই লাখ ৪৬না থোক্লক্তুনা স্কিম অসিগী কান্নবা ফংলে। মসিগী মনুংদগী, চাউরাকপা মীওই লাখ ২৫দা চাউরাকপা লুপা করোর ২,৫০০ পীখ্রে। লুপা করোর ২,৫০০না লম্বীদা দুকান ফম্বা মীওইশিংগী ফুরিৎখাওদা য়ৌবা হায়বসি অপিকপা ৱাফম নত্তে। মখোয়না হৌজিক্তি দিজিতেল ত্রাঞ্জেক্সন তৌরি অমসুং বেঙ্কতগী লৌখিবা লোনশিংসু শিংবা হৌনরে। মতম চানা লোন শিংদোকপা লম্বীদা দুকান ফম্না মীওইশিংদা শেন্দোই কোকপগী পথাপসু লৈ। তেল্লবা মতম অসিদা, মীওইশিং অসিনা লুপা করোর ৭ হেনবগী ত্রাঞ্জেক্সন তৌনরি। করিগুম্বা মতম খরদা লৈবাক্কী হৈ-শিংলবা মীওই খরনা অসিগুম্বা মীওইশিং অসি কদাইদগী থোক্লক্কদোইনো হায়না হঙই। অসিগুম্বা মীওইশিং অসিনা দিজিতেলগী থৌওং শিজিন্নদুনা শেল লৌবা অমসুং শিংদোক্তুনা লুপা করোর ৭কী ত্রাঞ্জেক্সন তৌদুনা থবক ওইনা উৎলগা মখোয়গুম্বা মীওই লৈরে হায়বা  তাক্লে।

মীওইশিং অসিনা করি তৌই, হলশেল তৌবা মীওইশিংদগী পোৎ লৈবদা মখোয়গী মোবাইলদগী দিজিতেলগী খুত্থাংদা শেল পীরি অমসুং কস্তমরশিংদগী শেল লৌবসু দিজিতেলগী খুত্থাংদা লৌরি। মসিগী য়াম্না কান্নবশিংগী মনুংদা চল্লিবদি, মখোয়গী দিজিতেল ত্রাঞ্জেক্সন পাংথোকপগী হিস্তরী লৈবা অসিনি। অমসুং মসিগী হিস্তরী অসিগী মরম্না, বেঙ্কশিংনা মখোয়গী কারবারগী মরমদা খঙবা ঙমদুনা মখোয়দা মথংগী লোন পীবদসু অরায়বা অমা ওইহল্লি।

মরুপশিং,

পি.এম. স্বনিধীগী মখাদা, লুপা ১০,০০০গী অহানবা লোন শিংদোক্লবা মতুংদা লুপা ২০,০০০গী অনিশুবা লোন পীবা অমসুং মসি শিংদোক্লবা মতুংদা লুপা ৫০,০০০গী অহুমশুবা লোন পীবসু হৌখ্রে। ঙসিদি, অসিগুম্বা মীওই চা কয়ানা অহুমশুবা লোন লৌনবা শেম শাবা লোইরে। মখোয়গুম্বা  মরুপশিংগীদমক্তা বেঙ্কতগী য়াম্লবা শেন্দোই পীদুনা লোন লৌবগী চৎনবীশিং অসি ঙসিদি ঐহাক্না মুথহৎপা পাম্লে। ঙসিদি, লৈবাক শিনবা থুংবগী মেয়রশিংনা ঐহাক্কী নাক্তা লৈরি, শহরশিংগী প্রসিদেন্তশিংনা ঐহাক্কী নাক্তা ফম্লি। থৌওংশিং অসি লাইরবশিংবু তসেংনা তেংবাংবা অমসুং মপাঙ্গল হাপ্পগী থৌওংনি। মসিনা শেন্দোইগী শাথীরবা চৎনবীদগী লাইরবশিংবু নীং তমহনবগী অশেংবা ৱাহন্থোক্নি। পি.এম. স্বনিধীবু মাই পাকহন্নীংদবা অমসুং লাইরবশিংবু তেংবাংনীংবগী থম্মোই শেংবা ৱাখল লৈতবগী মওং অমত্তা লৈবাক্কী মেয়রশিংনা চেল্লোইদবনি।

করিগুম্বা ঐখোয় খুদিংনা অমত্তা ওইনা পুল্লবদি, ঐখোয়গী লাইরবা মরুপশিংগীদমক্তা করি পাংথোকপা ঙম্লোই? অদুগা, ঐখোয়না কোরোনাগী মনুংদসু উখ্রবদুনি, ঐখোয়গী সোসাইতী, লৈরকশিংদা হেঞ্জাং-নাপী য়োনবা মীওই লাক্তবা মতমদা ঐখোয়না অৱাবা কয়া মাইয়োক্নৈ? শঙ্গোম পীবা মীওই লাক্তবা ঐখোয়না খুদোংচাদবা কয়াম থেংনৈ? খুন্নাই অসিগী মীওই খুদিংমক ঐখোয়গীদমক্তা কয়াম্না তঙাই ফদবগে হায়বসি ঐখোয়না কোরোনা মনুংদা নীংথিনা খঙনখ্রবনি। ৱাফমশিং অসি ঐখোয়না খঙনরবনিনা, মখোয়গীদমক্তা অসিগুম্বা স্কিম লৈহনবা অসি ঐখোয়গী থৌদাং নত্তবরা? মখোয়না কারবার তৌনবা শেল ফংলি। মখোয়দা ঐখোয়না দিজিতেল ত্রাঞ্জেক্সনগী ত্রেনিং পীফম থোক্তবরা? অদোমগী শহরদা অসিগুম্বা মরুপ লিশিং ১, ২, ২০,০০০, ২৫,০০০ লৈরম্বা য়াই, মখোয়গী পুন্সিদা অহোংবা পুরক্নবা খোঙথাং লৌখৎপা য়াদবরা?

প্রোজেক্ত অসি ভারত সরকারগী ওইরবসু, পি.এম. স্বনিধী ওইরবসু, নখোয়না থৌজালগী থবকশিং অসি পাংথোক্লবদি, লাইরবশিংগী থম্মোইদা অদোমগী মফম অমা শোইদনা লৈগনি হায়না ঐহাক্না য়াম্না থাজনা হায়জনীংই। মখোয়না শহরগী মেয়র, কোর্পোরেতরবু থাগৎকনি। মখোয়গী তেংবাংগীদমক্তা খুৎ তিংথোকরকখিবা মীওইবু ইকায় খুম্নগনি। লৈবাক্কী শহরশিংগী মেয়র ওইরো, লৈবাক্কী কোর্পোরেতর ওইরো, কাওন্সেল্লর ওইরো, ঐহাক্না মখোয়না অদোম্বু থাগৎহন্নীংই। লম্বীদা থেলা গারী ইন্দুনা পোৎ য়োনবা চৎলীবশিংগী পুন্সিদা অফবা অহোংবা অমা লাকহন্দুনা, মখোয়না অদোম্বু থাগৎপসি ঐহাক্না তসেংনাব পাম্মি। মখোয়নসু মখোয়গী মচা-মশুশিংগী মহৈ তম্বীবা ঙম্নবা অচুম্বা ৱারেপ লৌহন্নীংই।

ঐখোয়না মসি য়াম্না লাইনা পাংথোকপা য়াই। অদুবু, মসিদা অদোম পুম্বগী তেংবাং চঙই। ঐহাক্না কম্মিস্নর পুম্নমক্তা হায়জনীংবদি, মসিদা মীওইবা খুন্নাইদা তেংবাংবগী থবক্নি, গ্রাস রুত লেভেলদগী শেন্মিৎলোন শেমগৎ শাগৎপগী থবক অমসু ওইগনি। মসিদি ইশানা ইশাবু ইকায় খুম্নবগী ৱাখল্লোন লৈহনবগী থবক্নি। লৈবাক্না অদোম্বু ইজৎ লৈরবা থাক অমদা থম্লি। নখোয়না পি.এম. স্বনিধীবু নশামক্কী থবক্নি খন্দুনা পাংথোক্কদবনি। থম্মোই শেংনা মসিদা খোংদাগদবনি। অদোমগী ইমুং খুদিংনা মনা-মশিং লৈবদা অমসুং পোৎয়াম লৈবদা দিজিতেলগী খুত্থাংদা শেল পীরবনি। অচৌবা অহোংবা অমা লাক্লগনি। মখোয়গুম্বা মশিং য়ামদ্রবা মীওইশিংনা পুন্না লুপা করোর ৭কী ত্রাঞ্জেক্সন তৌরিবনি। নখোয় খুদিংনা মখোয়গী তেংবাংলবদি, ঐখোয়না কান্নবা কয়া য়াম্না ফংগনি?

অদুগা ঙসিগী থৌরম অসিদা শরু য়ারিবা চাউখৎ খোংথাংগা মরী লৈনবা মীওই খুদিংদা অদোমসু হীরম অসিদা তুং হন্দনবা হায়জনীংই। অদুগা বাবাসাহেবকী মমিংগা মরী লৈনবা হোল অসিদগী ঐহাক্না ৱা ঙাংলবনিনা ঐখোয়না লায়রবশিংগী করিগুম্বা খরা পাংথোকপা হায়বসিসু ঐখোয়গী থৌদাং অমা ওইরি।

মরুপশিং,

ঐখোয়গী লৈবাক্কী খ্বাইদগী চাউবা রাজ্য অনি, উত্তর প্রদেশ অমসুং মধ্য প্রদেশ্তা লম্বীদা দুকান ফম্বগী মশিং খ্বাইদগী য়াম্বনা বেঙ্কতগী লোন ফংবসিদা ঐহাক্না য়াম্না নুংঙাইবা ফাওই। করম্বা রাজ্যনা খ্বাইদগী মকোক্তা লৈ, করম্বনা রাজ্যনা দিজিতেল ত্রাঞ্জেক্সন খ্বাইদগী পাংথোকই, করম্বা রাজ্যনা অহুমশুবা লোন পীবা ঙম্নরে হায়বগী মতাংদা রাজ্যশিংনা চাংয়েংনবা ঐহাক্না পাম্মি। দুকান ফম্বশিংগী মখুত্তা লুপা লিশিং ৫০ পায়হনবা ঙম্বা রাজ্য অসি করম্বনো, করাম্বা রাজ্যনা খ্বাইদগী হেল্লি হায়বসু খঙলগা চৎহন্নীংই। মসিগা মতাংদা চাংয়েংনবা থমদুনা থা অহুম নত্ত্রগা থা তরুক খুদিংগী রাজ্যশিংদা মনা পীবগী চৎনবী লৈহন্নীংই, মরী লৈনবা শহরশিংদসু মনা পীহন্নীংই। অফবা চাংয়েংনবগী থৌওং লৈবনা লাইরবশিংদসু কান্নবা পীগনি, মপাঙ্গল হাপকনি। ঐখোয় খুদিংনা চাংয়েংনবসিদা শরুক য়ারসি। মেয়র, শহরগী প্রসিদেন্ত, কোর্পোরেতর অসুং কাওন্সেল্লর খুদিংনা মসিদা শরুক য়ামিন্নরসি।

মরুপশিং,

ঐখোয়গী শাস্ত্রদা হায়রম্বা অমা লৈঃ

আস্তে ভগ আসিনঃ য়ঃ উর্ধ্বঃ তিস্থতী তিস্থৎঃ ।

শেতে নিপদয় মান্স্য চরাতি চরতো ভগঃ চরৈৱেতি।।

মসিনা হায়বদি, কর্মগী লম্বীদা চত্তুনা, করিগুম্বা অদোম্না ফমদুনা লৈরবদি, মাই পাকপসু ফংলোই। অদোম্না তুম্লবদি, মাই পাকপসু তুমদুনা লৈখিগনি। অদোম্না লেপখৎলবদি, মাই পাকপসু লেপখৎলক্কনি। অদোম্না মখা তানা চত্থরবদি, মাই পাকপসু মখা তানা চত্থরক্কনি। মরম অদুনা, ঐখোয়না লেপ্তনা মখা তানা চত্থগদবনি। চরৈৱেতি চরৈৱেতি। চরৈৱেতি চরৈৱেতি। অদোম্না চরৈৱেতিগী মন্ত্রগা লোয়ননা মখা তানা চৎসি অমসুং অদোমগী শহরবু খুদোংচাদবা কয়াদগী কোকহন্নবা থৌদাং লৌসি। ঐখোয়না লু-নানবা, নুংঙাই-য়াইফবা ভারত অমা অমসুং মালেমদা তুং কোইনা চৎকদবা লম্বী অমা তাক্কদবনি।

ঐখোয়গী লৈবাক মীয়াম খুদিংনা হোৎনদুনা ঐখোয়গী পান্দম অসি শোইদনা ফংবা ঙমগনি হায়বগী ঐহাক্না চেৎনা থাজৈ। অসিগুম্বা নুংঙাইরবা য়াইফ পাউজেলগা লোয়ননা ঐহাক্না মীয়াম পুম্নমকপু হন্না হন্না থম্মোই শেংনা থাগৎচরি।

*****