পুনেদা লৈবা আই.সি.এম.আর.-নেস্নেল ইন্সতিত্যুত ওফ ভাইরোলোজী (এন.আই.ভি.)না মমাংগী চহি চুপ্পা লানগুম্না থবক তৌখি। দিপার্তমেন্ত ওফ সাইন্স এন্দ তেক্নোলোজীগী ও.তি.তি. চেনেল ওইরিবা ইন্দিয়া সাইন্সকী ইন্তর্ভ্যু অমদা লৈবাক অসিদা সার্স-কোব-২দা সাইন্তিফিক রিসর্চ তৌবদা মাংজিল থানা হোৎনরিবা আই.সি.এম.আর.-এন.আই.ভি.গী দিরেক্তর কুমারি প্রিয়া অব্রহামনা হায়খি, “২০২১ অসি ঐখোয়গী ওইনা অৱাবা অদুবু মহৈ ফংবা চহি অমা ওইখি”।

লৈবাক অসিদা সার্স-কোব-২দা সাইন্তিফিক রিসর্চ তৌবদা মাংজিল থানা হোৎনরিবা ইন্সতিত্যুত অসিদা পাঙথোকপা ভেক্সিন পুথোকপগী প্রোসেসকী তেলপ্পা ৱারোল অমা পীরদুনা মহাক্না শন্দোক্না হায়খি: “ঐখোয়না এপ্রিল (২০২০)দা য়াম্না থুনা আইসোলেৎ তৌখি অমসুং ভারত বাইওতেক ইন্তর্নেস্নেল লিমিতেদতা (বি.বি.আই.এল.)দা স্ত্রেন অমা পীখি, মসিগী মতুংদা মখোয়না মে থাদা হোল ভিরিওন-ইনএক্তিবেতেদ ভেক্সিন অমা দিবেলপ তৌদুনা ঐখোয়না রিভ্যুগীদমক পীরকখি। ঐখোয়না মখোয়গী ইনএক্তিবেসন মপুং ফানা তৌখি, করেক্তরাইজেসন মপুং ফানা তৌখি অমসুং উচি অঙৌবা (হেমস্তর) অমসুং নন-হ্যুমেন প্রিমেৎশিং, হায়বদি য়োংশিংদা প্রি-ক্লিনিকেল ত্রাইএলশিং চত্থবা হৌখি। “মসি পাঙথোকপদা য়াম্না লুবা এক্সপরিমেন্তশিং ওইখি। মসি ঐখোয়গী খ্বাইদগী ৱাংবা বাইও-সেফতী লেবেল-৪ লেবেল কন্তেনমেন্ত ফেসিলিতীশিংদা পাঙথোকখি। মথংগী ফেসতা, দাইগ্নোস্তিক এস্পেক্ত অমসুং লেবোরেতোরী সপ্পোর্ত অসিগুম্বা হীরমশিং অসিদা ঐখোয়না মখোয়বু ক্লিনিকেল ত্রাইএল ফেস I, II, অমসুং IIIদা মতেং পাংখি।”

কোবিদ-১৯গা মরী লৈনবা সাইন্তিফিক দিবেলপমেন্তশিং, লাইচৎকী তুংলমচৎকী এনলাইসিস অমা অমসুং ভাইরস অসিগী মরী লৈনবা অচম্বা ৱাহংশিংগী মতাংদা পাঙথোকপা ইন্তর্ভ্যুদগী ৱারোল খরা মসিদা পীরি।

অঙাংশিংগী কোভাক্সিনগী ত্রায়ল করম্বা স্তেজতা লৈরিবগে অমসুং অঙাংশিংগী ওইবা ভেক্সিন করম্বা মতমদা পুথোক্কনি?

হৌজিক্কী ওইনা, চহি ২-১৮গী কাংলুপকী অঙাংশিংগী ওইবা কোভাক্সিনগী ত্রায়লগী ফেজ II অমসুং III চত্থরি। য়াম্না অথুবদা মসিগী রিজল্তশিং ফংলগনি। রিজল্তশিং অসি রিগ্যুলেতরশিংদা খুৎশিন্নগনি। অদুনা সেপ্তেম্বরদা নত্ত্রগা মসিগী হেক মতুংদা ঐখোয়দা অঙাংশিংগী কোবিদ-১৯ ভেক্সিনশিং লৈরবা য়াই। মসিগী মথক্তা জাইদস কেদিলাগী ভেক্সিন ত্রায়লসু চত্থরি। মসি অঙাংশিংদসু এপ্লাই তৌবা য়াই অমসুং অথুবদা ফংলগনি।

মসিগী মথক্তা ঐখোয়গী প্রজাশিংগীদমক্তা অতৈ করম্বা ভেক্সিনশিং ফংলবা য়াবগে?

জাইদস কেদিলাগী ভেক্সিন অসি শীজিন্ননবা ফংগদবা অহানবা দি.এন.এ. ভেক্সিন ওইরগনি। মসিগী মথক্তা জেন্নোভা বাইওফার্মাকোতিকেল্স লিমিতেদকী এম-আর.এন.এ. ভেক্সিন, বাইওলোজিকেল-ই ভেক্সিন, সিরম ইন্সতিত্যুত ওফ ইন্দিয়াগী নোভোভেক্স অমসুং অতোপ্পা পুক্নীং চীংশিন্নীংঙাই ওইবা অমনা – ভারত বাইওতেক ইন্তরনেস্নেল লিমিতেদনা দিবেলপ তৌবা ইন্ত্রা-নেজল ভেক্সিন অসিনি। ভেক্সিন অসি কাপ্পগী মথৌ তাররোই অমসুং নাতোনগী খুত্থাংদা কাপ্লগনি।

হৌজিক লৈরিবা ভেক্সিনশিং অসি দেল্তা-পল্স ভেরিএন্ততা ইফেক্তিব ওইগদ্রা?

অহানবা ওইনা, দেল্তা-পল্স ভেরিএন্ত অসি দেল্তা ভেরিএন্ত মশামক্তগী শন্দোকপগী চাং হন্থৈ। মপুং ওইনা দেল্তা ভেরিএন্ত অসি লৈবাক ১৩০ হেনবদা হৌজিক লৈরি। মসি লৈবাক শিনবা থুংবদা শন্দোকখ্রে অমসুং মসিগী ভেরিএন্ত অসিনা শন্দোকপগী চাং খ্বাইদগী ৱাংই। এন.আই.ভি.দা ঐখোয়না ভেরিএন্ত অসিদা স্তদী তৌখি। ঐখোয়না ভেক্সিন কাপ্লবা মীওইশিংগী হকচাংশিংদগী পুথোকপা এন্তিবোদীশিং অসি স্তদী তৌখি অমসুং ভেরিএন্ত অসিগী মায়োক্তা চাংয়েং তৌখি। ভেরিএন্ত অসিগী মায়োক্তা এন্তিবোদীগী ইফিকেসী অসি শরুক অনিদগী অহুমগী চাংদা হন্থখি। অদুবু, ভেরিএন্ত অসিগী মায়োক্তা ভেক্সিন অসিনা ঙাকলৌদি পীরি। মখোয়গী ইফিকেসী খজিক্তং হন্থবা য়াই অদুবু ভেক্সিনশিং অসি লাইনা অসিগী তোঙান-তোঙানবা শাথিবা শক্লোনশিংনা মরম ওইরগা পেসেন্তশিং হোস্পিতেলাইজ তৌবা অমসুং শীবা ফাওবদগী ঙাকথোকপদা য়াম্না মরু ওই। ভেরিএন্ত অমা হেক্তা ওইরবসু, ভেক্সিন্না হৌজিক ফাওবগী ওইনা ঐখোয় পুম্নমকপ ঙাকথোকই; দেল্তা ভেরিএন্ত য়াওনা। অদুনা ভেক্সিন কাপথোকপদা চীংনবা পোকপা তৌরোইদবনি।

তুংদা ঐখোয়না বুস্তর দোজ অমা মথৌ তারকপা য়াবগী ওইথোকপা লৈবরা? হীরম অসিদা স্তদী পাঙথোকপা লৈরবরা?

মপাল লৈবাকশিংদা বুস্তর দোজকী স্তদীশিং পাঙথোক্লি অমসুং য়ামদ্রবদা তোঙান-তোঙানবা ভেক্সিন তরেৎ বুস্তর দোজকীদমক চাংয়েং তৌখ্রে। হৌজিক মসি দবল্যু.ঐচ.ও.না অতৈ লৈবাক কয়াগী ভেক্সিনেসন অসি তৌবা লোইদ্রিবা ফাওবা অথিংবা থম্লি। মসিগী মরমদি হায়-ইনকম অমসুং লো-ইনকম লৈবাকশিংগী মরক্তা ভেক্সিন গেপ চাউনা লৈরক্লি। অদুবু তুংলমচৎতা বুস্তরশিংগী রিকম্মেন্দেসনশিং শোইদনা লাক্কনি।

ভেক্সিন য়ানশিন্নবগী মতাংদসু স্তদীশিং পাঙথোক্লিবরা? মসিনা ঐখোয়দা কান্নগদ্রা?

তোঙান-তোঙানবা ভেক্সিন অনি শোইবদগী দোজ অনিদা য়ানশিন্নখিবা ফীভম থোকখি। মখোয়গী সেম্পলশিং লৌদুনা এন.আই.ভি.দা তেস্ত তৌবা মতমদা দোজ অনিদা তোঙান-তোঙানবা ভেক্সিন অসি কাপখিবা পেসেন্তশিং অসি খুদোংথিনীংঙাই ওইদে হায়বা খঙবা ঙমখি। এদভর্স ইফেক্ত অমত্তা লৈখিদে অমসুং ইম্ম্যুনোজেনিসিতী অসি খজিক্তং ফগৎলি। মরম অসিনা মসিনা খুদোংথিগদবা করিগুম্বা অমত্তা থোকহন্নীংঙাই ওইদে। ঐখোয়না মসিগী ফিনোমিনন অসি স্তদী তৌরি অমসুং নুমিৎ খরনিগী মনুংদা কুপ্পা মরোলশিং পীবা ঙম্লগনি।

রিজল্তশিং হেন্না ফজনা পীবা ঙম্বা অমসুং হেন্না থাজবা য়াবা অনৌবা কোবিদ-১৯ তেস্তিং মেথদ লৈরবরা?

অনিশুবা ৱেব মনুংদা কেসশিংগী মশিং য়াম্বনা হোস্পিতালশিং অমসুং লেবোরেতোরীশিং থবক চিনখি। মখোয়গী স্তাফ মেম্বর কয়া নাখি। অদুনা মতম অসিগী মনুংদা তেস্তিংগী ইফিসিএন্সী হন্থখি। রিএজেন্তশিংগী অৱাৎপসু লৈখি। পুম্নমক অসিনা তেস্তিংগী ইফিকেসীদা অকাইবা পীখি। আর.তি.-ই.সি.আর. তেস্তিং মেথদ অসিমক ৭০% সেন্সিতিব ওই। অদুবু মসি দবল্যু.ঐচ.ও.না অদুমক রিকম্মেন্দ তৌখি। অদুবু মতুং তারকপদদি সেম্পলশিং লেবশিংদা থাবা মথৌ তাদনা হেন্না লায়বা অমসুং অথুবা ‘ওন্ত-ওফ-কিয়র’ তেস্তশিং লৈরগনি।

আই.সি.এম.আরনা দিবেলপ তৌবা আর.তি.-লেম্প তেস্তকী মরমদা হায়বীয়ু

আই.সি.এম.আর.না পুথোকপা আর.তি.-লেম্প এসে অসি কোস্ত-ইফেক্তিব এসে অমনি। মসিদা অতাংবা ইক্বিপমেন্ত নত্ত্রগা এক্সতেন্সিব ত্রেনিং মথৌ তাদে অমসুং মসি জিলাশিংদা লৈবা প্রাইমরী হেল্থ সেন্তরশিংদসু তৌবা য়াগনি। মসি তেক্নোলোজীদা চাউখৎপা ৱাৎপা মফমশিংদা য়াম্না থুনা তৌবা য়াবা তেস্ত অসি তুংদা হেন্না পাম্নবা অমা ওইরক্লগনি।

হৌজিক্তি কৈথেলশিংদা সেল্ফ-তেস্তিং কিৎশিংসু ফংলে। মসিনা তেস্ত তৌবা হেনগৎহনগদ্রা?

সেল্ফ-তেস্তিং কিৎশিং অসি এন্তিজেন তেস্তিং কিৎশিংনি মরম অসিনা মখোয়গী সেন্সিতিবিতী অসি আর.তি.-পি.সি.আর. মেথদতগী হন্থৈ। লাইওং উৎপা পেসেন্তশিংদনা হেন্না সেন্সিতিবিতী লৈ। অদুবু লাইওং উত্তবা পেসেন্তশিংগী ওইনদি সেন্সিতিবিতী অসি হন্থৈ।

বর্দ-ফ্লু নত্ত্রগা জিকা ভাইরসনা নাবা মীওইশিংদা সার্স-কোব-২ নারকপা য়াবরা?

বর্দ ফ্লু অমসুং জিকা ভাইরসশিং অসি কোরোনাভাইরসকা মরী লৈনদে। অদুবু ঐচIএনI বর্দ ফ্লু নত্ত্রগা স্বান ফ্লু অমসুং সার্স-কোব-২গী মরক্তা লৈরিবা মান্নবা অদুদি মখোয় অসি মাস্ক নীংথিনা উপ্পা, ফিজিকেল দিস্তেন্সিং থম্বা, খুৎশা লুনান্না থম্বা অমসুং লোক খুবগী নিয়মশিং ঙাক্না চৎলবদি ঙাকথোকপা ঙম্মি। ভাইরস পুম্নমক অসি রেস্পিরেতরী রুৎকী খুত্থাংদা শন্দোকই। অদুনা কোবিদকা চুনবা চৎনা কাংলোনশিং ঙাক্না চৎপনা ভাইরসশিং অসি শন্দোকপা হন্থহল্লি। অদুম ওইনমক জিকা ভাইরস অসিদি কাংনা চিকপদা শন্দোকই।

নোংজুথাগী মতমদা কোবিদ-১৯ নাবা হেনগৎলকপগী ওইথোকপা লৈবরা? 

কাংনা চিকপদগী শন্দোকপা দেঙ্গি, চিকনগুনিয়া অমসুং জিকা ভাইরসকু্বা ভাইরেল ইনফেক্সনশিং অসি নোংজুথাগী মতমদা হেনগৎপা য়াই। অকোইবদা ঈশিং তুংদুনা লৈবা মফমশিং লৈহল্লোইদবনি মরমদি মসিদা কাং মরুম কোকশিল্লি। মসিগী কাংনা চিকপদগী থোকহনবা ইনফেক্সনশিং অসিগী মথক্তা কোরোনা ইনফেক্সন য়াওশিল্লবদি য়াম্না তমথীবা ওইগনি।

মিদিয়াদা মীয়াম তিনবগী ইমেজ কয়া উৎলি। মসিগী ঞ্জান তাবা ৱাৎপা থৌদোকশিং অসিনা কয়াম য়াম্না অমাংবা থোকহনবা য়াবগে?

মসি শোইদনা খুদোংথীবা থোক্নবা মরম অমনি অমসুং মসিনা ঐখোয়না মথংগী ৱেব ইনভাইত তৌরি। দা. দবল্যু.ঐচ.ও.গী দি.জি. তেদ্রোস এ. ঘেব্রেয়ুসুসনা হায় “লাইচৎ অসি ঐখোয়না লোইশিল্লগে হায়না লেপ্পা মতমদা লোইশিনগনি। মসি ঐখোয়গী খুত্তা লৈরে। মসিনা তাকপদি ঐখোয় চেকশিন্না লৈবা মথৌ তাই হায়বনি। মরু ওইনা লাক্কদৌরিবা হরাও কুহ্মৈশিংদা ঐখোয়না মীয়াম তিনবা মফমদা চংলোইদবনি মরমদি মসিনা ভাইরস অসি শন্দোক্নবা মরম অমা ওই।

অতোপ্পা ৱেব অমত্তা লাক্লরোই হায়বগী থাজবা লৈবরা?

অনৌবা ভেরিএন্তশিং লেপ্তনা লাকখিগনি। ঐখোয়গী খ্বাইদগী চাওবা ঙকথোক্নবা পাম্বৈ ওইরিবা খুৎলাই অনি লৈ। মদুদি: নিংথীনা মাস্ক উপ্পা অমসুং মীপুম খুদিংমক ভেক্সিন কাপ্নবা পুক্নিং থৌগৎপা। অদু ওইরবদি করিগুম্বা ৱেব অমা লাক্লবসু মদু অচৌবা খুদোংথীবা অমা ওইরোই।

ইন্তর্ভ্যু অদু মসিদা য়েংবীয়ু।

*****