প্রধানমন্ত্রীগী লোইশঙ
পি.এম.না মধ্য প্রদেশতা প্রধান মন্ত্রী গরীব কল্যান অন্ন য়োজনা (পি.এম.জি.কে.এ.ৱাই.)গী বেনিফিসিয়রীশিংগা ৱারী শাখ্রে
রাজ্য অসিদা বেনিফিসিয়রী করোর ৫রোমনা পি.এম.জি.কে.এ.ৱাই.গী কান্নবা ফংলি
ঈশিং-ঈচাউ থোক্লিবা অমসুং নোং চুরিবা মতম অসিদা ভারত সরকার অমসুং লৈবাক পুম্বনা মধ্য প্রদেশকীদমক লেপ্লি: পি.এম.
কোরোনাগী খুদোংথিবা অসি লাকশিন্নবা লালোং য়াৎপদা ভারতনা লায়রবশিংদা মরু ওইবা মীৎয়েং থমখি: পি.এম.
প্রজা করোর ৮০ হেনবনা লেম্না রাসন ফংবতা নত্তনা লায়রবা ইমুং-মনুং করোর ৮ হেনবনা লেম্না চাকথোং গ্যাস ফংখি
নুপী করোর ২০ হেনবগী জন-ধন একাউন্তশিংদা হকথেংননা লুপা করোর লিশিং ৩০ ত্রান্সফর তৌখি
শিন্মীশিং অমসুং লৌমীশিংগী একাউন্তশিংদা লুপা করোর লিশিং কয়া ত্রান্সফর তৌখি, হংচিৎনা মথংগী ইনস্তোমেন্ত পীগনি
‘দবল-ইঞ্জিন ওইবা সরকারশিং’দা রাজ্য সরকারশিংনা কেন্দ্র সরকারগী স্কীমশিংদা মতেং পাংখি অমসুং ফগৎহনখি অমসুং মখোয়গী শক্তি হেনগৎহনখি: পি.এম.
শ্রী শিবরাজ সিংহ চৌহানগী লুচিং মখাদা, মধ্য প্রদেশতা বিমারুগী রাজ্য ওইনা মতম শাংনা লৈরকপা অদু কোকহনবা ঙমখি: পি.এম.
মমাংদা মখোয়না খুদোংচাবা অমত্তা পীদে শুপ্নগী মীনাম্লগা মীনুংশি উৎপা শাখি। তশেংনা ৱানা হৌরকপা মীওইশিংগী থবক শুবগী মওং অসি খেন্নৈ, ঐখোয়না মসিগী অৱাবশিং থেংনরক্লে:
Posted On:
07 AUG 2021 1:20PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি ভিদিও কনফরেন্সিংগী থোংদা মধ্য প্রদেশতা প্রধান মন্ত্রী গরীব ক্যান অন্ন য়োজনাগী (পি.এম.জি.কে.এ.ৱাই.) বেনিফিসিয়রীশিংগা লোইননা ৱারী শাখ্রে। ইলিজিবল ওইবা মীওই অমত্তা চিত্থবা তৌদনবা স্কীম অসিগী মরমদা হেন্না ভাব তাহন্নবা রাজ্য সরকারনা অকনবা কেম্পেন অমা চত্থখ্রে। রাজ্য অসিনা ওগস্ত ৭ , ২০২১ অসি প্রধান মন্ত্রী গরীব ক্যান অন্ন য়োজনা নুমিৎ হায়না পালন তৌরি। থৌরম অসিদা মধ্য প্রদেশকী রাজ্যপাল অমসুং মুখৎ মন্ত্রীনা শরুক য়াখি। রাজ্য অসিদা বেনিফিসিয়রী করোর ৫রোমনা পি.এম.জি.কে.এ.ৱাই.গী কান্নবা ফংলি।
থৌরম অসিদা ৱা ঙাংলদুনা প্রধান মন্ত্রীনা হায় মধ্য প্রদেশতা নোং কন্না চুবা অমদি ঈচাউগী খুদোংথিবা অসিনা রাজ্য অসিগী পুন্সি কয়া অমদি হিংনবগী পাম্বৈদা শোকহল্লে। লাংফমগী পুংফমসিদা ভারত সরকার অমসুং লৈবাক পুম্বনা মধ্য প্রদেশগীদমক লেপ্লি হায়না মহাক্না থাজবা পীখ্রে।
কোরোনাগী লাইচৎ অসি চহি চামদা অমুক্তং থোকপা খুদোংথিবা অমনি হায়না ফোঙদোক্লসুনা প্রধান মন্ত্রীনা হায় লৈবাক পুম্বনা শীংনবা অসি থেংননবা অমত্তা ওইনা লেপখি। কোরোনানা থোকহল্লকপা লাংফম থেংননবগীদমক ভারতনা লাল্লোং য়াৎপদা লায়রবশিংদা অহেনবা মীৎয়েং থম্লি হায়না মহাক্না নৌহৌননা নীংশিংখ্রে। মসিগী অহানবা নুমিত্তগী হৌরগা লায়রবা অমসুং শিন্মীশিংগী চাননবা চীঞ্জাক অমসুং থবক্কীদমক খন্দুনা লাকখি। প্রজা করোর ৮০ হেনবনা লেম্না রাসন ফংবতা নত্তনা লায়রবা ইমুং-মনুং করোর ৮ হেনবনা লেম্না চাকথোং গ্যাস ফংখি। নুপী করোর ২০ হেনবগী জন-ধন একাউন্তশিংদা হকথেংননা লুপা করোর লিশিং ৩০ ত্রান্সফর তৌখি। মসিগা মান্ননা, শিন্মীশিং অমসুং লৌমীশিংগী একাউন্তশিংদা লুপা করোর লিশিং কয়া ত্রান্সফর তৌখি। মহাক্না ওগস্ত ৯দা লৌমীগী ইমুং-মনুং করোর ১০-১১রোমগী বেঙ্ক একাউন্তশিংদা লুপা করোর লিশিং কয়া ত্রান্সফর তৌরগনি হায়নসু ফোঙদোকখ্রে।
হন্দক্তা ভেক্সিন দোজ করোর ৫০ কাপ্পা ঙমখিবা অদু পল্লদুনা প্রধান মন্ত্রীনা হায় ভারতনা চয়োল অমদা ভেক্সিন কাপথোকপা মীশিংদগী মালেমগী লৈবাক কয়াগী লৈরিবা মীশিংগা চপ মান্নৈ। “মসি অনৌবা ভারতকী, মরোমদোম লেপচবা ঙমবা ভারতকী অনৌবা খোঙফম্নি” হায়না মহাক্না ফোঙদোকখ্রে। মহাক্না হায় ভেক্সিন অসি খুদোংথিনীংঙাই ওইদে অমসুং কান্নবা ফংই অমসুং ভেক্সিনেসন মখা তানা হেনগৎহন্নবা ফোঙদোকখ্রে।
মহাক্না হায় মালেম পুম্বগী ওইনা হিংনবগী লম্বীদা অমুক্তা ওইখিদ্রিবা মওংদা খুদোংথিবা নুংলিঙৈ মনুংদা ভারত্তা কা হেন্না শোকহনদনবা হোৎনদুনা লাক্লি। স্মোল অমসুং মাইক্রো ইন্দস্ত্রীশিংদা লুপা করোর লাখ কয়া-কয়গী মতেং পীথদুনা মখোয়বু মখা তানা মথৌ তৌনবা অমসুং স্তেকহোল্দরশিংগী হিংনবগী লম্বী অসি কক্তনবা হোৎনখি। ৱন নেসন ৱন রাসন কার্দকুম্বা থৌরাংশিং, কা ভরা য়ামদনা লৌনবা স্কীম, পি.এম. স্বনিধিগী খুত্থাংদা হোংনা অমসুং লায়না লোন লৌবা, ইনফ্রাস্ত্রকচর প্রোজেক্তশিং অসিনা শিন্মীশিংদা চাউনা কান্নবা ফংহনখি।
রাজ্য অসিদা লৈরিবা দবল ইঞ্জিনগী সরকার অসিগী কান্নবশিংগী মতাংদা ৱা ঙাংলদুনা প্রধান মন্ত্রীনা রাজ্য সরকার অসিনা এম.এস.পি.দা পোৎ লৈশিনখিববু থাগৎপা ফোঙদোকখ্রে। মধ্য প্রদেশনা চহি অসিদা লৌমী লাখ ১৭ হেনবদগী গেহু লৈশিনখি অমসুং মখোয়গী একাউন্তদা হকথেংননা লুপা করোর লিশিং ২০ দিপোজিৎ তৌখি। চহি অসিদা রাজ্য অসিনা গেহু লৈশিনবগী সেন্তর মশিং খ্বাইদগী য়াম্না লিংখৎপা ঙমখি। ‘দবল-ইঞ্জিন ওইবা সরকারশিং’দা রাজ্য সরকারশিংনা কেন্দ্র সরকারগী স্কীমশিংদা মতেং পাংখি অমসুং ফগৎহনখি অমসুং মখোয়গী শক্তি হেনগৎহনখি।
শ্রী শিবরাজ সিংহচৌহানগী লুচিং মখাদা, মধ্য প্রদেশতা বিমারুগী রাজ্য ওইনা মতম শাংনা লৈরকপা অদু কোকহনবা ঙমখি হায়না প্রধান মন্ত্রীনা ফোঙদোকখ্রে।
হৌজিক পাল্লিবা সরকারগী মখাদা সরকারগী স্কীমশিংদা খোঙজেল য়াংনা দেলিবরী তৌবগী মতাংদা প্রধান মন্ত্রী মমাংগী সরকারগী সিস্তেমশিংদা লৈরম্বা অশোইবশিং পুথোকখি। মহাক্না হায় মখোয়না বেনিফিসিয়রীশিংগা করিসু খন্নরম্বা তৌদনা লায়রবশিংগী মরমদা ৱাহংসু হংই অদুগা পাউখুমসু মশানা পীজৈ। লায়রবশিংদা বেঙ্ক একাউন্তশিং, লম্বী-থোং, চাকথোং গ্যাস, তোইলেৎ, তোতি ঈশিং, লোনশিং অসিগুম্বা খুদোংচাবশিং অসিগী কান্নবা লৈতে হায়না খলমখি। অরানবা ৱাখল্লোন অসিনা মতম শাংনা লায়রবশিংবু খুদোংচাবা ফংহনদনা লৈরকখি। প্রধান মন্ত্রীনা হায় লায়রবা মীওইশিং অসিগুম্বা হৌজিক লুচিংবা ওইরিবশিং অসিসু অৱাবা ফীভম অসি থেংনদুনা লাকখি অমসুং মখোয়না অৱাবা অসি খংই। হন্দক চহি খরা অসিদা লায়রবশিংগী মপাঙ্গল কলহন্নবা অমসুং শক্তি পীনবা তশেংনা অমসুং মওং চুম্না হোৎনদুনা লাকখি। ঙসি লৈবাকসিগী খুঙ্গং-খুঙ্গংদা লম্বী শেম্লি, নৌনা থবক্কী খুদোংচাবশিং পীরি, কৈথেলশিংদা লৌমীশিংনা লায়না য়ৌবা ঙম্লি, অনা অয়েক য়াওরকপা মতমদা লায়রবশিংনা হোস্পিতালদা মতম চানা য়ৌবা ঙম্লে।
ঙসি নেস্নেল হেন্দলুম দে নুমিৎতা প্রধান মন্ত্রীনা ১৯০৫কী ওগস্ত ৭তা স্বদেশিগী ইহৌ হৌদোকখিবা অদু নীংশিংখ্রে। খুঙ্গঙ, লায়রবা, ত্রাইবেলশিংবু মপাঙ্গল কলহন্নবা অচৌবা থৌরাং অমসু লৈবাকসিদা পায়খৎলি অমসুং থৌরাং অসি ঐখোয়গী ফিশা-লোনশাগী, খুৎ-শা হৈবগী থৌওংশিংবু য়োকখৎনবনি। থৌরাং অসি নেস্নেল হেন্দলুম দে নুমিৎ পালন তৌবগা লোইননা লোকেলগীদমক ভোকেল ওইনবনি হায়না মহাক্না ফোঙদোকখ্রে। খাদিগী মতাংদা প্রধান মন্ত্রীনা হায় মতম অমদা মিরাইবিরুরবা খাদি ঙসিদি অনৌবা ব্রান্দ অমা ওইরে। “ঙসি ঐখোয়না নীংতম্বগী ১০০ শুবা চহিগী মায়কৈদা অনৌবা খোঙথাং অমা থাংজিল্লকপা মতমসিদা নীংতম লান্থেংদা লৈখিবা খাদি ইথিল অদু হেন্না চেৎশিনহনবা তাই” হায়না প্রধান মন্ত্রীনা ফোঙদোকখ্রে। লাক্কদৌরিবা হরাও-কুহ্মৈশিং অসিদা লোকেল হেন্দিক্রাফকী পোৎ খরা লৈবীনবা মীয়ামদা মহাক্না হায়খ্রে।
প্রধান মন্ত্রী ৱা ঙাংবা লোইশিল্লকপদা মহাক্না হরাও-কুহ্মৈশিংগী মনুংদা কোরোনা অসি কাউথোকপা তৌদনা চেকশিল থৌরাং লৌখৎনবা চেকশিনৱা থমখ্রে। মহাক্না লাইচৎ অসিগী অহুমশুবা ৱেব থিংনবা হোৎনবা মথৌ তাই হায়না অকনবা ৱাফম থমখি অমসুং মীয়ামদা চেকশিল থৌরাং পুম্নমক ঙাক্না চৎপীনবা হায়জখ্রে। শ্রী মোদীনা, “ঐখোয়না মশা-মউ ফবা ভারত অমসুং চাউখৎপা ভারত অমা ওইহন্নবা ৱাশক লৌরসি” হায়না ফোঙদোক্লদুনা ৱা ঙাংবা লোইশিনখি।
প্রধান মন্ত্রীনা হন্দক্তা গুজরাত অমসুং উত্তর প্রদেশতা লৈবা পি.এম.জি.কে.এ.ৱাই.গী বেনিফিসিয়রীশিংগসু ৱারী শাখি।
***
(Release ID: 1743548)
Visitor Counter : 242
Read this release in:
English
,
Urdu
,
Marathi
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam