ଅର୍ଥ ମନ୍ତ୍ରଣାଳୟ
୨୦୨୧ ଜୁଲାଇ ପାଇଁ ଜିଏସଟି ରାଜସ୍ୱ ଆଦାୟ
ଜୁଲାଇରେ ୧,୧୬,୩୯୩ କୋଟି ଟଙ୍କାର ଜିଏସଟି ରାଜସ୍ୱ ସଂଗ୍ରହ
ଓଡ଼ିଶାରେ ୫୪% ଅଧିକ ଜିଏସଟି ସଂଗ୍ରହ ହୋଇଛି
୨୦୨୧ ଜୁଲାଇରେ ରାଜ୍ୟରେ ୩,୬୧୫ କୋଟି ଆୟ
୨୦୨୦ ଜୁଲାଇରେ ଏହା ୨,୩୪୮ କୋଟି ଟଙ୍କା ଥିଲା
Posted On:
01 AUG 2021 12:24PM by PIB Bhubaneshwar
୨୦୨୧ ଜୁଲାଇ ମାସରେ ମୋଟ ୧,୧୬,୩୯୩ କୋଟି ଟଙ୍କାର ଜିଏସଟି ରାଜସ୍ୱ ସଂଗ୍ରହ ହୋଇଛି, ଯେଉଁଥିରେ ୨୨,୧୯୭ କୋଟି ଟଙ୍କାର ସିଜିଏସଟି, ୨୮,୫୪୧ କୋଟି ଟଙ୍କାର ଏସଜିଏସଟି, ୫୭,୮୬୪ କୋଟି ଟଙ୍କାର ଆଇଜିଏସଟି (ଉତ୍ପାଦ ଆମଦାନି ଉପରେ ସଂଗୃହୀତ ୨୭,୯୦୦ କୋଟି ଟଙ୍କାକୁ ମିଶାଇ) ଏବଂ ୭,୭୯୦ କୋଟି ଟଙ୍କାର ସେସ୍ (ଉତ୍ପାଦ ଆମଦାନି ଉପରେ ଆଦାୟ ହୋଇଥିବା ୮୧୫ କୋଟି ଟଙ୍କାକୁ ମିଶାଇ) ଅନ୍ତର୍ଭୁକ୍ତ । ୨୦୨୧ ଜୁଲାଇ ୧ରୁ ୨୦୨୧ ଜୁଲାଇ ୩୧ ମଧ୍ୟରେ ଦାଖଲ ହୋଇଥିବା ଜିଏସଟିଆର-୩ବିରୁ ହାସଲ କରାଯାଇଥିବା ଜିଏସଟି ସଂଗ୍ରହ ଏବଂ ସମାନ ଅବଧିରେ ହାସଲ କରାଯାଇଥିବା ଆଇଜିଏସଟି ଏବଂ ଆମଦାନିରୁ ସଂଗ୍ରହ ହୋଇଥିବା ସେସ୍ରେ ଉପରୋକ୍ତ ସଂଖ୍ୟା ସାମିଲ ରହିଛି ।
୨୦୨୧ ଜୁଲାଇ ୧ରୁ ଜୁଲାଇ ୫ ତାରିଖ ମଧ୍ୟରେ ଦାଖଲ ହୋଇଥିବା ରିଟର୍ଣ୍ଣରୁ ହାସଲ କରାଯାଇଥିବା ୪,୯୩୭ କୋଟି ଟଙ୍କାକୁ ୨୦୨୧ ଜୁନ ମାସ ପାଇଁ ଉଦ୍ଦିଷ୍ଟ ପ୍ରେସ ଇସ୍ତାହାରରେ ଦର୍ଶାଯାଇଥିବା ଜିଏସଟି ସଂଗ୍ରହରେ ମଧ୍ୟ ସାମିଲ କରାଯାଇଥିଲା, କାରଣ କୋଭିଡ ମହାମାରୀର ଦ୍ୱିତୀୟ ଲହରକୁ ଦୃଷ୍ଟିରେ ରଖି ୫ କୋଟି ଟଙ୍କା ପର୍ଯ୍ୟନ୍ତ ମୋଟ କାରବାର କରୁଥିବା ଟିକସଦାତାଙ୍କ ନିମନ୍ତେ ୨୦୨୧ ଜୁନ୍ ମାସ ଲାଗି ୧୫ ଦିନ ବିଳମ୍ବିତ ରିଟର୍ଣ୍ଣ ଫାଇଲିଂ ପାଇଁ ଉଦ୍ଦିଷ୍ଟ ସୁଧ ଛାଡ଼/ହ୍ରାସ ଆକାରରେ ଟିକସଦାତାଙ୍କୁ ବିଭିନ୍ନ ରିହାତି ପ୍ରଦାନ କରାଯାଇଥିଲା ।
କେନ୍ଦ୍ର ସରକାର ନିୟମିତ ସମାଧାନ ସ୍ୱରୂପ ଆଇଜିଏସଟିରୁ ସିଜିଏସଟିକୁ ୨୮,୦୮୭ କୋଟି ଓ ଏସଜିଏସଟିକୁ ୨୪,୧୦୦ କୋଟି ଟଙ୍କା ଥଇଥାନ କରିଛନ୍ତି । ୨୦୨୧ ଜୁଲାଇ ମାସ ନିମନ୍ତେ ଉଦ୍ଦିଷ୍ଟ ନିୟମିତ ଥଇଥାନ ପରେ କେନ୍ଦ୍ର ଓ ରାଜ୍ୟଗୁଡ଼ିକର ମୋଟ ରାଜସ୍ୱ ସିଜିଏସଟି ପାଇଁ ୫୦,୨୮୪ କୋଟି ଟଙ୍କା ଓ ଏସଜିଏସଟି ନିମନ୍ତେ ୫୨,୬୪୧ କୋଟି ଟଙ୍କା ରହିଛି ।
୨୦୨୧ ଜୁଲାଇ ମାସ ନିମନ୍ତେ ସଂଗ୍ରହ ହୋଇଥିବା ରାଜସ୍ୱ ପରିମାଣ ଗତବର୍ଷ ସମାନ ମାସରେ ଆଦାୟ ହୋଇଥିବା ଜିଏସଟି ରାଜସ୍ୱଠାରୁ ୩୩% ଅଧିକ । ଏହି ସମୟରେ ଉତ୍ପାଦ ଆମଦାନିରୁ ହାସଲ ହୋଇଥିବା ରାଜସ୍ୱ ୩୬% ଅଧିକ ହୋଇଥିବା ବେଳେ ଘରୋଇ ନେଣଦେଣ (ସେବା ଆମଦାନି ସମେତ)ରୁ ଆଦାୟ ହୋଇଥିବା ରାଜସ୍ୱ ପରିମାଣ ଗତବର୍ଷ ସମାନ ମାସରେ ଉକ୍ତ ଉତ୍ସରୁ ଆସିଥିବା ରାଜସ୍ୱ ତୁଳନାରେ ୩୨% ଅଧିକ ହୋଇଛି ।
ମାସିକ ଜିଏସଟି ଆଦାୟ ଲଗାତର ୮ ମାସ ପାଇଁ ୧ ଲକ୍ଷ କୋଟି ଟଙ୍କା ଅତିକ୍ରମ କରୁଥିଲା ବେଳେ ୨୦୨୧ ଜୁନରେ ଏହା ୧ ଲକ୍ଷ କୋଟି ଟଙ୍କା ତଳକୁ ଖସିଥିଲା, କାରଣ ୨୦୨୧ ଜୁନ ମାସ ପାଇଁ ଆଦାୟ ହେଉଥିବା ଜିଏସଟି ରାଜସ୍ୱ ଆଦାୟ ମୁଖ୍ୟତଃ ୨୦୨୧ ମେ ମାସ ସହ ଜଡ଼ିତ ଥାଏ, କିନ୍ତୁ କୋଭିଡ ମହାମାରୀର ଦ୍ୱିତୀୟ ଲହର ଯୋଗୁ ମେ ମାସରେ ଅଧିକାଂଶ ରାଜ୍ୟ/କେନ୍ଦ୍ରଶାସିତ ଅଞ୍ଚଳ ସମ୍ପୂର୍ଣ୍ଣ କିମ୍ବା ଆଂଶିକ ଲକଡାଉନରେ ରହିଥିଲେ । ତେବେ ପରେ କୋଭିଡ କଟକଣା କୋହଳ ହେବା ଯୋଗୁ ୨୦୨୧ ଜୁଲାଇ ମାସ ନିମନ୍ତେ ଜିଏସଟି ଆଦାୟ ପୁଣି ୧ ଲକ୍ଷ କୋଟି ଟଙ୍କା ଅତିକ୍ରମ କରିଛି, ଯେଉଁଥିରୁ ସ୍ପଷ୍ଟ ଜଣାପଡୁଛି ଯେ ଘରୋଇ ଅର୍ଥନୀତି ଦ୍ରୁତି ଗତିରେ ସୁଧୁରୁଛି । ଏହି ଦୃଷ୍ଟିରୁ ଆଗାମୀ ମାସଗୁଡ଼ିକରେ ମଧ୍ୟ ମୋଟା ଅଙ୍କର ଜିଏସଟି ରାଜସ୍ୱ ସଂଗ୍ରହ ହେବ ବୋଲି ଆଶା କରାଯାଉଛି ।
୨୦୨୧ ଜୁଲାଇରେ ଓଡ଼ିଶାରେ ଜିଏସଟି ଆଦାୟ ୫୪% ବୃଦ୍ଧି ପାଇଛି । ୨୦୨୦ ଜୁଲାଇରେ ୨,୩୪୮ କୋଟି ଟଙ୍କା ରାଜସ୍ୱ ସଂଗ୍ରହ ହୋଇଥିଲା ବେଳେ ୨୦୨୧ ଜୁଲାଇରେ ଏହା ୩,୬୧୫ କୋଟି ଟଙ୍କାକୁ ବୃଦ୍ଧି ପାଇଛି ।
ନିମ୍ନରେ ଦର୍ଶାଯାଇଥିବା ସାରଣୀରେ ରାଜ୍ୟଭିତ୍ତିକ ଜିଏସଟି ସଂଗ୍ରହ ଉପରେ ତଥ୍ୟ ଦର୍ଶାଯାଇଛି । ୨୦୨୦ ଜୁଲାଇ ତୁଳନାରେ ୨୦୨୧ ଜୁଲାଇ ମାସରେ କେତେ ଆଦାୟ ହୋଇଛି, ତାହାର ତଥ୍ୟ ଏଥିରେ ଅନ୍ତର୍ଭୁକ୍ତ ।
SR
(Release ID: 1741351)
Visitor Counter : 292