ਦਿੱਲੀ ਹਾਈ ਕੋਰਟ ਨੇ ਗਾਜ਼ੀਆਬਾਦ ਅਧਾਰਤ ਇੱਕ ਵਪਾਰੀ, ਜੋ ਨਕਲੀ ਖਾਦੀ ਪ੍ਰਾਕ੍ਰਿਤਕ ਪੇਂਟ ਵੇਚਣ ਅਤੇ ਬਣਾਉਣ ਵਿੱਚ ਧੋਖਾਧੜੀ ਕਰ ਰਿਹਾ ਸੀ , ਨੂੰ ਤੁਰੰਤ ਸਾਰੀਆਂ ਅਜਿਹੀਆਂ ਗਤੀਵਿਧੀਆਂ ਨੂੰ ਰੋਕਣ ਲਈ ਨਿਰਦੇਸ਼ ਦਿੱਤਾ ਹੈ । ਕੋਰਟ ਨੇ ਨੋਟ ਕੀਤਾ ਕਿ ਡਿਫੈਂਡੈਂਟ ਜੇ ਬੀ ਐੱਮ ਆਰ ਐਂਟਰਪ੍ਰਾਈਜ਼ਸ ਜਿਸ ਦਾ ਮਾਲਕ ਉਮੇਸ਼ ਪਾਲ ਹੈ , “ਖਾਦੀ ਬ੍ਰੈਂਡ” ਨਾਂ ਨੂੰ ਗ਼ੈਰ ਕਾਨੂੰਨੀ ਢੰਗ ਨਾਲ ਵਰਤ ਕੇ ਜਾਲਸਾਜ਼ੀ ਕਰ ਰਿਹਾ ਹੈ ਅਤੇ ਖਪਤਕਾਰਾਂ ਨੂੰ ਗੁੰਮਰਾਹ ਕਰਨ ਲਈ “ਖਾਦੀ ਪ੍ਰਾਕ੍ਰਿਤਕ ਪੇਂਟ” ਦੇ ਨਾਂ ਅਤੇ ਪੈਕੇਜਿੰਗ ਦੀ ਨਕਲ ਕਰ ਰਿਹਾ ਹੈ ਅਤੇ ਖਾਦੀ ਦੇ ਸਦਭਾਵਨਾ ਅਤੇ ਵੱਕਾਰ ਨੂੰ ਖਰਾਬ ਕਰ ਰਿਹਾ ਹੈ ।

ਖਾਦੀ ਪ੍ਰਾਕ੍ਰਿਤਕ ਪੇਂਟ ਗਊ ਦੇ ਗੋਹੇ ਤੋਂ ਤਿਆਰ ਕੀਤਾ ਇੱਕ ਵਿਲੱਖਣ ਅਤੇ ਨਵੀਨਤਮ ਪੇਂਟ ਹੈ । ਖਾਦੀ ਅਤੇ ਪੇਂਡੂ ਉਦਯੋਗ ਕਮਿਸ਼ਨ ਵੱਲੋਂ ਵਿਕਸਿਤ ਕੀਤਾ ਐਂਟੀ ਫੰਗਲ ਅਤੇ ਐਂਟੀ ਬੈਕਟੀਰੀਅਲ ਪੇਂਟ 12 ਜਨਵਰੀ 2021 ਨੂੰ ਐੱਮ ਐੱਸ ਐੱਮ ਈ ਮੰਤਰੀ ਸ਼੍ਰੀ ਨਿਤਿਨ ਗਡਕਰੀ ਨੇ ਲਾਂਚ ਕੀਤਾ ਸੀ । ਇਸ ਦੇ ਲਾਂਚ ਹੋਣ ਤੋਂ ਲੈ ਕੇ ਹੁਣ ਤੱਕ ਇਹ ਪੇਂਟ ਹਰਮਨਪਿਆਰਾ ਹੋ ਗਿਆ ਹੈ ਅਤੇ ਦੇਸ਼ ਭਰ ਵਿੱਚੋਂ ਇਸ ਲਈ ਵੱਡੇ ਵੱਡੇ ਆਰਡਰ ਮਿਲ ਰਹੇ ਹਨ ।

ਕੋਰਟ ਨੇ ਡਿਫੈਂਡੈਂਟ ਜੇ ਬੀ ਐੱਮ ਆਰ ਐੱਟਰਪ੍ਰਾਈਜ਼ਸ ਨੂੰ ਆਪਣੀ ਵੈਬਸਾਈਟ www.khadiprakritikpaint.com ਨੂੰ ਰੋਕਣ ਅਤੇ ਫੇਸਬੁੱਕ ਅਕਾਉਂਟ ਜੋ ਵਪਾਰਕ ਨਾਂ “ਖਾਦੀ ਪ੍ਰਾਕ੍ਰਿਤਕ ਪੇਂਟ” ਹੈ ਨੂੰ ਹਟਾਉਣ ਅਤੇ ਆਪਣੀ ਈ ਮੇਲ ਆਈ ਡੀ khadiprakritikpaint[at]gmail[dot]com ਨੂੰ ਤੁਰੰਤ ਮੁਅੱਤਲ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ । ਕੇ ਵੀ ਆਈ ਸੀ ਦੇ ਵਕੀਲ ਨੇ ਕੋਰਟ ਵਿੱਚ ਦਾਅਵਾ ਕੀਤਾ ਸੀ ਕਿ ਡਿਫੈਂਡੈਂਟ ਜੇ ਬੀ ਐੱਮ ਆਰ ਐਂਟਰਪ੍ਰਾਈਜ਼ਸ ਥਰਡ ਪਾਰਟੀ ਵੈੱਬਸਾਈਟਸ ਜਿਵੇਂ ਇੰਡੀਆ ਮਾਰਟ ਅਤੇ ਟ੍ਰੇਡ ਇੰਡੀਆ ਤੇ ਵੀ , “ਖਾਦੀ ਪ੍ਰਾਕ੍ਰਿਤਕ ਪੇਂਟ” ਨੂੰ ਵੇਚਣ ਲਈ ਜਾਲਸਾਜ਼ੀ ਕਰ ਰਿਹਾ ਸੀ । ਹੋਰ ਇਹ ਭਾਰਤ ਸਰਕਾਰ ਦੇ ਐੱਮ ਐੱਸ ਐੱਮ ਈ ਮੰਤਰਾਲੇ ਦੇ ਸਰਕਾਰੀ ਲੋਗੋ ਨੂੰ ਆਪਣੀ ਵੈੱਬਸਾਈਟ ਤੇ ਵਰਤ ਕੇ ਖਪਤਕਾਰਾਂ ਨੂੰ ਗੁੰਮਰਾਹ ਕਰਦਿਆਂ ਇਹ ਵਿਸ਼ਵਾਸ ਦਵਾਉਂਦਾ ਸੀ ਕਿ ਜੇ ਬੀ ਐੱਮ ਆਰ ਐਂਟਰਪ੍ਰਾਈਜ਼ਸ ਇੱਕ ਸਰਕਾਰ ਨਾਲ ਜੁੜਿਆ ਹੋਇਆ ਅਦਾਰਾ ਹੈ ।

ਕੇ ਵੀ ਆਈ ਸੀ ਚੇਅਰਮੈਨ ਸ਼੍ਰੀ ਵਿਨੈ ਕੁਮਾਰ ਸਕਸੈਨਾ ਨੇ ਕਿਹਾ ਹੈ ਕਿ ਕੇ ਵੀ ਆਈ ਸੀ ਨੇ ਕਿਸੇ ਵੀ ਏਜੰਸੀ ਨੂੰ “ਖਾਦੀ ਪ੍ਰਾਕ੍ਰਿਤਕ ਪੇਂਟ ਦੀ ਮਾਰਕਿਟਿੰਗ ਜਾਂ ਬਣਾਉਣ ਲਈ ਆਊਟਸੋਰਸ” ਨਹੀਂ ਕੀਤਾ ਹੈ ।


ਕੇ ਵੀ ਆਈ ਸੀ ਨੇ ਪਿਛਲੇ ਕੁਝ ਸਾਲਾਂ ਵਿੱਚ ਅਜਿਹੇ ਉਲੰਘਣ ਕਰਨ ਵਾਲਿਆਂ ਖਿ਼ਲਾਫ਼ ਸਖ਼ਤ ਕਾਰਵਾਈ ਕੀਤੀ ਹੈ । ਹੁਣ ਤੱਕ ਕੇ ਵੀ ਆਈ ਸੀ ਨੇ 1000 ਪ੍ਰਾਈਵੇਟ ਕੰਪਨੀਆਂ ਨੂੰ ਖਾਦੀ ਦੇ ਨਾਂ ਤਹਿਤ ਉਤਪਾਦ ਵੇਚਣ ਅਤੇ ਬ੍ਰੈਂਡ ਨਾਂ ਦੀ ਦੁਰਵਰਤੋਂ ਲਈ ਕਾਨੂੰਨੀ ਨੋਟਿਸ ਜਾਰੀ ਕੀਤੇ ਹਨ ।
 

********

ਐੱਮ ਜੇ ਪੀ ਐੱਮ / ਆਰ ਆਰ