প্রধান মন্ত্রী, শ্রী নরেন্দ্র মোদীনা ভিদিও কনফরেন্সিংগী খুত্থাংদা প্রধান মন্ত্রী কিসান সম্মান নিধী য়োজনা (পি.এম.-কিসান) স্কিমগী মখাদা লৌমী বেনিফিশরী ৯,৫০,৬৭,৬০১দা লুপা ২,০৬,৬৭,৭৫,৬৬,০০০গী শেনফমগী শেলগী তেংবাংগী ৮শুবা ইন্সতোলমেন্ত ঙসি য়েন্থোকখ্রে। প্রধান মন্ত্রীনা থৌরম অসিগী মনুংদা লৌমী বেনিফিশরীশিংগা ৱারী শাখি। থৌরম অসিদা কেন্দ্রগী লৌউ-শিংউ মন্ত্রীসু শরুক য়াখি।

প্রধান মন্ত্রী কিসান সম্মান নিধী (পি.এম.-কিসান) স্কিমগী বেনিফিশরীশিংদা ভিদিও কনফরেন্সিংগী খুত্থাংদা ৱারী শাবদা, মহাক্না উত্তর প্রদেশকী উন্নাওদগী অর্বিন্দবু মহাক্কী লমদমগী নহাশিংদা ওর্গানিক ফার্মিং অমসুং অনৌবা লৌউবগী থৌওং কয়া তাকপীবগীদমক্তা থাগৎপা ফোংদোকখি। মহাক্না অন্দমান অমসিং ইকোবার ইথৎকী কার নিকোবারদগী পেত্রিকপু ওর্গানিক ফার্মিং পাক চাউনা পাংথোকপগীদমক্তা থাগৎখি। মহাক্না অন্ধ্র প্রদেশকী অনন্তপুরদগী এন. ভেন্নুরামাবু মহাক্কী লমদমগী অদিভাসী লৌমী ১৭০ হেনবদা পাউতাক পীবগীদমক্তা থাগৎখি। প্রধান মন্ত্রীনা মেঘালয়দগী রেভিস্তারবু শিং মকুপ, য়াইনঙ, সিন্নামোন্নচিংবা মরু-মরাং কয়া রাজ্যসিগী চিঙগী লমদমদা মরু ওইনা পুথোকপগীদমক্তা থাগৎপা ফোংদোকখি। মহাক্না জম্মু অমসুং কশ্মিরগী স্রীনগরদগী খকুর্শিদ অহমদপু ওর্গানিক ওইবা মওংদা কেপ্সিকম, মোরোক অতেকপ্স অমসুং থবীগুম্বা হেঞ্জাং-নাপী পুথোকপগীদমক্তা থাগৎপা ফোংদোকখি।

থৌরম অসিদা ৱা ঙাংবদা, প্রধান মন্ত্রীনা নোংচুপ বেঙ্গোলগী লৌমীশিংনা স্কিম অসিগী খুদোংচাবশিং অহানবা ওইনা ফংলগনি হায়বা ৱাফম ফোংদোকখি। কোরোনাগী খুদোংচাদবা মরক্তা, লৌউ-শিংউ অমসুং লৈকোল য়োকপদা রিকোর্দ থম্লিবা অসিগুম্বা লৌমীশিংনা হোৎনরিবা অসিবু থাগৎপা ফোংদোকখি। এম.এস.পি.দা পোত্থোক লৈবগী মতাংদসু সরকারনা চহি খুদিংগী অনৌবা রেকোর্দ থম্লি হায়না মহাক্না পাউদমখি। ফৌবু এম.এস.পি.দা লৈবগী অনৌবা রেকোর্দ অমা থমখ্রবা তুংদা হৌজিক্না, গেহু লৈবগী মতাংদা অনৌবা রেকোর্দ থম্লি। হন্দক্কী চহিদা, মমাংগী চহিগা চাংদম্নবদা, চাউরাক্না ১০% হেনবগী গেহু এম.এস.পি.দা লৈখ্রে হায়না মহাক্না মখা তানা হায়খি। হৌজিক  ফাওবগী ওইনা, গেহু লৈবগী চাউরাকপা করোর লিশিং ৫৮ অসি লৌমীশিংগী একাউন্ততা হকথেংননা হাপখ্রে।

লৌবুকশিংদা অনৌবা খুদোংচাবা অমসুং থৌওং কয়া পাংথোকহন্নবা সরকারনা লেপ্তনা হোৎনদুনা লাক্লি হায়না প্রধান মন্ত্রীনা ফোংদোকখি। অসিগুম্বা থৌং কয়া ওর্গানিক ফার্মিং চাউখৎহন্নবগী ওইনসু হোৎনরি। ওর্গানিক ফার্মিংনা শেন্থোক লৈবসু হেল্লি অমসুং লৈবাক্কী লৌমী নহাশিংনা লৈবাক শিনবা থুংনা ওর্গানিক ফার্মিং তৌনরি। ওর্গানিক ফার্মিং অসি হৌজিক্তি, গঙ্গাগী তোর্বান অনিমক্তা অমসুং মসিগী কিলোমিতর ৫গী অকোয়বা মফমদা তৌনরে অমসুং মসিনা গঙ্গাবুসু শেংনা থম্বা ঙম্লে হায়না মহাক্না হায়খি।

কোবিদ-১৯গী লাইচৎ মনুংদা, কিসান কেরদিৎ কার্দকী লোইবগী মতমসু শাংদোক্লে অমসুং হৌজিক্তি, মসিবু জুন ৩০গী মনুংদা নৌহৌননা অমুক তান্নবা য়ারগনি হায়না প্রধান মন্ত্রীনা অহেনবা মিৎয়েং চঙলদুনা হায়খি। হৌখিবা চহি খরা অসিদা, কিসান ক্রেদিৎ কার্দ করোর ২ হেন্না য়েন্থোকখ্রে হায়না মহাক্না মখা তানা ফোংদোকখি।

প্রধান মন্ত্রীনা চহি ১০০গী মতুংদা লাক্লিবা শাথীরবা লাইচৎ অসিনা মালেম্বু খোঙথাং খুদিংদা চাংয়েংলি মরমদি মসি ঐখোয়গী মাঙদা শক উদবা য়েক্নবা অমা ওইনা লৈবননি হায়না ফোংদোকখি। সরকারনা কোবিদ-১৯গী মখোয়গী ঙমজবী মতিক্কা লান্থেংনরি অমসুং লৈবাক্কী খুদোংচাদবশিং অসিবু কোকহন্নবগীদমক্তা সরকার খুদিংনা অহিং-নুংথিল নাইদনা হোৎনরি হায়না মহাক্না হায়খি।

কেন্দ্র সরকার অমসুং রাজ্য সরকারশিংনা পুন্দুনা লৈবাক্কী মীয়াম্না অথুবা মতমদা তীকা থাদোকহন্নবা লেপ্তনা থবক কয়া চত্থরি হায়না প্রধান মন্ত্রীনা পাউদমখি। হৌজিক ফাওবগী ওইনা, লৈবাক শিনবা থুংবদা চাউরাকপা ভেক্সিন দোজ করোর ১৮ পাকখ্রে হায়না মহাক্না হায়খি। লৈবাক শিনবা থুংবগী সরকারগী হোস্পিতালশিংদা লেম্না তীকা কাপ্লি। মীপুম খুদিংনা মশাগী মতম লাকপদা, শোইদনা তীকা থাদোকপীয়ু অমসুং মতম পুম্বদা কোবিদকী চুনবা লিচৎ ইন্দুনা লৈয়ু হায়না মহাক্না মীয়ামদা হায়খি। ভেক্সিন অসিনা কোরোনাদগী ঙাথথোক্নবা খ্বাইদগী মরু ওইবা পাম্বৈনি অমসুং মসিনা কোরোনানা শাথীনা নারকপগী ফীভম লৈহল্লোই হায়না মহাক্না মখা তাখি।

প্রধান মন্ত্রীনা হায়খিবদা, অর্ম্দ ফোর্সনা মখোয়গী অপুনবা মপাঙ্গল থাদোক্তুনা লুরবা মতমসিদা ওক্সীজেন ফংহন্নবা হোৎনরি। রেলৱেজনসু ওক্সীজেন এক্সপ্রেস ত্রেন কয়া অমা চেল্লি। লৈবাক্কী ফার্মা সেক্তরসু হিদাক কয়া শাদুনা অয়াম্বা মশিংদা মীয়ামদা ফংহল্লি। মহাক্না হিদাকশিং অমসুং মেদিকেল সপ্লাইশিং লান্না য়োনবগী থবক থিংনবা রাজ্য সরকারশিংনা অকনবা মওংদা হোৎননবা ৱাফমসু থমখি।

প্রধান মন্ত্রীনা হায়খিবদা, ভারত অসি অরুবা মতম লাকপদা ৱাখল মাঙবা লৈবাক নত্তে অমসুং হৌজিক থেংনরিবা শিংনবশিং অসি থৌনা অমসুং খোঙফম চেত্তুনা মাইথীবা পীগনি। মহাক্নয়া খুঙ্গংদা কোবিদ-১৯ শন্দোরকপগী চেকশিনৱা হায়রদুনা খুঙ্গংগী পঞ্চায়ৎশিংদা মখোয়-মখোয়গী মফমশিংদা ই-পাউ নীংথিজনা খঙহন্দুনা অমসুং নীংথিজনা সেনিতেসন তৌনবসু হায়খি।

***