ہندوستانی ریلوے موجودہ چیلنجز کا سامنا اور نئے طریقوں کی تلاش کے ساتھ ملک کی مختلف ریاستوں کی مانگ پر لیکوئڈ میڈیکل آکسیجن (ایل ایم او) کی سپلائی کی اپنی مہم کو لگاتار جاری رکھتے ہوئے لوگوں کو راحت پہنچا رہی ہے۔ ہندوستانی ریلوے اب تک ملک کی مختلف ریاستوں میں 396 ٹینکروں میں تقریباً 6260 میٹرک ٹن طبی استعمال کے لیے آکسیجن کی سپلائی کر چکی ہے۔

کل آکسیجن ایکسپریس کے ذریعے ملک کے مختلف حصوں میں تقریباً 800 میٹرک ٹن آکسیجن کی سپلائی کی گئی۔

اس مہم کے تحت اب تک 100 آکسیجن ایکسپریس کا سفر مکمل ہو چکا ہے اور مختلف ریاستوں کو راحت پہنچائی گئی ہے۔

ہندوستانی ریلوے، ریاستوں کی مانگ پر حتی الامکان مقدار اور کم ازکم وقت میں لیکوئڈ میڈیکل آکسیجن کی سپلائی کے لیے پابند عہد ہے اور اس پر لگاتار کام کر رہی ہے۔

ہندوستانی ریلوے کے ذریعے شروع کی گئی آکسیجن ایکسپریس مہم کے تحت اس پریس ریلیز کو جاری کرتے وقت تک مہاراشٹر میں 407 میٹرک ٹن، اتر پردیش میں تقریباً 1680 میٹرک ٹن، مدھیہ پردیش میں 360 میٹرک ٹن، ہریانہ میں 939 میٹرک ٹن، تلنگانہ میں 123 میٹرک ٹن، راجستھان میں 40 میٹرک ٹن، کرناٹک میں 120 میٹرک ٹن اور دہلی میں 2404 میٹرک ٹن سے زیادہ آکسیجن کی سپلائی کی جا چکی ہے۔

جھارکھنڈ کے ٹاٹا نگر سے 120 میٹرک ٹن آکسیجن لیکر اتراکھنڈ میں کل رات پہلی آکسیجن ایکسپریس پہنچی۔

پونہ میں بھی کل دیر رات پہنچی پہلی آکسیجن ایکسپریس نے 55 میٹرک ٹن آکسیجن کی سپلائی کی۔ یہ سپلائی اوڈیشہ کے انگل سے کی گئی۔

آکسیجن کی ڈھلائی ایک پیچیدہ عمل ہے اور ڈھلائی سے جڑے اعداد و شمار لگاتار اپ ڈیٹ کیے جا رہے ہیں۔ کچھ اور آکسیجن ایکسپریس دیر رات اپنی اپنی منزلوں کی جانب روانہ ہوں گی۔

*****

ش ح – ق ت – ت ع

U: 4423