সাইন্স অমসুং তেক্নোলোজী মন্ত্রালয়

অসামদগী নৌরিবী নুপীমচা ৬না পুথোকপা মহৌশানা পত্থ-পুমথখিবা য়োগ ফক্না পাৎ কয়াবু কবোকংগী চৈথেংদগী কনবা ঙমগদৌরি

Posted On: 04 MAY 2021 1:14PM by PIB Imphal

অসামগী ঙামী কাঙলুপ্তগী চহী নৌরিবী নুপীমচা ৬না কবোকংদগী শেমবা মহৌশানা পত্থ-পুমথবা ঙম্বা য়োগ ফক অসিনা ঈশিং পাম্বী অসিবু খুদোংচাদবা ফীভম ওইনা লৌনরম্বদগী লল ওইনা লৌনহল্লকপা য়ারি‍।

নুপীমচাশিং অসি গুৱাহীতি ময়োল্লমগী খা-নোংচুপ্তা লৈবা রামসার মফম অমা (মালেমগী ওইনা মরুওইবা ঈশিং তুংবা মফম অমা) ওইনা অমদি ঈচেকশিংগী ৱাইল্দলাইফ সেংচুএরী অমা ওইনা শকখঙলবা মতম পুম্বগী ওইনা থুমহি চেন্দবা ঈশিং লৈবা পাৎ দিপোর বীলগী অকোয়বদা খুন্দাবা ঙামী কাঙলুপ্তগীনি‍। পাৎ অসি মসিগী মচাক মথুমশিং চহীচা কয়া শীজিন্নদুনা লৈরকবা ঙামী কাঙলুপশিংগী খুঙ্গঙ ৯গী পুন্সি মহিংগী মফম অমা ওইদুনা লাক্লি, অদুবু হৌখিবা চহীশিংদা কবোকং কা হেন্না হৌজিল্লকপা অমদি পৈশিল্লকপনা খুদোংচাদবা মায়োক্নরি‍।

ঈশিং তুংবা মফমদুদা মপুন্সি হিংনবগীদমক হকথেংননা তাংদুনা লৈরিবা ঈমুংশিংদগী নুপীমচাশিং অসিনা পুথোরক্লিবা ৱাখল্লোন অসিনা দীপোর বীলগী মহৌশাগী ফীভম ঙাক শেন্দুনা থম্বদা অমদি য়োকখৎপদা মশক থোক্না থৌদাং লৌবতা নত্তনা লমদমদুগী মীওইশিংদা হিংনবগী লম্বী অমসু পীবা ঙমগনি‍। ‘মুরহেন য়োগ মেত’ হায়না মিংথোনবা ফক অসি অখন্নবা পোত্থোক অমা ওইনা মালেমগী কৈথেলদা শক্তাক্লগনি‍।

থৌরাং অসি ভারত লৈঙাক্কী দিপার্তমেন্ত ওফ সাইন্স এন্দ তেক্নোলোজী (দি.এস.তি.)গী মখাদা লৈবা মনীং তম্বা লুপ অমা ওইরিবা নোর্থ ইস্ত সেন্তর ফোর তেক্নোলোজী এপ্লিকেসন এন্দ রীচ (নেক্তার)না কবোকং পাম্বীদগী লল ওন্থোক্নবা নুপীমচা ৬না লমজিংবা ‘সিমং’ ৱাহন্থোক্না মঙলান হায়না কৌবা কল্লেক্তিব অমগা পুন্না চৎমিন্নরিবা নুপী কাঙলুপ পুম্নমকপু কোনশিন্নবা লৌখৎপনি‍।

কবোকংগী মতিক অমসুং ফক্কুমবা পোৎশক অমগী শীজিন্নবদা মথৌ তাবশিং য়েংলবা মতুংদা খুৎনা লোনবা চাদা ১০০ মহৌশানা পত্থ-পুমথবা ঙমবা অমদি চাদা ১০০ হার ওন্থোকপা য়াবা ফক অসিবু য়োগ তৌবদা শীজিন্ননবগী ৱাখল্লোন অসি মহৌশাগী অমদি খুন্নাইগী ওইনা কান্নবা কয়া পীনবগী লম্বী অমা ওইনা পুথোরকপনি‍। ফাইবর প্রোসেসিং অমসুং তেক্নোলোজিকেল ইন্তরভেন্সনগী খুত্থাঙদা ফক অসি পুথোকপনা কবোকং লৌথোক্তুনা ঈশিং তুংবা মফমসিগী ঈশিংগী ইকোসিস্তেম ফগৎহনবদা, মীয়াম শরুক য়াদুনা শীজিন্নবা য়াবা পোত্থোক তুং কোইনা পুথোকপদা অমসুং য়েলহৌমী ফুরুপশিংবু মরোমদোম লেপচবা ঙমহন্নবগীদমক হিংনবগী লম্বী শেম্বিবদা মতেং ওইগনি‍।

ফক শাদ্রিঙৈদা কবোকং খোমজিনবা, কংহনবা অমদি শেম শাবা অসি খ্বায়দগী মরু ওইবা থৌওং ওইবা মরম্না কংহনবগী মতম নুমিৎ ৩নিদা হন্থহনগদবা ‘সোলার দ্রাইয়র’নচিংবা তেক্নোলোজী মচা খরা পুশিল্লকখি‍। মসিনা নোং তোয়না তাগনবা নোংজুথাগী মতম থা তরুক হেন্না (মেদগী ওক্তোবর ফাওবা) লৈবা লৈবাকসিগী মফম অসিদা নোং কন্না চুবনা মরম ওইরগা মাঙখিবা মতমগী মমলসু খরা ফুক্কৎপা ঙমহনগনি‍।

নুপীশিং অসিনা কবোকংশিং অসি অসামিজ ফিশাকোন শীজিন্নদুনা তোঙান তোঙানবা পরমশিং, মচাকশিং অমসুং খুৎলায়শিং শীজিন্নদুনা অৱাংবা থাক্কী ওইবা, শীজিন্নবদা নুংঙাইবা অমদি মহৌশানা মপুং ফানা পত্থ পুমথবা ঙম্বা য়োগ ফক শারি‍। মসিদা পাৎকী অকোয়বগী খুঙ্গঙ ৩দগী (কেওতপরা, নোতুন বস্তি অমসুং বোরবোরি) নুপী ৩৮না থবক চঙশিল্লি‍। তেক্নোলোজী হাপচিল্লকপনা পোত্থোক পুথোকপগী চাংসু হেনগৎহনবা ঙমগনি‍।

“৭ৱীভস”, (সিমং কল্লেক্তিব্সকী সিস্তর কন্সর্ন অমা) কাঙবুনা কামরুপ দিস্ত্রিক্তকী লোহারঘাত ফোরেস্ত রেঞ্জতা মহৌশানা ফংবা মচাকশিংদগী মহৌশাগী ওইবা মওংদা মচু শঙবগী লমজিং পীদুনা নেক্তারবু লেক, তিল্হৌ মকু, য়োৎ অমসুং চিনি অঙাঙবদগী মহৌশাগী ওইবা মওংদা মচু শঙবা লশিংগী লং শীজিন্নদুনা ফক অদুগী তোঙান তোঙানবা পরমশিংদা হাপচিনবা ঙমহল্লি‍। ফিশাকোলগী খুৎলায় কয়ামরুম ফক শাবদা চাননবগীদমক শেমদোক শেমজিনসু তৌরে‍।

কাম সোরাই (দীপোর বীল ৱাইল্দলাইফ সেংচুএরীদা লৈবা উচেক মখল অমা ওইরিবা পর্পল মুরহেন)গী মমুং লৌদুনা থোল্লিবা ‘মুরহেন য়োগ মেত’ অসি চেন নৎত্রগা মেতলগী কুদাম্নচিংবা শীজিন্নদবা লশিংগী কেনভস ফিগী খাউদা হাপ্পি‍। খাউ অসিদা মহৌশানা পত্থ-পুমথবা য়াগদবা মওংদা শেম্লবা কোমথোক কোমশিন য়াবা মরী অমসুং লোনশিনফম য়াওরি‍।

ফক শাবগী থবক তৌরিবা নুপীশিং

হেন্না কুপ্পা ৱারোলগীদমক প্রোফেসর (দোক্তর) অরুন কে. সর্ম, দাইরেক্তর জেনেরেল, নোর্থ ইস্ত সেন্তর ফোর তেক্নোলোজী এপ্লিকেসন এন্দ রীচ (নেক্তার) (০১১ ২৬৫৬৬৭৭৮; ৭৩৫৮৪৭৩৫০৮)কা পাউ ফাওনবা য়াগনি‍।

****



(Release ID: 1715897) Visitor Counter : 105