কেন্দ্রগী মন্ত্রীমন্দলদা লৈরিবা ঐহাক্কী খোংবুরোই শ্রী গজেন্দ্র সিংহ শেখাৱৎজী, মধ্য প্রদেশকী মুখ্য মন্ত্রী শ্রীমান শিবরাজ চৌহানজী, উত্তর প্রদেশকী মুখ্যমন্ত্রী শ্রীমান য়োগী আদিত্যনাথজী, জলশক্তিগী রাজ্য মন্ত্রী শ্রী রতন লাল কতারিয়াজী, তোঙান-তোঙানবা রাজ্যশিং অমসুং জীলাশিংগী ইকাইখুম্নরবা ওফিসরশিং,  লৈবাক অসিগী খুঙ্গং-খুঙ্গংগা শম্নরিবা অমদি মসিগী ইহৌ অসি তৌবদা খ্বাইদগী অচৌবা থৌদাং লৌবিরিবা অসি পঞ্চায়েৎশিং অমদি সরপঞ্চশিং, অতৈ মীহুৎশিং, ঐহাক্কী নুংশিরবা ইচিল-ইনাওশিংনি।

ঐহাক্না ঙসি হিন্দুস্তানগী তোঙান-তোঙানবা কাচিন্দা লৈরিবা ঐখোয়গী খুঙ্গংগী লুচিংবশিং অসিনা মহৌশাগীদমক্তা, ঈশিংগীদমক্তা মফমদুগী মীশিংনা নুংঙাইনা লৈনবগীদমক্তা মতৌ করম্না য়াইফনবা তৌবা অমা ওইনা থবক তৌরিবা, য়াম পুম্নমকপু পুনশিন্নদুনা মাংলোমদা চংশিল্লিবা, মখোয় পুম্নমক্কী ৱা তাবদা অনৌবা ইথীল ফংলিবা, অনৌবা পাঙ্গল-থৌনা ফংলিবা অমদি অনৌবা ৱাখল কয়া থোরক্লিবা অসি ঐহাক্কী লাইবক ফবনি।  ঐখোয়গী মীহুৎশিংগা ঙসি শান্নরিবা ৱারীশিং অসি তাবিরমগনি হায়না থাজৈ। মীপুম খুদিংমক্না মসিদগী করিগুম্বা খরা শোইদনা তম্বা ফংবিরমগনি, ঐহাকসু তম্বা ফংজরি, ঐখোয়গী ওফিসরশিংনসু তম্বা ফংলি, মীচম-মীয়ামপুম্বসু তম্বা ফংগনি।

জলশক্তিগী মতাংদা খংবা হেনগৎনরকপা, থবক হোৎনবা হেনগৎনরক্লিবা অসিদা ঐহাক নুংঙাইবা ফাওই। ঙসি মালেমগী ঈশিং নুীৎ অসিদা মালেম পুম্বনা ঈশিংগী মরুওইবা অসি হেন্না খংবা হেনগৎহন্নবগীদমক্তা মালেমগী ঈশিং নুমীৎ অসি পাংথোক্লিবনি। থৌরম অসিদা মরুওইবা থবক অসি পাংথোক্নবগীদমক্তা ময়াম পুল্লিবনি।  ঙসি হৌদোক্লিবা কেম্পেন অসি ঐহাক্না ঐহাক্কী মন কী বাত্তা হায়জখ্রবনি অদুবু ঙসি মালেম অসিগী মমাংদা খুদম অমা ফংননবা অমদি ভারত্ত ঈশংগী অৱাবা অসি কোক্নবা নোংগী ঈশিং য়োকশিনবগা লোয়ন-লোয়ননা কেন-বেতবা লিঙ্ক কেনেলগী ওইনসু অচৌবা থবক পায়খৎখি। অতলজীনা উত্তর প্রদেশক অমসুং মধ্য প্রদেশকী ইমুং লাখ কয়া য়াইফনবা মংলান শাগৎখিবা অদু থবক ওইনা পাংথোক্ননবগীদমক্তা মসিগী য়াশিন্নবা অসি তৌখিবনি অমসুং য়াম্না অচৌবা থবক পায়খৎখি। করিগুম্বা ঙসি কোরোনা অসি লৈরমদবা তারবদি অমসুং করিগুম্বা ঝান্সীদগী লাক্তুনা, বুন্দেলখন্দগী লাক্তুনা  উত্তর প্রদেশতা নত্রগা  মধ্য প্রদেশতা ওইরো, ঙসি মসিগী থৌরম অসি পাংথোক্তুনা মীওই লাখ কয়া লাকপীরমগদবনি অমদি ঐখোয়বু য়াইফ-থৌজাল পীবিরমগদবনি, অসুক য়াম্না মরুওইবা চাউরবা থৌরম অসি পাংথোক্লমগদবনি।

ইচিল-ইনাওশিং,

২১শুবা চহি চাগী ভারত অসিগী ওইনা ঈশিং মতিক চানা ফংহনবা অসি য়াম্না মরুওইবা ফেক্তরনি। ঈশিং অসি য়ুম খুদিংগী, লৌবুক খুদিংগী মথৌ তাই, পুন্সিগী, শেন্মীৎলোনগী মতাং খুদিংদা মথৌ তাই।  ঙসি ঐখোয়না য়াংনা চাউখৎনবগীদমক্তা হোৎনরিবসিদা ৱাতর সেক্যুরিতী য়াওদনা, অফবা ৱাতর মেনেজমেন্ত য়াওদনা ওইথোক্তবনি।  ভারত অসি চাউখৎহন্নবগী মীৎয়েং,  ভারত অসি মীপাল তাংদবা ওইহনবদা ঐখোয়গী ৱাতর রিসোর্সকী মখা পোল্লি, ঐখোয়গী ৱাতর কনেক্তিবিতীগী মখা পোল্লি। ৱাফম অসি হকচিন্না খংদুনা চহি তরা-তরাগী মমাংদগী মায়কৈ অসিদা থবক কয়া তৌরম্বগী মথৌ তাখি অমসুং ঐহাক্না অদোমদা গুজরাত্তা খংলক-উরকপা অদুনা হায়জরি মদুদি থৌরাং য়াত্তুনা মীয়াম্না শরুক য়াহন্দুনা ঈশিং য়োকশিন্নবগী থবক অসি পায়খৎলবদি ঐখোয়দা ঈশিংগী অৱাবা অসি লৈরোই, ঈশিং অসি শেলদগীসু হেন্না তাংবা পাৱর ওইনা ওইহল্লক্কনি। থবক অসি হান্ননা পাংথোক্লম্বা য়াবনি। লাইবক থিবদি চাং মতিক চানা ওইহল্লমগদবদুদা, পাক-শনবা মওংদা ওইরমগদবদুদা, মীয়াম্না শকুক য়াদুনা তৌরমগদবদুদা করিনো অৱাৎপা অমদি লৈখ্রে। মসিগী মহৈনা ভারত অসি চাউখৎপগী লম্বিদা চংশিল্লক্লিবগী মতিক ঈশিংগী অৱাবা মায়োক্নবগী চাং অসিসু অদুক্কী মতিক হেনগৎলক্লি। করিগুম্বা লৈবাক অসিনা ঈশিং খাকচিন্নবা খন্দবা তারবা, ঈশিং মাংহন-তাকহনবা অসি তোক্তবা তারবদি তুংদা লাক্কদৌরিবা চহি তরা-তরাগী ফীভম অসি য়াম্না শাথিনা শোকচিল্লগনি অমদি ঐখোয়গী ইপা-ইপুনা ঐখোয়দা ঈশিং  পীবিরম্লি, তুংদা লাক্কদৌরিবা মীরোলদা ঐখোয়না শোইদ-ঙামদবা ঈশিং ফংহনবা অসি ঐখোয়গী ইথৌদাংনি। মসিগী হেন্না চাউনা য়াইফবা অমা লৈররোই অমদি মরম অসিনা ঈশিং মাংহল্লোইদবনি, লান্না ঈশিং শিজিন্নথোক্লোইদবনি, ঐখোয়না ঈশিংগা শেংলবা মরী থমগদবনি হায়না লেপকদবনি। মসিগী শেংলবা মরী অসিনা ঈশিং কনবদা মতেং ওইগনি। হৌজিক্তগী হৌনা তুংগী মীরোলগীদমক্তা ইথৌদাং পাংথোকপা অসি মসি লৈবাক অসিগী হৌজিক্কী মীরোল অসিগী থৌদাংনি। 

ইচিল-ইনাওশা,

ঐখোয়না হৌজিক্কী ফীভম অসিসু হোংদোক্কদবনি অমসুং তুংগী অৱাবশিংসু লৈহন্দনবা পাম্বৈ থিগদবনি। মরম অসিনা ঐখোয়গী সরকারনা ৱাতর গবর্নেন্স অসি ঐখোয়গী থৌশীল-থৌরাংশিং অমসুং ৱারেপশিংগী মরক্তগী মরুওইবা মফমদা থম্লি। হৌখিবা চহি ৬ অসিদা মায়কৈ অসিদা থবক কয়া অমা পায়খৎখি। প্রাইম মিনিস্তর এগ্রীকলচরেল ইরিগেসন স্কিম ওইরো নত্রগা লৌবুক খুদিংদা ৱাতর কেম্পেন তৌবা ওইরো, ‘পর দ্রোপ মোর ক্রোপ’কী কেম্পেন ওইরো নত্রগা নমামি গঙ্গে মিশন ওইরো, জল জীবন মিশন নত্রগা অতল গ্রাউন্দ ৱাতর স্কিম ওইরো খোংজেল য়াংনা থবক চত্থরি।

মরূপশা,

থবকশিং অসিগী মরক্তা ৱানিংঙাই ওইবা হিরমদি ঐখোয়গী লৈবাক অসিদা অয়াম্বা নোংগী ঈশিং মাংই।  ভারত অসিনা নোংগী ঈশিং অসি নিংথিনা য়েংশিন্দুনা থম্নিবমখৈ লৈবাক অসিনা লৈনুংগী ঈশিংগী মখা পোনবা অসি হন্থরক্কনি। 

মরম অসিনা ‘নোংগী ঈশিং য়োকশিনবা’ গুম্বা কেম্পেন তৌবা অমদি মদু মায় পাকহনবা অসি য়াম্না মরুওই।  হন্দক্তি জল শক্তি অভিয়ান্দা মসিমসু মরুওই মদুদি মসিদা শহরগী অমসুং খুঙ্গংগী মফমশিং অনিমক য়াওহনগদৌরি। মোন্সুন য়ৌরক্কদবা অসি চয়োল খরখক্তা ঙাইরে, মরম অসিনা মসিগীদমক্তা হৌজিক্তগী হৌনা ঈশিং খাকচিন্নবা থৌরাং তৌদুনা লৈগবদনি। মোন্সুন য়ৌরক্ত্রিঙৈদগী হৌনা তেঙ্কীশিং, পুখ্রীশিং লু-নান্না থম্নবা, লৈবাক লৌথোক্দবা ওইরবসু মদুসু তৌথোক্তুনা থমগদবনি, ঈশিং তুংশিন্নবগী চাং অসি হেনগৎহনগদবনি, নোংগী ঈশিং অসি চেন্থরকপদা লৈগদবা অপনবশিং পুম্নমক লৌথোক্কদবনি, অসিগুম্বা থবকশিং অসিগীদমক্তা অরৈবা পাঙ্গলপুম্বা পুথোক্কদবনি অমদি করিগুম্বা অচৌবা ইঞ্জীনিয়রগী মথৌ তাদে।  চাউরবা ইঞ্জীনিয়র লাক্তুনা য়াম্না অচৌবা দিজাইন শেম্বা ওইরগদসু মদুগী মতুংদদি মকরিসু মথৌ তাররোই। খুঙ্গংগী মীশিংনা মসিগী মতাংদা খংই, মখোয়না য়াম্না লাইনা তৌখিগনি, কনানোমদা তৌহন্নিংলবসু শুপ্নতগী মসিদা তেক্নোলোজী য়াম্না শিজিন্নরগদি হেন্না ফগনি। হৌজিক মনরেগাগী শেল অসি নোং লাক্ত্রিঙৈফাওবা মসিগী থবক অসিদখক্তমক শিজিন্নহন্নিংই।

ঈশিংগা মরী লৈননা তৌগদবা থৌরাংশিংপুম্বা তৌগদবনি, মনরেগাগী শেলপুম্বা হৌজিক অতোপ্পা অমত্তদা চৎহল্লরোইদবনি অমদি মসিগী কেম্পেন অসি মায় পাকহনবদা ইরৈচাপু্ম্বনা তেংবাং পীহঞ্জনিংই, সরপঞ্চ খুদিংমক, দি.এম. খুদিংমক, দি.সি অমদি অতৈ মরূপশিংগীসু য়াম্না চাউবা থৌদাং লৈগনি।  ঙসিগী থৌরম অসিগীদমক্তা মরুওইবা গ্রামসভাশিং পাংথোকখি অমদি জল সপথ লৌহনখি হায়না ঐঙোন্দা হায়রকখি। মসিগী জল-সপথ অসি মীওই খুদিংগী ওইবা ৱশক ওইহনগদবনি, মীওই খুদিংগী হৌন-লোনচৎসু ওইহনগদবনি। ঈশিংনা মরম ওইদুনা ঐখোয়গী মহৌশা অসিদা হোংহল্লবদি মহৌসানসু ঐখোয়গী ইতেং পাংলক্কনি। ঐখোয়না কয়ারক হন্না তারে মদুদি আর্মীগী ওইনা হায়নৈ মদুদি শান্তিগী মতমদা খ্বাইদগী হেন্না হুমাং তাহল্লিবমখৈ লানগী মতমদা ঈ অসি হন্থনা তাই। মসিগী চৎন-পথাপ অসি ঈশিংদসু চৎনৈ হায়না ঐহাক্না খল্লি। করিগুম্বা ঈশিং অসি নোং তারক্ত্রিঙৈগী মমাংদা, ঐখোয়না কন্না হোৎনদুনা,মসিগী থৌরাং অসি তৌরবদি ঈশিং কন্নবগী থবক অসি তৌরবদি কুম কাংবা মরম্না শেল কয়া মাংই অমসুং অতৈ থবক কয়াসু লেপহল্লি, মাচম মীয়ামদা অৱাবা নংহল্লি, শা-শনশিং থাদোকপা তারিবা খুদিংমক তৌহল্লোই। মরম অসিনা শান্তিগী মতমদা হুমাং তাহনবা হায়বসিমক লাইশোন ওইরিবা অসিগুম্না পুন্সি কন্নবগীদমত্তা নোংগী ঈশিংগীদমক্তা হান্নদগী হৌনা হোৎনহৌবা তারবদি অদুক্কী মতিক য়াইফগনি।

ইচিল-ইনাওশা,

নোংগী ঈশিং য়োকশিনবগা লোয়ননা ঐখোয়গী লৈবাক অসিদা তুরেলগী ঈশিং নীংথিনা য়েংশিন্দুনা থবক শিন্দোক-শিঞ্জিন তৌবগী ৱাফম অসিসু চহি তরা-তরাদগী ঙাংনদুনা লাক্লি।   ঐখোয়না উরে, মফম কয়াদা দাম শারে অমদুবু দিসোল্তিংদি তৌদ্রি। করিগুম্বা দিসোল্তিং খরা তৌরদবদি, ইঞ্জীনিয়র খরনা লমজিং-লমতাপীবা তারবদি হেন্না ঈশিং লৈগনি, হেন্না ঈশিং লৈরবদি নুমীৎ য়াম্না চৎকনি, মরম অসিনা মতৌ অসিগুম্না ঐখোয়গী তুরেলশিং, ঐখোয়গী কেনেলশিংদা থবক অসি তৌবগী মথৌ তাই। লৈবাক অসিদা ঈশিংগী অৱাবা অসি থেংনদনবগী মায়কৈরোমদা থুনা-য়াংনা থবকপাংথোকপা অসি ঐখোয় খুদিংমক্কী ইথৌদাংনি। কেন-বেতৱা লিঙ্ককী প্রোজেক্ত অসি মসিগী শরুক অমনি। ঐহাক্না মধ্য প্রদেশ অমসুং উত্তর প্রদেশতা, মফমদুগী মুখ্যমন্ত্রী অনিমকপু, সরকার অনিমকপু অমসুং রাজ্য অনিমক্কী মীয়াম্বু থাগৎলবসু থাগৎফাত্রবনি।  ঙসি লুচিংবা অনিসিনা, সরকার অনিসিনা তৌরিবা চাউরবা থবক অসি হিন্দুস্তানগী অফবা তুংলমচৎকী ওইনা সনাগী কোর্বাক্তা ইদুনা মসি অচম্বা থবক নত্তে, মসি চেবাং অমদখক্তা খুৎয়েক পীরম্বা নত্তে, মখোয়না বুন্দেলখন্দগী লাইবক্কী মই অসি অনৌবা মওংদা ওইহল্লে। বুন্দেলখন্দগী লাইবক্কী মই অসি হোংদোক্নবগী থবক তৌরি অমদি মসিগীদমক্তা মুখ্যমন্ত্রী অনিমক, রাজ্য অনিমক্কী সরকারশিং, রাজ্য অনিমক্কী মীয়াম পুম্বা ইকোক নোন্নিংঙাইনি। অদুবু ঐহাক্কী বুন্দেলখন্দগী ইচিল-ইনাওশিংনা মসিদা থৌদাং অসি অদুক্কী মতিক য়াম্না লৌবীদুনা কেন-বেতুৱাগী থবক অসি ঐখোয়গী মীৎমাংদা মপুং ফাহনসি অমসুং ঐখোয়দা ঈশিং ফংহনসি। ঐখোয়না ঐখোয়গী লৌবুক অসি পুমশং-শংহল্লসি ঐখোয় ময়াম পুন্না। প্রোজেক্ত অসিদগী জীলা কয়াগী মীওই লাখ কয়ানা, লৌমী কয়ানা ঈশিং ফংলগনি, মসিদগী মৈসু থোরক্লগনি। হায়বদি খৌরাংবসু কোক্লগনি অমদি চাউখৎপসু হেল্লগনি।  

ইচিল-ইনাওশা,

থবকশিং অসি ভগিরথমুক চাউরবদি পান্দম অসি ফংগনি। অমদি ঙসি ঐখোয়না লৈবাক অসিদা জল জবন মিশন অসি অসিগুম্না উবা ফংলি।  চহি অমগা মখাইখক্তদা ঐখোয়গী লৈবাক অসিদা খুঙ্গংগী ইমুং করোর ১৯গী মনুংদা শুপ্নতগী ইমুং করোর ৩ খক্তদা তোতীগী ঈশিং শম্লম্মি। জল জীবন মিশন হৌদোক্লবা মতুংদা য়াম্না অতেনবা মতমগী মনুংদা ইমুং করোর ৪ মুক্তা তোতী শম্নহনখিবসি ঐহাক নুংঙাই। মিশন অসিগী খ্বাইদগী অথোইবা মতিক-ময়াইদি মসিগী ভেল্যুদা মীয়াম্না শরুক য়াবসিনি, লোকেল গবর্নেন্সকী মোদেলনি অমদি ঐহাক্না হায়জগদবদি মসি ঐহাক্না খংলক-উরকপদগী হায়জরি মদুদি মসিগী জল জীবন মিশন অসিদা ইচলশিংনা মশিং ৱাংনা মাংলোমদা চংশিল্লবমখৈ, মশিং য়াম্না ইচলশিংনা থৌদাং লৌরিবমখৈ চেন্থহল্লিবমখৈ, অদোম্না য়েংবীয়ু ঈশিংগী ভেল্যু অসি ইমা-ইচলশিংনা হেন্না খংলিবা অসিগুম্না অতৈ কনাননসু খংবা ঙম্লোই। ইমা-ইচলশিংনা খবীরমগনি মদুদি ঈশিংগী অৱাৎপা লৈরবদি য়ুমদা অদুক্কী মতিক য়াম্না ৱাই হায়বা। করিগুম্বা ইমাদুগী মখুত্তা ঈশিংগী থৌরাং অসি ফংহল্লবদি, ইচলদুগী মখুত্তা ঈশিংগী থৌরাং অসি পীবিরবদি মসিগী ইমা-ইচলশিংসিনা ঐখোয়না লাম্বা ফংদবা অহোংবা কয়া পুরক্কনি হায়বসি য়েংবীয়ু।  অদোম পঞ্চায়েৎ পায়বীরিবশিংনা নীংথিনা খংবীরম্লগনি মদুদি মসিগী থৌরম অসি খুঙ্গংনা পায়রিবনি, খুঙ্গংনা পাংথোক্লিবনি হায়বসি। মরুওইনা ঐহাক্না হান্না হায়জখ্রবনি মসিগী থবক অসি নুপীশিংনা মকোক থংদুনা খুমাং চাওশিলহল্লবদি মসিগী মহৈ অসি ফংবা হৌরগনি হায়না। মহৈলোয়শঙ ওইরো, আঙ্গনৱাদী ওইরো, আশ্রমগী শঙলেনশিং ওইরো, হেল্থ এন্দ ৱেলনেস সেন্তর ওইরো, কম্যুনিতী সেন্তর ওইরো অসিগুম্বা মফমশিং অসিদা হেন্না মরুওইবদা য়ুম্ফম ওইরগা ঈশিং ফংহল্লি।

মরুপশা,

ঐখোয়না য়াম্না কন্না খন্নদবা জল জীবন মিশনগী দাইমেন্সন অমসু লৈরি। ঐখোয়গীসিনা আর্সেনিক অমসু অতোপ্পা পোলুতেন্তশিংনা ঈশিংদা মখল অমা ওইনা ইলিমেন্ত য়াওরিবা, কেমিকেল য়াওরিবা অসি য়াম্না খুদোংথিনিংঙাইনি। ঈশিং মোৎপনা মরম ওইদুনা লায়না মখল কয়া নাহল্লি, মীওই কয়াগী পুন্সি মাংহল্লিবশিং অসিগী মরক্তা শরুগী অনাবশিংনা হিংবদা অৱাবা ওইহল্লি। অনাবশিং অসি লৈহন্দবা ঙম্লবদি পুন্সি কয়া কনবা ঙমগনি। মসিগীদমক্তা ঈশিংগী চাংয়েং তৌবা অসি য়াম্না মথৌ তাই। অদুবু নোংগী ঈশিং অসি য়োকশিনবা ঙমহৌবা তারবদি অতৈ লৈরিবা পাৱরশিং অসি হন্থগনি।  নিং-খা তম্লবা মতুংদা অহানবা ওইনা ঈশিং চাংয়েং তৌবগী মতাংদা করিগুম্বা সরকার অমগী মায়কৈদগী য়াম্না হকচিনবা মওংদা থবক চত্থরি। অদুগা ঈশিংগী চাংয়েং তৌবগী কেম্পেন অসিদা ঐখোয়গী খুঙ্গংদা লৈরিবা ইচল-ইচাশিংসু য়াওহল্লি হায়বা ৱাফম অসিদা ঐহাক নুংঙাইবা ফাওই। কোরোনাগী মতমদা নুপী লাখ ৪গা মখাইদগী হেনবদা ঈশিং চাংয়েং তৌনবগী ত্রেনিং পীরি। খুঙ্গং খুদিংদা য়ামদ্রবদা নুপী ৫ ঈশিং চাংয়েং তৌবগী ত্রেনিং পীরি। ৱাতর গবর্নেন্স অসিদা ঐখোয়গী ইচল-ইচেশিংগী থৌদাং অসি অদুক্কী মতিক হেনগৎহল্লিবমখৈ হেন্না ফবা মহৈ ফংগদৌরিবনি।  

ঐহাক্না থাজৈ মদুদি মীয়াম্না থৌদাং লৌবনা, মীয়াম্না শৌগৎপনা ঐখোয়না লৈবাক অসিগী ঈশিং কনবা ঙমগদৌরিবনি অমসুং লৈবাক অসিগী তুংদা লাক্কদৌরিবা মতম অসি ঐখোয়না অমুক হন্না শাফহনগদৌরিবনি।   ঐহাক্না অমুক্কা হন্না লৈবাক অসিগী নহাশিংদা, ইমা-অচলশিংদা, অঙাং খুদিংমক্তা, লোকেল বোদীশিংদা, সোসিএল ওর্গনাইজেসনশিংদা, সরকারগী বিভাগশিংদা, রাজ্য সরকরশিংদা হায়জগদবদি জল জীবন মিশন অসি মায় পাকহন্নবগীদমক্তা ঐখোয় পুম্নমক্না ৱাশক শক্তুনা মাংলোমদা চংশিনমিন্নসি হায়বসিনি। লাক্কদৌরিবা নুমীৎ ১০০নিসিদা ঈশিংগী থৌরাং তৌবা অসি, য়ুমদা অচৌবা মী থুংবদা করি থৌরাং তৌবগে, বোর থুংবদা করি থৌরাং তৌবগে? থাবুম চুপ্পা হান্নদগী হৌনা থৌরাং তৌদুনা থম্মি, ময়াম বোর লাক্কদৌরে হায়দুনা। নোং লাক্কদৌরে হায়না খুঙ্গং পুম্বদা অসুম্না থৌরাং তৌদুনা লৈগদবনি, ময়াম নোং লাক্কদৌরে, ঈশিং য়োকশিল্লসি হায়দুনা।  মওং অমদা পুক্নিং অসি লাংতক্নহনগদবনি। ঈশিং মরিক অমফাওবা মপান্দা থোকহনখিদ্রবদি অমদি অতোপ্পা অমনা ঈশিং অসি লাকপদা লান্না শিজিন্নথোকপগী হৈনবীসু লৈ। ঐহাক্না অদোমদা হায়জগদবদি ঈশিং কনবা অসি অদুক্কী মতিক মথৌ তাবা অসিগুম্না অদুক্কী মতিক ঈশিং অসি হৈ-শিংনা ৱাখল থাদদুনা শিজিন্নবগী মথৌসু তাই হায়বসি ঐখোয়না কাওরোইদবনি।

ঐহাক্না অমুক্কা হন্না ঙসি মালেমগী ঈশিং নুমীৎ অসিদা, ৱর্ল্দ ৱাতর দে অসিদা ঈশিংগী মতাংদা মীয়াম্না হেন্না খন্নরক্নবা কেম্পেন অসিদা অমদি মসিদা লৈবাক্তা থবক তৌবীরিবা সরপঞ্চশিং, ঈশিংগীদমক্তা লৈবাক্তা মাগী মিশন শেম্লিবা মীওই কয়া লৈ, ঙসিদি অসগুম্বা মীওই মঙাগা ৱারী শান্নবা ফংজরে অদুগা হিন্দুস্তানগী কাচিন-কোয়াদা লৈরিবা অসিগুম্বা মীওইশিং, অসিগুম্বা থৌনাপুম্বা খুরুমদুনা লাক্লো ঐখোয় ঈশিংগীদমক্তা থবক পাংথোকমিন্নরসি। ঈশিং খাকচিনবা অসি মায় পাক্নবগীদমক্তা অমসুং ঈশিং অসি ঐখোয়গী লৈমায় অসি ঈশিং লৈবা ওইহনসি, ঈশিং অসি ঐখোয়গী পুন্সি অসি ঈশিং লৈবা ওইহনসি,  ঈশিং অসি ঐখোয়গী শেন্মীৎলোন অসিদা ঈশিং লৈবা ওইহনসি, ঐখোয় অসি থৌনা-পাঙ্গল অমনা থল্লবা লৈবাক অমা ওইদুনা খুমাং চাউশিনসি, মসিগী ৱাখল অসিগা লোয়ননা অদোম পুম্নমকপু হন্না-হন্না থাগৎচরি!!!

******