প্রধান মন্ত্রী নরেন্দ্র মোদীগী নুংতিগী ওইবা মথৌ য়াম্না চিলবসু মহাক্না মতম ফংবা খুদিংদা মীয়ামগী চীথি অমসুং মখোয়গী মেসেসশিং পাউখুম পীনবগী খুদোংচাবা অদু মাংহনদে হায়না মীওই য়াম্নদি খঙনদে। নরেন্দ্র মোদী এপ (নমো এপ)কী খুত্থাংদা প্রধান মন্ত্রী ফসল বিমা য়োজনানা চহি মঙা মপুং ফারকপদা অমসুং সরকার অসিনা অতোপ্পা হোৎনরিবশিং অসিগী মতাংদা পি.এম.দা নুংঙাইবা ফোঙদোকখিবা উত্তরাখন্দগী নৈনিতাল খীমানন্দনা অসিগুম্বা চীথি অমা ফংখি। প্রধান মন্ত্রীনা খীমান্দদা মহাক্কী মমল য়াম্লবা ৱাখল্লোনশিং ফোঙদোরকপগীদমক থাগৎপা ফোঙদোক্লদুনা চীথি অমা ইখি।

"লৌউ-শিংউ য়াওনা সরকারনা তোঙান তোঙানবা সেক্তরশিং ফগৎহন্নবা সরকারনা লেপ্তনা হৌৎনরিবশিং অসিদা নখোয়না মমল য়াম্লবা ৱাখল্লোনশিং ফোঙদোকপীরক্তুনা লৈবাক অসিবু চাউখৎ-থৌরাংগী অনৌবা পন্দোম লোম্বা ঙমহনবগীদমক থাগৎচরি," হায়না প্রধান মন্ত্রী মোদীনা চীথিদা ইখি। “অসিগুম্বা মেসেসশিংদা লৈবাক অসিগী শেবা তৌনবা ঐহাক্না হোৎনবদা অনৌবা থৌনা হাপখি।”

প্রধান মন্ত্রী ফসল বিমা য়োজনাগী মাই পাকপা অসিগী মতাংদা প্রধান মন্ত্রীনা হায়, "প্রধান মন্ত্রী ফসল বিমা য়োজনানা নোংচীংগী তম্বা ঙমদবা ফীভমশিংগা মরী লৈনবা খুদোংথিবশিং হন্থহন্দুনা হোৎনবা কনবা লৌমীশিংগী শেন্মীৎলোনগী ফীভমশিং ঙাকশেল পীবদা লেপ্পা লৈতনা মরু ওইবা থৌদাং অমা লৌরি। লৌমী করোর কয়ানা ঙসি ফার্মর-ফ্রেন্দলী ইন্সুরেন্স স্কীমগী কান্নবশিং ফংহল্লি।”

সরকারনা লৌউ-শিংউ অমসুং লৌমীশিংগী য়াইফ-থৌরাংগীদমক সরকারনা হোৎনরিবশিং অসিগী মতাংদা প্রধান মন্ত্রীনা চীথি অদুদা মখা তানা অসুম্না ইখি, " হৌখিবা চহী মঙা অসিদা কম্প্রিহেন্সিব কভরেজ অমসুং ত্রান্সপরেন্ত ক্লেম রিদ্রেসেলগী প্রোসেসকী খুত্থাংদা মসিগী ‘ফসল বিমা’ (ক্রোপ ইন্সুরেন্স) স্কীম অসি লৌমীশিংগী য়াইফ-থৌরাংগীদমক ঐখোয়না কন্না হোৎনরিবা অসিগী খুদম অমা ওইরকখি। ঙসি ‘মরুদগী কৈথেল’ ফাওবদা লৌমীশিংগী খোঙচৎতা থেংনরিবা অপীকপা অমসুং অচৌবা খূদোংচাদবা খুদিংমক লৌথোক্নবা অমসুং মখোয়গী লৌউ-শিংউ চাউখৎনবা লেপ্তনা হোৎনরি।"

প্রধান মন্ত্রীনা লৈবাক অসি চাউখৎনবা শরুক য়ারিবা অমসুং থৌদাং লৌরিবা মীওইশিংবু থাগৎখি অমসুং অসুম্না ইখি: “ঙসি লৈবাক অসিনা হীরম পুম্নমক্তা চাউখৎনবা মঙলানগা লোইননা মপাঙ্গল কনবা, য়াইফবা অমসুং মরোমদোম লেপচবা ঙম্বা ভারত অমা শেনগৎনবা খোঙজেল য়াংনা চংশিল্লি। প্রজা পুম্নমক্না থাজবা থম্বা অসিনা থৌনা হাপতুনা লৈবাক্কী লৈরিবা পান্দমশিং মাই পাক্না ফংবা ঙম্নবা লৈবাক অসিনা হোৎনরি অমসুং ঐখোয়না লৈবাক অসিনা মালেমগী ফম্পাক্তা অনৌবা পন্দোম লোম্বা ঙম্নবা হোৎনরিবা অসি মখা তানা কনশিনগনি হায়না ঐহাক্না থাজৈ।”

মমাংদা খীমানন্দনা ক্রোপ ইন্সুরেন্স স্কীমনা চহি মঙা মপুং ফাবা অসিগী মতাংদা মহাক্কী মেসেস্তা নুংঙাইবা ফোঙদোকখি। খীমানন্দ হায় প্রধান মন্ত্রীগী লুচিং মখাদা কেন্দ্র সরকারনা তোঙান তোঙানবা য়াইফ-থৌরাংগী স্কীমশিংগী খুত্থাংদা প্রজাশিংগী অমসুং লৈবাক অসিগী য়াইফনবা লেপ্তনা হোৎনরি হায়নসু খীমানন্দনা ফোঙদোকখি।

*****