ভিদিও কনফরেন্সকী খুৎথাংদা পাংথোকপা শেন-থুমগী থবকশিংগী মতাংদা বজেত্তা য়াওরিবা খুদোংচাবশিং মপুংফানা পায়খৎনবা ৱেবিনার অমদা প্রধান মন্ত্রী শ্রী নরেন্দ্র মোদী ৱা ঙাংখ্রে।

থৌরম অদুদা প্রধান মন্ত্রীনা হায়খি প্রাইভেদ সেক্তর শরুক য়াবা হেনগৎহন্নবা অমসুং সরকারগী ইন্সতিতুৎশিং মপাঙ্গল কনখৎহন্নবা কেন্দ্রগী বজেত্তা ময়েক শেংলবা লম্বী অমা তাক্লে। লৈবাক অসিগী শেন-থুমগী হিরমদা সরকারগী পান্দম নাখৈ য়াম্না শেংলি। ঐখোয়গী মরুওইবা থবক্তি দিপোজিতর অমসুং ইনভেস্তর অনিমক্কী থাজবা লৈহনবা অমসুং অরোন-অথুপ লৈহন্দবা অসিনি। বেঙ্কিং অমসুং নন-বেঙ্কিং সেক্তরশিংদা অরিবা লম্বীশিং অমসুং অরিবা থবকশিং হোঙদোক্লে।

প্রধান মন্ত্রীনা হায়খি এগ্রেসিপ লেন্দিংগী মিংদা হৌখিবা চহি ১০-১২দা লৈবাক অসিদা বেঙ্কিং সেক্তর অমসুং ফাইনান্সিএল সেক্তর শাথিনা শোকহনখ্রে। লৈবাক অসিদা নারোন্দা শেন্থং পীবগী চৎনবী লৈহন্দনবা মথং-মথং থবকশিং পায়খৎলে। এন.পি.এশিং নমশিন্দুনা থম্বগী মহুত্তা, মসি তঙাইফদনা এন.পি.এগী অহানবা নুমিত্তা পাউ পীগদবনি।

প্রধান মন্ত্রীনা হায়খি ললোন-ইতিক্কী থবকশিংনা থেংনরিবা তম্বা ঙমদবা ফিবম অদু সরকারনা খঙই অমসুং ললোন-ইতিক্কী ৱারেপ খুদিংমক ফত্তবা ৱাখল্লোল অমদা লৌবা নত্তে হায়বা খঙই। অসিগুম্বা ফিবম অসিদা, অচুম্বা ৱাখল্লোল অমগা লোয়ন্না লৌবা ললোন-ইতিক্কী ৱারেপশিংগী লেপ্পা অসি সরকারগী দাইত্বনি অমসুং মসি ঐখোয়না পাংথোক্লি অমসুং মখা তানা পাংথোকখিগনি। ইন্সোলভেন্সি অমসুং বেঙ্করপসি কোদগুম্বা থবকশিংনা শেন শান্দোক্লিবশিং অমসুং পুরিবশিং থাজবা লৈহল্লে।

প্রধান মন্ত্রীনা হায়খি মীচম মীয়ামগী শেন্থোক-লম্বী ঙাক-শেন্নবা, লায়রবশিংদা পীরিবা সরকারগী খুদোংচাবশিং নারোন্দা লৌথোক্তনা ফংহন্নবা অমসুং লৈবাক অসিদা ইনফ্রাস্ত্রকচরগা মরী লৈনবা শেন থাদবা হেনগৎহন্নবা মরুওইবা থবকশিং পায়খৎলে। হৌখিবা চহি খর অসিদা পুরকখিবা শেন-থুমগী অওনবশিংদা হায়রিবা থবকশিং অসি য়াওরে। হন্দক্কী কেন্দ্রগী বজেত অসিদা ভারতকী শেন-থুমগী হিরম অসি মপাঙ্গল কনখৎহন্নবা পান্দম অসি মাঙলোমদা পুখৎলে। হন্দক লাউথোকখিবা নিউ পব্লিক সেক্তর পোলিসিদা ফাইনান্সিএল সেক্তরশু য়াওরে। সরকারগী বেঙ্ক অনি প্রাইভেদ ওন্থোকপা, ইন্সুরেন্সতা এফ.দি.আই চাদা ৭৪ ফাওবা অয়াবা পীবা, এল.আই.সিগী ইনিসিএল পব্লিক ওফরিং লৈহনবা য়াওনা থৌরাং কয়া হন্দক্কী বজেত অসিদা লাউথোক্লে।

প্রধান মন্ত্রীনা হায়খি প্রাইভেদ ইন্তরপ্রাইজশিং য়োকখৎলে অমসুং বেঙ্কিং অমসুং ইন্সুরেন্স সেক্তরশিংদা পব্লিক সেক্তর শরুক য়াবা লৈবাক অসিনা দরকার ওইরি। পব্লিক সেক্তর মপাঙ্গল কনখৎহন্নবা ইকুইতি কেপিতেল থাদনবা থবক পায়খৎলে। এন.পি.এশিং খোঙ্গুল লিনবা অমসুং অচুম্বা লম্বী অমদা লোনশিং পীনবা অনৌবা এ.আর.সি স্ত্রকচর অমা শেমগৎলগনি। মসিনা পব্লিক সেক্তর বেঙ্কশিং মপাঙ্গল কনখৎহনগনি। ইনফ্রাস্ত্রকচর অমসুং ইন্দস্ত্রিএল প্রোজেকশিংগী মতম শাংনা দরকার ওইবা শেনফমশিং ফংহন্নবা অনৌবা দিবলপমেন্ত ফাইনান্স ইন্সতিতুৎ অমা লিংখৎনবা খন্নরে। ইনফ্রাস্ত্রকচরদা শেন থাদনবা সোভরেন ৱেল্থ ফন্দশিং, পেন্সন ফন্দশিং অমসুং ইন্সুরেন্স কম্পেনিশিং পুক্নিং থৌগৎপা দরকার ওই।

প্রধান মন্ত্রীনা হায়খি অত্মানির্ভর ভারত অসি অচৌবা ইন্দস্ত্রি অমসুং অচৌবা সহরশিং খক্তনা শেমগদবা নত্তে। অপীকপা ওন্ত্রেপ্রেনিউয়রশিং অমসুং মীচম মীয়াম্না থবক কন্না শুদুনা খুঙ্গংশিংদা অত্মানির্ভর ভারত শেমগদবনি। লৌমীশিং অমসুং লৌউ-শিংউগী পোৎথোকশিং হেন্না মশক থোকহল্লিবা য়ুনিতশিংনা অত্মানির্ভর ভারত শেমগদবনি। ঐখোয়গী এম.এস.এম.ইশিং অমসুং স্তার্দ-অপশিংনা অত্মানির্ভর ভারত শেমগদবনি। মরম অদুনা, কোরোনা মনুংদা এম.এস.এম.ইশিংগী অখন্নবা থৌরাংশিং পায়খৎতুনা ইন্তরপ্রাইজ লাখ ৯০ রোম হায়রিবা খুদোংচাবশিং ফংখ্রে অমসুং লুপা ত্রিল্লিয়ন ২.৪গী শেন্থং ফংখ্রে। সরকারনা অওনবা কয়া পুরক্তুনা লৌউ-শিংউ, কোয়লা অমসুং স্পেস সেক্তর এম.এস.এম.ইশিংগীদমক হাংদোক্লে।

প্রধান মন্ত্রীনা হায়খি ঐখোয়গী শেন-থুম চাউখৎপা হেনগৎলকপা লোয়্ন্না শেন্থং পীবা হেনগৎহনবা অসি য়াম্না মরুওই। অনৌবা স্তার্দ-অপশিংগীদমক অনৌবা অমসুং হেন্না ফবা শেন-থুমগী খুদোংচাবশিং পীনবা ঐখোয়গী ফিনতেক স্তার্দঅপশিংগী থবকশিং থাগৎলি। কোরোনা মতমদা স্তার্দ-অপশিংগা থবক তৌমিন্ননবা ঐখোয়গী ফিনতেকশিংনা ফজনা শরুক য়াখি। চৎলিবা চহি অসিদশু ভারত্তা শেন-থুমগী লমদা অফবা ওইগনি।

প্রধান মন্ত্রীনা হায়খি হৌখিবা চহি খর অসিদা মী খুদিংমক শেন-থুমগী থবকশিংনা কোনশিনবদা তেক্নোলোজি হেন্না শীজিন্নবা অমসুং অনৌবা থবকশিং পায়খৎপনা য়াম্না চাউবা থৌদাং অমা লৌরি। ঙসিদি লৈবাক অসিদা মীওই কোতি ১৩০ আধার কার্দ লৈরে অমসুং মীওই কোতি ৪১ হেন্না জন ধন একাউন্তশিং লৈরে। হায়রিবা জন ধন একাউন্তশিংগী চাদা ৫৫ রোম নুপীশিংনি অমসুং একাউন্তশিংদা লুপা কোতি লাখ ১.৫ রোম থমজিল্লে। মুদ্রা স্কিমগী মখাদা অপীকপা ওন্ত্রেপ্রেনিউয়রশিং লুপা কোতি লাখ ১৫ রোমগী লোনশিং য়েন্থোকখ্রে। মখোয়গী মনুংদা চাদা ৭০ রোম নুপীশিংনি অমসুং চাদা ৫০ রোম্না দলিত, তোল্লবশিং, ত্রাইবেল অমসুং শোৎথরবা কাংলুপকী ওন্ত্রেপ্রেনিউয়রশিংনি।

প্রধান মন্ত্রীনা হায়খি পি.এম কিসান শ্বানিধি স্কিমগী মখাদা লৌমীগী ইমুং কোতি ১১ রোম মখোয়গী একাউন্তশিংদা হকথেংন্না লুপা কোতি লাখ ১.১৫ রোম ফংখ্রে। স্ত্রিৎ ভেন্দরশিংগী য়াইফনবা পি.এম শ্বানিধি স্কিম পায়খৎলে। ভেন্দর লাখ ১৫ রোমদা লুপা কোতি লিশিং ১০ রোমগী শেন্থং পীখ্রে। ত্রেদস, পি.এস.বি দিজিতেল লেন্দিং প্লেতফোর্মশিংনা এম.এস.এম.ইশিংদা য়াম্না লাইনা লোন ফংহল্লে। কিসান ক্রেদিদ কার্দশিংনা অপীকপা লৌমীশিং, শা-ষন লোইবা লৌমীশিং অমসুং ঙামীশিং মওং-মরিল নাইদনা শেন পুবদগী কনবা ঙম্লে। মসিগী হিরম অসিগীদমক অনৌবা শেন-থুমগী খুদোংচাবশিং শেমগৎনবা ফাইনান্সিএল সেক্তরনা থবক পায়খৎকদবনি। সেল্ফ হেল্প গ্রুপশিংগী থবক হৈবা অমসুং পোৎথোকশিং পুথোকপা ঙম্বা অমসুং শেন-থুম শীজিন্নবা হৈবা অসিনা মখোয় শেন থাদনবা অফবা লম্বী অমা ওইরে। মসি য়াইফ-থৌরাংগী ৱাফম অমা নত্তে, অচৌবা ললোন-ইতিক্কী নমুনা অমগী ৱাফম্নি।

প্রধান মন্ত্রীনা হায়খি মী খুদিংমক শেন-থুমগী থবকশিংনা কোনশিল্লবা মতুংদা, শেন-থুমগী শক্তি পীনবা মাইকৈদা লৈবাক অসি য়াংনা চঙশিল্লি। আই.এফ.এস.সি গিফ সিতিদা মালেম থাক্কী ফাইনান্সিএল হব অমা শেমগৎলি অমসুং মথং চহি ৫দা ভারত্তা ফিনতেক মার্কেত অসি ত্রিল্লিয়ন ৬ হেন্নগনি হায়না পানরি। ভারত্তা অনৌবা ইনফ্রস্ত্রকচর শেমগৎপা অসি ঐখোয়গী অনিংবা খক নত্তনা অত্মানির্ভর ভারত অমা শেমগৎনবা দরকার ওইরি। মরম অদুনা হন্দক্কী বজেত অসিদা ইনফ্রাস্ত্রকচরগী অচৌবা পান্দমশিং থম্লে। হায়রিবা পান্দমশিং অসি ফংনবা শেন থাদবা দরকার ওই অমসুং শেন থাদনবা হোৎনবা য়াবা খুদিংমক হোৎনরি। হায়রিবা পান্দমশিং অসিনা শেন-থুমগী হিরম খুদিংমক মপুংফানা শৌগৎকনি। ঐখোয়গী শেন-থুমগী থবকশিং মপাঙ্গল কনখৎহন্নবা, সরকারনা লৈবাক অসিগী বেঙ্কগী থবকশিং মপাঙ্গল কনখৎহল্লে। হৌজিক ফাওবদা বেঙ্কগী অওনবশিং পুরক্লে অমসুং মখা তানা পুরকখিগনি।

***