খুরুমজরি,

কেন্দ্র মন্ত্রী-মন্দোলদা লৈরিবা ঐহাক্কী মরূপশিং, শ্রী রমেশ পোখ্রিয়াল ‘নিশাঙ্ক’জী, শ্রী সঞ্জয় ধোত্রেজী, আই.আই.তি. খরগপুরগী চেয়রমেন, শ্রী সঞ্জীব গোয়নকাজী, শ্রী ভি.কে. তিৱারীজী, অতোপ্পা ফেকলতীগী মীওইশিং, মসিগী থৌমীশিং অমসুং ঐহাক্কী নহা ওইরিবা মরূপশিং অমসুং মখোয়গী মমা-মপাশিং! ঙসিগী নুমিৎ অসি দিগ্রী ফংলিবা মহৈরোয়শিংগী মরু ওইবা নুমিৎ অমা ওইবতা নত্তনা অনৌবা ভারত অমা শেম্বগী মরু ওইবা নুমিৎ অমসু ওইরে। নখোয়দা নখোয়গী ইমা-ইপাশিং অমসুং ওজাশিংনা থাজবা থম্বতা নত্তনা ভারত মচা করোর ১৩০গী অনিংবা-অপাম্বশিংসু নখোয়দা থম্লিবনি। মরম অদুনা, ইন্সতিত্যুৎ অসিদা ২১শুবা চহি-চাগী ভারত অসিবু মরোমদোম লেপচবা ঙমহন্নবা অনৌবা ইকোসীস্তেমগীদমক্তা অনৌবা লুচিংবা অমা শেমগনি হায়বগী লৈবাক অসিনা থাজবা থম্লি। ঐখোয়গী স্তার্ত-অপকী মালেমগী অনৌবা ইকোসীস্তেম, ঐখোয়গী ইন্নোভেসন রিসর্চকী অনৌবা ইকোসীস্তেম, ঐখোয়গী কোর্পোরেৎ মালেমগী অনৌবা ইকোসীস্তেম অমসুং লৈবাক অসিগী লৈঙাকপগী পথাপকী অনৌবা ইকোসীস্তেম। মসিগী কেম্পস অসিদগী থোক্লক্তুনা নখোয়না নখোয়গী অনৌবা পুন্সি অমা হৌবতা নত্তনা, লৈবাক অসি মীয়াম করোর অমগী পুন্সিদা অহোংবা পুরক্নবগীদমক্তা স্তার্ত-অপসু শেমগদবনি। মরম অদুনা, নখোয়গী মনাক্তা লৈরিবা দিগ্রী, মেদলশিং অসি নাকল অমদা মীয়াম করোর অমগী অপাম্বগী পরিং অমনি অমসুং মসিবু নখোয়না মঙফাওনহনগদবনি। হৌজিক্তি তুংদা মিৎফম থমদুনা, তুংদা করি ওইরকপা য়াবগে হায়বসু য়েংবা হৌরো। হৌজিক ঐখোয়গী করি তঙাই-ফদবা লৈ, চহি ১০গী মতুংদা করি তঙাই-ফদবা ওইরক্কনি, মসিগী মতাংদা নখোয়না থবক তৌগদবনি, হয়েংগী অনৌবা থৌওংশিং অসি হৌজিক্কী ভারত অসিনা শেমগদবনি।

মরূপশিং,

নখোয়না ইঞ্জিনীয়র অমা ওইনা নখোয়না হীরম অমবু কুপথনা য়েংবগী অঙম্বা লৈ অমসুং পেত্তর্নবু পেতেন্ততা ওন্থোকপা ঙম্বগী মতিকসু লৈ। হায়বদি, নখোয়না হীরমশিংবু য়াম্না কুপথনা য়েংবা ঙম্বগী মিৎয়েং লৈরে হায়বনি। মরম অদুনা, নখোয়না অকোয়বদা লৈরিবা ই-পাউ কয়া অমা অসিদগী শিংনবা করিনো অমসুং মসিগী পেত্তর্ন কয়া অমসু নখোয়না কুপ্না য়েংবা ঙমগনি। শিংনবা খুদিংগী পেত্তর্ন অমমম শোইদনা লৈগনি। শিংনবশিং অসিবু মখোয়গী পেত্তর্নশিং নীংথিনা খঙলবা তুংদা ঐখোয়বু মখোয়গী মতম কুইনা চৎকদবা ৱারোইশিন অমগী নাক্তা পুদুনা চৎকনি। মসিগী শিংনবশিং অসিনা তুংদা ওইরক্কদবা অনৌবা থৌওং খঙবা, অনৌবা থৌওং পাংথোকপগী য়ুম্ফম ওইগনি। অমুক্তা খন্থবীয়ু, পুন্সি কয়াদা অহোংবা কয়া পুরকপা ঙমগনি, পুন্সি কয়া কনবা ঙমগনি, লৈবাক্কী রিসোর্স কয়া য়াম্না কনবা ঙমগনি, করিগুম্বা নখোয়না পেত্তর্নশিং অসিবু নীংথিনা খঙদুনা মসিগী ৱারোইশিন পুরকপা ঙম্লবদি। অমসুং মসিগী ৱারোইশিন অসিনা নখোয়গী তুংগী পুন্সিদা কম্মর্সিএল ওইবা মাই-পাকপা পীবা ঙম্বগী ওইথোকপসু লৈগনি।

মরূপশিং,

পুন্সিগী তাঙ্কক অমদা নখোয়না মাং-থানা চৎলিবা অসিদা, নখোয়গী মাংদা ৱাহং কয়া অমা শোইদনা লাক্কনি। মসিগী লম্বী অসি অচুম্বনি, অরানবনি, মাংজবদি ওইরোইকো, মতমদি মাংওইকো? অসিগুম্বা ৱাহং কয়া অমা লাক্কনি। মসিগী ৱাহংশিং অসিগী পাউখুমদি – ইশাগী ওইবা হীরম ৩নি। ঐহাক্না হায়বদি, সেলফী হায়বা নত্তেকো, ইশাগী ওইবা অহুম হায়বনি। মসিনা হায়বদি, ইশাবু মশক খঙজবা, ইশাদা থাজজবা অমসুং খ্বাইদগী মতিক-মগুন লৈবা পাঙ্গল, ইশাগী ওইজবা থাদোকপা। নখোয়না ইশাগী তৌবা-ঙম্বগী চাং খঙনা মাং থানা চৎকদবনি, ইশাদা থাজদুনা মাং থাগদবনি, ইশাগী ওইজবী থাদোক্তুনা মাং থাগদবনি। ঐখোয়গী মফম অসিদা হায়নবা অমা লৈঃ শনৈঃ পন্থাঃ শনৈঃ কন্থা শনৈঃ পরৱৎলংঘনম। শনৈৱির্দয়া শনৈৱির্তং পচস্তানি শনৈঃ শনৈঃ ।। মসিনা হায়বদি, লম্বী শাংলবসু, ফিরোল তাইশিনবা ওইরো, চিং কাবা ওইরো, লাইরক তম্বা ওইরো পুন্সি মহিং তানবা ওইরো, পুম্নমক অসিগীদমক্তা খাঙবা কনবা উৎপা তাবনি, খাঙবা কনবা তাবনি। চহি কয়াদগী লৈরক্লবা শিংবশিং অসি হৌজিক্তি সাইন্সনা য়াম্না লাইহল্লে। অদুবু, লৌশিং অমসুং সাইন্স শিজিন্নবা, মসিগী মতাংদা ঙাংনরিবাশিং অসি তপ্না-তপ্না মপাঙ্গল লৈরক্লি। নখোয় খুদিংমক্না সাইন্স, তেক্নোলোজী অমসুং ইন্নোভেসনগী লম্বী অসিদা চৎলিবনি, মসিদা হাথু-হাথু তৌবগী মফম লৈতে। নখোয়না খল্লিবা, অনৌবা থৌওং অমা পাংথোক্লিবা অদুদা নখোয়না মাই-পাকপা ফংদবা য়াই। অদুবু মদুগী মাইথীবা অদুসু মাই-পাকপা ওইনা লৌগনি, মরমদি নখোয়না মদুদগী করিগুম্বা খরদি তম্বা ঙমগনি। নখোয়না নীংশিংগদবদি, সাইন্সকী অমসুং তেক্নোলীজীগী ওইবা মাইথীবা খুদিংদগী অনৌবা লম্বী থোক্লকপনি, ঐহাক্না নখোয়না মাই পাকপগী লম্বীদা চৎপা য়েংবা পামগনি। মসিগী মাইথীবা অসিনা নখোয়গী তুংগী মাই-পাকপগী লম্বী ওইগদৌরিবনি।

মরূপশিং,

21শুবা চহি-চাগী ভারতকী ফিভম হোংলবনি, তঙাই ফদবশিংসু হোংলবনি অমসুং অনিংবা-অপাম্বসু হোংলবনি। হৌজিক্তি আই.আই.তি.শিং অসি ইন্দিয়ন ইন্সতিত্যুৎ ওফ তেক্নোলোজী খক্তা নত্ত্রে, ইন্সতিত্যুৎ ওফ ইন্দিজিনিয়স তেক্নোলোজীগী হীরমদসু মথংগী থাক্তা পুখৎপগী তঙাই ফদবা লৈরবনি। ঐখোয়গী আই.আই.তি.শিংনা ভারতকী শিংনবশিংবু মুত্থৎনবা হোৎনরিবমখৈ, মসিনা ভারতকী ৱারোইশিন কয়া পুরক্কনি অমসুং মালেমগী ওইনা শিজিন্নবগী থাকসু য়ৌরক্কনি। ঐখোয়গী য়াম্লবা মীয়াম অসিগী মরক্তগী নখোয়গী থৌওং পাংথোকপশিং অসিনা মাই-পাক্লবদি, মখোয়শিং অদু মালেমগী মফম খুদিংদসু মাই-পাক্কনি।

মরূপশিং,

নখোয়না মসিমদি খঙলমগনি, মালেম অসিনা অইং-অশা হোংবগী শিংনবশিংগা ৱানা মায়োক্নরিঙৈ মতমগী মনুংদা, ভারতনা ইন্তর্নেস্নেল সোলার এলাইএন্স (আই.এস.এ.)গী ৱাখল্লোন হৌদোক্তুনা শিজিন্নবা হৌখি। ঙসিদি, মালেমগী অতোপ্পা লৈবাকশিংদা ভারতনা হৌদোকখিবা খোঙথাং অসিগা মরী লৈনরি। হৌজিক্তি মসিগী খোঙথাং অসি হেন্না মাং থানা পুবগী ঐখোয়দা থৌদাং লৈরবনি। ভারতকী অসিগুম্বা খোঙথাং অসিবু মাং থানা পুগদবা অমসুং ভারতকী শক্তাকপু হেন্না মপাঙ্গল লৈহনগদবা শেল য়াম্না চঙদবা, অকোয়বগা চান্নবা তেক্নোলোজী ঐখোয়না পুথোকপা ঙম্লোইদবরনে? ঙসিদি, ভারত অসি সোলার পাৱর য়ুনিৎ অমগী মমল য়াম্না তাথবা লৈবাকশিংগী মনুংদা অমা ওইরবনি। অদুবু, য়ুম্থোং খুদিংদা সোলার পাৱর য়ৌহনবগী মতাংদদি শিংনবা কয়া অমা লৈরি। ঐহাক্না মমাংদা হান্নসু হায়খিবনি মদুদি ঐহাক্না আই.আই.তি.গী মহৈরোয়শিংদা অমুক্তা খন্থবীয়ু, করিগুম্বা ঐখোয়না ক্লিন কুকিংগী ইহৌ অমা হৌরবা অমসুং মদুদা সোলারদা য়ুম্ফম ওইদুনা য়ুম্থোং খুদিংদা চাক থোংনবা অমসুং য়ুম্থোং খুদিংগী তঙাই ফদবা বেত্তরী অমা শাবা য়াবরা? ভারত্তা লৈরঙ করোর করোর ২৫ লৈ। য়ুম করোর ২৫দা লৈরঙ লৈ। করোর ২৫গী কৈথেলনি। মসিদা করিগুম্বা ঐখোয়না মাই-পাকপা ফংলবদি, ঐখোয়না ইলেক্ত্রিক গারীগীদমক্তা অহোঙবা বেত্তরী অমা থিরিবা অদু মসিদা ক্রোস সবসিদাইজ তৌবা য়াগনি। হৌজিক্তি, মসিগী থবক অসি আই.আই.তি. নহা ওইরিবা মহৈরোয়শিং নত্তনা কনানা তৌবা ঙমগনি। ভারতনা অকোয়বদা অকায়বা য়াম্না পীদবা, মতম কুইনা শিজিন্নবা য়াবা অমসুং মীয়াম্না য়াম্না লাইনা শিজিন্নবা য়াবা তেক্নোলোজী তঙাই-ফদবা লৈরে।

মরূপশিং,

দিজাজতর মেনেজমেন্ত হায়রিবা হীরম অসি মালেম্না ভারত্তা তমজনীংঙাই ওইনা য়েংবা হীরম অমনি। অচৌবা অৱা-অনা থোকপা মতমদা, পুন্সিদা নত্তনা ইনফ্রাস্ত্রকচরদসু অকায়বা য়াম্না পী। মসিগীদমক্তা ভারতনা য়ুনাইতেদ নেসন্সতা চহি ২গী মমাংদা কোএলিসন ফোর দিজাজতর রেজিলিএন্ত ইনফ্রাস্ত্রকচর – সি.দি.আর.আই. অমা লিংখৎনবা ৱাফম হৌদোকখি। মালেমগী লৈবাক কয়া অমসু মসিদা থৱাই য়াওরি, ভারতনা দিজাজতর মেনেজমেন্তকী মতাংদা ৱাজবা, ভারতকী অনিংবা-অপাম্বা অসিবুসু মশক খঙবীরি, মালেম ঙসিদি মসিবু তরাম্না ওক্লিবনি। অসিগুম্বা মতম অসিদা ভারতকী তেক্নোলোজী এক্সপর্তশিংনা দিজাজতর রেজিলিএন্ত ইনফ্রাস্ত্রকচরগী থৌওং পুথোক্তুনা মালেমগী ওইনা ৱারোইশিন করম্না পুরকসিগে হায়না খন্ন-নৈনরিবনি। লৈবাক অসিদা ঙসি অচৌবা-অপিকপা য়ুম শারিবা, বিলদিং কয়া শারিবা, মখোয়শিং অসিবু ঐখোয়না তেক্নোলোজী শিজিন্নদুনা দিজাজতর থোকহন্দনবা মতৌ করম্না হোৎনসিগে হায়না ঐখোয়না ঙসি খন্নগদবনি। চাউর-চাউরবা থোং কয়া শারি। অকনবা নোংলৈ-নুংশিৎ অমা লাকপদা, পুম্নমক অকায়-অতোয় নংই। ঐখোয়না হন্দক উত্তরাখন্দদা করি থোকখি হায়বা উরে। ঐখোয়না মতৌ করম্না অসিগুম্বা ঙাকথোকপগী পথাপ পুথোক্কনি।

মরূপশিং,

গুরুদেব তেগোরনা অসুম্না হায়বীরম্মি- “নখোয়গী লৈবাকপু ফংজবা হায়বসি নখোয়গী থৱাইবু পাক-চাউবা মওংদা খঙজবা হায়বনি। ঐখোয়না ঐখোয়গী ৱাখল্লোন, থবক অমসুং সেবাগী খুত্থাংদা ইশাগী লৈবাকপু শেমগৎপা মতমদখক্তা, ঐখোয়না ঐখোয়গী লৈবাক্তা ইশাগী থৱাই উবা ফংগনি”। ঙসিদি, খরগপুরগা লোয়ননা লৈবাক অসিগী আই.আই.তি.গী নেৎৱর্ক খুদিংনা মখোয়গী থৌদাং হেনগৎলগনি হায়বগী থাজবা লৈরে। নখোয়দি হান্নদগী হৌনা মসিগী মতাংদা পাক চাউরবা ইকোসীস্তেম অমা ওইরবনি। অদুবু, ইন্দস্ত্রী ৪.০গীদমক্তসু, মফম অসিদা অনৌবা থৌওং পাংথোকপদা মিৎয়েং চঙলি। এ.আই.গা মরী লৈনবা একাদমিক রিসর্চপু ইন্দস্ত্রীগী থাক্তা পুরক্না নখোয়না য়াম্না কন্না হোৎনরি। ইন্তর্নেৎ ওফ থিংস ওইরো, মতমগা চান্নবা য়ুম শাবগী তেক্নোলোজী ওইরো, মসিদা নখোয়না পাংথোক্লিবা থবকশিং অসি য়াম্না থাগৎনীংঙাই ওইরি। কোরোনাগা লান্থেংনবদসু নখোয়না পুথোকখিবা সোফৱেয়র অসিনা লৈবাক অসিদা য়াম্না তেংবাংখি। হৌজিক্তি নখোয়না হেল্থ তেক্নোলীজীগী মতাংদা ফ্যুচুরিস্তিক সোল্যুসন পুরক্নবা থবক কয়া অমসু খোঙজেল থুনা পাংথোক্কদবনি। হৌজিক ঐহাক্না হকশেলগী মতাংদা পনবা অসিদা, দেতা, সোফৱেয়র অমসুং হার্দৱেয়র খক্তগী ৱাফম পনবা নত্তে, ঐহাক্না পল্লিবা অসি ইকোসীস্তেম অমগী মতাংদনি। ঙাকথোকপগী হৌদুনা মাই-পাক্না লাইয়েংবা ফাওবগী ওইনা ঐখোয়না লৈবাক অসিদা মতমগা চান্নবা ৱারোইশিন পীগদবনি। কোরোনাগী মতম অসিদা ঐখোয়না পর্সনেল হেল্থকেয়র ইক্বিপমেন্তকী মতাংদা অচৌবা কৈথেল অমা লৈরকপা উরে। মীয়াম্না অহানবদা থর্মোমীতর অমসুং তঙাই-ফদবা হিদাকশিংদি য়ুমদা থম্নরম্মি, অদুবু হৌজিক্তি ব্লদ প্রেসর, শুগর, ব্লদ ওক্সিজেন ফাওবা চাংয়েং তৌনবা খুৎলায়শিং য়ুম্থোং খুদিংদা লৈনরে। হেল্থ অমসুং ফিৎনেসকা মরী লৈনবা খুৎলায়শিং অসি য়ুমদা লৈবগী মশিং হেনগৎলক্লি। ভারতকী মনুংদা পর্সনেল হেল্থকেয়রগী খুৎলাইশিং অসি লায়না লৈবা ঙমহন্নবা, মসিগী মতাংদা মরু ওইবা ই-পাউ পীবা ওইরো, মসিগী ওইনসু ঐখোয়না তেক্নোলোজীগী তেংবাং লৌদুনা অনৌবা ৱারোইশিন পুথোকপা তাবনি।

মরূপশিং,

কোরোনাগী মতুংদা লৈরকপা তঙাই ফদবা খুদোংচাবশিং অসিদা ভারত অসি মালেমগী ওইনা সাইন্স, রিসর্চ, তেক্নোলোজী অমসুং ইন্নোভেসন্দা অচৌবা থৌমী অমা ওইবা য়ারিবনি। মসিগী ৱাখল্লোন অসিগা লোয়ননা, হন্দক্কী চহিগী বজেত্তা সাইন্স অমসুং রিসর্চকীদমক্তা খুদোংচাবা কয়া অমা পীরি। পি.এম. রিসর্চ ফেলো স্কিমগী খুত্থাংদগী অদোমগুম্বা হৈ-শিংলবা মরূপশিংগীদমক্তা রিসর্চ তৌনবা অনৌবা খুদোংচাবা কয়া অমা লৈরে। নখোয়গী ৱাখল্লোনশিংবু থবক ওইনা পাংথোক্নবগীদমক্তা স্তার্ত-অপ ইন্দিয়া মিসন্দগী নখোয়দা তেংবাং য়াম্না ফংলগনি। হৌখিবা নুমিৎ খরনিগী মমাংদসু, য়াম্না মরু ওইবা পোলিসী অমদসু শেমদোকখ্রবনি। মসিগী মতাংদা ঐহাক্না খরা কুপ্না হায়নিংই। সরকারনা মেপ অমসুং স্পেসিএল দেতাদা লৈরম্বা কন্ত্রোল অদু হৌজিক লৈত্রে। মসিগী খোঙথাং অসিদগী তেক স্তার্ত-অপ ইকোসীস্তেমদসু মপাঙ্গল য়াম্না হাপ্লগনি, আত্মানির্ভর ভারতকী খোঙথাংগী খোঙজেলসু হেন্না য়াঙশিল্লগনি অমসুং লৈবাক অসিগী নহা ওইরিবা স্তার্ত-অপশিং অমসুং ইন্নোভেতরশিংদসু নৌহৌননা অমুক মনিং-মখা তমহল্লগনি।

মরূপশিং,

ঐঙোন্দা পাউদমখিবগী মতুং ইন্না নখোয়না জীমখানাদা খুন্নাইগী, সংস্কৃতীগী, স্পোর্তকী অমসুং অতোপ্পা থবক-থৌরম কয়াদা থৱাই য়াওনা শরুক য়াই হায়রি। মসি য়াম্না মরু ওইবনি। ঐখোয়গী ৱাখল অসি ঐখোয়না হৈজবা হীরম অদুগী মনুংদা খক্তা লৈহনবা য়াদে। ঐখোয়গী লৌশিং অমসুং মিৎয়েং অসি পাকথোক চাউথোক্কদবনি। অনৌবা নেস্নেল এজুকেসন পোলিসী অসিদসু মসিগীদমক্তা মলতি দিসিপ্লিনরী এপ্রোচ অমা হাপ্লিবনি। মসিগী হীরম অসিদা আই.আই.তি. খরগপুরনা হান্নদগী হৌনা থবক তৌবা হৌবা অসিদা ঐহাক্না য়াম্না হরাওবা ফাওজৈ। ঐহাক্না আই.আই.তি. খরগপুরবু অতোপ্পা ৱাফম অমগীসু থাগৎকনি। নখোয়না নখোয়গী তুংগী পুন্সিবু, অরিবা লৌশিংবু তুংদা পাংথোক্কদবা অনৌবা থৌওংগী পাঙ্গল হাপ্নবা থিজিল্লিবা অসি য়াম্না থাগৎনীংঙাইনি। নখোয়না বেদদগী হৌদুনা উপানিশদ অমসুং অতোপ্পা অইবা লাইরিকশিংদা য়াওরিবা লৌশিং কয়া অসিদসু নখোয়না ইম্পিরিকেল স্তদীগীদমক্তা খুমাং চাউশিন্দুনা পুক্নিং থৌগৎলি। মসিগীদমক্তা ঐহাক্না নখোয়বু ইকায় খুম্নজরি।

মরূপশিং,

হন্দক্কী চহিসিদা লৈবাক অসিনা নিং-তম্বগী চহি ৭৫ ফাওরগনি। আই.আই.তি. খরগপুরগী ওইনা মসিগী চহি অসি য়াম্না মরু ওই মরমদি মসিগী মফম, মসিদা নখোয়না লৈরিবা, নখোয়না নখোয়গী পুন্সিবু অনৌবা মাইকৈ অমা পীরিবা, অসি নিং-তম্বগী লানগা নক্নবা মরী লৈনখি। মসিগী মফম অসিনা ইহৌ অসিগী নহা ওইরবা অথৌবা কয়া, তেগোর অমসুং নেতাজী সুভাস চন্দ্র বোসনা পাংথোক্লম্বা নীংথিরবা থবকশিং উখ্রিবনি। ঐহাক্না নখোয়দা হায়জনিংবদি, হৌখিবা চহি ৭৫দা আই.আই.তি. খরগপুরদগী থোকখিবা অনৌবা থৌওংশিংবু খোমজিনবীয়ু। মদুবু লৈবাক অমসুং মালেমদা খঙহল্লু। হৌখিবা থৌদোকশিং অসিনা লাক্কদৌরিবা চারোন-শুরোন্দা ইথিল পীগনি, নহাশিংদা মশাবু থাজহনগনি। মশাদা থাজবগা লোয়ননা, মাং থানা চৎপা ঙমগনি, লৈবাক্কী অপাম্বশিংবু কৈদৌনুংদা কাওথোকহল্লোই। লৈবাক্কী অপাম্বা অসিনা নখোয়গী শক্তাক্নি। মসিগী শক্তাক অসি ফক্লাংদা থেৎনবখক্তা নত্তে, নখোয়গী কেরিয়র শেম্নবগীদমক্তা নত্তে। ঙসি নখোয়না সর্তিফিকেৎ ফংলিবা অসি লৈবাক অসিগী মীওই করোর ১৩০গী অপাম্বগী পরিং অমনি। ঐহাক্না নখোয় খুদিংবু ঙসিগী নুংঙাইরবা থৌরম অসিদা য়াইফ পাউজেল পীজরি। নখোয়গী ইমা-ইপানা নখোয়দা থাজবা থম্লিবা, নখোয়গী ওজাশিংনা নখোয়গীদমক্তা হোৎনখিবা, মখোয়শিং অসিনা নখোয়গী হোৎনজম, পুন্সিগী খোঙচৎ অমসুং নখোয়গী মঙলানশিংদা অপেনবা পীগনি। মসিগী থাজবা অসিগা লোয়ননা, নখোয় খুদিংদা মাই পাকপগী য়াইফ পাউজেল পীজরি। পুম্নমকপু থাগৎচরি।

*****