Speaking at the India-Australia Circular Economy Hackathon Award Ceremony. https://t.co/nM1wYCQNQg

— Narendra Modi (@narendramodi) February 19, 2021

মরুপশিং,

হৌখিবা চহিগী জুন থাদা প্রধান মন্ত্রী মোরিসন অমসুং ঐহাক্না সর্ক্যুলর ইকনোমীদা হেক্কাথোন অমা পাঙথোক্নবগী ওইথোকপা লৈবরা হায়না খন্নখি।

ঐখোয়গী ৱাখল্লোন অদু অথুবদা মঙ ফাওনবা ঙমখিবা অসিদা ঐহাক্না নুংঙাইবা পোকই।

ঐহাক্না ঐগী মরু প্রধান মন্ত্রী স্কোৎ মোরিসননা অপুনবগী থৌরাং অসিদা মহাক্কী মতেং পীরকখিবগীদমক থাগৎচরি।

ঐহাক্না শরুক য়ারিবা পুম্নমক্না কোবিদ-১৯ লাইচৎ লৈরবসু মখোয়না শরুক য়াখিবা অসিগীদমক থাগৎলি।

ঐঙোন্দদি নখোয় পুম্নমক অথোইবা ঙাক্তনি।

মরুপশিং,

অইং-অশাগী অহোংবনা মরম ওইরগা মীওইবা খুন্নাইনা থেংনরিবা খুদোংচাদবশিং অসি য়েংলগা হেক্কাথোন অসিগী হিরম অসি মালেম পুম্বগী মরী লৈনৈ।

কঞ্জুম্পসন-ওরিয়েন্তেদ ইকনোমিক মোদেলশিংনা ঐখোয়গী গৃহদা চাউনা অকাইবা অমা পীরি।

ঐখোয়না কাওরোইদবদি মালেম ইমানা পীরিবা পুম্নমক অসিগী মপু ঐখোয় খক্তা নত্তে, ঐখোয়দি শুপ্নগী তুংদা লাক্কদৌরিবা চারোনশিংগী ত্রস্তীশিং ‌ওইবা খক্তনি।

ঐখোয়গী পোৎ পুথোকপগী থৌওং অসি হেন্না কান্নবা ওইহনবা অমসুং পোলুসন থোকহনবা হন্থহনবা খক্তনা য়ারোই।

কনাগুম্বনা গারি থৌবা মতমদা য়াংগেরা নত্ত্রা তপকেরা করিগুম্বা মাইকৈ অদু লাল্লবদি অরানবা মফমদা থুংগনি।

অমসুং ঐখোয়না অচুম্বা মাইকৈদা চংশিনবা তাই।

ঐখোয়গী কঞ্জুম্পসন পেত্তর্নশিং অসিদা মীৎয়েং চংবা অমসুং মখোয়না অকোইবগী ঈশিং-নুংশিৎকী ফীভমদা থোকহল্লিবা অকাইবা অসি করম্না হন্থহনগনি হায়বা অসি ঐখোয়না য়েংশিনবা মথৌ তাই।

মসিদগী সর্ক্যুলর ইকনোমীগী ৱাখল্লোন অসি লাকখি।

মসিনা ঐখোয়গী শিংনবা কবা অসি কোকহন্নবা মরু ওইবা খোঙথাং অমা ওইবা য়াই।

পোৎচৈশিং রিসাইকল তৌবা অমসুং অমুক হন্না শিজিন্নবা, অমোৎপা লৈহন্দবা অমসুং রিসোর্স ইফিসেন্সী হেনগৎহনবা হায়রিবা অসি ঐখোয়গী পুন্সি মহিংগী শরুক অমা ওইহনগদবনি।

হেক্কাথোন অসিদা ভারতকী অমসুং অস্ত্রেলিয়াগী মহৈরোইশিং, স্তার্তঅপশিং অমসুং ওন্তোপ্রিনোরশিংদগী ইন্নোবেতিব সোল্যুসনশিং উবা ফংখি।

মসিগী ইন্নোবেসনশিং অসিনা নখোয়না সর্ক্যুলর ইকনোমীগী ৱাখল্লোন অসিগীদমক হোৎনরি হায়বা উৎলি।

নখোয়গী ইন্নোবেসনশিং অসিনা পীবা ইথিনা লৈবাক অনিনা সর্ক্যুলর ইকনোমী সোল্যুসনশিং পুরকপদা মাংজিল থাহল্লগনি হায়না ঐহাক্না চিংনবা লৈতনা থাজবা থম্মি

অমসুং মসিগীদমক ঐখোয়না হৌজিক ৱাখল্লোনশিং অসি চাউখৎহন্নবা অমসুং ইনক্যুবেৎ তৌনবা লম্বীশিং খঙদোক্নবা হোৎনবা তাই।

মরুপশিং,

অনৌবা ৱাখল্লোনশিং অমসুং ইন্নোবেসনশিংদা মাং থানা চংশিনবা অমসুং শিংনবা মায়োক্নবা ঙম্বা অসিদগী নহারোলশিংনা শক্তি ফংগনি।

ঙসিগী নহারোলশিংনা হেক্কাথোন অসিদা থৱায় য়াওনা শরুক য়ারিবা অসিনা ভারত অমসুং অস্ত্রেলিয়াগী মরক্তা লৈরিবা মপাং ওইবগী মরী অসি ফগৎলক্লি হায়বগী খুদম অমনি।

ঐহাক্না ঐখোয়গী নহারোলশিংগী থৌনা-লিংজেল, হৈ-শিংবা অমসুং অনৌবা ৱাখল্লোনশিং পুথোরক্কনি হায়বগী মপুং ফানা থাজবা লৈ।

মখোয়না ঐখোয়গী লৈবাক অনি অসি খক্তা নত্তনা মালেম পুম্বদা সস্তেনেবল, হোলিস্তিক ওইবা সোল্যুসনশিং ফংহল্লগনি।

ভারত-অস্ত্রেলিয়াগী অচেৎপা মপাং ওইবগী মরী অসিনা কোবিদ মতুংগী মালেম শেমগৎপদা মরু ওইবা থৌদাং অমা লৌরগনি।

অমসুং ঐখোয়গী নহারোল, ঐখোয়গী নহা ওইরিবা ইন্নোবেতরশিং, ঐখোয়গী স্তার্তঅপশিং অসিনা মপাং ওইবগী মরী অসিদা মাং থারগনি।

থাগৎচরি!

য়াম্না থাগৎচরি!

*****