দোনরগী রাজ্য মন্ত্রী(মনিংতম্বা), পি.এম.ও, পর্সোনেল, পব্লিক গ্রিভান্সেস, পেন্সন্স, এতোমিক ইনর্জি অমসুং স্পেসকী রাজ্য মন্ত্রী দোক্তর জিতেন্দ্র সিংহনা হায়খি কেন্দ্রগী বজেত ২০২১-২২দা প্রধান মন্ত্রীগী পান্দম ‘অপীকপা সরকার, অচৌবা লৈঙাক”কী মমি ফজনা তারে। মেদিয়াদা ৱা ঙাংবদা মহাক্না হায়খি মিৎয়েং শানবা বজেত অসিগী য়ুম্বী তরুক্কী মনুংদা অমা ওইনা, অপীকপা সরকার, অচৌবা লৈঙাক্কী মরুওইবা ৱাখল্লোনশিং অমা ওইনা বজেত অসিনা অওনবশিং পুরক্নবা থৌরাং তৌরে। মসিগী থৌনা অসিদা য়াম্না য়াংনা অচুম্বা ৱায়েল পুরক্নবা হৌখিবা চহি খর অসিদা ত্রাইবুনেলশিংদা অওনবশিং পুরক্নবা খোঙথাং কয়া লৌখৎলে অমসুং ত্রাইবুনেলশিংগী থবকশিং মরম চানা পাংথোক্নবা মখা তানা থবকশিং পায়খৎনবা বজেত অসিদা খন্নরে।

মিনিস্তরনা মখা তানা হায়খি সরকার নত্রগা সি.পি.এস.ইশিংগা লোয়ন্না থবক তৌমিন্নরিবশিং লাইনা ললোন-ইতিক পাংথোকপা য়ানবা অমসুং য়ানদবশিং য়ানবা পুরক্নবা অমসুং লনাই ইনভেস্তরশিং অমসুং কন্ত্রেক্তরশিংগী থাজবা লৈহন্নবা থৌরাং অমা পায়খৎনবা ৱাফম বজেত অসিদা য়াওরে।

হৌখিবা চহি ৬-৭ অসিদা পর্সোনেল অমসুং ত্রেনিং দিপার্তমেন্ত অমসুং এদমিনিস্ত্রেতিপ রিফোর্মস অমসুং পব্লিক গ্রিভান্সেস দিপার্তমেন্তনা পায়খৎখিবা অফবা থবকশিংগী মতাংদা দোক্তর জিতেন্দ্রনা হায়খি ভারত্তা লৈবাক ঙাকপগী লমদা অহোংবা পুরক্নবা শিংথানিংঙাই ওইবা ৱারেপ খর লৌখ্রে। ২০১৪দা মোদী সরকার লাক্লবা মতুংদা খুদক্তা গেজেতেদ ওফিসার অমনা এত্তেচ তৌদনা সর্তিফিকেতশিং মশা-মরোমদোম এত্তেচ তৌবা য়ানবা ৱারেপ লৌখ্রে।

কাংলুপ খরগী ওইনা সরকারগী থবক লৌবদা ইন্তরভিয়ু পাংথোক্তনবা, মখোয় মখোয়গী রাজ্যশিং/য়ু.তি কেদরশিংদা চৎত্রিঙৈ মমাংদা অনৌবা আই.এ.এস ওফিসারশিং কেন্দ্র সরকারদা থা ৩ থবক তৌনবা, শেন পীরিবা মীওই অদু চৈরাক পীনবা প্রিভেন্সন ওফ করপসন এক্ত,১৯৮৮ শেমদোকপা, সরকারগী থবক তৌবা নুপাশিং অঙাং শেন্নবা ছুতি পীবা, সরকারগী থবক তৌবা নুপীশিংগী অঙাং উনবগী ছুতি হেনগৎহনবা, মপামদা হল্লক্লবী মচানুপীশিংগী ফেমিলি পেন্সন পীবা, পেন্সন্নরশিংগী দিজিতেল লাইফ সর্তিফিকেত হৌদোকপা, সি.পি.জি.আর.এ.এম.এস পোর্তেল হৌদোকপা, পি.এম এক্সলেন্স এৱার্দশিং শেমদোকপা, লাল বহাদুর সাস্ত্রি নেসনেল একাদেমি ওফ মুসোরিগী সেল্লেবস শেমদোকপা অসিনচিংবা পাংথোক্নবা ৱারেপ লৌরে।

দোক্তর জিতেন্দ্রনা হায়খি ২০২০গী অগস্ত অমসুং সেপ্তেম্বর থাশিংদা পুৱারি ওইরবা মরুওইবা ৱারেপ অনি লৌখ্রে। অহানবা ৱারেপ অমা ওইনা, ওফিসার অমনা পায়খৎপা অনৌবা থবক খুদিংমক দিজিতেল ওইনা থৌরাং তৌবা অমসুং চুনবা থবক অমগী চুনবা ওফিসার সাইন্তিফিক ওইনা ওথোরিতিশিংনা খন্নবা “মিসন করাময়োগী”না পান্দম থম্লি। অনিশুবা ৱারেপ্তা লৈবাক শীনবা থুংনা থবক থিরিবা মীওইশিং চপ মান্নবা খুদোংচাবা ফংনবা কমন ইলিজিবিলিতি তেস্ত(সি ই তি) পাংথোক্নবা নেসনেল রিক্রুইতমেন্ত এজেন্সি(এন আর এ)লিংখৎপা য়াওরি।

*****